Mark 8

Jesus ehanai hasimaka nakama

(Mat 15.32-39)

1Vahola, keonohenua elahi ehapaa hakoa. Ia nakama la seisi naꞌai lakou meiꞌai. Ia kena Jesus uanaa aꞌe nakama kaukali aia la, kena ime aꞌe, 2“Anau ealoha keonohenua nei, maikinimea nakama nei enoho manau koukolu naaho hakoa, ia seisi naꞌai lakou meꞌai. 3Ame anau ehaunalia nakama hiꞌai la io i namakaꞌina lakou, alakama ameponia nosina i keala. Maikinimea alakama eo mai naꞌina emao.”

4Kena nakama kaukali la ume aꞌe Jesus, “Kakou umao haeꞌo ikaha ma namakaꞌina la. Kakou selavaa keko nahalaoa ikau kehanai keonohenua nei.”

5Ia Jesus eme aꞌe, “Ehia nahalaoa okou eisi na?” Nakama kaukali la eme aꞌe, “Kakou eisi kauhiku nahalaoa oia.”

6Kena Jesus ume aꞌe keonohenua la inoho ilalo. Kama la uko ehiku nahalaoa la, kena ihamaha i Keakua. Kena Jesus ukohikohi nahalaoa la iau aꞌe nakama kaukali aia la ivavae aꞌe i keonohenua la. 7Nakama kaukali la eisi nikamaiꞌa hoi. Kena Jesus eko naiꞌa la, kena ihamaha i Keakua. Kena kama la eme aꞌe nakama la ivavae aꞌe i keonohenua la. 8Keonohenua la eꞌai nopohu. Ia kena nakama kaukali la uhaele hanaopo nohao kauhiku naꞌeke namuli halaoa ekoe. 9Keꞌoina nakama eꞌai la ekae pela hasimaka nakanaka.*f9* Imuli keꞌai la, Jesus uhaunalia nakama la ivaꞌai i namakaꞌina lakou la. 10Saika la, kama la ma nakama kaukali aia la uꞌae kemonoui nohulo i keꞌina Dalmanutha.

NaFarasi eainoa aꞌe Jesus ihuli aꞌe namahi Keakua

(Mat 16.1-4)

11Kulana nakama la ekae aꞌe iuka, naFarasi la uo aꞌe nolahu aꞌe ia Jesus, “Poi aꞌoe hekama Keakua, huli aꞌe haꞌaku i namahi Keakua.” 12Ia Jesus ekipuaina, kena ime aꞌe, “Okea okou hakoa eainoa mai ihuli aku nahaꞌaku? Anau eme aku kehamaoni. Anau mesehuli aku haꞌaku la.”

13Kena Jesus ukiaꞌi naFarasi la, kena iꞌae iluna kemonoui la nohulo kelaa vahi kemoana la.

Lolosi hamakonu naoaꞌo esala

(Mat 16.5-12)

14Nakama kaukali la uo noꞌae iluna kemonoui la, ia eko halaoa hokahi oia. Nakama la usemanaku keko alahalaoa. 15Kena Jesus upolopolo aꞌe nakama la, “Lolosi hamakonu ke{iist} kela naFarasi ia ma ke{iist} kela kekuꞌu Herod.”

16Nakama kaukali Jesus la uhakauoki solakou imakino lakou kehakaꞌoko nakakala hulihuli nei, kena ikakala solakou, “Kakou sehihalaoa?”

17Jesus umakino hea nakama kaukali aia la ekakala, kena ime aꞌe nakama la, “Okea okou ekakala ma okou sehihalaoa? Okou seiꞌike ia seiailoa? Nahakaꞌoko okou oipouli. 18Okou eisi naꞌalemaka, ia seiꞌike. Okou eisi naakalina, ia selono. Okou semanaku hea anau nipena imua? 19Anau nikohikohi elima nahalaoa nohanai lima simaka nakama. Ehia napunaꞌeke epii namuli halaoa okou ekoe la?”

Kena nakama kaukali la ume aꞌe, “Sanahulu ma lua napunaꞌeke.”

20Kena Jesus ume aꞌe, “Anau nikohikohi ehiku nahalaoa nohanai hasimaka nakama. Kena okou ekoe ehia napunaꞌeke epii namuli halaoa?” Kena nakama kaukali la ume aꞌe, “Ehiku napunaꞌeke.”

21Kena Jesus ume aꞌe nakama la, “Okou niꞌike namea anau ehuli aku la, ia okou oisemakino.”

Jesus ekonaꞌi kama alemaka seni noꞌike

22Jesus ia ma nakama kaukali aia la ukae kemakaꞌina Bethsaida. Ia kena alakama kemakaꞌina la ehakaꞌi aꞌe kekama alemaka seni ia Jesus, kena iainoa aꞌe Jesus ihapili nalima aia iluna kama la. 23Kena iko Jesus ihakaꞌi kama alemaka seni la ikaha ma kemakaꞌina la, kena isavale iluna naꞌalemaka kama la. Kena Jesus ehakili nalima aia iluna naꞌalemaka kama la, kena ime aꞌe, “Aꞌoe uꞌike?”

24Kama la uꞌila aꞌe, kena ime aꞌe “Ino. Anau uꞌike nakama ehahaele, ia nakama la ehau poi nilaꞌau nanaue.”

25Kena Jesus uhakili aꞌe halaoi nalima aia iluna naꞌalemaka kama la. Kena kama la ukoꞌa hamakonu naꞌalemaka aia, ia kena uꞌike laoi namea hakoa, ehau poi aia niꞌike imua la. 26Jesus ehaunalia kama la ivaꞌai i hale, kena ime aꞌe kama la, “Aꞌoe isehaele valoko kemakaꞌina la.”

Peter eme aꞌe Jesus, “Aꞌoe o keMesaea”

(Mat 16.13-20; Luk 9.18-21)

27Jesus ia ma nakama kaukali aia la uo i namakaꞌina kapili aꞌe Caesarea Philippi. Keualoko nakama la nio, Jesus eme aꞌe nakama kaukali aia la, “Ea? Keonohenua la emakino oai anau? Nakakala lakou la emea pehe?”

28Nakama kaukali la eme aꞌe “Alakama ekakala maꞌoe John Baptist. Alakama emea maꞌoe Elijah. Ia alakama hoi emea maꞌoe hekama hakae nakakala Keakua.”

29Kena Jesus evasili aꞌe nakama la, “Ia okou emea ma oai anau?” Kena iko Peter ime aꞌe, “Aꞌoe o keMesaea.”

30Ia Jesus epui aꞌe nakama kaukali aia la isehaꞌali aꞌe alakama pela aia o keMesaea.

Jesus ukakala kemake aia

(Mat 16.21-28; Luk 9.22-27)

31Kena Jesus uꞌamaka noaoaꞌo nakama kaukali aia la, “Ke{kama ekipu kama} meikili komaꞌi nahalono lihu. Nakama hamakua na{Jiu}, ia namaakua hamakua, ia ma nakama epolopolo nakuaa la, nakama la hakoa mesehihai ke{kama ekipu kama}. Kena nakama la mekaa kama la nomake. Ia imuli ekolu naaho, kama la meiola muli.” 32Jesus ekakala hamakahua kehakaꞌoko aia la. Kena Peter uhakaꞌi Jesus i kevahi, kena ihai aꞌe kama la.

33Kena Jesus uhakiꞌe aꞌe noꞌike nakama kaukali aia la, kena ihai aꞌe ia Peter, “Haele ikaha manau, Satan. Maikinimea aꞌoe sehakaꞌoko nakipukipu Keakua, aꞌoe ehakaꞌoko nakipukipu nakama oia.”

34Kena Jesus uanaa aꞌe keonohenua la, ia ma nakama kaukali la io aꞌe, kena ime aꞌe, “Poi hekama hihai ikaukali mai anau, kama na ikiaꞌi namea aia hihai, uhapili {kolosi} aia, kena ukaukali mai anau. 35Oai kekama ehakekele ilolosi kanaola, meilano keola hamaoni. Ia oia kekama eaunahie kekiaꞌi keola aia nokaukali mai anau, kena ihakina kelono kaualeꞌa la, kama la meiko keola hamaoni la. 36Ame sekonu pela hekama ihakau namea hakoa i kemaalama nei, ia ulano keola hamaoni. 37Kama la selavaa kesui muli keola aia.

38“Komaꞌi nakama saꞌino i kemaalama nei sehalono Keakua. Ia kena alakama emakaꞌu nakama saꞌino la, ia enapa i anau, ia enapa i nakakala anau la hoi. Ia ke{kama ekipu kama} meivaꞌai iho ma namahi Kamana aia la, ia ma na{enselo} ekapu. Vahola, {kama ekipu kama} meinapa i nakama la hoi.”

Currently Selected:

Mark 8: ojv

Highlight

Copy