Malke 16

Zezu 'wlo- gluzɔ, 'ɔ 'sibhɔ- 'ŋwenea 'yliku.

(Matie 28.1-8; Luke 24.1-11; Zaa 20.1)

1-Gbajɛ -bhiɛ lɛ "bhuɔ ne, Magedala 'na Mali, Zake "ne Salome 'wa "nɔ Mali, 'wa -pea -lasiklɔ -se 'wa 'cɛ Zezu 'na -gɛzɛ "ku slu -ka me. 2Dimasi 'na gwlɛlezle 'na zegbakpɔkpɔ "me -dee ylo 'wlole gluzɔ -wɛ, 'lɔbhɔ 'wa -me -lɔ -biɛglo "ku. 3Ŋwɛnɛɛ: «Zaa, -ɔ "kɛ bhɔ 'tiyi -gwli -wɛ -biɛ 'nuɔ "ku -sɛ?» 4'Ŋwenea 'na 'wolo ne, "ɛ 'tiyi -wɛ "ne -biɛ 'nuɔ "ku -ko, 'wa -letiɛ "ne 'ɛ 'kpɔ- nɛ -kɛ kpɛnyee. 5'Wa -plɛ -biɛ "me 'wa 'na 'wolo 'teyigbɔ 'gli- lilikwlɛ -gbɔsɔ "ku, 'ɔ -pla "koti 'fɛɛ "me. 'Ɛ -sɛ 'ŋwenea geji "ku. 'Wa 'gu-. 6'Ɔ nɛɛ: «'A te 'gu! Nazalɛte 'na Zezu -ye 'wa -kole klowa "klo -wɛ za 'pɔ bhɔ 'yli 'a! 'Ɔ "ne -dɛne -ko, 'ɔ 'wlo- gluzɔ, -dee 'ɔ 'pe- nɛ -wɛ -lɔ. 7-Dɛmeda, 'a me -se 'a "kɛ Piɛle "ne gɛlenya 'na -bedia bhulɛle-. 'A -wole 'anye Galile. "Bhle -ce 'ye 'a "kɔ -lɔ 'ylime 'yele. -See 'ɔ bhulɛle- 'anye -wɛ.»

8'Ŋwenea 'wolo- -biɛ "me zɔ. 'Wa "guɔ, 'wa 'tɛtɛle, 'wanɛɛ 'wlime -nyimɔ. 'Wa "ne -kɛ 'nyɔkpɔ 'de -sɛle "gugu za.

Zezu -tuɔ 'ɔyi Madela 'na Mali 'ylime.

(Matie 28.9-10; Zaa 20.11-18)

9Dimasi 'na 'zegbakpɔ "me 'ye Zezu 'wlo- -lɔ gluzɔ, "ne 'ɔ yi -lɔ Magedala 'na Mali 'yliku 'sibhɔ 'tɛ-. 'Ŋɔnɔ -ye Zezu -sɛ zuzu -nyɛnyea -gbɔsɔ keyi -wɛ yɔ -lɔ. 10Madela 'na Mali -me -ye 'ɔ 'ye 'ylime -wɛ 'na 'de gɛlenya -sɛle -ka. 'Wa 'tu 'nyɛze za. 11'Wa 'no- lɛ Mali 'na -ye 'ɔ -bhulɛ -wɛ "me nɛɛ: «Zezu -yɛ, 'e 'yo- 'ylime» "ɛ 'nyakpa -wɛ "no 'dleku -kɛle.

Zezu 'sibhɔ- gɛlenya ''sɔ 'yli "ku

12'Ɛ "kɛ 'ple "bhuɔ ne, gɛlenya "sɔ 'wlo- nɛ "ɛ 'du -wɛ "me zɔ, "ne Zezu yua -lɔ 'yli "ku sibhɔ -visɛ. 13"Ne "ɛ gɛlenya "sɔ -wɛ yi -lɔ 'wlizɔ zi "ne 'wa yi -lɔ 'walua 'de -sɛle, -mɔ, 'wa 'noa 'dleku -kɛle.

Zezu 'sibhɔ- 'ɔnɛɛ gɛlenya -kogbɔ -bholo 'yli "ku

(Matie 28.16-20; Luke 24.36-49; Zaa 20.19-23; Noli 1.6-8)

14'Ɔnɛɛ gɛlenya kogbɔ -bholo -ko lidɛ "ku "ne Zezu yi -lɔ 'yli "ku 'sibhɔ "ne 'ɔ yua -lɔ "ku 'gbɔtɔle- nɛɛ: «'Dlekukɛleɛ "ne 'anye "me -ko, "ne 'a "ne 'yɔbhɔ -gbɔ 'a "kɛ -bɛɛ' "me 'no, "ne -wa 'ye- -ame 'ylime -wɛ 'a "noa 'dleku -kɛle.» 15"Ne Zezu yua 'lelee -lɔ sɛne bhulɛle- nɛɛ: «'A me -glɔ 'klekle "ku, -se 'a "kɛ "bhle 'Denaade 'nyakpa 'klekle -sɛle. 16-Ɔ -kɛ -ame 'dleku -kɛle "ne 'wa "kɔ batɛme 'nyɛ-, 'ɔ nyɔ -wɛ "kɛ -lɔ 'po me. "Ne -ɔ "ne -ame 'dleku -kɛle -wɛ 'ɔ nyɔ -wɛ 'wa yu 'ce 'gbobhlele- "ne weli -kɔ 'ce kɔ 'namale-. 17'Be 'na -ye 'wa "kɛ 'ce -wa -kɛ -ame 'dleku yibhlele- ne lɛ: 'Neɛ 'tɔ "me, 'wa yi zuzu -nyɛnyea 'kpeti- "ne 'wa yi 'ce gbo -lele gbɔ. 18'Wa yi 'tɛbhea "ku 'libhi "ne 'wa -koa nimi. 'Wa kɛ -bɛɛ' 'na -ye 'wa "zo "gu "me -wɛ -li ne, "ɛ -koa -bɛɛ' no. 'Wa yi gwizinya 'kwlɛ 'wli 'piɛ "ne 'wa yi yamale-.»

19Anyinɛnyɔ Zezu "kɛ bhulɛ "bhuɔ ne, 'ɔ 'gblɛ- "nɔgɔ "me. 'Ɔ 'gli- "bhle Lagɔ yɔko, lilikwlɛ -gbɔsɔ "ku. 20"Ne Gɛlenya yi -lɔ -glɔ 'klekle "ku 'Denaade -sɛle -ka me. Anyinɛnyɔ 'kwɛloa "ne "ɛ libhɔ -ye 'wa no -wɛ "me 'ɔ nyoa 'bhɛloɛ -se 'wa "kɛ -li 'na -ɛ sɛ geji "ku -wɛ no. Soɔ 'ye 'ɔ -tua -lɔ 'ylime -gbɔ gɛlenya 'na weli -ye 'wa -bhulɛ -wɛ 'diɛɛ yɛ -lɔ.

Currently Selected:

Malke 16: btg

Highlight

Copy