Mark 14

Nakama hamakua na{Jiu} hihai ikaa Jesus imake

(Mat 26.1-5; Luk 22.1-2; Jhn 11.45-53)

1Saaho imua keꞌai kePasova, ia ma keꞌai halaoa ekapu, namaakua hamakua ia ma nakama epolopolo nakuaa la elamalama ma ikaohi Jesus, ikaa kama la imake. Ia nakama la hihai ihasemuu, sehikama imakino. 2Nakama la ukakala solakou ma, “Kakou isekaohi kama la keualoko keꞌai la, aoki keonohenua la amehakaukau ma kakou.”

Kehine eamusi kelo manoni pohoulu Jesus

(Mat 26.6-13; Jhn 12.1-8)

3Kulana Jesus enoho Bethany, kama la eꞌai iloko kehale Simon, kama nilavea kemahana ke{leprosi} imua. Vahola, hehine ehaele aꞌe. Kama la eko kelo*f20* manoni esuinakaa haeꞌo, emale ma {Nard}. Kehine la ekili kepono kelo la nokalaꞌi, kena iamusi pohoulu Jesus. 4Alakama ilaa ekakala solakou, “Okea kama la ninini puamu kelo manoni la? 5Ame hekama eheheaꞌu nokae hekau hokahi, kama la amelavaa kesui kelo la. Ame kaualeꞌa pela kesui kelo manoni la ivavae aꞌe nakama haaloha.” Kena alakama uhai aꞌe kehine la pela hoi.

6Ia Jesus eme aꞌe nakama la, “Kiaꞌi kehine na! Okou isekakala hamemea kama na. Ekaualeꞌa pela kama na eamusi anau. 7Nakama haaloha la meinoho kahi ma okou, kena okou elavaa kekonaꞌi nakama la. Ia anau mesenoho ma okou naualoko kahi. 8Hea kehine nei epena ekau maia. Kama nei enini kelo manoni la iluna kinokama anau, ikanakana keualoko anau meimake la. 9Anau eme aku kehamaoni. Kulana alakama meikaukaꞌu kelono kaualeꞌa i naꞌina hakoa kemaalama nei, nakama la meikakala hea kehine nei epena, kena nakama la meimanaku kehine nei.”

Judas ehaꞌali aꞌe Jesus

(Mat 26.14-16; Luk 22.3-6)

10Kena Judas Iscariot, hekama iloko sanahulu ma lua nakama kaukali Jesus la, kama la ehaele nohaꞌali aꞌe Jesus i namaakua hamakua. 11Kulana nakama la elono nakakala Judas, nakama la ehihia lo, kena ikakala hamaoni pela lakou meau aꞌe nimoni ma kama la. Ia kena Judas eꞌilaꞌila heualoko aia elavaa kehaꞌali aꞌe Jesus i nakama la.

Keꞌai kePasova

(Mat 26.17-25; Luk 22.7-14,21-23; Jhn 13.21-30)

12Keualoko keaho amaka keꞌai halaoa ekapu la,*f21* keonohenua la ekaa napunua {sipisipi} lakou la, iꞌai keꞌai kePasova. Saika la, nakama kaukali Jesus la evasili aꞌe aia, “Keꞌina hee aꞌoe hihai makou ikaꞌa nokanakana keꞌai kePasova la maꞌoe?”

13Kena Jesus ehaunalia koꞌolua nakama la, kena ime aꞌe, “Kaꞌa iloko Jerusalem. Olua mekili kekama kela eamo kelo vai kea.*f22* Kaukali kama na. 14Kulana kama na meulu iloko hale na, olua ume aku kama hamakua hale na, ‘KeRabai eme aku ma, kehe kepuikana aia meiꞌai keꞌai kePasova ma nakama kaukali aia la?’ 15Kena kama na meihuli aku puikana elahi iluna la, uoki kekanakana. Olua ukanakana mai kakou meiꞌai na.”

16Koꞌolua la ukaꞌa iloko kemakaꞌina la, noꞌike namela ehau poi Jesus nime aꞌe laua. Kena iko koꞌolua la ikanakana keꞌai kePasova la.

17Kulana keiahi, Jesus ma sanahulu ma lua nakama kaukali aia ukae kehale la. 18Ia kulana nakama la enoho noꞌai, Jesus eme aꞌe, “Anau eme aku kehamaoni. Hekama okou meihaꞌali aꞌe anau i nakama eliloko anau la. Kama na eꞌai manau.”

19Kena nakama kaukali la ukipuaina, kena kama ma kekama eme aꞌe, “Kena oai, anau?”

20Kena iko Jesus ime aꞌe, “Hekama hokahi okou sanahulu ma lua. Kama na mekoꞌi halaoa aia la manau iloko {pesoni}.*f23* 21{Kama ekipu kama} meimake, ehau poi kelauniu kapu nikakaa mai. Ia kekama kela meihaꞌali aꞌe {kama ekipu kama} i nakama la mehalono lihu haeꞌo. Ekau pela kama la isehanau iho.”

Keꞌai haoki Kealiꞌi

(Mat 26.26-30; Luk 22.14-20; 1Co 11.23-25)

22Kulana nakama la eꞌai, Jesus eko halaoa la, kena iloku aꞌe Keakua, kena ikohi halaoa la, novavae aꞌe i nakama la, kena ime aꞌe, “Ko halaoa nei, kenei kaukinokama.”

23Kena Jesus eko ke{kapu} la nohamaha i Keakua, kena iau aꞌe ke{kapu} la i nakama la hakoa nounu. 24Kena Jesus ume aꞌe, “Kenei o kaukoko, kela ehuli aꞌe kehamaoni nakakala eivi Keakua. Kekoko anau nei meꞌo iho ikonaꞌi naonohenua la. 25Anau eme aku kehamaoni. Imuli, anau meseunu ke{uaen} nei. Hakali anau meiunu ke{uaen} vahonei iloko kenoholana Keakua.”

26Kena nakama la ehua kehua keloku, kena io i kemouna kela esomo na{Oliv}.

Nakama kaukali meikiaꞌi Jesus

(Mat 26.31-35; Luk 22.31-34; Jhn 13.36-38)

27Kena Jesus eme aꞌe nakama la, “Okou hakoa meihulo ikaha nokiaꞌi anau. Ehau poi Keakua nikakala mai i kelauniu kapu, pela ‘aia meikaa kekama lolosi namanu la, ia kena na{sipisipi} la meihuhulo huli.’ 28Ia keualoko anau memasiꞌe mai ikaha ma kemake, anau meihaele i Galilee imua okou.”

29Ia Peter eme aꞌe, “Niaina nakama nei hakoa ehulo ikaha maꞌoe, anau mesekiaꞌi aꞌoe.”

30Kena Jesus eme aꞌe Peter, “Anau eme aku kehamaoni. Kepo nei, imua kemoa mekani saualoko, aꞌoe mekakala koukolu naualoko pela aꞌoe semakino anau.”

31Ia Peter ekakala hapula aꞌe, “Niaina anau meimake maꞌoe, anau mesekakala pela anau semakino aꞌoe.” Ia kena nakama kaukali la hakoa ekakala pela hoi.

Jesus eloku iloko Gethsemane

(Mat 26.36-46; Luk 22.39-46)

32Keualoko nakama la nio i keꞌina emale ma Gethsemane, Jesus eme aꞌe nakama kaukali aia la, “Noho inei. Anau meloku.” 33Kena Jesus eko Peter, James, ia ma John, io maia. Saika la, Jesus ukipuaina haeꞌo, 34kena ime aꞌe nakama la, “Anau ealoha haeꞌo, nokapili imake. Noho inei, okou iala kahi.”

35Kena Jesus uhaele ikaha ma nakama la nokoukuli ilalo noloku aꞌe Keakua pela aia ame sehalono lihu. 36Kama la eme aꞌe, “Abba. Kaukamana. Namea hakoa ehainahie i aꞌoe. Ia kena ko kehalono lihu nei*f24* ikaha manau. Ia kaukali hea aꞌoe hihai, ia seai hea anau hihai.”

37Kena Jesus uvaꞌai muli noꞌike pela koukolu nakama kaukali aia la emoe. Kena kama la eme aꞌe Peter, “Simon aꞌoe emoe oia? Aꞌoe selavaa keala manau kamaualoko? 38Ala kahi, ia loku aꞌe Keakua pela okou mesekaoleole hia namea sala. Naanana okou emaka ola, ia nakinokama okou emaka nanae oia.”

39Kena Jesus uvaꞌai muli noloku aꞌe Keakua, poi aia niloku la hoi. 40Kena Jesus uvaꞌai muli noꞌike nakama kaukali aia la emoe oia, maikinimea nakumoe nakama la uhaimahi haeꞌo. Ia nakama la semakino hea lakou meme aꞌe Jesus.

41-42Kena Jesus uhaele noloku keualoko hakoukolu. Kena kama la uvaꞌai muli noꞌike nakama kaukali la, kena ime aꞌe, “Okou emoe oia. Ukau. Masiꞌe iluna, io kakou. Ila aꞌe, kekama mehaꞌali aꞌe anau la ukae mai. Vahonei, kama la meau aꞌe {kama ekipu kama} i namahi nakama haisala.”

Keonohenua ekaohi Jesus

(Mat 26.47-56; Luk 22.47-53; Jhn 18.3-12)

43Namaakua hamakua, nakama epolopolo nakuaa, ia ma nakama hamakua na{Jiu} la, ehaunalia Judas, kekama iloko sanahulu ma lua nakama kaukali la, nokaꞌa ma keonohenua la nokaohi Jesus. Ia nakama la eko nasiꞌa ia ma napulamoa nokaꞌa ma lakou hoi.

Kulana Jesus oikakala la, Judas ukae aꞌe ma keonohenua la. 44Judas ekini aꞌe haꞌaku nakama la pela, “Anau mevaisoni kekama ilaa, kena Jesus. Hapiꞌi kama na, kena kaohi mau kama na, uo ma okou.”

45Saika la oia, Judas uhaele aꞌe ia Jesus, kena ime aꞌe, “Rabai,” kena iapaꞌe novaisoni Jesus. 46Kena iko nakama la ikaohi Jesus nohapiꞌi. 47Kela hekama ekuu ilaa euhu pulamoa aia la nokuu pakalina kekama heheaꞌu pohoulu kemaakua hamakua la nosopo.

48Kena Jesus eme aꞌe keonohenua la, “Okou eo mai ma napulamoa ia ma nasiꞌa nokaohi anau, ehau poi anau hekama ekahao sala. 49Keaho ma keaho, anau enoho ma okou iloko hale kapu noaoaꞌo, ia okou sekaohi anau. Name nei ehuli aku pela nakakala kelauniu kapu la ehamaoni.”

50Ia kena nakama kaukali Jesus la hakoa ukiaꞌi kama la, ihulo ikaha.

51-52Keonohenua la ekaohi kaupeala kela ekaꞌa ma Jesus la hoi. Ia kama la ekele ikaha kiaꞌi pamalo aia la sehimea eleleu.

Jesus imua nakama hananiu

(Mat 26.57-68; Luk 22.54-55,63-71; Jhn 18.13-14,19-24)

53Kena nakama la uhakaꞌi Jesus imaka pohoulu hamakua namaakua. Kena namaakua hamakua, nakama polopolo nakuaa, ia ma nakama hananiu na{Jiu} la eꞌuku ilaa hoi. 54Peter ekaukali vamuli, ia sehaele hakapili aꞌe Jesus. Kena kama la ukae haseꞌe kehale pohoulu kemaakua hamakua, kena inoho ma napulepule la nohamahana keahi.

55Namaakua hamakua lakou ma nakama hananiu la hakoa elahulahu ma ilave nakama kela emea ma Jesus ehaisala, pela ikaa Jesus imake. Ia nakama la sehisala elave. 56Komaꞌi nakama eo aꞌe nohakuu nanukulaoi lakou ia Jesus. Ia nakakala nakama la esehanakahi.

57Kena alakama emasiꞌe iluna nome aꞌe nanukulaoi lakou la ia Jesus ma, 58“Makou elono kama na kakala mai pela aia meseu hale kapu kela nakama epenapena la, kena iloko koukolu naaho, aia mehakuu kelaa hale kapu kela sehikama epena la.” 59Ia nakakala nakama la hakoa esehanakahi.

60Kena pohoulu kemaakua hamakua umasiꞌe imua nakama la hakoa, kena ime aꞌe Jesus, “Aꞌoe seisi nakakala mesui aꞌe nakama kela hai aku aꞌoe la?” 61Ia Jesus enoho semuu, sehikakala eme aꞌe.

Ko pohoulu kemaakua hamakua la ivasili aꞌe Jesus ma, “Ea? Aꞌoe o keMesaea, kekama Keakua kaualeꞌa la?”

62Kena iko Jesus ime aꞌe, “Ino, kenei anau. Okou meiꞌike kama ekipu kama keualoko aia menoho kevahi laua Keakua hananiu, kena kama la meihamai iluna napuleulehu i kevaelani.”

63Vahola, pohoulu hamakua namaakua la esae naauꞌahu aia la,*f25* kena ime aꞌe, “Kakou sehihai alakama imau kakala ia kama la hoi. 64Okou elono, kama nei ekakala maia Keakua. Okou ehakaꞌoko pehe?” Kena nakama la hakoa uhaio aꞌe pela Jesus ekau kemake.

65Kena alakama nakama la sasavale aꞌe ia Jesus. Ia alakama esaisai pamalo namaisu Jesus, kena ipaku namaisu aia, kena ime aꞌe, “Haꞌali mai, oai kekama evuhu aꞌoe?” Kena napulepule elolosi Jesus la ekaohi kama la nolili kia kama la hoi.

Peter eꞌole pela aia semakino Jesus

(Mat 26.69-75; Luk 22.56-62; Jhn 18.15-18,25-27)

66Kulana nakama la nikaa Jesus, Peter enoho i haseꞌe kehale pohoulu hamakua namaakua la. Kena kaupu heheaꞌu kela pohoulu hamakua namaakua la uhaele aꞌe, 67noꞌike Peter hamahana kevahi keahi la, kena ime aꞌe, “Aꞌoe ekakaꞌa ma Jesus, kekama Nazareth.”

68Ia Peter eꞌole pela, “Anau semakino hea aꞌoe ekakala.” Kena kama la ehaele nokuu keꞌina kokoꞌa.*f26*

69Saika kaupu la niꞌike Peter ilaa, kaupu la ume aꞌe nakama kela ekuu valaa, “Kama nei iloko nakama la hoi.” 70Kena Peter uꞌole hoi. Seloloa, nakama ekuu valaa ume aꞌe Peter, “Aꞌoe hekama nakama la, maikinimea aꞌoe hekama i Galilee.”

71Kena iko Peter ikakala saꞌino soia, kena ime aꞌe, “Anau semakino kekama okou ekakala na.”

72Saika la oia, kemoa la ukani kana hasiaoa. Kena Peter umanaku hea Jesus nime aꞌe aia la, pela, “Imua kemoa la mekani saualoko, aꞌoe meikakala koukolu naualoko pela aꞌoe semakino i anau.” Kena Peter unapa nokanikani.

Currently Selected:

Mark 14: ojv

Highlight

Copy