Matthew 26

Nakama hamakua na{Jiu} hihai ikaa Jesus imake

(Mrk 14.1-2; Luk 22.1-2; Jhn 11.45-53)

1Keualoko Jesus nime aꞌe naaoaꞌo la hakoa, kama la eme aꞌe nakama kaukali aia la, 2“Okou emakino. Imuli saaho, keonohenua la meꞌai keꞌai kePasova. Ia keaho keꞌai la, kela hekama meiau aꞌe {kama ekipu kama} i nakama eliloko kama la, ma ikii kama la iluna {kolosi} imake.”

3Vahola, namaakua hamakua ia ma nakama hamakua na{Jiu} la eꞌuku i kehale Caiaphas, pohoulu hamakua namaakua. 4Nakama la ehakaꞌoko ma io semuu nokaohi Jesus, ma ikaa kama la imake. 5Ia nakama la ekakala solakou, “Kakou selavaa kekaohi kama la keualoko keꞌai la, aoki keonohenua la meihakaukau ma kakou.”

Kehine eamusi kelo manoni pohoulu Jesus

(Mrk 14.3-9; Jhn 12.1-8)

6Jesus enoho i kemakaꞌina Bethany i kehale Simon, kama nilavea kemahana ke{leprosi} imua la. 7Ia kulana Jesus enoho ilaa noꞌai, kela hehine ehaele aꞌe ma kelo#26.7 manoni esuinakaa haeꞌo, kena eamusi kelo manoni la iluna pohoulu Jesus. 8Kulana nakama ekaukali Jesus la eꞌike kehine la eamusi pohoulu Jesus, nakama la eloko, kena ime aꞌe, “Okea kama la amusi puamu kelo manoni la? 9Kaualeꞌa pela kama la iau aꞌe kelo manoni la isui alakama, kena uko komaꞌi namoni novavae aꞌe i nakama haaloha.”

10Ia Jesus unamakino avale nakakala nakama la, kena ime aꞌe, “Okou isekakala hamemea kehine na. Ekaualeꞌa pela kama na eamusi anau. 11Nakama haaloha la meinoho kahi ma okou, ia anau mesenoho ma okou naualoko kahi. 12Kehine nei eamusi kelo manoni iluna kinokama anau, ikanakana imua anau meimake la. 13Anau eme aku kehamaoni. Kulana alakama meikaukaꞌu kelono kaualeꞌa i naꞌina hakoa kemaalama nei, nakama la meikakala hea kehine nei epena, kena nakama la meimanaku kehine nei.”

Judas ehaꞌali aꞌe Jesus

(Mrk 14.10-11; Luk 22.3-6)

14Judas Iscariot, hekama iloko sanahulu ma lua nakama kaukali Jesus la, ehaele nokakala aꞌe namaakua hamakua, 15kena ime aꞌe, “Pena anau ehaꞌali aku Jesus, hea okou meiau mai?” Nakama la epau aꞌe kipukolu namoni noau aꞌe ma kama la. 16Ia kena Judas eꞌilaꞌila heualoko aia elavaa kehaꞌali aꞌe Jesus i nakama la.

Keꞌai kePasova

(Mrk 14.12-21; Luk 22.7-13,21-23; Jhn 13.21-30)

17Keaho la keꞌamaka keꞌai halaoa ekapu.#26.17 Kena nakama kaukali Jesus la eo aꞌe nome aꞌe aia, “Keꞌina hee aꞌoe hihai makou ikaꞌa nokanakana keꞌai kePasova la maꞌoe?”

18Kena iko Jesus ime aꞌe, “Kaꞌa iloko Jerusalem nome aꞌe kekama kemakaꞌina la ma, ‘KeRabai eme aku pela aia mekaohi keꞌai kePasova vahonei ma nakama kaukali aia la iloko hale kehale aꞌoe la.’ ”

19Nakama kaukali la ehalono hea Jesus eme aꞌe la, kena ikanakana keꞌai kePasova la.

20Kulana keiahi, Jesus enoho noꞌai ma nakama kaukali aia la. 21Kulana nakama la eꞌai, Jesus eme aꞌe, “Anau eme aku kehamaoni. Hekama okou meihaꞌali aꞌe anau i nakama eliloko anau la.”

22Ia kena nakama kaukali Jesus la ukipuaina, kena kama ma kekama evasili aꞌe, “Kealiꞌi. Kena oai, anau?”

23Jesus eme aꞌe nakama la, “Kekama kela ekoꞌi halaoa aia la manau iloko {pesoni}, kama la meihaꞌali aꞌe anau. 24{Kama ekipu kama} meimake, ehau poi kelauniu kapu nikakaa mai. Ia kekama kela meihaꞌali aꞌe {kama ekipu kama} i nakama la mehalono lihu haeꞌo. Ekau pela kama la isehanau iho.”

25Kena Judas eme aꞌe Jesus, “Rabai. Kena oai, anau?” (Judas o kekama meihaꞌali aꞌe Jesus i nakama eliloko kama la.) Jesus eme aꞌe, “Ehau poi aꞌoe me mai na.”

Keꞌai haoki Kealiꞌi

(Mrk 14.22-26; Luk 22.14-20; 1Co 11.23-25)

26Kulana nakama la eꞌai, Jesus eko halaoa la noloku aꞌe Keakua. Kena ikohi halaoa la novavae aꞌe nakama kaukali aia la, kena ime aꞌe, “Ko halaoa nei noꞌai. Kenei o kaukinokama.”

27Kena Jesus eko ke{kapu} la noloku aꞌe Keakua, kena iau aꞌe ke{kapu} la i nakama kaukali aia la, kena ime aꞌe, “Okou hakoa iunu. 28Kenei o kaukoko, kela ehuli aꞌe kehamaoni nakakala eivi Keakua. Kekoko anau nei meꞌo iho isolo nahaisala naonohenua la ikaha. 29Anau eme aku kehamaoni. Imuli, anau meseunu ke{uaen} nei. Hakali anau meiunu ke{uaen} vahonei ma okou iloko kenoholana kaukamana la.”

30Kena nakama la ehua kehua keloku, kena io i kemouna esomo na{Oliv} la.

Nakama kaukali meikiaꞌi Jesus

(Mrk 14.27-31; Luk 22.31-34; Jhn 13.36-38)

31Kena Jesus eme aꞌe nakama la, “Kepo nei kakou mekili kesala, ia kena okou hakoa mehulo ikaha nokiaꞌi anau. Ehau poi Keakua nikakala mai i kelauniu kapu, pela ‘aia meikaa kekama lolosi namanu la, ia kena na{sipisipi} la hakoa mehuhulo huli.’ 32Ia keualoko anau meimasiꞌe mai ikaha ma kemake, anau meihaele i Galilee imua okou.”

33Ia Peter eme aꞌe, “Niaina kakou mekili kesala, kena nakama nei hakoa ehulo ikaha maꞌoe, anau mesekiaꞌi aꞌoe.”

34Jesus eme aꞌe Peter, “Anau eme aku kehamaoni. Kepo nei, imua kemoa mekani, aꞌoe meikakala koukolu naualoko pela aꞌoe semakino anau.”

35Ia Peter eme aꞌe, “Niaina anau emake maꞌoe, anau mesekakala pela anau semakino aꞌoe.” Ia kena nakama kaukali la hakoa ekakala pela hoi.

Jesus eloku iloko Gethsemane

(Mrk 14.32-42; Luk 22.39-46)

36Kena Jesus ma nakama kaukali aia la uo hakoa i keꞌina emale ma Gethsemane. Kena Jesus eme aꞌe nakama la, “Noho inei. Anau haele pela noloku.” 37Jesus eko Peter ma koꞌolua nakama Zebedee la nokaꞌa lakou. Saika la Jesus ualoha nokipuaina haeꞌo, 38kena ime aꞌe nakama la, “Anau ealoha haeꞌo, nokapili imake. Noho inei, kakou iala kahi.”

39Kena Jesus ehaele ikaha ma nakama la nokoukuli ilalo noloku, “Kaukamana, pena aꞌoe hihai, ko kehalono lihu nei ikaha manau. Ia kaukali hea aꞌoe hihai, ia seai hea anau hihai.”

40Kena Jesus uvaꞌai noꞌike koukolu nakama kaukali aia la emoe, kena ime aꞌe Peter, “Okou selavaa keala manau kamaualoko oia? 41Okou iala kahi, ia loku aꞌe Keakua pela okou mesekaoleole hia namea esala. Naanana okou emaka ola, ia nakinokama okou emaka nanae oia.”#26.41

42Kena Jesus uvaꞌai hoi noloku, “Kaukamana, pena aꞌoe selavaa keko kehalono lihu nei ikaha manau, kena anau mehalono lihu, poi aꞌoe hihai.” 43Ia Jesus uvaꞌai muli noꞌike nakama la emoe, maikinimea nakumoe nakama la uhaimahi haeꞌo.

44Kena Jesus uhaele ikaha ma nakama la noloku keualoko hakoukolu, ehau poi aia niloku la hoi. 45-46Kena Jesus uvaꞌai mai muli, kena ime aꞌe nakama kaukali aia la, “Okou emoe ia. Masiꞌe iluna. Io kakou. Ila aꞌe, kekama mehaꞌali aꞌe anau la ukae mai. Vahonei, kama la meau aꞌe {kama ekipu kama} i namahi nakama haisala.”

Keonohenua ekaohi Jesus

(Mrk 14.43-50; Luk 22.47-53; Jhn 18.3-12)

47Namaakua hamakua ia ma nakama ehamakua na{Jiu} la ehaunalia Judas, hekama iloko sanahulu ma lua nakama kaukali la, nokaꞌa ma keonohenua elahi la nokaohi Jesus. Ia nakama la eko napulamoa ia ma nasiꞌa lakou hoi.

Kulana Jesus oikakala, Judas ukae aꞌe ma keonohenua la. 48Judas ekini aꞌe haꞌaku nakama la pela, “Anau mevaisoni kekama ilaa, kena Jesus. Hapiꞌi kama na, kena kaohi mau kama na.”

49Saika la oia, Judas uhaele aꞌe ia Jesus, kena ime aꞌe, “Rabai,” kena iapaꞌe novaisoni Jesus.

50Jesus eme aꞌe Judas, “Kausoa. Aꞌoe hamai noa?” Kena nakama la ukaohi Jesus nohapiꞌi. 51Kela hekama ekaꞌa ma Jesus la euhu pulamoa aia la, nokuu pakalina kekama heheaꞌu pohoulu hamakua namaakua la nosopo.

52Ia Jesus eme aꞌe kama la, “Kuꞌu muli pulamoa aꞌoe na. Nakama kela evuhu ma napulamoa meikaia lia napulamoa lakou la nomake.” 53Okou emakino pela anau elavaa keme aꞌe Kamana anau la ihaunalia iho kipu hiku ma lua nasimaka na{enselo} nokonaꞌi anau. 54Ia poi na{enselo} la eo iho, kena keonohenua nei ame selavaa kekaohi anau, poi hea kelauniu kapu la ekakaa iho.

55Kena Jesus eme aꞌe keonohenua la, “Okou eo mai ma napulamoa ia ma nasiꞌa nokaohi anau, ehau poi anau hekama kahao sala. Keaho ma keaho anau enoho i hale kapu la noaoaꞌo. Ia okou sekaohi anau. 56Namenei ehuli aku kehamaoni nalauniu nakama hakae nakakala Keakua la.” Kena nakama kaukali Jesus la hakoa ukiaꞌi Jesus nohulo ikaha.

Jesus imua nakama hananiu

(Mrk 14.53-65; Luk 22.54-55,63-71; Jhn 18.13-14,19-24)

57Nakama epolopolo nakuaa ia ma nakama hananiu na{Jiu} la eꞌuku lakou ma Caiaphas, pohoulu hamakua namaakua la. Kena keonohenua la ehakaꞌi aꞌe Jesus nokae ilaa hoi. 58Peter ekaukali vamuli hoi, ia sehaele hakapili aꞌe Jesus. Kama la ukae haseꞌe kehale la, kena inoho ma napulepule la imakino hea meikae aꞌe Jesus.

59Namaakua hamakua ia ma nakama hananiu la hakoa elahulahu ma ilave nakama kela enukulaoi ma Jesus ehaisala, pela ikaa Jesus imake. 60Komaꞌi nakama eo aꞌe nohakuu nanukulaoi lakou ia Jesus. Ia nakama hamakua la selave nahaisala ikaia kama la. Kena koꞌolua nakama eo nome aꞌe, 61“Kama nei eme mai pela aia elavaa keseu hale kapu Keakua nei, kena hakuu halaoi kehale nei iloko koukolu naaho.”

62Kena pohoulu hamakua namaakua la umasiꞌe iluna, kena ime aꞌe, “Aꞌoe seisi nakakala mesui aꞌe nakama kela hai aku aꞌoe la?” 63Ia Jesus enoho semuu oia.

Kena pohoulu hamakua namaakua la eme aꞌe Jesus, “Ea? Aꞌoe o keMesaea, kekama hokahi Keakua? Aꞌoe ikapa kemale Keakua kela eola kahi, ihuli mai makou pela nakakala aꞌoe la ehamaoni.”

64Kena Jesus eme aꞌe kama la, “Kena aꞌoe me mai na. Ia anau eme aku, okou meiꞌike {kama ekipu kama} meinoho i kevahi laua Keakua hananiu, kena kama la meihamai iluna napuleulehu i kevaelani.”

65Kena pohoulu hamakua namaakua la esae naauꞌahu aia la,#26.65 kena ime aꞌe, “Kakou sehihai alakama imau kakala i kama la hoi. Okou elono, kama nei ekakala ma aia Keakua. 66Okou ehakaꞌoko pehe?” Ko nakama la ime aꞌe, “Kama na ekau kekaia imake.”

67Kena nakama la usasavale aꞌe namaisu Jesus. Alakama epaku namaisu Jesus, ia alakama elili kia kama la. 68Nakama la eme aꞌe, “Pena aꞌoe keMesaea hamaoni, ainoa aꞌe Keakua ihaꞌali aku oai kekama evuhu aꞌoe.”

Peter eꞌole pela aia semakino Jesus

(Mrk 14.66-72; Luk 22.56-62; Jhn 18.15-18,25-27)

69Keualoko la, Peter enoho i haseꞌe kehale la. Kena kaupu heheaꞌu la uhaele nome aꞌe a Peter, “Aꞌoe ekakaꞌa ma Jesus, kekama Galilee.”

70Ia Peter eꞌole imua namaisu nakama la hakoa, “Anau semakino hea aꞌoe ekakala na.” 71Kena Peter uhaele ikaha. Kena kelaa kaupu uꞌike kama la, kena ime aꞌe, “Kama nei ekakaꞌa ma Jesus, kekama Nazareth.”

72Peter uꞌole hoi, kena ikakala hapulapula ma, “Anau semakino kama na.”

73Seloloa, alakama ekuu i keꞌina la uo nome aꞌe Peter, “Hamaoni. Aꞌoe hekama nakama la hoi. Nakakala aꞌoe na ehaꞌali mai oai aꞌoe.”

74Kena Peter ekakala saꞌino soia, kena ime aꞌe, “Anau semakino kama na.”

Saika la oia, kemoa la ukani. 75Kena Peter umanaku nakakala Jesus nei, “Imua kemoa la mekani, aꞌoe meikakala koukolu naualoko pela aꞌoe semakino anau.” Kena iko Peter ihaele kani ikaha.

Currently Selected:

Matthew 26: ojv

Highlight

Copy