Mark 6

Nakama i Nazareth sehamaha Jesus

(Mat 13.53-58; Luk 4.16-30)

1Jesus ehaele ikaha ma kemakaꞌina la, kena ihaele ma nakama kaukali aia la i kemakaꞌina aia la. 2I keaho kapu, Jesus eaoaꞌo iloko hale loku. Nakama kela ehalono la emasalo i nakakala Jesus la, kena ivasisili solakou, “Kama nei eailoa nahakaꞌoko la pehe? Kama nei emakonu lo, kena elavaa kehuli aꞌe namahi Keakua. 3Kena hekama hakuku nahale oia, hekama Mary. Seai la? Ia kama nei hekaina James, Joses, Judas lakou ma Simon. Naꞌave aia la enoho inei hoi.” Kena keonohenua la emasalo haeꞌo i nakakala Jesus la.

4Kena Jesus eme aꞌe nakama la, “Nakama naꞌina hakoa ehamaha kekama kela ehakae nakakala Keakua. Ia alakama sehamaha i aia. Ala nikama kemakaꞌina aia, nakama keꞌaha aia, ia ma alakama haleaina aia la hoi.”

5Ia kena Jesus selavaa kehuli aꞌe namahi Keakua ilaa. Ia niaina, kama la ehapili nalima aia iluna nikamaa kama elavea la nokaualeꞌa. 6Ia Jesus emasalo haeꞌo hoi, maikinimea nakama la sehakina.

Jesus ehaunalia sanahulu ma lua nakama heheaꞌu

(Mat 10.5-15; Luk 9.1-6)

Kena Jesus uhaele noaoaꞌo i namakaꞌina ekapili aꞌe la. 7Kama la eanaa aꞌe sanahulu ma lua nakama heheaꞌu aia la noꞌuku hakoa, kena iau aꞌe nakama la namahi iluna nakipua saꞌino, kena ihaunalia nakama la kai koꞌolua. 8Jesus epolopolo aꞌe nakama la ma, “Kulana okou eo, okou iseko naꞌai, seko namuliopu, ia seko nasileni. Emeia okou iko nilaꞌau hahaele oia. 9Okou elavaa kehahao nakapuae, ia ko keauꞌahu hokahi oia.”

10Kena Jesus eme aꞌe hoi, “Keualoko okou ekaꞌa iloko hale, noho inaa, ikae keualoko okou meo ikaha ma kemakaꞌina la. 11Ia poi nakama kemakaꞌina na sehihai iko okou, ia sehihalono nakakala okou, kaꞌa ikaha ma kemakaꞌina la. Okou ukaikahi namuli vae okou, iailoa nakama la pela lakou esala.”

12Kena nakama heheaꞌu Jesus la uo nokaukaꞌu pela, “Okou ikiaꞌi nahaisala okou.” 13Nakama la ehakui komaꞌi nakipua ikaha, kena amusi komaꞌi nakama lavea kelo hala nokaualeꞌa.

Kemake kela John Baptist

(Mat 14.1-12; Luk 9.7-9)

14Kekuꞌu Herod ulono hea Jesus epena la, maikinimea kelono nakipukipu Jesus la upalalaha i nakama hakoa. Kena alakama eme aꞌe ma, “Kela John Baptist. Kama la uola muli. Kela hea kama la elavaa kehuli aꞌe namahi aia.”

15Ia alakama emea ma, “Kela Elijah!” Ia alakama emea ma, “Kama la ehakae nakakala Keakua, ehau poi alakama nihakae nakakala Keakua imua.”

16Ia keualoko Herod elono nakakala la, kama la eme aꞌe penei, “Kena John Baptist! Anau nime aꞌe napulepule anau la io nosepe keua kama la. Ia kena kama la uola muli na!”

17-18Kemenei esala mai imua, pela Herod eailalao noꞌavana Herodias, keꞌavana kaina aia la, Philip. Ia kena John Baptist eme aꞌe Herod penei, “Sekonu pela aꞌoe iko keꞌavana kaina aꞌoe na.” Kena Herod ume aꞌe napulepule aia la ikaohi John Baptist usaisai, kena upono kama la iloko kelokapu.

19Herodias uliloko haeꞌo John Baptist, ia kena hihai ikaa kama la imake. Ia Herodias uselavaa, 20maikinimea Herod emakaꞌu kekaa John. Herod ehakaꞌoko pela John ame hekama ekonu kahi, hekama ekapu. Kena Herod elolosi hakaualeꞌa John, ia ehalolono nakakala kama la.

21Herod epena keꞌai ma napalekuꞌu, napulepule aia la, ia ma nakama hamakua Galilee, pela imanaku keaho kela aia nimamaoha la. Kena Herodias ekuꞌu saika la ikaa John imake. 22Ia kena, kaupu Herodias uhaele iho nolulue imua nakama la. Ia Herod ia ma nakama hamakua aia la hihai kelue kaupu la.

Kena Herod eme aꞌe kaupu la, “Ainoa mai hemea pehe aꞌoe hihai, kena anau meau aku maꞌoe.” 23Kena Herod ukakala hamaoni aꞌe kaupu la pela, “Hemea pehe aꞌoe ainoa mai, anau meau aku maꞌoe. Niaina aꞌoe eainoa mai hevahi keukuhenua anau nei.”

24Kena kaupu la uhaele imakaaho novasili aꞌe kina aia la, “Anau meiainoa aꞌe kea?” Kena kina aia la eme aꞌe, “Me aku, aꞌoe hihai pohoulu John Baptist.”

25Kena kaupu la uvaꞌai vave nome aꞌe Herod, “Vahonei oia, anau hihai aꞌoe ipale mai pohoulu John Baptist la iloko {pesoni}.”

26Ia kena Herod ualoha haeꞌo. Ia kama la uselavaa keꞌalo, maikinimea nakama hamakua aia la hakoa ulono nakakala haimahi aia. 27Saika la ia, Herod ehaunalia pulepule iko aꞌe pohoulu John Baptist. Ia kena pulepule la uhaele iloko kelokapu nosepe keua John Baptist nosopo. 28Kena pulepule la eko pohoulu John la nohao iloko {pesoni}, ihoꞌi aꞌe kaupu la. Kena kaupu la eko noau aꞌe kina aia la. 29Keualoko nakama kakaꞌa ma John la nilono ma John umake, nakama la uo aꞌe noko kinokama kama la nokanu.

Jesus hanai lima simaka nakama

(Mat 14.13-21; Luk 9.10-17; Jhn 6.1-14)

30Sanahulu ma lua nakama kela Jesus nihaunalia la uvaꞌai imuli nokakala aꞌe Jesus hea lakou epena, ia hea lakou eaoaꞌo. 31Ia komaꞌi nakama eo aꞌe ia Jesus hoi. Ia kena Jesus ma nakama kaukali aia la sehiualoko eꞌai. Kena iko Jesus ime aꞌe nakama kaukali aia la, “Kakou io heꞌina sevaa nohamalolo.” 32Kena Jesus ma nakama kaukali aia la uꞌae kemonoui nohulo keꞌina sevaa solakou.

33Ia keualoko keonohenua la niꞌike pela kemonoui la ukele, nakama la umakino pela Jesus uꞌae. Kena nakama namakaꞌina la uhulo imua i keꞌina Jesus ekele aꞌe la. 34Keualoko Jesus nihauu iuka, kama la uꞌike keonohenua elahi la, kena ualoha haeꞌo. Maikinimea nakama la ehau poi ni{sipisipi}, sehikama lolosi lakou. Kena iko Jesus iꞌamaka noaoaꞌo nakama la komaꞌi namea.

35Keualoko kelaa la ukapili isulu, ko nakama kaukali la ime aꞌe Jesus, “Keꞌina nei sehihale. Kelaa la ukapili isulu. 36Haunalia keonohenua nei i namakaꞌina kapili mai la nosui niꞌai ma lakou.”

37Kena iko Jesus ime aꞌe nakama la, “Okou iau aꞌe niꞌai ma nakama nei iꞌai.” Ia nakama kaukali la eme aꞌe Jesus, “Aꞌoe hihai makou io nosui nahalaoa ihanai keonohenua nei? Keꞌoina nasileni la ehau poi kesui kekama iloko evalu namalama.”

38Ia Jesus eme aꞌe nakama kaukali aia la, “O nomaka ehia nahalaoa kakou eisi na.” Kulana nakama la nilave, nakama la eme aꞌe Jesus, “Kela kaulima nahalaoa, sakamaiꞌa oia.”

39Kena Jesus ekakala aꞌe nakama kaukali aia la ma, “Me aꞌe keonohenua la inoho i naukulana lakou i naꞌina naveve ekea la.” 40Kena iko keonohenua la inoho hakoa, alaukulana huikalau, alaukulana kipulima. 41Kena Jesus uko kaulima nahalaoa la ma sakamaiꞌa la, noꞌila iluna kevaelani noloku. Kena kama la ekohi nahalaoa la, kena iau aꞌe nahalaoa la ma sakamaiꞌa la i nakama kaukali aia la novavae aꞌe keonohenua la. 42Nakama la hakoa eꞌai nopohu. 43Kena nakama kaukali Jesus la uhaele hanaopo nohao sanahulu ma lua naꞌeke namuli halaoa. 44Keꞌoina nakanaka eꞌai la ekae pela elima nasimaka.

Jesus ehaele valuna kemoana

(Mat 14.22-33; Jhn 6.15-21)

45Vahola oia, Jesus eme aꞌe nakama kaukali aia la iꞌae kemonoui la nohulo imua aia i kemakaꞌina Bethsaida. Kena kama la eme aꞌe keonohenua la ikaꞌa veihale. 46Ia keualoko nakama la ukaꞌa, Jesus uhaele iluna kemouna la noloku. 47Kulana kelaa la nisulu, kemonoui la ukae i lakonu kemoana, ia Jesus enoho soia iuka. 48Vahola, Jesus uꞌike nakama kaukali aia la ealo lakou make, maikinimea kemakani la epui mai imua.

Kena kapili keulu keaka, Jesus uhaele valuna kemoana la. Kama la ehakaꞌoko kehaele halaꞌa kemonoui la. 49Ia keualoko nakama kaukali la niꞌike Jesus ehaele valuna kemoana, nakama la hakaꞌoko ma kela hekipua, kena eoho noapihi navalo lakou, 50maikinimea nakama la uꞌike kama la, kena imakaꞌu.

Saika la oia, Jesus eme aꞌe nakama kaukali aia la ma, “Okou isehakekele. Kenei anau oia. Okou isemakaꞌu.” 51Ia keualoko Jesus uꞌae iluna kemonoui nonoho ma nakama la, kemakani la ukeiho nomalino. Kena nakama la umasalo haeꞌo. 52Niaina nakama la uꞌike Jesus eau aꞌe kaulima nahalaoa nohanai keonohenua elahi, nakama la oiseailoa namahi aia. Emeia kehakaꞌoko nakama la oipouli oia.

Jesus ekonaꞌi nakama lavea i Gennesaret nokaualeꞌa

(Mat 14.34-36)

53Kulana nakama la ekae kelaa vahi kemoana la, nakama la ekaula kemonoui lakou la ikai i Gennesaret. 54Keualoko nakama la nikuu iho ikaha ma kemonoui la, keonohenua la uꞌila aꞌe nomake Jesus, 55kena ihulo valoko namakaꞌina la hakoa nosausau iho nakama lavea la iluna namoena imaka Jesus. 56Heꞌina pehe Jesus ehaele, i namakaꞌina elahi, ia ma namakaꞌina soliꞌi la, nakama la esausau iho nakama lavea la nohamoe iloko namalae. Kena iainoa aꞌe ma nakama lavea la ipiꞌi pamalo Jesus. Ia nakama kela epiꞌi pamalo Jesus la ukaualeꞌa hakoa.

Currently Selected:

Mark 6: ojv

Highlight

Copy