Acts 21

Paul uhaele nokae i Jerusalem

1Makou hakoa ekiaꞌi nakama la ilaa, kena iuhu nohaele kahi i henua emale ma Cos. Ia kela aho makou ukae kela henua, emale ma Rhodes, kena ihalaꞌa nohaele nokae kemakaꞌina Patara. 2Makou ulave kevaꞌa i keꞌina la meihaele i Phoenicia, kena iꞌae kevaꞌa la iuhu nohaele. 3Keualoko makou uꞌike henua Cyprus, kena makou ehaele halaꞌa kevahi keꞌupu, kena ihaele pela i Syria. Makou uhamau i kemakaꞌina Tyre, maikinimea kevaꞌa la meikiaꞌi na{kako} henua la ilaa. 4Makou elave nahakina ana i Tyre, ia kena makou enoho ma nakama la ehiku naaho. Nakama la ekakala aꞌe i namahi Keanana Kapu pela Paul isehaele nokae Jerusalem. 5Makou enoho ma nakama la iaoki, kena iuhu holau makou la nohaele. Nakanaka keloku la lakou ma nahaikina lakou la ekaꞌa iho ikaha ma kemakaꞌina la nokae kahua ikai. Kena ikoukuli ilalo noloku. 6Kena makou ume aꞌe naaloha makou, kena iuhu nohaele. Ia nahakina ana la uvaꞌai muli i nahale lakou.

7Kena makou uuhu i Tyre nohaele nokae i Ptolemais. Ia kena makou ekakala hihia aꞌe nahakina ana la, kena inoho ma nakama la heaho hokahi. 8Kela aho makou uuhu nohaele nokae i Caesarea, kena io nonoho ma Philip i kehale aia la. Ia Philip hekama kela ekaukaꞌu kelono kaualeꞌa. Kama la hekama iloko koahiku nakanaka kela nihilihili lia la.*f12* 9Ia kama la eisi koahaa nakaupu, kela ehakae nakakala Keakua.

10Makou enoho elava naaho i keꞌina la. Kena kela hekama ehakae nakakala Keakua ehamai i Judea, kanamale Agabus. 11Kama la eko kaukuu Paul la nonoa navae ma nalima aia soia, kena ikakala penei, “Kenei nakakala Keanana Kapu. Na{Jiu} iloko Jerusalem meisaisai kekama kaukuu nei la, kena uko kama la noau aꞌe i nakama enoho pouli la.”

12Keualoko makou ma nakama enoho ilaa nilono kakala nei la, makou hakoa eainoa aꞌe Paul isehaele i Jerusalem. 13Ia kama la emea ma, “Poi okou ekani pena, anau mealoha haeꞌo. Anau eaunahie kesai kia, ia imake iloko Jerusalem hoi, maikinimea anau ehakina kemale Kealiꞌi Jesus.” 14Paul uhainakaa kesui hakaꞌoko aia, kena makou unoho semuu, ia ime aꞌe kama la pela, “Hea Keakua ehihai meiokia.”

15Ia kena makou ukana kana, kena ikaꞌa nokae Jerusalem. 16Alakama keloku i Caesarea ekaꞌa ma makou, ihakaꞌi makou i kehale Mnason, hekama henua Cyprus. Kama la hekama i nakama amaka kela ehakina Kealiꞌi.

17Keualoko makou nikae i Jerusalem, nakama keloku ilaa ehihia noko makou. 18Kela aho, Paul ukaꞌa ma makou nomaka James. Ia nakama hamakua keloku la hakoa enoho ilaa hoi. 19Paul ekakala hihia aꞌe nakama la, kena ime aꞌe lakou hea Keakua ekonaꞌi nakama enoho pouli la, keualoko aia niheheaꞌu ma nakama la.

20Keualoko nakama keloku la nilono nakakala Paul, nakama la ehamaha i Keakua. Kena ikakala aꞌe ia Paul, “Kaukaina. Aꞌoe makino pela komaꞌi nasimaka na{Jiu} la ehakina Kealiꞌi. Ia nakama la hakoa oikaukali nakuaa Moses. 21Nakama la elono pela maꞌoe eaoaꞌo sala na{Jiu} i namakaꞌina emao la ikiaꞌi nakuaa Moses, ia isehamakino nakapukapu nakamaliꞌi kanaka lakou la, ia isekaukali nakipukipu kakou. 22Hea kakou meipena? Na{Jiu} la amelono pela aꞌoe ukae mai i nei.

23“Kena aꞌoe ihalono hea makou eme aku. Kela koahaa nakama iloko makou nei ukakala hamaoni imua namaisu Keakua pela lakou mehakea naola lakou. 24Kena aꞌoe isuꞌui ma nakama la. Kena okou hakoa penapena nakipukipu ihakea naola okou imua namaisu Keakua. Kena aꞌoe au aku kesui kekama meikuu nalaulu lakou ipoko.*f13* Ia kena na{Jiu} la hakoa meimakino pela aꞌoe elolosi keola aꞌoe, ikaukali nakuaa Moses. Kena nakama la meiailoa hoi pela nakama kela eveuveꞌu aꞌoe la ekakala vale oia.

25“Ia nakama enoho pouli kela ehakina la ekau kekaukali nakuaa iloko kelauniu makou niau aꞌe lakou. Iseꞌai naꞌai kela alakama ehoꞌi aꞌe nahakipua la. Seunu kekoko, ia seꞌai namanu emake kekoko la oimoe iloko. Ia seꞌalemaka ailalao alakama.”

26Kela aho Paul usuꞌui ma koahaa la nopenapena nakipukipu ihakea naola lakou imua namaisu Keakua. Kena Paul uhaele i kehale kapu nome aꞌe namaakua la imakino nakama la keaho hee aia ma koahaa la meioki kehakea. Imea pela namaakua la meiau aꞌe Keakua nahoꞌi ekau ma koalima la hakoa.

Paul ukaohi lia

27Alakama na{Jiu} la uo mai Asia. Imuli kauhiku naaho, nakama la eꞌike Paul iloko hale kapu, kena iusuusu aꞌe keonohenua la ma iloko haimahi ia Paul, kena ikaohi kama la. 28Kena nakama la uananaa hamaloa ma, “Okou nakanaka Israel. Konaꞌi mai makou. Kama nei ehaele noaoaꞌo nakama i naꞌina hakoa ihakauoki ma keonohenua kakou, isehalono nakuaa Moses, ia isehamaha hale kapu kakou nei. Ia kena kama nei eko mai nakama haGreek la iloko hale kapu nei, imea hale nei i saꞌino.” 29Nakama la ekakala penei, maikinimea nakama la eꞌike Trophimus hekama i Ephesus ekaꞌa laua ma Paul iloko kemakaꞌina la. Kena nakama la ehakaꞌoko pela Paul ehakaꞌi kama la iloko hale kehale kapu la hoi.

30Nakama kemakaꞌina la ulono nakakala nei, kena ihulo aꞌe nokaohi Paul nosolo kama la ikaha ma kehale kapu la. Kena ipui nakokoꞌa hale la. 31Keonohenua la kapili ma ikaa Paul imake. Ia saika la oia, kama hananiu napulepule haRome la ulono pela kemakaꞌina la ehakauoki hakoa. 32Kena kama la uko napulepule aia la ma nakama hamakua napulepule la nohulo vave nokae keonohenua la. Ia keualoko keonohenua la eꞌike kama hananiu napulepule la ma napulepule aia la hoi, kena nakama la uhamau, sekaa Paul.

33Kena kama hananiu napulepule la uhaele aꞌe ia Paul, kena ime aꞌe napulepule aia la ikaohi kama la, kena uko siaoa na{seni} nosaisai kama la. Kena kama hananiu la uvasili aꞌe nakama la, “Kenei oai? Hesala pehe kama nei epena?” 34Ia alakama keonohenua la apipihi valo kelaa mea, alakama ehai aꞌe kelaa mea. Kena kama hananiu la ehainakaa kemakino hea nakama la ehakauoki la. Kena kama la umea napulepule aia la iko Paul nohakaꞌi i kehale elahi napulepule la. 35Ia kulana napulepule la nikapili keaꞌae kehale lakou la, keonohenua emumui aꞌe la, uloko haimahi. Kena napulepule la usau Paul iluna nololosi kama la. 36Ia keonohenua la oikaukali vamuli, kena iapipihi aꞌe navalo lakou pela, “Kaa kama na imake.”

Paul ekakala aꞌe keonohenua

37Keualoko napulepule la ehakaꞌi Paul iloko hale kehale lakou la, kena Paul uainoa aꞌe kama hananiu la penei, “Ea, anau elavaa kekakala aku?” Ia kama hananiu la umasalo, kena ime aꞌe, “Aꞌoe ailoa nakakala haGreek? 38Anau ehakaꞌoko maꞌoe kekama haEgypt la. Kekama kela eusuusu keonohenua, kena ihakaꞌi ehaa nasimaka nakama kaa kama la nohanoho i keꞌina kukuaha.”

39Ia Paul eme aꞌe, “Seai. Anau hekama ha{Jiu}. Anau hekama kemakaꞌina hananiu Tarsus iloko Cilicia. Anau hihai aꞌoe ihakana mai anau ikakala aꞌe keonohenua la.”

40Kama hananiu napulepule la eaunahie. Kena Paul ukuu iluna keaꞌae la, nohaiauna aꞌe keonohenua la inoho semuu, kena iꞌamaka nokakala aꞌe lakou i nakakala na{Jiu} la.

Currently Selected:

Acts 21: ojv

Highlight

Copy