Acts 27

Paul uuhu nohaele i Rome

1Nakama hamakua la ehakaꞌoko pela ma makou iuhu nohaele i Italy. Kena ime aꞌe kepulepule hamakua emale ma Julius ilolosi Paul lakou ma ala{palaseni} hoi. Julius hekama keukulana napulepule kekuꞌu haRome la. 2Makou eꞌae kevaꞌa kela ehamai pela i kemakaꞌina Adramyttium. Kevaꞌa la ekana kana ihaele hakiꞌe namakaꞌina Asia. Kelaa hekama kemakaꞌina Thessalonica iloko Macedonia ekaꞌa ma makou hoi, kanamale Aristarchus. 3Kela aho makou ukae i Sidon. Ia Julius ekaualeꞌa ia Paul, kena ihakana Paul ihaele iuka nomaka nasoa aia la. Ia kena nakama la elolosi hakaualeꞌa Paul. 4Keualoko makou niuhu ilaa, kemakani la epui mai imua makou, ia kena makou uhaele hapale i kehenua emale ma Cyprus. 5Kena ihaele hakapili aꞌe Cilicia ma Pamphylia nokae kemakaꞌina Myra iloko Lycia. 6Julius ulave kevaꞌa ehamai pela i Alexandria, kela mehaele Italy, ia kena ihaunalia makou noꞌae kevaꞌa la.

7Makou euhu nohaele hasolo komaꞌi naaho, ia makou ehainakaa kekae kemakaꞌina Cnidus. Kemakani la upui imua makou, ia kena makou uhaele halaꞌa kemaka Crete, emale ma Salmone. 8Kena makou ehaele hasolo hakapili aꞌe henua la nokae i keꞌina emale ma Keꞌina Ekaualeꞌa Kehaluu, kapili kemakaꞌina Lasea.

9Vahola, komaꞌi naaho ulaꞌa. Keualoko na{Jiu} ehasese hiꞌai la uoki. Ia makou ukae saika esaꞌino kehaele vakemoana. Kena Paul ume aꞌe nakama la, 10“Okou nakanaka. Poi kakou euhu vahonei nohaele, kevaꞌa ma na{kako} nei hakoa meilano, ia komaꞌi nakama kakou meimake.” 11Ia pulepule hamakua la sehalono aꞌe ia Paul, kama la ehalono kealiꞌi kevaꞌa la laua ma kekama esui kevaꞌa la. 12Kehapakio la sehiꞌina ekaualeꞌa i kekuu kevaꞌa la, keualoko kemoana epeau. Ia kena nakama kevaꞌa la ehakaꞌoko iuhu uhaꞌike ikae Phoenix, kemakaꞌina i Crete nokuu ilaa. Maikinimea hapakio la ehuli konu aꞌe i keꞌupu halaꞌi ma koꞌolau halaꞌi.

Pukiꞌa kemoana

13Keualoko la, kamamakani i keꞌupu la eꞌamaka noaniani. Ia kena nakanaka la ehakaꞌoko pela kemakani la ame kaualeꞌa. Kena ihuki kaula la nohaele hapale Crete. 14Ia semao, kemakani la uꞌamaka nomaili mai koꞌolau hanaꞌe pela i namouna henua la. 15Kemakani maili la emea makou nokahea i kemoana, pela makou selavaa kevaꞌai muli. 16Makou uhaele hakapili aꞌe henua emale ma Cauda, ia keꞌina la uluu aꞌe hamalie, ia kena makou uhai namahi makou ihauka kama monoui la iluna kevaꞌa. 17Kena nakama kevaꞌa la usaisai kemonoui la ma kevaꞌa la i namaea. Kena ilaku kaula imea kevaꞌa la inase kekahea, maikinimea nakama la emakaꞌu ma kevaꞌa la noꞌasa naluahua i Libya. Kena ikiaꞌi kevaꞌa la ihakahe kemakani maili. 18Kela aho, makou ukili pukiꞌa haimahi, kena nakama kevaꞌa la ukaua na{kako} la i kemoana. 19Kena keaho kana hakolu nakama la ulaku naheheaꞌu kevaꞌa la hakoa iloko kelokai. 20Komaꞌi naaho makou seꞌike kelaa ma nahekuu, ia kemakani ekauhano nomaili mahi, ia kena makou usehakaꞌoko pela makou meiola.

21Saika loloa lo, sehikama makou eꞌai naꞌai, kena Paul ukuu iluna nome aꞌe nakama la, “Okou nakanaka usehalono mai anau, kena iuhu i Crete. Kela hea na{kako} kakou la hakoa ulano. 22Ia vahonei, anau eme aku okou isekipuaina, maikinimea sehikama kakou memake. Kevaꞌa nei soia meilano. 23Keakua elolosi anau, kena anau eheheaꞌu maia. Kepo la ke{enselo} Keakua ekuu mai nokakala mai ma, 24‘Paul aꞌoe isemakaꞌu. Aꞌoe meikuu imua namaisu kekuꞌu haRome. Ia kevahi aꞌoe Keakua meikonaꞌi naola nakama kela ehaele maꞌoe na.’ 25Ia kena okou isekipuaina. Anau emakino laoi pela Keakua meikonaꞌi kakou, poi hea aia ekakala mai anau. 26Ia kevaꞌa nei meꞌasa iluna henua.”

27Sehui ma haa naaho kemakani maili la ehakakahe lia makou valoko kemoana. I lakonu kepo, nakama kevaꞌa la ulono pela makou ukapili nahenua. 28Nakama la haꞌike kenoko kemoana la nolave pela ukae kipulua namaꞌaa. Kama saika hoi nakama la uhaꞌike nolave pela ukae sehui ma lima namaꞌaa. 29Ia kena nakama la umakaꞌu, aoki kevaꞌa la meꞌasa naꞌau. Kena nakama la elaku ehaa nakaula imuli kevaꞌa la, kena iloku pela lakou meola nokae keulu keaka.

30Nakama heaꞌu kevaꞌa la hihai ma lakou imuni nohulo iuka, kena ihakele kemonoui la ilalo i kelokai, ihailavaꞌa ma lakou elaku nakaula imua kevaꞌa la. 31Ia Paul eme aꞌe pulepule hamakua la ma napulepule aia la, “Apoi nakama kevaꞌa nei senoho iloko kevaꞌa, kena Keakua mesekonaꞌi okou iola.” 32Ia kena napulepule la ukuu namaea kela esai kemonoui la nokeiho i kelokai.

33Imua keulu keaka, Paul eme aꞌe nakama la iꞌai naꞌai, “Vahonei ukae sehui ma haa naaho okou sehimea eꞌai. 34Kena anau eme aku okou, iꞌai naꞌai ikaohi naola okou pela sehikama okou memake.” 35Paul ekakala aꞌe nakama la, kena iko halaoa iloku aꞌe i Keakua imua namaisu nakama la hakoa. Kena ikohikohi halaoa la noꞌai. 36Nakama la hakoa ulono nakinokama lakou ukaualeꞌa, ia kena iꞌai naꞌai lakou la. 37Kela lua huikalau, kipuhiku ma ono nakama hakoa enoho iluna kevaꞌa la. 38Kena keualoko makou nioki keꞌai, nakama la ukaua naaupu halaoa iloko kelokai, imea kevaꞌa la ilana.

Kevaꞌa la umaseu

39Kulana kahaka, nakama la eꞌike hapakio eleꞌele, ia sehikama emakino henua la. Ia kena ihakaꞌoko ihaꞌasa kevaꞌa la i keꞌina la. 40Nakama la ekuu nakaula kevaꞌa la nomaoha i kemoana. Kena ikaohi sahoeꞌulu kevaꞌa la. Kena ialeko puꞌei la nokele iuka. 41Nakama la ekae kesao, kena ihaꞌasa kevaꞌa la ialuna keluahua la, imua kevaꞌa la uꞌapi nomau. Kena napeau elahi la useu imuli kevaꞌa la.

42Napulepule la ehakaꞌoko pela lakou ikaa na{palaseni} la imake, pela selavaa hekama meꞌau nosao. 43Ia pulepule hamakua la ehihai ikonaꞌi Paul, kena ipui nakama la isekaa nakama la. Ia kena imea nakama kela eailoa keꞌau la ilee i kelokai, noꞌau iuka. 44Kena nakama ekoe la uko nihono ma alamea iluna kevaꞌa la ihalana lakou iꞌau iuka. Ia kena makou hakoa ukae laoi iluna henua la, sehikama elano.

Currently Selected:

Acts 27: ojv

Highlight

Copy