Matie 9

Zezu -yamalea 'kɔtɔkɔtɔnyɔ

(Malke 2.1-12; Luke 5.17-26)

1Zezu 'gblɛ- gɔlo "me, 'ɔ 'to- jinyɛ, "ne 'ɔ yi -lɔ 'ɔnɛɛ zoku me#9.1 'Ɛ zoku -wɛ, 'du 'ye 'wa la Kafanaɔme -wɛ yɛ -lɔ. Malke 2.1 "me.. 2'Nyakpa -su -gbolulɔbhɔnyɔ, 'ɔ 'pe- -gbɔto "klo, "ne 'wa yu -lɔ Zezu -nɛme. 'Ɔ 'ye- lɛ 'wanɛɛ dlekukɛleɛ 'ylime, 'ɔ yi -lɔ sɛne -gbolulɔbhɔnyɔ bhulɛle- nɛɛ: «'Tamale- 'dleku -ame yowli! -Neɛ' 'nyinyonoli 'na gbo -bhiɛ!»

3-Lɔsloanya 'na yɛ -wa -ko -me lɔbhɔ -wɛ bhulɛle -lɔ 'dlezɔ nɛɛ: «Lagɔ 'ye 'ɔ 'yli -lɔ!» 4Zezu -yi -see 'wa 'pɔ 'dle, "ne 'ɔ yua -lɔ bhulɛle- nɛɛ: «Sɛko bhɔ "ne 'a -kɛ bhɔ 'dlepɔsɛ -nyɛnye 'a?» 5-Bɛɛ' 'na -ɛ yɔle- bhɔ "me "ne -ɛ zi "ɛ -ɛwɛ "ku 'a? 'E "kɛ -no nɛɛ: «-Neɛ' 'nyinyonoli 'na gbo -bhiɛ.» "Ne 'e "kɛ dɛme -no nɛɛ: «-Sɔ "ku -se "nɔŋɔ?» 6'A yibhlele- sɛ -gbɔ 'Nyɔkpɔ Yowli 'bhɛle- -se 'ɔ "kɛ dodo ne "ku 'nyinyonoli 'na gbo 'bhia-. 'Ɛza, Zezu bhulɛle- -lɔ sɛne 'kɔtɔkɔtɔnyɔ: -sɔ "ku, 'libhi -neɛ' -gbɔto "ku -se me sueme.

7"Ɛ 'nyɔkpɔ -wɛ -sɔ "ku, "ne 'ɔ yi -lɔ sueme me. 8'Nyakpa 'na -zakpɛ 'cɛ 'ylime 'ye ne, nyanɔ 'lɔbhoa- -lɔ. Ŋwɛnɛɛ: «Lagɔ me 'ŋlu -se 'ɔ kɛ -kɛ 'nyakpa 'bhɛloɛ "yitɛ 'nyɛ-.»

-See Zezu la- Matie ne lɛ

(Malke 2.13-17; Luke 5.27-32)

9Zezu 'ple, "ne 'ɔ yi -lɔ 'nyɔkpɔ -bholo 'ylime 'ye, 'ɔyi 'wa la -lɔ Matie, 'ɔ 'gli- -lɛposa-bhudu "me. Zezu nɛɛ: «'gɛle- -ame.» Cuu, Matie -sɔ "ku "ne 'ɔ yi -lɔ Zezu gɛle-.

10Zezu -nyɛ 'ɔnɛɛ gɛlenya "bhaa 'wa -ko Matie 'na -bhudu "me li dɛku, "ne -lɛposanya -kwleyia, "ne "nyinyonolinonya -yi -me "ɛ lilɛ -wɛ li -ka. 11'Wa 'ye- lɛ -ɛwɛ 'ylime, "ne Faliziɛnya yi -lɔ 'ɔnɛɛ gɛlenya bhulɛle- nɛɛ: «Sɔɔbɛɛza, 'anyɛɛ sloanyɔ -nyɛ -lɛposanya "ne "nyinyonolinonya "bhaa 'wa lili bhɔ 'gɔme 'a?»

12Zezu 'no- "ɛ welicibhɛ -wɛ "me, 'ɔ nɛɛ: «-Wa -yɛ -wɛ 'waa- -na 'nyakpononyɔ 'siɛ tɛle-, -mɔ, 'gwizinya 'tɛle -lɔ 'nyakpononyɔ 'siɛ.» 13-Ame, 'nyɛzedlekɛleɛ 'ye 'e 'yɔbhɔ -lɔ, -mɔ, 'e -na bɔbɔli lo 'yɔbhɔ. Soɔ 'ye 'ɛ kɛleɔ- -lɔ Lagɔbɔgo "me: 'A me -se 'a tɛle- 'ɛnɛɛ zɔsɛsɛ 'siɛ. "Naa-, 'E -na "meŋwinɛlenya la -ka yi, -mɔ, "nyinyonolinonya za 'e -yi -lɔ.

Nuɛteɛ

(Malke 2.18-22; Luke 5.33-38)

14"Ne Zaa Batise 'na gɛlenya yi -lɔ Zezu yɔko 'nyiɔ-, ŋwɛnɛɛ: «Faliziɛnya 'wɔ "bhaa -a te nuɛ, "ne -neɛ' gɛlenya 'wa "ne te nuɛ, sɔɔbɛɛza?» 15Zezu nɛɛ: «'Ŋulele 'luwli kɛ lɔbhɔ -ko, -wa -yi ŋukwɔjajo "klo -wɛ yi bhɔ 'lelee "klo 'nyɛne 'a? -Mɔ, lɔbhɔ yi ylɛ, "ne 'wa yua 'ŋulele 'luwli 'glɛme -sɛ: Lɔbhɔ 'na dɛku, 'wa yi -la nuɛ te.

16'Wa "ne 'libhi -la lokwipɛ -lele "ku "ne 'wa 'cɛ lokwi-gɔgɔ "klo 'kplɛle. "Naa-, 'pɛɛ lele -ye 'wa "zo- lɔbhɔ -wɛ yi "ɛ -gɔgɔ -wɛ 'teti, "ne 'ɛ yi 'yɔlɔ-, "ne 'ɛnɛɛ -gwe yi "me 'kpɔmale-. 17'Wa "ne 'slu -la duvɛ lele kutu -gɔgɔ "me. 'Wa 'cɛ sɔbhɔ 'sa- ne, "ɛ kutu 'wlɔ, "ne "ɛ duvɛ 'slu -lɔ 'siɛ, kutu "ne -la -le. -Mɔ, duvɛ lele, kutu -lele "me 'wa "zo -lɔ. "Ne 'ɛyi "sɔkpɔsɔkpɔ 'ɛ "ne 'nyimɔ- -lɔ.»

Zezu -yamalea 'ŋɔnɔ -bholo "ne 'ɔ 'golia- 'ŋuyu -digbɔ

(Malke 5.21-43; Luke 8.40-56)

18"Ɛ welicibhɛ ne -ko Zezu nu, "ne Zufonya 'na "cifi -bholo yi -lɔ lɔbhɔ ylɛ "ne 'ɔ yi -lɔ Zezu yɔko 'nyiɔ-, 'ɔ 'pɔ- -kokomini. 'Ɔ nɛɛ: «'Na 'ŋuyu -bhli -dɛme 'nyɔŋo, zaa, yi -se -e "kɔ kwlɛ 'wli 'piɛ -se 'ɔ "kɛ glɔ-.» 19Zezu -sɔ "ku, "ne 'ɔ yi -lɔ "ɛ 'nyɔkpɔ -wɛ 'beku bhli- 'ɔnɛɛ gɛlenya "bhaa.

20'Ŋɔnɔ -bholo -ko -me "ɛ -zakpɛ -wɛ "me, 'ylobɛ 'kogbɔ "sɔ -see 'dlu bhiɔ "me. 'Ɔɔ 'bhale- -lɔ Zezu 'beme, "ne 'ɔ yi -lɔ 'ɔnɛɛ "koti 'na -cɛmɛ kɔ 'sa. 21"Naa-, sɛne 'ɔ -gbɔ 'awɔ -lɔ nɛɛ: «'E kɛ "fu 'ɔnɛɛ "koti 'na -cɛmɛ kɔ 'sa- ne, 'e yi yamale-!» 22Zezu 'bheliɔ- "me, "ne 'ɔ yi -lɔ "ɛ 'ŋɔnɔ -wɛ "ku wolo- too. 'Ɔ nɛɛ: «'Tamale- 'dleku 'na yu! -Neɛ' 'dlekukɛleɛ 'fuɔ -eyi.» Cuu ne, "ɛ 'ŋɔnɔ -yamale.

23Zezu -nyɛ 'ɔnɛɛ gɛlenya "bhaa -ylɛ lɛ "ɛ zufonya 'na "cifi na sueme ne, -jiji gbɔ, lɛglɛ gbɔ, 'nyakpa tu. Zezu nɛɛ: 24«Zaa, 'a 'yli- -na 'se "guɔ, "naa- "ɛ 'ŋuyu -digbɔ ne "ne "ku-, -mɔ 'yla "me 'ɔ -ko -lɔ.» "Ne "ɛ 'nyakpa -wa -ko lɔbhɔ -wɛ sile -lɔ Zezu. 25"Ɛ 'nyakpa -wɛ 'wlo- lɛ -bhudu "me zɔ "bhuɔ ne, "ne Zezu yi -lɔ "bhle bhlɔ-, "ne 'ɔ yi -lɔ yu sɔ 'sale, "ne yu yi -lɔ "ku -sɔ. 26"Ne "ɛ 'de -wɛ yi -lɔ -glɔ 'klekle ŋwɛne-.

Zezu -yamalea -kpelɔbhɔnya "sɔ

27-Sɔɔdɛku Zezu -ko nɛ me dɛku -wɛ, -kpelɔbhɔnya "sɔ -bhlu 'beku "ne 'wa 'kpa nɛ -lɔ "me nɛɛ: «Davide yowli, "pɔ -anyɛɛ 'nyɛzedle.»

28Zezu -plɛ -bhudu "me "ne, "ɛ -kpelɔbhɔnya -wɛ yu -lɔ yɔko 'nyiɔ, Zezu nɛɛ: «'A -kɛ bhɔ 'dleku -gbɔ 'e 'yi 'bhɛle-?» Ŋwɛnɛɛ: «-Ɛɛ, "Bhenyɔ, -e 'bhɛle-.» 29"Ne Zezu yi -lɔ 'wanɛɛ 'yli kɔ ze, 'ɔ nɛɛ: «-see 'a -kɛ 'dleku -wɛ 'ɛ ylɛle- sɔbhɔ.» 30Gbɛklɛklɛ, "ne 'wanɛɛ 'yli yi -lɔ "ku 'vuluɔ-. "Ne Zezu yua -lɔ kɔ 'titli -gbɔ: «'nyɔkpɔ te -kɛ sɛ yibhlele- gou!» 31-Kpelɔbhɔnya 'bha- lɛ doɔ, -glɔ 'klekle "ku 'wa -me -lɔ 'de -sɛle -ka.

Zezu -yamalea 'nyɔkpɔ -ɔ "ne 'di gbo -wɛ

(Luke 11.14-15)

32-Dee "ɛ -kpelɔbhɔnya "sɔ ne -ko nɛ "zo 'wlo dɛku -wɛ, 'wa -nɛme 'nyɔkpɔ -bholo -ɔ "ne 'di 'gbo, "ne zuzu -nyɛnye -ko keyi -wɛ. 33Zezu "kɛ "ɛ zuzu -nyɛnye -wɛ kpeti- "bhuɔ ne, "ɛ 'nyɔkpɔ -wɛ 'gbo 'ɔ 'di -lɔ cuu, -wa -ko lɔbhɔ 'klekle -wɛ geji 'bhoa- "ku. "Ne 'wa no -lɔ nɛɛ: «-A -na 'ce -zɛ soɔ 'na -li Izlayɛle 'ylime 'yele!» 34'Ɛyi 'ye Faliziɛnya no -lɔ nɛɛ: «Zuzu -nyɛnyea 'na "cifi gbɔ -lɔ za 'ɔ "kpeti -lɔ Zuzu -nyɛnyea 'nyakpa keyi.»

Zezu 'pɔ- 'nyakpa 'na 'nyɛzedle

(Malke 6.6; Luke 10.2)

35Zezu me 'awɔ 'du 'tekeyi, "ne 'du "yitɛ 'klekle "ku. 'Ɔ sɛle 'awɔ Zufonya 'na "mebhubhɔlebhudu "me Lagɔ 'na 'Kamalezikpɛ "me 'na 'Denaade, "ne 'ɔ yamalea 'awɔ 'nyakpa 'na 'lɔbhɔgu 'klekle. 36Zezu -wolo lɛ "ɛ 'nyakpa 'na -zakpɛ -wɛ "ku ne, 'nyɛze lɔbhɔ- -lɔ, "naa-, 'wa 'kplɛ- "ne gbo -bhua 'dleku, 'wa -ko sɛgbɛɛ wlia 'na -wa "ne lɛ gɛlenyɔ -kɛ. 37"Ne Zezu yi -lɔ 'ɔnɛɛ gɛlenya bhulɛle- nɛɛ: «'lɛɛ 'kpɔ kpɛnyee, -mɔ "bhle 'na libhɔnonya ne -zu. 38Zaa 'a bhubhɔ- 'lɛɛbhenyɔ -se 'ɔ "kɛ "bhle 'na libhɔnonya -nɛme.»

Currently Selected:

Matie 9: btg

Highlight

Copy