Matthew 19

Kipukipu kekiaꞌi keꞌavana

(Mrk 10.1-12)

1Keualoko Jesus uoki kekakala, kama la uhaele ikaha ma Galilee nokae Judea i kelaa vahi ke{liva} Jordan. 2Ia naonohenua elahi ekaꞌa ma Jesus, kena kama la ekonaꞌi nakama lavea lakou la nokaualeꞌa.

3Alakama naFarasi la uo aꞌe nokaiꞌi Jesus, kena ivasili aꞌe, “Nakuaa kakou eme pehe? Poi hekama hihai ikiaꞌi kehine aia, elavaa kanaka la keseꞌavana kehine aia la?”

4Kena Jesus eme aꞌe, “Okou napau avale nakakala nei iloko kelauniu kapu. ‘Kulana Keakua nipena kemaalama nei la, kama la epena koꞌolua nakama; kanaka, kehine.’ 5Kena Keakua eme aꞌe, ‘Kela hea kaupeala la mekiaꞌi kamana ia ma kina aia la, kena ihanoa ma kaupu la. Ia kena koꞌolua na uo mai pela hekama hokahi.’ 6Seai koꞌolua. Keakua esuꞌui koꞌolua la, hokahi oia. Kena sehikama ekau kekuu keꞌavana koꞌolua la.”

7Kena iko naFarasi la ime aꞌe, “Nakuaa Moses la emau iho ma kanaka ‘iꞌave kelauniu kela keseꞌavana imua aia ukiaꞌi keꞌavana aia la.’ Saika la, kama na elavaa kehaise kehine la ikaha.”

8Ia Jesus eme aꞌe, “Moses ehakana okou ikiaꞌi naꞌavana okou, maikinimea okou ehakapanaka haeꞌo. Ia kulana Keakua nipena kanaka ma kehine, kama la sehaakana nakama la ikiaꞌi naꞌavana lakou. 9Anau eme aku okou. Poi hekama ekiaꞌi kehine aia la, kena uꞌavana kelaa hine, ia kehine aia la sehai huli, kena kanaka la uhaisala i keꞌavana huli.”

10Kena nakama kaukali Jesus la eme aꞌe, “Poi keꞌavana ekipu penei, kaualeꞌa pela sehikama meꞌavana.”

11Ia Jesus eme aꞌe, “Keakua ekonaꞌi alakama ihalono nakakala nei. 12Alakama sehihai iꞌavana, maikinimea lakou hanau mai pela lakou sehakekele keꞌavana. Alakama meseꞌavana ikaukali kehakaꞌoko alakama.#19.12 Ia alakama sehihai iꞌavana, maikinimea lakou ehakaꞌoko maha kenoholana kevaelani. Halono, poi keaoaꞌo nei ekau ma okou, kena okou ukaukali.”

Jesus hihai nakamaliꞌi io aꞌe aia

(Mrk 10.13-16; Luk 18.15-17)

13Alakama eau aꞌe nakamaliꞌi lakou la ia Jesus, pela aia mehapili nalima aia iluna nakamaliꞌi la, kena iloku aꞌe Keakua ikonaꞌi nakamaliꞌi la. Ia nakama kaukali la ehai aꞌe nakama la. 14Kena Jesus eme aꞌe, “Kiaꞌi nakamaliꞌi na io mai anau. Okou isepui nakamaliꞌi na. Maikinimea kenoholana kevaelani heꞌina nakamaliꞌi na.”

15Kena Jesus ehapili nalima aia iluna nakamaliꞌi la. Iaoki, kena ihuli nohaele.

Kevasili kekama haiheaꞌu

(Mrk 10.17-31; Luk 18.18-30)

16Kela hekama ehaele nome aꞌe Jesus, “Rabai, anau ikaukali kipukipu pehe iko keola eola kahi?”

17Kena Jesus eme aꞌe, “Aꞌoe isevasili mai anau pela nakipukipu kaualeꞌa. Keakua soia ekaualeꞌa. Poi aꞌoe hihai iola hamaoni ma Keakua, kena kaukali nakuaa aia la.”

18Kama la eme aꞌe, “Nakuaa hee?” Kena Jesus eme aꞌe, “Sekaa kama, seꞌavana huli, seailalao, sekakala nukulaoi. 19Hamaha kamana aꞌoe ma kina aꞌoe. Kena laoi alakama, ihau poi aꞌoe elaoi soꞌoe.”

20Kena kama la eme aꞌe, “Anau nakaukali avale nakuaa la hakoa. Ea? Anau ikaukali kelaa mea hoi?”

21Kena iko Jesus ime aꞌe, “Poi aꞌoe hihai ikonu kahi, haele noko naheheaꞌu aꞌoe la hakoa. Au aꞌe namela i alakama isui. Kena uvavae aꞌe namoni la i nakama haaloha. Ia kena aꞌoe meiko namea kaualeꞌa i kevaelani. Kena aꞌoe uhamai nokaukali mai anau.”

22Ia keualoko kama la elono nakakala Jesus, kama la ukipuaina haeꞌo, kena ihaele ikaha, maikinimea kama la hekama haiheheaꞌu.

23Jesus eme aꞌe nakama kaukali aia la, “Anau eme aku kehamaoni. Mehainakaa haeꞌo nakama haimoni la kekae kenoholana kevaelani. 24Anau eme aku okou hoi. Ehainakaa ke{kamelo} keulu iloko kelua kelina kela ekui pamalo. Ia hainakaa haeꞌo nakama haimoni la kekae kenoholana Keakua.”

25Keualoko nakama kaukali Jesus la nilono nakakala la, nakama la umasalo haeꞌo, kena ime aꞌe, “Kena oai kekama amekae na?”

26Jesus uꞌila aꞌe nakama la, kena ime aꞌe, “Ame hainakaa haeꞌo kekama, ia namea hakoa ehainahie Keakua.”

27Ko Peter ime aꞌe Jesus, “Makou ukiaꞌi namea hakoa, kena makou ukaukali aꞌoe. Ia hea makou meiko na?”

28Kena Jesus eme aꞌe nakama la, “Anau eme aku kehamaoni. Kulana okou meikae kelaa maalama, {kama ekipu kama} meinoho iluna kenoholana hananiu aia la. Ia kena okou nakama kaukali anau, meinoho iluna sehui ma lua nanoholana okou la, kena ihakonukonu sehui ma lua naꞌaha Israel.

29“Pena hekama ekiaꞌi nahale aia la, ia ma napaupaꞌu aia la, kena ukaukali mai anau, kena Keakua meihoꞌi aꞌe kama la, elaꞌa iluna ma namea aia ukiaꞌi la. Pena hekama ekiaꞌi nakaina aia, naꞌave aia, kamana aia, kina aia, ia ma nakamaliꞌi aia la, nokaukali mai anau, kena Keakua meiko aꞌe komaꞌi nakama mo haleaina kama la, elaꞌa iluna ma nakama aia nikiaꞌi la. Poi kama la ekiaꞌi kemea hokahi, kama la meiko huikalau namea la. Kena Keakua meiau aꞌe kama la keola eola kahi. 30Komaꞌi nakama hananiu meikeiho ilalo. Ia nakama moulalo meihananiu.

Currently Selected:

Matthew 19: ojv

Highlight

Copy