Acts 23

1Kena Paul ukoꞌa hamakonu aꞌe nakama hamakua la, kena ime aꞌe, “Aukaina. Anau eailoa laoi pela keola anau ekaualeꞌa i namaisu Keakua.” 2Pohoulu hamakua namaakua la emale ma Ananias. Kama la eme aꞌe nakanaka kela ekuu kapili ia Paul ivuhu puꞌua kama la. 3Ia kena Paul ume aꞌe i pohoulu hamakua namaakua la, “Keakua meivuhu aꞌoe hoi. Aꞌoe ehau poi kaluma euhi lia kaꞌele maꞌini. Aꞌoe enoho inaa nohakonu anau i kevahi nakuaa Moses. Ia keualoko aꞌoe eme aꞌe nakama la ivuhu anau, aꞌoe soꞌoe sekaukali nakuaa la.”

4Nakanaka kela ekuu i kevahi Paul eme aꞌe ma, “Aꞌoe sekau kehai aꞌe pohoulu hamakua namaakua Keakua.”

5Ia kena iko Paul ime aꞌe, “Aukaina. Anau semakino pela kena pohoulu hamakua namaakua. Nakakala iloko kelauniu kapu la emea ma, ‘Au sekakala saꞌino aꞌe kekama hamakua keonohenua okou la.’ ”

6Paul uꞌike pela alakama hamakua niSatiusi, ia alakama niFarasi, kena ianaa hamaloa aꞌe nakama hamakua la, “Aukaina. Anau heFarasi, ia nakamana anau la niFarasi hoi. Okou ehakonu konu anau, maikinimea anau ehakina pela nakama emake la meimasiꞌe muli ikaha ma kemake.”

7Saika Paul nikakala penei, naFarasi la uhavaꞌee ikaha ma naSatiusi la nohakauoki solakou. 8NaSatiusi la ehakina pela nakama emake la selavaa keola muli. Ia sehakina pela na{enselo} ma naanana la ehamaoni. Ia naFarasi la ehakina namela hakoa. 9Nakama hamakua la evaa hakoa, ia kena alakama naFarasi ma alakama nakama epolopolo nakuaa umasiꞌe iluna nokakala hamaloa penei, “Makou esee sehimea esala i kama nei. Eꞌila pela kela he{enselo} ma heanana ekakala aꞌe kama la.”

10Nakama la ehakauoki haimahi. Kena kama hamakua napulepule la umakaꞌu, aoki nakama la mekaa Paul nomake. Kena kama la ime aꞌe napulepule aia la io nokaohi Paul, kena uhakaꞌi kama la ikaha ma keonohenua la nokaꞌa i kehale lakou la.

11Kepo la Kealiꞌi ekuu imua Paul, kena ime aꞌe, “Aꞌoe isemakaꞌu. Aꞌoe meikakala aꞌe nakipukipu anau i Rome, ehau poi aꞌoe ekakala aꞌe nakipukipu anau i Jerusalem.”

Na{Jiu} la epena hakaꞌoko ikaa Paul imake

12Kae kahaka kela aho, na{Jiu} la penapena hakaꞌoko ikaa Paul imake. Nakama la ekakala hamaoni pela lakou meseꞌai ia meseunu, ikae saika lakou mekaa Paul imake. 13Elaꞌa iluna kipuhaa nakama epena hakaꞌoko nei la. 14Nakama la ukili ma namaakua hamakua ia ma nakama hamakua la nome aꞌe, “Makou penapena hakaꞌoko iseꞌai, ikae kulana makou mekaa Paul imake. 15Kena makou ehihai okou ma nakama hamakua na{Jiu} la ime aku kama hananiu napulepule haRome la ihakaꞌi mai Paul. Kaoleole aku kama la pela okou ehihai ivasisili aꞌe Paul. Kena makou mekanakana keualoko Paul mehaele iho, kena ukaa kama la imake.”

16Kulana kelamoku Paul la nilono nahakaꞌoko nakama la epena la, kena kama la ehaele i kehale napulepule la nohaꞌali aꞌe ia Paul. 17Ia kena Paul ume aꞌe kepulepule hamakua la, “Hakaꞌi kelamoku anau nei imaka kama hananiu okou la. Maikinimea kama nei eisi kakala meime aꞌe kama la.” 18Kepulepule hamakua la ehakaꞌi kelamoku Paul la imaka kama hananiu aia la, kena ime aꞌe, “Kekama epono iloko kelokapu emale ma Paul. Kama la me mai anau ihakaꞌi mai kaupeala nei ikakala aku aꞌoe.”

19Kena kama hananiu napulepule la eko kelima kaupeala la, ihakaꞌi kama la i kevahi, kena ivasili aꞌe kama la, “Hea aꞌoe hihai ikakala mai i anau na?”

20Kena iko kaupeala la ime aꞌe, “Na{Jiu} ehakekele pela kaiao lakou mekaoleole aku aꞌoe ihakaꞌi aꞌe Paul imaka nakama hamakua na{Jiu} la. Nakama la mekakala uhiuhi aku i aꞌoe pela lakou ehihai ivasisili aꞌe Paul. 21Ia nakama la ekaoleole aku oia. Elaꞌa iluna kipuhaa nakanaka emuni i kevahi keala nohakali keualoko Paul meihaele iho la. Nakama la ukakala hamaoni pela lakou meseꞌai, ia seunu, ikae saika lakou mekaa Paul imake. Ia vahonei nakama la ehakali ilono pela aꞌoe meipena hea lakou hihai la.”

22Kena kama hananiu napulepule la ume aꞌe kaupeala la, “Au sehaꞌali aꞌe hekama iailoa pela aꞌoe ekakala mai i anau.” Kena ihaunalia kaupeala la nohaele.

Paul uhaele nomaka {kaumani} Felix

23Kena kama hananiu napulepule la uanaa aꞌe koꞌolua nakama hamakua napulepule aia la, kena ime aꞌe koꞌolua la, “Kanakana helua huikalau napulepule ikaꞌa i Caesarea kepo nei. Ia kanakana hoi kipuhiku nakanaka meihulo valuna na{hosi} la, kena kelua huikalau napulepule iko nasiꞌa uo ma lakou hoi. 24Ia kanakana kelaa {hosi} iꞌae Paul iluna, ia hamakonu pela Paul ikae laoi ia Felix ke{kaumani}.” 25Kena kama hananiu napulepule la ekakaa kelauniu nei,

26“Anau Claudius Lysias ekakaa aku i aꞌoe {kaumani} Felix, ikakala aku kehihia anau.

27“Na{Jiu} ekaohi kama nei ma ikaa imake. Keualoko la, anau nilave pela kama nei hekama haRome, kena anau uko napulepule anau la io nohasao kama nei ikaha ma keonohenua la. 28Ia anau ehihai ilave hea na{Jiu} la ehakaukau lakou ma kama nei. Kena iꞌave kama nei nohakuu imua nakama hamakua na{Jiu} la. 29Anau elave pela na{Jiu} la ehakaukau lakou ma kama nei i kevahi nakuaa lakou solakou. Ia nakama la sehisala elave ikau pela kama nei ipono lia kelokapu, ia ikaia imake. 30Keualoko anau nilono pela na{Jiu} la epena hakaꞌoko ikaa kama nei imake, kena anau uhaunalia aku kama nei i aꞌoe. Ia anau eme aꞌe nakama ehakaukau lakou la ime aku aꞌoe hea kama nei esala.”

31Napulepule la uhalono nakakala kama hananiu lakou la. Kena kepo la, nakama la ehakaꞌi Paul nokae kemakaꞌina i Antipatris. 32Kela aho napulepule kela nikaꞌa valalo la uvaꞌai muli i kehale lakou la. Ia napulepule kela ehulo na{hosi} la eko Paul. 33Keualoko nakama la nikae i Caesarea, napulepule la eau aꞌe kelauniu la imaka {kaumani} la, kena iau aꞌe Paul hoi, pela {kaumani} la ilolosi Paul. 34{Kaumani} la epau kelauniu la, kena ivasili aꞌe imakino aia keꞌina hee Paul ehamai. Kama la elono pela Paul ehamai i Cilicia, kena ime aꞌe, 35“Kulana nakama ehakaukau maꞌoe la ekae mai inei, anau meihalono nakakala aꞌoe.” Kena iko kama la ime aꞌe napulepule la ilolosi Paul iloko kehale kekuꞌu Herod.

Currently Selected:

Acts 23: ojv

Highlight

Copy