Matthew 10

Jesus ekini sehui ma lua nakama heheaꞌu aia

(Mrk 3.13-19; Luk 6.12-16)

1Jesus ekini sehui ma lua nakama kaukali aia la, kena iau aꞌe nakama la namahi ihakui nakipua ikaha, ia ikonaꞌi nakama elavea hakoa nokaualeꞌa. 2Kenei namale sehui ma lua nakama kela Jesus ehaunalia la.

Kama amaka, Simon, emale ma Peter, ia ma kaina aia la Andrew.

James laua ma kaina aia la John, nakama Zebedee,

3Philip laua ma Bartholomew.

Thomas laua ma Matthew, kama kela eaoao na{kakisi}.

James kekama Alphaeus laua ma Thaddaeus.

4Simon, kekama sehihai pela Rome ilolosi Israel. Ia Judas Iscariot, kekama meihaꞌali aꞌe Jesus i nakama hamakua la.

Jesus ehaunalia sehui ma lua nakama heheaꞌu aia

(Mrk 6.7-13; Luk 9.1-6)

5Imua kela Jesus ehaunalia sehui ma lua nakama heheaꞌu aia la, kama la eme aꞌe, “Okou isekaꞌa iloko nahenua nakama enoho pouli, ia ma namakaꞌina Samaria. 6Okou ikaꞌa iloko namakaꞌina nakama Israel. Nakama la ehau poi nimanu sili oia. 7Ia kulana okou meio, okou ikaukaꞌu penei, ‘Keakua kevaelani mehamai nohamakua kenoholana aia.’ 8Kena okou ukonaꞌi nakama lavea ikaualeꞌa, haola nakama emake, konaꞌi nakama elavea kemahana {leprosi}, ia hakui nakipua saꞌino la ikaha. Keakua eau aku maluu namahi aia ikonaꞌi alakama. Kena kulana okou ehuli aꞌe namahi la, okou iseainoa kesui. 9Kulana okou eo, okou seko nimoni nokaꞌa ma okou. 10Ia okou iseko namuliopu moni, ia seko nikapuae, ia ma nilaꞌau hahaele ma okou. Ia ko keauꞌahu hokahi oia. Maikinimea nakama la ekau kehanai nakama kela heheaꞌu ma lakou.

11“Keualoko okou ekae aku kemakaꞌina, okou usee hekama ekau kekonaꞌi okou. Kena okou unoho ma kama na, ikae keualoko okou meikaꞌa ikaha ma kemakaꞌina na. 12Kulana okou mekaꞌa iloko hale, okou ikakala hakaualeꞌa i nakama la. 13Poi nakama la ekau, kena okou ekonaꞌi nakama la inoho laoi. Ia poi nakama la sekau, haele nokonaꞌi alakama. 14Ia alakama ameseko okou, ia sehihalono nakakala okou. Kena keualoko okou ekaꞌa ikaha ma kehale la, ia ma kemakaꞌina la, okou ikaikahi namuli vae okou.#10.14 15Anau eme aku okou kehamaoni. Kehalono lihu nakama la i keaho hakonukonu, meilaꞌa iluna nahalono lihu nakama iloko Sodom laua ma Gomorrah.

Keualoko nahalono lihu

(Mrk 13.9-13; Luk 21.12-17)

16“Anau ehaunalia okou poi nipunua {sipisipi} nonoho ma napoi leikama. Ia kena okou ihamakonu poi niꞌaka, ia pasemuu poi nilupe. 17Lolosi hamakonu nakama la, maikinimea nakama la meihakaꞌi okou i nahale hakonukonu, kena meilili kia okou iloko nahale loku lakou. 18Nakama la meihakaꞌi okou ikuu imua nakuꞌu ia ma nakama hamakua, maikinimea okou ekaukali anau. Okou meikakala aꞌe kelono kaualeꞌa i nakama la, ia ma nakama enoho pouli la hoi. 19Ia kulana nakama la meikaohi okou, okou isehakekele hea okou meime aꞌe, maikinimea Keanana Kapu meiau aku nakakala aia. 20Ia seme pela okou mekakala soꞌokou. Kena Keanana Kapu kela Kamana okou la meikakala iloko okou.

21“Ia kena alakama meiau aꞌe nakaina lakou la ikaia imake. Ia nakamana meau aꞌe nakamaliꞌi lakou la ikaia imake hoi. Ia nakamaliꞌi la meihakaukau ma namakua lakou la, ia kena au aꞌe namakua lakou la ikaia imake. 22Nakama hakoa meililoko okou, maikinimea okou ekapa kemale anau. Ia oai kekama meihakina i anau nokae kehaoki, Keakua meikonaꞌi kama la iola. 23Kulana nakama la meimeme haeꞌo kia okou iloko namakaꞌina lakou, okou io ikaha ma namakaꞌina na, kena okou uo ala makaꞌina. Anau eme aku kehamaoni. Keualoko {kama ekipu kama} mevaꞌai mai imuli, okou amesekae namakaꞌina i Israel hakoa.

24“Kama aoaꞌo la elaꞌa iluna ma nakama aia eaoaꞌo la. Ia kama hamakua la elaꞌa iluna ma kama heheaꞌu aia la. 25Ekau pela nakama kaukali la ikipu poi kekama haaoaꞌo lakou la. Ia kama heheaꞌu la ikipu poi kama hamakua aia la hoi. Poi alakama esui kemale kama hamakua kehale la ma ‘Baꞌal Zebub,’ kena nakama la meikakala saꞌino nakama haleaina aia la hoi.

Semakaꞌu alakama

(Luk 12.2-7)

26“Okou isemakaꞌu nakama saꞌino la. Maikinimea namea hakoa kela ehunaa lia meihuli aꞌe. Ia namea kela eꞌuhi meilavea lia oia. 27Hea anau eme aku okou i kepo, okou ikakala aꞌe i keao. Ia hea anau ekakala semuu aku okou, okou mekakala hamaloa. 28Okou isemakaꞌu nakama la, maikinimea nakama la elavaa kekaa nakinokama okou imake oia, ia selavaa kekaa naanana okou imake. Emeia okou ikau kemakaꞌu Keakua. Maikinimea kama la elavaa kekaa nakinokama okou imake, kena elavaa keꞌave naanana okou i keꞌina keahi hoi.

29“Sileni hokahi esui salupe. Ia niaina namanu la ekomaꞌi lo, Kamana okou ialuna emakino kulana hemanu hokahi emake. 30Keakua emakino hoi keꞌoina naloulu napohoulu okou. 31Kena okou isemakaꞌu, maikinimea naola okou nimea elahi i namaisu Keakua, elaꞌa iluna ma nalupe la.#10.31

Ehainakaa kekaukali Jesus

(Luk 12.8-9; Luk 12.51-53; Luk 14.26-27)

32“Poi hekama ekakala aꞌe imua namaisu keonohenua la pela aia ehakina anau, kena anau meme aꞌe Kamana anau i kevaelani pela kama la hekama kaukali anau. 33Ia poi hekama ekakala imua keonohenua la pela aia sehakina anau, anau meme aꞌe Kamana anau i kevaelani hoi pela kama la sehakina anau.

34“Okou isehakaꞌoko pela anau ehamai nokonaꞌi nakama kemaalama nei inoho laoi. Emeia anau ehamai ma penisi nohavaꞌee nakama la#10.34 . 35Anau ehamai nohavaꞌee kamaliꞌi kanaka ikaha ma kamana aia la, ia havaꞌee hoi kamaliꞌi hine ikaha ma kina aia la, ia havaꞌee hoi kama hine ikaha ma hainaona hine aia la. 36Nakama iloko nahaleaina okou la meililoko okou hoi.

37“Poi hekama ehaikamana laoi kamana aia la, ia ehaikina laoi kina aia la, elaꞌa iluna anau, kena kama na sekau kekaukali anau. Ia poi hekama ehaikama laoi kamaliꞌi kanaka aia la ma kamaliꞌi hine aia la, elaꞌa iluna anau, kena kama na sekau kekaukali anau. 38Poi hekama seaunahie kehapili {kolosi} aia la nokaukali mai anau, kena kama la mesekau kekaukali anau. 39Oai kekama ehakekele keola aia soia, kama na meseko keola hamaoni. Ia oai kekama eaunahie kekiaꞌi keola aia la nokaukali mai anau, kama la meiko keola hamaoni.

Nahoꞌi

(Mrk 9.41)

40“Poi hekama ehihai okou, kama na ehihai anau hoi. Ia nakama kela ehihai anau, ehihai Keakua, kekama kela ehaunalia iho anau la. 41Poi okou ekonaꞌi kekama kela ehakae nakakala Keakua, Keakua meiau aku nakuhana okou, ehau ma kuhana kama hakae nakakala aia la meiko. Ia poi okou ekonaꞌi kekama ekonu kahi, Keakua meiau aku nakuhana okou, ehau ma kuhana kama ekonu kahi la meiko. 42Anau eme aku kehamaoni. Pena okou eau aꞌe kamaliꞌi la kevai kea nounu, maikinimea kama la ekaukali mai anau, kena Keakua meiau aku nakuhana okou.”

Currently Selected:

Matthew 10: ojv

Highlight

Copy