मत्ति 16
16
भारभुसाइका काम तिम्पा दोअ्का
(मर्कुस ८:११-१३; लुका १२:५४-५६)
1आधे फरिसिगेलाइ रो सदुकिगेलाइ लोतेङ इसुहेङ जाच पालि सादेलसो एलोङ भारभुसाइका चिनो तिम्पालि वाकोदोफा काथा ताअ्हि।#मत्ति १२:३८; लुका ११:१६ 2कालाउ बुङ वा एम्बालाइहेङ जावाफ पिहि, “बेला दुबेलि तोम्लाउ नेलाइ दोअ्स्वाना, ‘आदेल इका जेङका हि हाइपानु जुम्नि रेम्का दिना जेनाङ।’ 3र्हिमाचाहिँ नेलाइ दोअ्स्वाना, ‘नानि दुमभेर्मा ल्वाङ हाइपानु आदेल इका बादेल थुम्का हि।’ नेलाइ आदेलहेङ खान्तेङ दिना हिसिका ज्याङ खेङलि गेसुखेना। कालाउ बुङ नानि जुम्नि हाइ जेङदोङखे दोअ्तेङ याको माने खेङलि मादोस्वाना। 4खान्धुरसो दुरे जेङका आसाति खालको द्याङगेलाइ खिनिङ इसिका भारभुसाइका काम खाङलि भोखे। कालाउ बुङ इदोइ खालको द्याङगेलाइ आगाधुइका योनाको ज्यानता घाटिका भारभुसाइका कामबिना बो काम तिङलि मानिनावा।” इङकोन्हुअ्सो इसु एम्बालाइहेङ लाअ्तेङ इन्तासो हानेहि।#मत्ति १२:३९; लुका ११:२९
फरिसि रो सदुकिगेलाइको साउरि
(मर्कुस ८:१४-२१)
5चात्यागेलाइ चावान्दिओदोइपार थुकालिलोलाउ एम्बालाइ तोले चुमालि निलन्हाहि दोअ्तेङ गेहि। 6इसु एम्बालाइहेङ दोअ्हि, “होस पासु, फरिसि रो सदुकिगेलाइको साउरिसो जोगितेङ हिसु!”#लुका १२:१ 7चात्यागेलाइ ताताइमिता दोअ्लि तेङहि, “केलाइ तोले माचुमान्हाहि इदोइखातिर वा एसा दोअ्का वाला।” 8इसु इदोइ गेतेङ दोअ्हि, “खोइ कुनु नेलाइको खान्धुर? नेलाइदोसा तोले मान्थु दोअ्तेङ हाइपालि ताताइमिता सावालजावाफ पासुखेना? 9हाइ नेलाइ एला बुङ मागेसुखेना? ना हाजार द्याङगेलाइहेङ ना लोङ तोलेहोइ चापाका काथा नेलाइहेङ फोममान्थु? नेलाइ हेअ् डालो जोम्पाका हिघासुन्हा?#मत्ति १४:१७-२१ 10कालाउ न्हिअ् लोङ तोलेहोइ द्या हाजार द्याङगेलाइहेङ चापातेङ हेअ् डालो नेलाइ जोम्पाका हिघासुन्हा?#मत्ति १५:३४-३८ 11का नेलाइहेङ तोलेको बारेता दोअ्का माको दोअ्तेङ नेलाइ हाइपालि मागेसुखेना? कालाउ बुङ फरिसि रो सदुकिगेलाइको साउरिसो होसपातेङ हिसु।” 12कालाउ एम्बालाइ गेहि, वा तोलेको साउरिसो माको कालाउ बुङ फरिसि रो सदुकिगेलाइको बिद्यासो जोगितेङ हिलि दोअ्का हिघाहि।
इसु हासु हि?
(मर्कुस ८:२७-३०; लुका ९:१८-२१)
13इसु कैसरिया फिलिप्पिको माउजाता थुकालिलोकान्हुअ्सो, वा ताइको चात्यागेलाइहेङ हिअ्हि, “द्याङगेलाइ का द्याङको चानहेङ हासु एइ दोअ्तेङ दोअ्खे?” 14एम्बालाइ दोअ्हि, “आधेमि चिभुअ्लि पिका युहन्ना, आधेमि एलिया, आधेमि यर्मिया रो आगाधुइकालाइता हिदिङ एमि एइ दोअ्तेङ दोअ्खे।”#मत्ति १४:१-२; मर्कुस ६:१४-१५; लुका ९:७-८
15इसु एम्बालाइहेङ हिअ्हि, “नेलाइ हाइ दोअ्स्वाना, का हासु हिघा?” 16सिमोन पत्रुस दोअ्हि, “ना दोङ सिन्हुका परमेस्वरको चान ‘ख्रिस्ट’ हिन्हा।”#युहन्ना ६:६८-६९ 17इसु वासेहेङ दोअ्हि, “योनाको चान सिमोन, ना सहसाम्पा निङका हिन्हा। हाइदोनु द्याङसो नासेहेङ इदोइ तिम्पाका माको, कालाउ बुङ सादेलता हिका काङको परमेस्वर आबा तिम्पाका हि। 18का नासेहेङ दोअ्खा, एलासो नासेहेङ पत्रुस#१६:१८ पत्रुस जाइको माने “उन्ठुइ” जेङखे। दोअ्तावा। का काङको मन्डलि इदोङ उन्ठुइता बान्हायाङका रो पातेलको सरबङगेलाइ इङकोहेङ जितिलि माद्वावा। 19का नासेहेङ सादेलको सारभिको चाभिगेलाइ प्याङका। जेदोङ ना सुमिङता धेवाना, इङको सादेलता जिङन्हावा। जेदोङ ना सुमिङता खायाना, इङको सादेलता खाइन्हावा।”#मत्ति १८:१८; युहन्ना २०:२३ 20कालाउ इसु “का ख्रिस्ट हिघा दोअ्तेङ हासुहेङ मादोअ्लि” दोअ्तेङ ताइको चात्यागेलाइहेङ कारा हुकुम पिहि।
इसु ताइको सिकाको काथा दोअ्का
(मर्कुस ८:३१-३३; लुका ९:२२)
21इङको दिनासो इसु चात्यागेलाइहेङ हेतेङ गोताङ काथा दोअ्लि तेङहि। का यरुसलेमता हानाङका रो इन्ता आगुवागेलाइ, मुल धामिगेलाइ, धरममास्टरगेलाइसो हेन्जा तु: निङचाङका, सेअ्न्हाङका रो सुम्नि दिनाता आरोङ सिकासो सिन्हुतेङ ल्होपान्हाङका।
22इदोइ हिङतेङ पत्रुस वासेहेङ एपाहा चुमपुतेङ दोअ्हि, “परमेस्वर एसा जेङलि माप्याको, प्रभु, नासेहेङ इसिका हेअ्लाउ माज्याको।” 23कालाउ बुङ इसु पत्रुसभारि घुरितेङ दोअ्हि, “ओइ दियाबलस, काङको आगासो हाने, ना काङको भाअ्सिङ छेकाभाजि हिन्हा। हाइदोनु ना परमेस्वरको काथागेलाइता माको, कालाउ बुङ द्याङगेलाइको काथागेलाइता मन लागाइखेना।”
चात्या जेङलाउ लाअ्लि गोइका
(मर्कुस ८:३४-९:१; लुका ९:२३-२७)
24कालाउ इसु ताइको चात्यागेलाइहेङ दोअ्हि, “जाइ कासेहेङ पिताइलि लाल्सा पाखे पानु, वा ताइमिहेङ इन्ताना मार्याको रो ताइको कुरुस फातेङ कासेहेङ पितायाको#मत्ति १०:३८; लुका १४:२७ 25हाइपानु जाइ ताइको बायु बान्चेपालि खाङखे, इङको वा मुअ्पावा। कालाउ बुङ जाइ ताइको बायु काङको भाअ्सिङ मुअ्पावा, इङको वा निनावा।#मत्ति १०:३९; लुका १७:३३; युहन्ना १२:२५ 26गोताङ दुनिया निङलाउ बुङ ताइको बायु मुअ्पानु, द्याङहेङ हाइ लाभ ज्यावा? माकोनु द्याङ ताइको बायुको बादलाता हाइ पिलि द्वावा? 27हाइपानु का द्याङको चान ताइको आबाको प्रतापता ताइको सादेलचरगेलाइदोफा ल्वाङका। इङको पहर का गोताङ द्याङहेङ इङकोको काममाफिक नातिजा प्याङका।#मत्ति २५:३१; ले ६२:१२; रोमि २:६ 28जातिङको, का नेलाइहेङ दोअ्खा, इता जाअ्कालाइता हेअ्मि द्याङगेलाइ का द्याङको चानहेङ ताइको सारभिता लोतेङहिका मातिम्पाधाउ मास्यावा।”
Currently Selected:
मत्ति 16: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
