Luke 13

Pilate 'lɔbhɔ- Galile 'na 'nyakpa "ne 'wa "ku-

1'Ɛ "tɛnye -wɛ "me, 'nyakpa -yi -lɔ Zezu fɛ 'plɛle- -ka, -see Pilate 'lɔbhɔ- Galile 'na 'nyakpa -kwleyia, "ne 'ɔ -bhlebhlelea 'wanɛɛ dlu 'wanɛɛ bɔbɔli -nɛ lo. 2"Ne Zezu yua -lɔ bhulɛle- nɛɛ: 'A 'pɔ 'dle -gbɔ Galile 'na 'nyakpa -wa "ku- "ɛ soɔ -wɛ 'na 'nyinyonoli 'kpɔ nɛ bhɔ "ne 'ɛ -zi nɛ bhɔ Galile 'na 'nyakpa 'klekle nɛ "ku 'a? 3'Bhɔ! 'E bhulɛle 'anye nɛɛ 'a "mɔ -kɛ kɔ 'bheliɔ-, "ɛ sɛbhele -wɛ 'ye 'a "kɛ -lɔ "ku me 'klekle. 4"Ne, 'nyakpa kogbɔ gbɔɔta -ye Siloe 'na "ku 'jejele-bhudu -bhlile "ku "ne 'wa "ku- -wɛ, 'wanɛɛ 'nyinyonoli 'kpɔ- bhɔ "ne 'ɛ -zi Zeluzalɛme 'na 'nyakpa -nɛ "ku bha? 5'Bhɔ -kɛ, -mɔ, 'e bhulɛle 'anye, 'a "mɔ kɔ 'bheliɔ-, "ɛ sɛbhele -wɛ 'ye 'a "kɛ 'ce -lɔ "ku me.

Fige -su -ɛ "ne tlo 'bhi 'na nunɛ

6"Ne 'ɔ yi -lɔ nunɛ 'pɔ nɛɛ: «'Nyɔkpɔ -bholo -kɛ -lɔ figesu 'ɔnɛɛ 'lɛɛ "me. "Ne 'ɔ 'yi -lɔ 'bhuɛ 'yli 'be -ka "me, -mɔ 'ɔ "ne -bɛɛ' 'yli -ylele. 7"Ne 'ɔ yi -lɔ 'ɔnɛɛ libhɔnonyɔ bhulɛle- nɛɛ: 'Ylobɛ ta ne lɛ -se 'e 'yi -sɛ -ka "ne 'e "ne -ylele "ɛ figesu ne "bhuɛ 'yli. Zaa, 'di "ku. "Fu 'ye 'ɛ nyimɔ -lɔ dodo. 8-Mɔ, "ɛ libhɔnonyɔ -bhulɛlo nɛɛ: "Bhenyɔ, 'tale- -na 'ylobɛ ne "me 'yi -se 'e 'cɛ yɔko "bhlu, -se 'e 'cɛ dodo "namanɔ yɔko 'slu, 9'ɛ yi -lalɛce 'ylobɛ 'na -ɛce "me bhuɛ -tlo, 'ɛ "mɔ -da sɔbhɔ -ylɛle ne, -e 'cɛ -la 'guɔ 'di-.»

Zezu -yamalea -gbajɛzle 'ŋɔnɔ

10Zezu -ko 'awɔ -gbajɛzle Lagɔweli 'slo dɛku "mebhubhɔlebhudu "me. 11'Ŋɔnɔ -bholo -ko -me nɛ lɔbhɔ, -zuzu -nyɛnye "zoɔ- nɛ 'gwiziŋɔnɔ 'na 'ylobɛ kogbɔ gbɔɔta ne lɛ, 'ɔ -gliɔ nɛ "me "ne 'ɔ "ne nɛ 'bhɛle- 'ɔ "kɛ 'ya 'nyegble- gbii. 12Zezu kɔ 'ylime 'ye ne, 'ɔ 'lɔ- "ne 'ɔ yu -lɔ bhulɛle- nɛɛ: «'ŋɔnɔ, -neɛ' 'gu bhiɛ.» 13"Ne 'ɔ yu -lɔ kwlɛ libhi, "ɛ doɔ cuu, "ɛ 'ŋɔnɔ -wɛ yi -lɔ "me 'je "ne 'ɔ kwɔ 'awɔ -lɔ Lagɔ 'ŋlu. 14-Mɔ, "ɛ "mebhubhɔlebhudu "me 'na "cifi 'pɔle- Zezu 'kɛle yɔko, "naa-, 'ɔ -yamalea 'nyɔkpɔ -gbajɛzle zɛ. 'Ɔ "kɛ -zakpɛ "klo glɛ ne, 'ɔ nɛɛ: «libhɔnoyli -yle 'gbeplo, za "ɛ 'yli -wɛ "me 'ye 'a -na yi -se 'wa "kɛ 'anye yamalea-, -mɔ 'ɛ "ne -gbajɛzle yɛ.» 15"Ne Anyinɛnyɔ yu -lɔ bhulɛle- nɛɛ: «'Nyakpa -gbeyia -lɛ, 'anye 'glɛme 'na -bholo "ne -sɛ bhɔ gbajɛzle 'ɔnɛɛ bhli o, -soko o lu 'yli "ne 'ɔ "kɔ 'ŋu nɔmɔ -ka kɔme?» 16"Ɛ 'ŋɔnɔ ne, Ablame 'yɔŋlɔ -ye Sata -gbɛte "ne 'ɛ -bhli 'ylobɛ kogbɔ gbɔɔta -wɛ, 'e 'to nɛ -gbajɛzle vulu-? 17"Ɛ weli -wɛ kɔ 'ye zu 'lɔbhɔ- -lɔ 'ɔnɛɛ gbo 'wli nonya 'klekle, "ne 'ŋwɛnɛ 'lɔbhɔ nɛ -lɔ 'nyakpa -wa 'ye- "ɛ -li 'na -li 'na dɛ -wɛ.

Mutade yɛ 'na nunɛ

(Matie 13.31-32; Malke 4.30-32)

18Zezu nɛɛ: «-Ye 'wa "kɛ bhɔ Lagɔ 'na 'Kamalezikpɛ wɔkɔle- 'a? -Ye 'e 'cɛ bhɔ wɔkɔle- 'a? 19'Ɛ -ko sɛgbɛɛ suyɛ -ye 'wa la mutade#13.19 Mutade: -Su 'ɛ tlo bhi nɛ -ko yɛ 'jejeyuɛ "me yɛ -lɔ. -wɛ 'na yɛ, 'ye 'nyɔkpɔ -glo 'ɔnɛɛ 'laabhuɛyi "me, 'ɛ bhoɔ "ne 'ɛ -tlomale "ku, "ne 'zea yi -lɔ 'wanɛɛ -lolɛ 'wli sɔbhɔle -ka.»

Manyɔ 'na nunɛ

(Matie 13.33)

20"Ne Zezu yi 'lelee -lɔ bhulɛ nɛɛ: «-ye 'e "kɛ bhɔ Lagɔ 'na 'Kamalezikpɛ#13.20 Kamale zikpɛ: Lagɔ 'na -klɔgbɔ -du yɛ -lɔ. wɔkɔle- 'a? 21'Ɛ -ko sɛgbɛɛ: Manyɔ -ye 'ŋɔnɔ libhi- "ku, "ne 'ɔ yi "fɔlɔbhobho 'na "kɔpo ta wɔkɔ-, "ne 'ɔ yi manyɔ "me "zo -se 'ɛ "kɛ -kɛ 'flu.»

-Ɔ 'bhɛle- bhɔ -ɔ "kɛ Lagɔ 'na 'Kamalezikpɛ "me plɛ 'a?

(Matie 7.13-14; 21.23)

22-Sɔɔdɛku Zezu 'sloa 'awɔ Lagɔweli -wɛ, 'ɔ ylɛle 'awɔ 'du -jejeyua "ku "ne 'du "yitɛ "ku "ne 'ɔ me 'awɔ -lɔ Zeluzalɛme. 23"Ne 'nyɔkpɔ yu -lɔ lo 'yɔbhɔ- nɛɛ: «Anyinɛnyɔ, 'nyakpa 'na -zakpɛ 'tekeyi "kɛ 'ce bhɔ 'po 'a?» "Ne Zezu yu -lɔ bhulɛle- nɛɛ: 24«'A 'tɔtɔle- -kɛ 'ayi kɔ, -se 'a "kɛ -kɛ -gbanuɛgwe 'tekeyi "me ylɛle- -me, "naa-, 'e bhulɛle 'anye nɛɛ: 'Nyakpa -kwleyia yi 'ce "bhle 'na plɛplɛɛ siɛtɛle-, "ne 'wa -ka 'ce "bhle plɛ. 25-Sɔɔdɛku -bhudubhenyɔ "kɛ 'ce "ku -sɔ "ne 'ɔ "kɛ 'ce 'ɔnɛɛ -bhudu 'gba, 'a yi 'ce zikpɛ "ku to-, "ne 'a yi 'ce -gbulɛ gbɔtɔ "ne 'a yi 'ce no nɛɛ: Anyinɛnyɔ, kɛle- lɔbhɔ, "ne 'ɔ yi 'ce 'anye bhulɛle- nɛɛ: 'Anye, 'e "ne -dee 'a 'bhale -yi.

26"Ne 'a "kɛ 'ce -lɔ no nɛɛ: -Eyi 'yliku -a -li "ne 'a 'nɔmɔ-, "ne -e -slo Lagɔweli 'anyɛɛ digbɛ "me. 27"Ne 'ɔ "kɛ 'ce -lɔ 'anye bhulɛle nɛɛ: 'E ne -dee 'a 'bhale -yi. 'A 'ziɔle- 'se -ame guɔ, 'anye 'klekle -wa no "nyɛnye -wɛ. 28Lɔbhɔ 'ye 'a "kɛ 'ce -lɔ "tule "ne 'a "kɛ 'ce -lɔ 'glɛ nimile-, -sɔɔdɛku 'a "kɛ 'ce Ablame, Izake, Zakɔbo "ne "guɔkwɔmenya 'klekle Lagɔ 'na 'Kamalezikpɛ "me 'ylime 'yele, "ne 'anye 'a "kɛ -lɔ zikpoku pɔ-#13.28 -Ye 'wa "kɛ zikpɛ "ku 'pɔ -wɛ: 'Wa yi 'ce "klo nyɛne "ne 'wa "kɛ 'walua -wa gli Lagɔ 'na 'Kamalezikpɛ "me -wɛ 'ylime 'ye, 'wa yua 'ce 'ylime kamale.. 29'Nyakpa yi 'ce -glɔ 'na -mee ylo 'wlole gluzɔ, -mee 'ɛ me 'duku 'pele- -ka, 'wliku "ne -gluzɔ 'bhale- "ne 'wa yi 'ce "kuzalilɛ Lagɔ 'na -klɔgbɔdu "me dɛbhele lile-. 30Sɔbhɔ 'ye -wa -bhiɛle 'be "kɛ 'ce -lɔ 'yuku gɛle-, "ne -wa -gɛ 'yuku "kɛ 'ce -lɔ 'be bhiɛle-.»

Zezu -bhulɛ Zeluzalɛme 'na "ku 'na weli

(Matie 23.37-39)

31'Ɛ dɛ -wɛ "ku 'ye Faliziɛnya 'na yɛ nyiɔ -lɔ Zezu yɔko "ne 'wa yu -lɔ bhulɛle- nɛɛ: «Me -se 'bha- "ɛ dɛne, "naa-, Elode 'yɔbhɔ -gbɔ 'ɔ "kɛ -eyi 'lɔbhɔ -se -e "kɛ "ku zɛ.» 32"Ne Zezu yua -lɔ bhulɛle- nɛɛ: 'A 'bhulɛle- -kɛ "ɛ -kplɛkplɛnyɔ -wɛ nɛɛ: 'E 'kpeti -kɛ zuzu -nyɛnyea "ne 'e yamalea 'gwizinya -zeka "ne 'zegbɛ, "ne 'ɛnɛɛ 'yli 'na 'tazle nɛ -wɛ "me 'e bhiɛ -lɔ 'neɛ libhɔ kɔ. 33-Mɔ, 'e yi -kɛ 'neɛ -gwe bhli -zeka "ne 'zegbɛ "ne 'ɛnɛɛ zle 'na -vinɛ -wɛ "me 'yiɛ, "naa-, "guɔkwɔmenyɔ "ne "kule -glɔ 'na -vidɛ, 'ɛ "mɔ Zeluzalɛme yɛ. 34Zeluzalɛme 'na 'nyakpa, Zeluzalɛme 'na 'nyakpa, 'anye -wa lɔbhɔ "guɔkwɔmenya "ne 'nyakpa 'na -ye Lagɔ -lebhe 'anye "ku -wɛ 'a lɔbhɔa 'tiyi nu, "ne 'wa "ku, 'e 'yɔbhɔ 'ce -godogodo -gbɔ 'e "kɛ 'anye -ame yɔko 'wli 'yabha- sɛgbɛɛ 'gwaŋɔnɔnunu -nyɛ 'ɔnɛɛ yua "bhaa, -mɔ, 'a "ne "ku 'ŋunu-. 35-Ɛɛ, 'wa yi 'ce 'anyɛɛ -bhudu 'anye kɔ 'tle-, 'e bhulɛle 'anye nɛɛ: 'A -ka -la -ame 'ylime 'ye -kaa, -dee 'a "kɛ -la no nɛɛ: Lagɔ "pɔ -ɔ yi Anyinɛnyɔ 'na 'tɔ "me -wɛ, 'ɔ 'pɔ- 'ŋu, lɔbhɔ "kɛ 'ce -lɔ ylɛ.

Currently Selected:

Luke 13: btg

Highlight

Copy