Luke 4

Sata 'bea- Zezu "me

(Matie 4.1-11; Malke 1.12-13)

1Zuzu Wlewle 'kwlile- Zezu "ku, 'ɔ 'bha- Zludɛbɔ "me. "Ne Lagɔ-zuzu yu -lɔ 'kɔsɛku kɔme-. 2Sata 'beɔ- "me 'yli 'glo "sɔ. 'Ɔ "ne li nɛ lilɛ "ɛ 'yli yɛ -wɛ "me. Lɔbhɔ "kɛ 'ple ne, "ne ŋɔŋo yu -lɔ 'lɔbhɔ-. 3"Ne "ɛ Sata yu -lɔ bhulɛle- nɛɛ: -E kɛ 'diɛɛ Lagɔ 'na Yu yɔ, bhulɛle- "ɛ 'tiyi ne 'wɔ -se 'ɛ "kɛ "fɔlɔ "me 'ylile-. 4"Ne Zezu yu -lɔ bhulɛle-, 'ɔ nɛɛ: «'Ɛ kɛleɔ- Lagɔbɔgɔ "me -gbɔ: 'Nyɔkpɔ "ne lɔbhɔ -ko "fɔlɔ 'ɛyikɔ za.» 5"Ne "ɛ Sata yu 'lelee -lɔ -zicɛtlo 'vli kɔme-, "ne 'ɔ yu -lɔ dodo ne "ku 'na -glɔ 'klekle -nyɛ "bhle 'na -klɔgbɔ "bhaa 'ylime tua-. 6"Ne 'ɔ yu -lɔ bhulɛle- nɛɛ: 'E yi -eyi "ɛ 'bhɛloɛ -wɛ kɔ 'je, 'ɛ -nyɛ dodo ne "ku 'na -klɔgbɔ "bhaa. Sɛko -wɛ -ame 'ye 'wa 'je- -lɔ kɔ, "ne 'e 'je -lɔ -ye 'e 'yɔbhɔ -wɛ kɔ. 7Zaa -eyi, -e kɛ -ame "zo-, 'e 'yi -eyi kɔ 'je 'klekle. 8"Ne Zezu yu -lɔ bhulɛle- nɛɛ: 'Ɛ kɛleɔ- Lagɔbɔgo "me nɛɛ: Anyinɛnyɔ -neɛ' Lagɔ 'ye -e "kɛ 'ce -lɔ "zo, "ne 'ɔyi -bholo -kpee 'ye -e "kɛ 'ce -lɔ "ku lɔbhɔ-.

9"Ne "ɛ Sata yu -lɔ Zeluzalɛme kɔme-, "ne 'ɔ yu -lɔ "Mebɔbɔlebhudu 'na "nɔgɔ didigbe 'vli kɔme-, "ne 'ɔ yu -lɔ bhulɛle- nɛɛ: -E "kɛ 'diɛɛ Lagɔ 'na Yu yɔ, 'gbeti. 10"Naa-, sɛne 'ɛ kɛleɔ- -lɔ nɛɛ: 'Ɔ yi 'ce -neɛ' za 'ɔnɛɛ "nɔgɔzilia bhulɛle- -gbɔ 'wa slu- -eyi. 11"Ne 'wa yi 'lelee -eyi kɔ slu- -se -e te -kɛ 'tiyi gɔzɔ -wɛ. 12"Ne Zezu yu -lɔ bhulɛle- nɛɛ: «'Ɛ 'kɛleɔ- -me 'lelee Lagɔbɔgɔ "me nɛɛ: Te -kɛ Anyinɛnyɔ -neɛ' Lagɔ "me 'bea-.»

13'Ɔ "kɔ -li 'klekle "me 'beale- "bhuɔ ne, "ne "ɛ Sata yu -lɔ 'guɔ 'ylile- -kaa "tɛnye -ye 'wa -sɛ lɔbhɔ -wɛ "kɛ ylɛ.

Zezu 'ci 'ɔnɛɛ libhɔ "ku Galileglɔ "me

(Matie 4.12-17; Malke 1.14-15)

14"Ne Zuzu Wlewle -ko Zezu "ku, "ne 'ɔ yi -lɔ -glɔ -ye 'wa la Galile -wɛ 'wlizɔ zi, "ne 'ɔnɛɛ 'tɔ yi -lɔ "bhle ŋwɛne- 'klekle. 15"Ne 'ɔ 'sloa 'awɔ -lɔ 'wanɛɛ "mebhubhɔlebhudu "me Lagɔweli, "ne 'wayi 'klekle 'kwɔ 'awɔ -lɔ 'ŋlu.

Nazalɛte 'na 'nyakpa -sɛ Zezu 'na lo

16'Ɔ -yi Nazalɛte -mee 'ɔ 'bhoɔle- -wɛ, 'ɔ -plɛ -gbajɛ -zle "mebhubhɔlebhudu "me, -see 'ɔ 'sɛ "kle -wɛ, "ne 'ɔ yi -lɔ "ku -sɔ, -se 'ɔ "kɛ Lagɔbɔgo "me zɛle. 17"Ne 'wa yu -lɔ "guɔkwɔmenyɔ Ezayi 'na "bɔgo kɔ 'je, "ne 'ɔ 'yi -lɔ vulu-, "ne 'ɔ yi -lɔ 'cibhɛ ne 'na -dee 'ɛ kɛleɔ- -wɛ yle:

18Anyinɛnyɔ 'na zuzu -ko -ame "ku,

sɛko -wɛ nea, 'ɔ 'ŋwɛnɛ- -ame,

-se 'e "kɛ 'Denaade 'nyɛzenya -sɛle.

'Ɔ -lebhe -ame

-se 'e "kɛ -jiɛnya 'lu 'wlime -sɛ, -se 'e "kɛ -kpelɔbhɔnya 'na 'yli "ku vulu-,

-se 'e "kɛ -ye 'wa ziɛ 'nyɛze -wɛ 'na galu 'di.

19-Se 'e "koa 'de -sɛle nɛɛ Anyinɛnyɔ 'na "nɛnekoɛ 'na 'ylime 'ye -ylobɛ ne lɛ.

20"Ne 'ɔ yi -lɔ "ɛ "bɔgo -wɛ giglilea-, "ne 'ɔ 'yi -lɔ "kulɔbhɔnyɔ kɔ 'je, "ne 'ɔ yi -lɔ -duku 'gli. -Wa -ko "ɛ "mebhubhɔlebhudu "me -wɛ, 'wa 'wolo -lɔ "ku 'wewe. 21"Ne 'ɔ yi -lɔ 'wanɛɛ bhulɛle- -ku ci. 'Ɔ nɛɛ: -Zeka ne "me, -ɛ kɛleɔ- -wɛ 'wlole- -lɔ 'yli, 'anye -wa 'no- "me -wɛ za. 22Zɛzɛ -weli -ɛ 'bhalo 'nu -wɛ 'poa 'awɔ 'ŋutɛ "ku, "ne 'wayi 'klekle yu -lɔ -ye 'wa 'ye 'ylime -wɛ 'na 'de 'sɛle-, "ne 'wa lɛ -lɔ sɛne nɛɛ: 'Ɔ ne bhɔ Zozɛfo 'na yu -wɛ yɔ? 23"Ne Zezu yua -lɔ bhulɛle- nɛɛ: «'Diɛɛ 'a yi -ye 'a 'yɔbhɔ -wɛ bhulɛ-, "ne 'a yi no nɛɛ: Dotlɛyu, yamalea- -eyi -eyigɛsɛ.» Li 'klekle -ɛ -ylɛle Kafanaɔme -wɛ, 'no -me 'se -neɛ' zoku! 24"Ne 'ɔ yi 'lelee -lɔ sɛne lɛ nɛɛ: -Ɛɛ, 'e bhulɛle 'anye nɛɛ: "Guɔkwɔmenyɔ "ne -la 'ɔ "luku "plome -ko. 25-Ye 'e -bhulɛle 'anye ne, gbɛklɛklɛ yɛ -lɔ. -Sɔɔdɛku, Eli -noɔ nɛ "guɔkwɔmenyɔ yɔ -wɛ, 'kwiziŋwenea -zu 'awɔ Izlayɛle. "Ne "nɔgɔ yi -lɔ "ku gbɔ- 'ylobɛ ta 'ce 'gbeplo 'na dɛ, "ne 'guŋɔŋo yi -lɔ 'du 'klekle "ku yi, 26'wa "ne nɛ Eli "ɛ kwiziŋwenea 'na -bholo "ku lebhele, -mɔ, kwiziŋɔnɔ -bholo -ɔ -ko Salɛta, Sidɔ -du "ku -wɛ. 27"Guɔkwɔmenyɔ Elize 'na "tɛnye -wɛ "me: 'Zlɛlɔbhɔnya -zu 'awɔ Izlayɛle. "Ne 'wayi 'glɛme 'na -bholo "ne 'wlele -plɛ. -Mɔ, Silinyɛyu Naama 'ɔyikɔ 'ɔ yamale- 'awɔ -lɔ.

28'Wa "kɛ "ɛ weli -wɛ "me no ne, 'kɛle 'lɔbhɔloa- 'awɔ -lɔ "mebhubhɔlebhudu "me. 29'Wa -sɔ "ku, 'wa -sɛ Zezu "ɛ 'du -wɛ "me, "ne 'wa yu -lɔ tlo 'vli, -dee 'wa 'dile- 'wanɛɛ 'du -wɛ kɔme-, -se 'wa "kɔ zɔ "pɔ. 30-Mɔ, 'ɔ ylɛloa jijɛku, "ne 'ɔ yi -lɔ 'ɔnɛɛ -gwe bhli.

Zezu -kpeti 'nyɔkpɔ 'na zuzu -nyɛnyea Kapanaɔmedu "me

(Malke 7.21-28)

31Zezu -yi Kafanaɔme, Galile 'na 'du -bholo yɛ -lɔ, "ne 'ɔ yi -lɔ -gbajɛzle Lagɔweli 'sloa-. 32'Ɔnɛɛ sloasɛ sɛ 'awɔ -wa -fo 'yukwli -wɛ geji "ku, "naa-, 'ɔ bhulɛ nɛ 'kamalea sɛku. 33"Ɛ "mebhubhɔlebhudu -wɛ "me, 'nyɔkpɔ 'ye zuzu -nyɛnye -ko keyi -wɛ 'ko "bhle, "ne 'ɔ 'kpa -lɔ "me "yitɛ "ku. 34Aaa, Nazalɛte 'na Zezu, -ye -e 'yɔbhɔle bhɔ -anye "me -tia 'a? -E "kɛ -anye "kwlɛ 'bhilia- za -e -yi bha? -Ame, 'e -yi 'neɛmɔ -ye -e -noɔ, Lagɔ 'na lebhelebhleyu -ɔ -ko 'Wlewle 'ye -e -noɔ -lɔ. 35"Ne Zezu yi -lɔ "ɛ Zuzu -nyɛnye -wɛ 'nuɔ "ku bhli, 'ɔ nɛɛ: «'Tli doɔ "ku, -se 'bha- 'nyɔkpɔ ne keyi!» "Ne "ɛ zuzu -nyɛnye yi -lɔ "ɛ 'nyɔkpɔ -wɛ zɔ "pɔ, 'nyakpa 'klekle 'yliku -mɔ 'ɔ "no nyɛnye -no. 36"Ne 'wliku tlu 'awɔ 'nyakpa 'klekle, "ne 'wa 'yɔbhɔyɔbhɔle- 'awɔ -lɔ lo nɛɛ: -Ɛwɛ sɔɔ -weli yɛ bhɔ! "Ne 'ɔ bhulɛ -lɔ 'kamalesɛ, "ne bhɛloɛsɛ "ku zuzu -nyɛnyea, "ne 'wa 'wlozɔ. 37"Ne Zezu 'na 'tɔ yi -lɔ Galile 'na -glɔ 'klekle "ku ŋwɛne-.

Zezu -yamalea 'gwizinya -kwleyia

(Matie 8.14-17; Malke 1.29-34)

38Zezu "kɛ "mebhubhɔlebhudu "me zɔ 'wlo ne, Simɔ 'na sueme 'ye 'ɔ -me -lɔ, "ne Simɔ 'na 'wɔtɔŋɔnɔ 'na ku gbɛtɛ nɛ kpɛnyee "ne 'wa yi -lɔ Zezu bhubhɔ- -gbɔ 'ɔ no -bɛɛ'. 39"Ne 'ɔ yu -lɔ 'wli "ku bhliale-, "ne 'ɔ yi -lɔ "ɛ wɔtlɔ "ku 'gbɔtɔle-, "ne 'ɔnɛɛ ku yi -lɔ "ku wɔtɔ-, "ne 'ɔ yi -lɔ "ku -sɔ cuu, "ne 'ɔ yua -lɔ "ku lɔbhɔ-.

40Kugbedɛku, -wa -kɛ gwizinya -wɛ -nɛmoa Zezu, "ne 'ɔ yua -lɔ 'kwlɛ 'wli 'piɛ- -bholo -bholo, "ne 'wa yi -lɔ yamale-. 41Zuzu -nyɛnyea 'bha- nɛ 'nyakpa -kwleyia keyi, "ne 'wa 'kpa nɛ -lɔ "me nɛɛ: Lagɔ 'na Yu 'ye -e -noɔ -lɔ! -Mɔ, 'ɔ "ne 'taloa- nɛ yi "ne 'wa kɛ 'gbo 'di, "naa-, 'wa -yi -see 'ɔ -noɔ Klise yɔ zɛ.

Zezu -sɛle 'Denaade Zude -glɔ "me

(Malke 1.35-39)

42Zle "kɛ 'ze ne, Zezu 'wlo- zɔ, "ne 'ɔ yi -lɔ 'kɔsɛku me. "Ne 'nyakpa 'na -zakpɛ yu -lɔ 'siɛtɛle-, "ne 'wa yu -lɔ yle. "Naa- 'wa "ne 'yɔbhɔ nɛ -gbɔ 'ɔ 'ylilua- guɔ, -mɔ 'ɔ "koa yɔko. 43"Ne Zezu yua -lɔ bhulɛle- nɛɛ: 'E -yi -se 'e "kɛ 'du 'na vinɛ -wɛ 'wɔ "ku Lagɔ 'na 'Kamalezikpɛ 'na 'de "bhle -sɛle me 'lelee. "Naa- 'ɛza Lagɔ -lebhe -lɔ -ame. 44"Ne 'ɔ sɛ 'awɔ -lɔ 'Denaade Zude -glɔ "me 'na "mebhubhɔlebhudu "me.

Currently Selected:

Luke 4: btg

Highlight

Copy