John 5

Jesus ekonaꞌi kekama nokaualeꞌa i keꞌina kevai

1Kena imuli, Jesus uhaele i Jerusalem, kemakaꞌina kela na{Jiu} la eꞌai keꞌai lakou la. 2Kevai elahi ekuu kapili aꞌe kokoꞌa kemakaꞌina la, emale ma Kokoꞌa Na{sipisipi}. Kevai la emale ma Bethesda, i nakakala keꞌina la. Ia elima naꞌina emalu ekuu hakiꞌe navahi kevai la. 3Komaꞌi nakama lavea emoe i naꞌina la, nakama naꞌalemaka eseni, nakama navae emake, ia ma nakama nalima epiꞌo. (Nakama la ehakali keualoko kevai la eꞌamaka nominoi. 4Alaualoko ke{enselo} Kealiꞌi ehaele iho nohamio kevai la. Kena kekama amaka kela eꞌauꞌau kevai la memaakala muli ikaha ma kemahana aia la.)

5Kela hekama emoe kevahi kevai la. Kama la elavea nokae kipukolu ma valu nahekau. 6Jesus uꞌike kama la emoe ilaa, kena elono pela kemahana kama la la uloloa haeꞌo. Ia kena Jesus eme aꞌe kama la, “Aꞌoe hihai ikaualeꞌa?”

7Iko kama lavea la ime aꞌe, “Alohai Kealiꞌi, sehikama mesau anau iauꞌau keualoko kevai la meminoi. Anau haꞌikeꞌike ma ikae imua iloko kevai la. Ia kelaa kama nakae avale imua anau.”

8Kena Jesus ume aꞌe, “Kuu iluna. Ko kemoena aꞌoe na, aꞌoe uhaele.” 9Vahola ia, kama la ukaualeꞌa, kena iko kemoena aia la nohaele.

Ia keaho la heaho kapu na{Jiu}. 10Kena iko nakama hamakua na{Jiu} la ime aꞌe kekama Jesus ekonaꞌi la, “Kenei keaho kapu, ia esala ma kuaa kakou pela aꞌoe eamo kemoena aꞌoe na.”

11Kena kama la ume aꞌe, “Kekama ekonaꞌi anau nokaualeꞌa la eme mai manau iko kemoena anau nei, manau uhaele.”

12Kena nakama hamakua na{Jiu} la ume aꞌe, “Oai kekama eme aku maꞌoe iko kemoena aꞌoe nohaele na?”

13Ia kama la esemakino oai Jesus. Maikinimea keꞌina la eꞌapi haeꞌo kekama, ia Jesus uhaele semuu ikaha.

14Kena imuli, Jesus ulave kama la iloko kehale kapu, kena ime aꞌe kama la, “Aꞌoe uꞌike, vahonei aꞌoe ukaualeꞌa. Kiꞌe ikaha ma nahaisala aꞌoe, aoki namea saꞌino haeꞌo meikae aku aꞌoe imuli.” 15Kena kama la uhaele nome aꞌe na{Jiu} la, “Kela Jesus avale ekonaꞌi anau nokaualeꞌa.”

16Jesus eapaꞌe nokonaꞌi kama la nokaualeꞌa i keaho kapu na{Jiu} la. Kela hea nakama la uꞌamaka nohai haeꞌo kia Jesus. 17Kena Jesus eme aꞌe na{Jiu} la, “Kamana anau la ehuli aꞌe namahi aia la naaho hakoa, kena anau ehuli aꞌe namahi pela hoi.” 18Na{Jiu} la elono Jesus ekakala pela ma Keakua o Kamana aia. Ia ma laua ma Keakua ehanakahi. Ia na{Jiu} la ehakaꞌoko hoi ma Jesus esekaukali nakuaa lakou keaho kapu. Ia kena na{Jiu} la ehai namahi lakou ma ikaa Jesus imake.

Namahi kekama Keakua

19Ko Jesus ime aꞌe na{Jiu} la, “Anau eme aku kehamaoni. Kama Keakua selavaa kepena namea soia. Kama la epena hea aia eꞌike kanakamana la epena. Hea Kamana epena, kanakama epena hoi. 20Kamana elaoi kanakama, kena ihuli aꞌe namea hakoa aia epena iailoa kanakama la. Okou meimasalo, maikinimea Kamana mehuli aꞌe kanakama namahi elaꞌa iluna namenei hoi. 21Kamana ehamasiꞌe nakama emake la noola. Ehau pela hoi, kanakama mehaola nakama aia ehilihili la. 22Kamana soia selaulahu nakama. Ia kama la naꞌau aꞌe avale namahi i kanakama ilaulahu nakama la. 23Ia kena nakama hakoa meihamaha kanakama, ehau poi lakou ehamaha Kamana aia la. Kamana ehaunalia iho kanakama la. Kena poi hekama sehamaha kanakama, kama la ame sehamaha Kamana aia la hoi.

24“Anau eme aku kehamaoni. Poi hekama ehalono nakakala anau nei, ia ehakina Keakua kela ehaunalia mai anau, kama na meola naualoko hamau. Ia Keakua mesehakonukonu kama na. Ia kama na uhiki ikaha ma kemake noola. 25Anau eme aku okou kehamaoni. Nakama emake ukapili ilono keleo kama Keakua. Ia nakama kela ehalono la meiola. 26Keola la ehamai Kamana soia. Ia Kamana eau aꞌe keola la i kanakama hoi. 27Ia Kamana eau aꞌe namahi kanakama ilaulahu nakama, maikinimea kama la o {kama ekipu kama}. 28Okou isemasalo i nakakala nei. Nakama umake nomoe iloko naꞌava meilono keleo kama Keakua la, 29kena io mai ikaha ma nakaluma lakou la. Nakama kela epena namea kaualeꞌa meimasiꞌe iluna noola kahi. Ia nakama kela epena namea saꞌino meimasiꞌe iluna nohalono lihu kehakonukonu la.

Jesus o kekama Keakua

30“Anau sehai namahi anau sonau. Anau elaulahu keonohenua ikaukali hea anau elono. Ia kehakaꞌoko anau la ekonu. Maikinimea anau sehakaꞌoko kekaukali hakaꞌoko anau sonau. Ia anau ekaukali hakaꞌoko kekama kela ehaunalia mai anau la.

31“Poi anau ehaꞌali aꞌe nakipukipu anau sonau, kena nakakala anau la ame sehamaoni. 32Ia Kamana anau la ekakala aꞌe nakipukipu anau. Ia anau emakino pela namea kama la ekakala i anau la ehamaoni.

33“Okou ehaunalia nakama novasili aꞌe John Baptist imakino laoi okou nakipukipu anau. Kena John ekakala aku okou kehamaoni. 34Niaina anau sehihai alakama ikakala aku nakipukipu anau, anau ekakala aku okou nakakala John la, ikonaꞌi okou iola. 35Nakakala John la ehau poi heahi ehaula nohamalama. Ia okou ehihai ihalono nakakala kama la kamaualoko oia.

36“John ekakala aku nakipukipu anau. Ia namahi kela anau ehuli aku la ehamakua iluna nakakala John la. Anau epena nookia nia Kamana la ehihai anau ipena. Ihuli aku okou pela kama la ehaunalia iho anau. 37Kamana ehaunalia mai anau, kena ihuli aku soia nakipukipu anau. Okou selono kanaleo, ia seꞌike kama la. 38Nakakala kama la semoe iloko okou, maikinimea okou sehakina i kekama kela kama la nihaunalia iho la. 39Okou epaupau kahi kelauniu kapu. Maikinimea okou hakaꞌoko pela kelauniu la mehuli aku keola naualoko hamau. Ia kelauniu kapu la ehuli aku nakipukipu anau oia. 40Ia okou sehihai keo mai anau noko keola eola kahi la.

41“Anau sehihai keonohenua la ihamaha mai anau. 42Anau emakino nakipukipu okou. Okou soꞌokou selaoi hamaoni Keakua. 43Anau ehamai i namahi Kamana anau la. Ia okou sehihai anau. Ia poi kelaa kama meihamai nokakala aku namahi aia soia, kena okou ame hihai kama la. 44Okou hihai keonohenua la ihamaha okou. Ia okou sehai namahi okou pela Keakua amehamaha okou. Kena okou meihakina nakakala Keakua la pehe?

45“Okou isehakaꞌoko pela anau mehai aku okou imua namaisu Kamana la. Seai. Niaina okou ehakaꞌoko pela Moses mekonaꞌi okou, kama la mehai aku okou avale. 46Poi okou ehakina hamaoni nakakala Moses, okou ame hakina ia anau hoi. Maikinimea Moses nakakaa aku avale nakipukipu anau. 47Ia okou sehakina hea Moses nikakaa mai imua. Ia okou meihakina nakakala anau nei pehe?”

Currently Selected:

John 5: ojv

Highlight

Copy