Matie 22
22
Zezu -bhulɛ ŋukwɔjajo 'na lilɛliweli
(Luke 14.15-24)
1"Ne Zezu yua 'lelee -lɔ nunɛ "pɔle nɛɛ: 2«Lagɔ 'na 'Kamalezikpɛ 'wlole- -klɔgbɔnyɔ -ɔ -pi 'ɔnɛɛ yu 'na ŋukwɔjajo 'na lilɛ. 3"Ne 'ɔ yi -lɔ 'ɔnɛɛ "kulɔbhɔnya lebhe- -gbɔ, 'wa me 'nyakpa la -ka, -se 'wa "kɛ ŋukwɔjajo "klo 'na lilɛ li -ka yi. -Mɔ, "ɛ -ye 'wa la- -wɛ nɛɛ 'wa -ka yi. 4"Ne 'ɔ yi 'lelee -lɔ 'ɔnɛɛ "kulɔbhɔnya 'na -vinoa 'lebhe -gbɔ 'wa me -se 'wa bhulɛle- "ɛ -ye 'wa la- -wɛ nɛɛ: 'E 'di- 'neɛ -bhilia "ne 'neɛ wlia 'na -wa -ko 'kpe "me -wɛ 'wli "ku "ne 'e yi -lɔ "ɛ ŋukwɔjajo 'na lilɛ pi, 'ɛ 'ya yli zaa, 'a yi "ɛ -jajolilɛ li -ka. 5-Mɔ, 'wayi, 'wa "ne 'yliku "zolea- zaa, -ɔwɛ -me 'ɔnɛɛ 'lɛɛ "me, "ne -ɔwɛ -me 'ɔnɛɛ 'pɔlo "pɔ ka. 6'Wanɛɛ -wawɛ 'sa- "ɛ "kulɔbhɔnya kɔ ne 'wa 'lɔbhoa- "ne -bedia "ku-. 7"Ɛ -klɔgbɔnyɔ "kɛ "ɛ weli -wɛ "me 'no ne, 'kɛle 'ye 'ɔ 'pɔ- -lɔ "ne 'ɔ yi -lɔ 'ɔnɛɛ "slojanya 'lebhe- -gbɔ 'wa me -se 'wa 'lɔbhɔ "ɛ 'nyakpa -wɛ -se 'wa 'siɛ- 'wanɛɛ 'du "yitɛ -wɛ. 8"Ne 'ɔ yi -lɔ 'ɔnɛɛ "kulɔbhɔnya bhulɛle- nɛɛ: Ŋukwɔjajo "ku 'na lilɛ -yli, -mɔ, -ye 'wa la- -wɛ ne "ɛ -jajo ne "ku 'na yisɛ -kɛ. 9Zaa, 'a me -gwe gbata "me -se 'a la -ye 'a -kɛ lɔbhɔ -ylele 'klekle -se 'a -nɛmoa "ɛ ŋukwɔjajo ne "ku. 10"Ne "ɛ "kulɔbhɔnya -wɛ yi -lɔ zɔ 'wlo "ne 'wa yi -lɔ -gwe -gbata "me me, "ne 'wa yi -lɔ -ye 'wa -ylele lɔbhɔ 'klekle -wɛ, "nyɛnyea -nyɛ "namanoa 'wɔ "bhaa 'wli "zo, "ne "ɛ -bhuducibhɛ -mee 'wa "kɛ -jajolilɛ lile- -wɛ yi -lɔ 'yiɛ -gwizi.
11'Ɛ ylɛle- -la lɛ "ɛ soɔ "bhuɔ ne, "ne "ɛ -klɔgbɔnyɔ yi -lɔ "ɛ -bhudu -wɛ "me 'plɛ -se 'ɔ "kɛ 'nyakpa -wa 'gli- "bhle -wɛ 'ylime 'ye, 'ɔ 'na 'wolo, 'nyɔkpɔ -bholo "ne -jajokoti "me -pla. 12"Ne 'ɔ yu -lɔ bhulɛle- nɛɛ: -A 'tito, -see -e "zo bhɔ "ne -e "ne -jajokoti "me -pla "ne 'e yi "ɛ mɛne plɛ 'a? "Ɛ 'nyɔkpɔ -tli "ku toto. 13Zaa, "ɛ -klɔgbɔnyɔ yi -lɔ 'ɔnɛɛ "kulɔbhɔnya la, 'ɔ nɛɛ: 'A 'gbɛte- 'ɔnɛɛ sɔ -nyɛ bho "bhaa klekle, -se 'a "pɔ zikpɛ "ku 'na titiɛ -gwli -wɛ "me, -se 'ɔ "kɛ "bhle -wɛ 'tule, -se 'ɔ "kɛ 'glɛ nimi. 14"Ne Zezu yi -lɔ no nɛɛ: Lagɔ la- 'nyakpa -kwleyia, -mɔ, -ye 'ɔ sɛ lɔbhɔ -wɛ "ne -zu.»
Zezu -sɛ -lɛposaweli keyi
(Malke 12.13-17; Luke 20.20-26)
15"Ne Faliziɛnya yi -lɔ 'wli "zo ka "me, -se 'wa "kɛ Zezu weli 'na -gbotu 'cile-. 16"Ne 'wa yi -lɔ 'wanɛɛ gɛlenya 'na yɛ "ne Elode 'na keyikonya 'na yɛ Zezu "ku 'lebhele- -gbɔ 'wa yi -se 'wa "kɔ bhulɛle- nɛɛ: «Slonyɔ, -a -yi sɛ -gbɔ -e bhulɛ gbaa, "ne -ye Lagɔ no -gbɔ -a no -wɛ, -e sloa -anye gbɛklɛklɛ "me, "ne -e "ne 'gu 'nyɔkpɔ -gɛ gou, "naa-, -e "ne 'wolo- 'nyɔkpɔ 'na kosɛ "ku. 17Zaa, bhulɛle- 'se -anye, -see -e 'pɔ 'dle -wɛ: -A yi bhɔ -lɛpo 'peɛle 'Kamalenyɔ Sezale kɔ, -Mɔ, -a -cɛ bhɔ 'peɛle?»
18-Mɔ, Zezu 'ye- 'wanɛɛ 'dlepɔsɛ -nyɛnye 'ylime, "ne 'ɔ yua -lɔ bhulɛle- nɛɛ: «'Nyakpa -gbeyia -lɛ! Sɔɔbɛɛza 'a 'bea bhɔ -ame "me 'a?» 19'A tua- 'se -ame "ɛ 'dlasi -ye 'a 'peɛle -lɛpo nu -wɛ 'ylime. "Ne 'wa yu -lɔ 'tamayɛ 'ylime tua-. 20"Ne 'ɔ yua -lɔ lo 'yɔbhɔ nɛɛ: «"Ɛ 'tamayɛ ne "klo, -nyɔ 'na 'wli "ne -nyɔ 'na 'tɔ -ko bhɔ lɔbhɔ -tia 'a?» 21Ŋwɛnɛɛ: «'Kamalenyɔ Sezale.» "Ne Zezu yua -lɔ bhulɛle- nɛɛ: «-Ɛ -noɔ 'Kamalenyɔ Sezale -nɛ yɛ -wɛ, 'a 'je Sezale kɔ. -Ɛ -noɔ Lagɔ -nɛ yɛ -wɛ 'a 'je Lagɔ kɔ.» 22'Wa "kɛ "ɛ weli -wɛ 'no ne, 'ɛ -nyoa 'klekle "ne 'wa yi -lɔ Zezu yɔko 'bha-, "ne 'wa yi -lɔ me.
Zezu nɛɛ: Glukonya yi 'ce gɔlɔ-
(Malke 12.18-27; Luke 20.27-40)
23-Zlewɛ, Saduseɛnya, -wa "ne gluzɔwloɛ 'dleku -kɛ 'nyiɔ- -lɔ Zezu yɔko, "ne 'wa yu -lɔ lo 'yɔbhɔ nɛɛ: 24«Slonyɔ, Moyize nɛɛ: 'Nyɔkpɔ "mɔ yu -gwɛle "ne 'ɔ kɛ "ku-, 'ɔ "nɔwli 'libhi- 'ɔnɛɛ 'kwiziŋɔnɔ "ku -se 'ɔ "kɔ 'beme "zo. 25Zaa, "nowlia gbɔsɔ -ko 'awɔ -anyɛɛ zoku. 'Ɔnɛɛ tɛtɛnɔ -kwɔ 'awɔ 'ŋɔnɔ, -mɔ, 'wa "ne yu -gwɛle, "ne 'ɔ yi -lɔ "ku, "ne 'ɔ yi -lɔ 'ɔnɛɛ 'ŋɔnɔ 'ɔ "nɔwli 'na "sɔnɔ -wɛ yɔko tle-. 26Sɛbhele -wɛ 'ɛ -ylɛle -lɔ, "sɔnɔ, tanɔ "ne 'wayi gbɔsɔ -kpɔ -wɛ 'na dɛku. 27-Ye 'wa "ku- -da 'klekle "bhuɔ -wɛ, "ne "ɛ 'ŋɔnɔ -wɛ yi -la -lɔ "ku me. 28Zaa, -glukonya kɛ 'ce gluzɔ 'wlo-, 'wayi gbɔsɔ -kpɔ 'glɛme 'na -nyɔ 'na 'ŋɔnɔ 'ɔ "kɛ 'ce bhɔ "zo 'a? Sɛko -wɛ, 'wayi gbɔsɔ -kpɔ -yibhlelo 'ŋɔnɔ "ku zɛ.» 29"Ne Zezu yua -lɔ bhulɛle- nɛɛ: 'Kwlɛ 'ye 'a bhli -kɛ -lɔ, sɛko -wɛ, 'a "ne Lagɔbɔgo "me 'na -ɛ kɛleɔ- "bhle -wɛ "ne Lagɔ 'na 'bhɛloɛ -yi. 30"Naa-, -glukonya kɛ 'ce gluzɔ 'wlo- ne, 'widi -nyɛ 'ŋɔnɔ "bhaa 'wa -ka -la 'kwɔkwɔle-. -Mɔ, 'wa yi 'ce "nɔgɔzilia 'nasɛ ko "nɔgɔ "me. 31Zaa, 'ɛ kɛ gluzɔwloɛ yɛ, 'a "ne bhɔ -ye Lagɔ -bhulɛle 'anye -wɛ "me -zɛle. 32Sɛne 'ye 'ɔ lɛ- -lɔ nɛɛ: «'Mɔɔ -noɔ -lɔ Ablame 'na Lagɔ yɔ, Izake 'na Lagɔ yɔ, "ne Zakɔbo 'na Lagɔ yɔ. Lagɔ "ne -kɛ 'kwia 'na Lagɔ yɔ, -mɔ, -yɛyɛnya 'na Lagɔ yɔ -lɔ.» 33"Ɛ 'nyakpa 'na zakpɛ -wɛ "kɛ Zezu 'na weli 'yukwli 'fo "bhuɔ ne, 'ɔnɛɛ sloasɛ 'poa- 'ŋutɛ "ku.
-Lɔ "me 'na gbagbɛ "yitɛ
(Malke 12.28-34; Luke 10.25-28)
34'Wa 'cɛ 'no -gbɔ Zezu 'gba- Saduseɛnya 'na nuɛ "ku ne, Faliziɛnya 'wli 'wa "zo- -lɔ. 35'Wanɛɛ 'glɛme 'na -bholo -ɔ -noɔ -Lɔslonyɔ yɔ -wɛ 'yɔbhɔ- -lɔ Zezu lo -se 'ɔ "kɔ weli 'na -gbotu 'cile-! 36'Ɔ nɛɛ: «Sloanyɔ, -Lɔ "me 'na gbagbɛ "yitɛ 'pa- bhɔ lɛ 'a?» 37"Ne Zezu yu -lɔ bhulɛle- nɛɛ: «Wamale- Anyinɛnyɔ -neɛ' Lagɔ -neɛ' 'dlezɔ, -neɛ' 'wugɔŋo "me, "ne -neɛ' 'dlepɔsɛ 'klekle "me. 38Gbagbɛ 'na -ɛ 'kpɔ- "ne -ɛ -noɔ tɛkɛnɛ yɛ -wɛ -lɔ. 39Gbagbɛ 'na "sɔnɛ -ɛ 'kpɔ -me 'lelee ne lɛ: Wamale- -eluyu -see -e -wa -eyi -wɛ. 40-Ye 'wa kɛle- Moyize 'na -Lɔbɔgo "me 'klekle "ne -ye "guɔkwɔmenya -sloa -wɛ, "ɛ gbagbɛ "sɔ -wɛ 'ɛɛ -su -lɔ.»
Ŋwɛnɛŋwɛnɛyu "ne Davide
(Malke 12.35-37; Luke 20.41-44)
41Faliziɛnya "zo- 'wli "ne Zezu yua -lɔ lo 'yɔbhɔ nɛɛ: 42«-See 'a "pɔ bhɔ Klise za 'dle 'a? -Nyɔ 'na yu yɔ bhɔ?» "Ne 'wa yu -lɔ bhulɛle- nɛɛ: «Davide 'na yu yɔ -lɔ.» 43"Ne Zezu yua -lɔ bhulɛle- nɛɛ: «-See 'ɛ "kɛ bhɔ "me ko "ne Davide -ye Zuzu Wlewle 'kwlile- "ku lɔ- Anyinɛnyɔ? 44"Naa- Davide nɛɛ:
Anyinɛnyɔ -bhulɛle Anyinɛnyɔ:
Yi -se 'gli- 'neɛ lilikwlɛ -gbɔsɔ "ku,
-se 'e "kɛ -neɛ' -gblenya -eyi bhɔzɔ "zo "bhuɔ.
45Zaa, Davide kɔ Anyinɛnyɔ la-, -see 'ɔ -noɔ bhɔ 'lelee 'ɔnɛɛ yu yɔ 'a?»
46Faliziɛnya 'glɛme 'na -ɔ "kɛ 'ɔnɛɛ weli -cibhɛ keyi sɛ "ne -lele. 'Ɛ 'bhale- -la lɛ doɔ ne, 'nyɔkpɔ "no -da lo 'yɔbhɔ-.
Currently Selected:
Matie 22: btg
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
