Malke 5

Zezu -kpeti Zuzu -nyɛnye -ɔ -ko 'nyɔkpɔ keyi -wɛ

(Matie 8.28-34; Luke 8.26-39)

1Zezu -nyɛ 'ɔnɛɛ gɛlenya "bhaa -ylɛ jinyɛ 'na 'pɛɛ -ce "ku Zelazeniɛnya 'na -glɔ "me. 2Zezu -ko gɔlo "me zɔ -kwli dɛku, 'ɔ 'na 'wolo cuu, 'nyɔkpɔ 'bhale -biɛglo "ku, 'ɔ yu 'sibhɔle- -ka. "Ɛ 'nyɔkpɔ -wɛ zuzu -nyɛnye -ko -lɔ keyi. 3-Biɛ -wɛ 'wɔ "me 'ye 'ɔ 'dile- -lɔ 'du. "Ne 'nyɔkpɔ "ne 'bhɛle- "ne 'ɔ "kɔ 'gbɛte-, 'gɔgɔ 'nu 'ɛ kɛ 'se -noɔ -ce. 4"Naa-, 'wa 'ya 'ɔnɛɛ 'sɔ -nyɛ 'ɔnɛɛ bho "bhaa 'gɔgɔ 'nu 'gwale- -bɛɛ', -mɔ "ɛ -ɛwɛ 'klekle "me 'ye 'ɔ "didile -lɔ. "Ne 'nyɔkpɔfu "ne 'bhɛle- "ne 'ɔ "kɔ 'dɛbhele 'jilɛ. 5-See zle ze "ne 'titiɛ yi -wɛ, 'ɛ "ne -la nyɛpɛ nyɛpɛ "ku -ko, "ne 'ɔ sɛsɛle -lɔ -biɛ kɔ. "Ne 'ɔ -kɛ -lɔ tlo 'vli 'na 'nɔŋɔnɔŋɔ -libhɔ, "ne 'ɔ 'kpa -lɔ "me, "ne 'ɔ ylɛylɛle -lɔ 'ɔnɛɛ ku "me 'tiyi nu. 6'Ɔ "kɛ Zezu 'na 'guɔzizanɔ 'ylime 'ye ne, guɔ 'ɔ -guɔ -lɔ "ne 'ɔ yu -lɔ -kokomini 'yliku "pɔle. 7'Ɔnɛɛ "mekpaweli -gɛ "mɛ -ce, 'ɔ nɛɛ: «-Ye -e 'yɔbhɔle bhɔ -ame "me 'a, Zezu, Lagɔ -ɔ zi "ku 'na yu? -Yaya -kɛ, Lagɔ 'na 'tɔ "me, te -kɛ -ame "nyɛnye no!» 8"Naa-, Zezu -bhulɛlo -lɔ nɛɛ: «Zuzu -nyɛnye 'bha- 'nyɔkpɔ ne "me!» 9"Ne Zezu yi -lɔ "ɛ zuzu -nyɛnye -wɛ lo 'yɔbhɔ nɛɛ: «-Neɛ' 'tɔ pa- lɛ?» 'Ɔ nɛɛ: «'Mɔɔ pa- pluplu, "naa-, -a -zu kpɛnyee zɛ.» 10"Ne 'ɔ yi -lɔ Zezu bhubhɔ-, 'ɔ nɛɛ: «-Yaya, te -kɛ -anye "ɛ -glɔ ne "ku 'kpeti-!»

11"Ɛ doɔ 'kokotia 'na -zakpɛ "yitɛ -ko 'awɔ lɔbhɔ, 'wa li lɔbhɔ 'na tlo 'vli "ku. 12"Ne Zuzu -nyɛnyea yi -lɔ Zezu bhubhɔ-, ŋwɛnɛɛ: «"Pɔ -kɛ -anye 'kokotia -wɛ "me, gbɔ -se -a "kɛ -kɛ 'kokotia 'na -zakpɛ "me plɛ!» 13"Ne Zezu yua -lɔ -gwe "nyɛ. "Ne 'nyɔkpɔ -ye 'wa -ko nɛ "keyi -wɛ, 'wa yu -lɔ "me 'bha-, "ne 'wa yi -lɔ 'kokotia "me 'gbe. 'Wa yi 'awɔ -gɛmɛnɛ -wlulu "sɔ bhli-. 'Wanɛɛ -zakpɛ -wɛ gou 'bha- tlo 'vli, "ne 'wa yi -lɔ 'ŋu "me 'gbe 'klekle, "ne 'wa yi -lɔ "bhle "kule. 14"Ne "ɛ 'kokotia 'na "klokolenya yi -lɔ 'fɔtɔ-. 'Wa -me zoku "ne 'kwlɛdu -wɛ 'wɔ "ku 'de -sɛ -ka. "Ne nyakpa yi -lɔ -see 'ɛ -ylɛle -wɛ 'ylime 'ye ka yi. 15'Wa 'na 'sibhɔ Zezu yɔko ne, "ɛ 'nyɔkpɔ -ye zuzu -nyɛnyea 'wɔ -ko nɛ keyi -wɛ, 'ɔ gli -duku, 'ɔ -pla "me 'tee, "ne 'ɔ -kɛ -la 'nyɔkpɔklo, "ne geji yua -lɔ "ku 'bha- 'klekle. 16Nyakpa -wa 'ye- "ɛ -li 'klekle 'na dɛ -wɛ, 'waa- -sɛle -lɔ 'walua, "ɛ 'gwizinyɔ -nyɛ 'kokotia "bhaa 'na 'de. 17-Ɛwɛza, "ɛ zoku -wɛ 'na 'nyakpa -wa -ko -me nɛ lɔbhɔ -wɛ yi -lɔ Zezu bhubhɔ- nɛɛ: «-Yaya 'bha- -anyɛɛ -glɔ ne "me!» 18Zezu -ko nɛ gɔlo "me 'gblɛ dɛku, "ne "ɛ 'nyɔkpɔ -ye Zuzu -nyɛnye -ko nɛ keyi -wɛ yu -lɔ bhubhɔ- nɛɛ: «'E "kɛ 'se -eyi 'gɛle -me.» 19Zezu nɛɛ: «'Bhɔ, -mɔ, zi -neɛ' -bhudu "me 'wlizɔ, yle "bhle -neɛ' 'nyoa, -ye Lagɔ -no -neɛ' za 'klekle -wɛ, "ne -see 'ɔ 'pɔ- -neɛ' 'nyɛzedle -wɛ, me -e "koa 'de -sɛle.» 20"Ne "ɛ 'nyɔkpɔ -wɛ yi -lɔ Dekapɔle#5.20 Dekapɔle, -glɔ 'na 'ɛ -ko Galile 'na 'ŋu yɔko yɛ -lɔ. Zezu 'na -ye 'ɔ -no 'wli 'klekle -wɛ 'na 'de "bhle ŋwenia -ka me. 'Ɛ -nyɛa 'nyakpa 'klekle -wa 'no- "ɛ weli -wɛ.

Zezu -yamalea 'ŋɔnɔ -bholo, "ne 'ɔ -golia 'ŋuyu 'tekeyi.

(Matie 9.18-26; Luke 8.40-56)

21Zezu -zi 'wlizɔ, 'ɔ 'bhale gɔlo "me 'ŋu 'na 'pɛɛ -ce "ku. 'Ɔ -ko nɛ 'ŋu yɔko "ne 'nyakpa -kwleyia yu -lɔ 'yli 'yiɛ -ka yi. 22Lɔbhɔ 'ye "mebhubhɔlebhudu "me 'na "cifi -bholo -ye 'wa la Zayile -wɛ -yi me -lɔ. 'Ɔ 'ye- lɛ Zezu 'ylime ne, "ne 'ɔ yu -lɔ 'bho 'sale. 23"Ne 'ɔ yu -lɔ bhubhɔ- nɛɛ: «-Yaya, -ameyɔ 'tekeyi nɛɛ 'ɔ "kɛ "ku, zaa, yi -se -e "kɔ 'kwlɛ 'wli 'piɛ, -se 'ɔnɛɛ gu "kɛ 'bhiɛ, -se 'ɔ "kɛ "po!» 24"Ne Zezu -nyɛ "ɛ 'nyɔkpɔ -wɛ "bhaa 'wa yi -lɔ me. 'Nyakpa -wa 'kwɔlo -gwe "ku -wɛ -zu kpɛnyee "ne 'wa 'pɔpɔ mo -lɔ "bhle.

25'Ŋɔnɔ -bholo -ko -me "ɛ -zakpɛ -wɛ "me. 'Ylobɛ 'kogbɔ "sɔ -see 'dlu bhiɔ "me. 26'Ɔ 'kplɛle- "nyakpononya -gbagboa kɔ kpɛnyee. 'Ɔ -ple 'ɔnɛɛ -ye 'ɔ -kɛ 'klekle -wɛ "ne gu "ne 'ŋunu-, -mɔ, kɔ 'ye 'ɛ memele 'ce -lɔ 27"Ɛ 'ŋɔnɔ -wɛ 'no- -me Zezu 'na "ku 'na weli, "ne 'ɔ yi -lɔ "ɛ -zakpɛ -wɛ "me yi -me, "ne 'ɔ yi -lɔ Zezu keyi 'plele, "ne 'ɔ yi -lɔ 'ɔnɛɛ "koti kɔ 'sa. 28"Naa-, sɛne 'ye 'ɔ -bhulɛle -lɔ 'dlezɔ nɛɛ: «'E kɛ "fu 'ɔnɛɛ "koti -wɛ kɔ -ze, 'e yi yamale-.» 29"Ɛ doɔ cuu, "ɛ 'ŋɔnɔ -wɛ 'na dlu 'diɔle-. 'Ɔ 'na wolo, 'ɔ -yamale. 30"Ɛ -gbabhuɛ -bhele -wɛ "me, Zezu -yibhlele sɛ -gbɔ 'bhɛloɛ 'bhɔ- ku "me: "Ne 'ɔ yi -lɔ 'beme 'wolo- "ɛ -zakpɛ -wɛ "me, 'ɔ nɛɛ: «-Ɔ -ze bhɔ 'na koti kɔ 'a?» 31'Ɔnɛɛ gɛlenya nɛɛ: «-E "ne bhɔ 'nyakpa -wa gwegwele yɔko "me ne 'yli -gɛ? "Ne -e no nɛɛ: -Ɔ -ze bhɔ -ame kɔ 'a?» 32"Ne Zezu yi -lɔ 'ɔyi 'yli 'bliale- -se 'ɔ "kɛ -ɔ "zo- sɔbhɔ -wɛ yibhlele-. 33"Ɛ 'ŋɔnɔ -wɛ tɛtɛle nyanɔ za, "naa- 'ɔ -yi -bɛɛ' 'na -ɛ -ylo -wɛ zɛ. "Ne 'ɔ yi -lɔ Zezu -kokomini 'yliku "pɔle, "ne 'ɔ yu -lɔ gbɛklɛklɛ bhulɛle-. 34Zezu nɛɛ: «'Na yu, -neɛ' 'dlekukɛleɛ 'ya -eyi 'fuɔ, me "kuwɛtɛ "me -neɛ' gu -bhiɛ.»

35"Ɛ weli -wɛ -ko Zezu nu "ne 'nyakpa -ye 'wa -lebhe yi -lɔ yi. 'Wa 'bhale "mebhubhɔlebhudu "me 'na "cifi 'na sueme, ŋwɛnɛɛ: «-E yɔɔ 'ya 'nyɔŋo bhli zaa, te -la "fu "Bhenyɔ 'yalɛ lia-!» 36Zezu "ne 'wanɛɛ bhulɛweli -wɛ 'yliku "zolea-, "ne 'ɔ yi -lɔ "mebhubhɔlebhudu "me 'na "cifi bhulɛle- nɛɛ: «Nyanɔ te -eyi 'lɔbhɔ, -mɔ, kɛle- Lagɔ 'dleku cuu.» 37Zezu nɛɛ -vinyɔ 'to -gwe "ku kwɛle-, -mɔ, Piɛle "ne Zake "ne 'ɔ "nɔwli Zaa 'wa -na gɛlo. 38"Ne 'wa yi -lɔ "mebhubhɔlebhudu "me 'na "cifi 'na sueme ylɛ. Zezu 'na 'wolo zikpoku ne, 'nyakpa 'totole 'be, 'wa tu "ne 'wa 'pɔ 'wukwɛ. 39"Ne 'ɔ yi -lɔ -bhudu "me plɛ, "ne 'ɔ yua -lɔ bhulɛle- nɛɛ: «Sɔɔ -jiji 'a sɛ bhɔ? "Ne sɔɔ -lugbu 'a tu bhɔ? "Ɛ yu ne -na "ku, -mɔ, ŋɔŋo 'ye 'ɔ 'ŋɔŋo- -lɔ.» 40'Nyakpa -wa -ko lɔbhɔ -wɛ 'silo -lɔ. "Ne Zezu yi -lɔ 'nyakpa 'klekle zɔ 'wloa-. "Ne 'ŋuyu 'ɔ 'to, 'ɔ "nɔ "ne 'ɔnɛɛ gɛlenya -wɛ, 'ɔ 'lubhua- "ku, "ne 'wa yi -lɔ -mee yu 'pe- -wɛ plɛ. 41"Ne 'ɔ yi -lɔ "ɛ yu 'sɔ 'sale "ne 'ɔ yu -lɔ bhulɛle-, 'ɔ nɛɛ: «Talitakum! 'Ɛ sɛ zɔ nɛɛ: ''Yubhueyi, -mɔɔ bhulɛle -lɔ -eyi, glɔ-!» 42Cuu, "ɛ yu 'tekeyi -wɛ yi -lɔ "ku -sɔ, "ne 'ɔ yi -lɔ 'nɔŋo, 'ɔ -kɛ 'ylobɛ kogbɔ "sɔ. "Ɛ doɔ, "ne geji yua -lɔ "ku 'bha-. 43"Ne Zezu yua -lɔ kɔ 'titli, -se 'wa te -kɛ 'de -sɛ -wɛ za. "Ne 'ɔ yua -lɔ bhulɛle- nɛɛ: «'A "nyɛ yu lilɛ.»

Currently Selected:

Malke 5: btg

Highlight

Copy