Marcos 3

Ginpamayad ni Jesus Ro Sangka Tawo nga Kimpay ro Alima sa Adlaw it Inogpahuway

(Mat 12:9-14; Luc 6:6-11)

1Nag-adto it uman si Jesus sa sinagoga#3:1 Daya siguro ro sinagoga sa Capernaum (basaha sa 1:21). ag may tawo idto nga kimpay ro anang alima. 2May mga Pariseo man idto ag ginabantayan nanda kon pamayron ni Jesus ro tawo ngato sa Adlaw it Inogpahuway agod may anda dayon nga ikaakusar kana. 3Gintawag ni Jesus ro tawo ngato ag anang ginhambae, “Tindog iya sa printi.” 4Ginpangutana dayon ni Jesus ratong mga nagabantay kana, “Suno sa Kasuguan, ano ro puyding obrahon kon Adlaw it Inogpahuway? Ro mayad o ro maeain? Magtabang baea o magpatay?” Pero owa sanda magsabat. 5Gintueok ra sanda ni Jesus nga may kaakig pero nasubuan man tungod owa gid sanda it kaeuoy. Ginhambae na dayon ro kimpay ngato, “Untayan ring alima.” Gin-untay na ro anang alima ag nagmayad eagi rato. 6Naggueuwa eagi sa ratong sinagoga ro mga Pariseo ag nagpakigkita sa mga kaapin ni *Herodes agod planuhan kon paalin patyon si Jesus.

Kaabo nga mga Tawo nga Halin sa Sari-saring Lugar ro Nag-adto kay Jesus

7Pagkatapos, si Jesus ag ro anang mga sumueunod hay nag-adto sa baybayon ku Dagat it Galilea ag kaabo-abo nga mga tawo ro nagsunod kanda. Naghalin ra sanda sa probinsya mismo it Galilea. May mga naghalin man sa Judea, 8Jerusalem, Idumea, sa tabok ku suba it Jordan, ag sa palibot ku mga syudad it Tiro ag Sidon. Kaabo-abo gid nga tawo nga nag-adto kay Jesus tungod nakabati sanda ku tanan nga mga ginaobra nana. 9Tungod sa kaabuon ku mga tawo, ginpapahaom ni Jesus it baroto ro anang mga sumueunod ay basi magdueutdutan sanda kana. 10Dahil abo ro anang ginpamayad ngani ro iba pang mga masakiton hay nagadueutdutan paeapit kana agod hibuytan imaw. 11Ag kon hikita ngani imaw it mga maeain nga espirito nga una sa eawas it mga tawo hay anda nga ginapahapa ag ginapasiyagit ro mga tawo nga andang ginsudlan ag ginapahambae it mabaskog, “Ikaw ro Unga it Dyos!” 12Pero ginbinawaean gid ni Jesus ro mga maeain ngato nga espirito nga indi magsugid bisan kanyo kon sin-o imaw.

Nagpili si Jesus it Anang Dose nga ka Apostoles

(Luc 6:12-16)

13Ku ulihi, nagtukad si Jesus sa bukid ag ana nga gintawag ro mga tawo nga gusto nana nga magmunot idto kana ag nag-aeadto dayon sanda kana.#3:13 Sa Luc 6:12-13 hay mabasa naton nga idto si Jesus nagpinangamuyo it sang gabii ag pagkaagahon hay gintawag nana ro anang mga sumueunod nga mag-adto kana. 14Nagpili dayon imaw kanda it dose nga gintawag nana nga mga *apostoles. Ana sanda nga ginpili nga mangin kaibahan nana agod ipadaea bisan siin para magwali parti kana. 15Gintaw-an man nana sanda it otoridad ag gahom sa pagsuboe it mga demonyo sa mga tawo nga andang ginsudlan.

16Ro dose nga ginpili nana hay si Simon (nga ginpangaeanan nana nga Pedro), 17ro mga unga ni Zebedeo nga sanday Santiago ag Juan. (Ginhayuan nana sanda nga Boanerges nga ro buot hambaeon hay “matsa daeugdog” dahil sanda hay mga mainiton it ueo.) 18Kaibahan man si Andres, si Felipe, si Bartolome, si Mateo, si Tomas, si Santiago nga unga ni Alfeus, si Tadeus, si Simon (nga isaeang ka rebelde anay sa paggobyerno it Roma), 19ag si Judas Iscariote nga nagtraidor kay Jesus ku ulihi.

Ro Gahom ni Jesus hay Halin sa Espirito Santo Bukon it kay Satanas

(Mat 12:22-32; Luc 11:14-23, 12:10)

20Nag-adto dayon sanday Jesus sa sangka baeay. Kaabo-abo eon man nga mga tawo ro nag-aeabot idto ngani owa eon makakaon sanday Jesus ag ro anang mga sumueunod ay masako gid sanda. 21Pagkasayod kara ku anang pamilya, gin-adtunan nanda si Jesus agod sueangon ay may nagahinambae nga nasamad eon ro anang ueo. 22May mga maestro man it Kasuguan nga naghalin sa Jerusalem nga naghinambae sa mga tawo, “Ginagamhan imaw ni Beelzebul.#3:22 Ro Beelzebul hay sambilog pa nga tawag kay Satanas. Paagi eang sa gahom ku pinuno ngaron it mga demonyo imaw makasuboe it mga demonyo.” 23Dahil sa andang ginhambae ngaron hay gintawag dayon sanda ni Jesus ag ginsugiran it mga paanggid nga istorya nga ginkomparahan nana sa ratong sitwasyon:

“Paalin ni Satanas hipahalin ro anang kaugalingon? 24Kon ro mga pumueuyo sa isaeang ka nasyon hay nagagrupo-grupo ag perming nagailinaway, indi puydi nga ronduyon nga nasyon hay magbuhay. 25Makaruyon man ro matabo sa sangka panimaeay nga perming nagailinaway. 26Ngani kon si Satanas mismo ro nagasuboe sa anang mga sinakpan nga mga demonyo sa mga tawo nga andang ginsudlan hay ginakuntra nana ro ana mismong kaugalingon. Kon matabo ron hay indi magbuhay ro anang pagdominar ag matapos gid ron.

27“Si Satanas hay pareho it sangka makusog nga tagbaeay nga haperdi ag gin-gapos ag puydi eon matakawan ku anang pagkabutang. Ginperdi ko eon si Satanas mawron nga masuboe ko ro anang mga demonyo nga magguwa sa mga tawo nga andang ginsudlan.

28“Matuod rang ginahambae kinyo nga mapatawad it Dyos ro mga tawo sa tanan nandang mga saea ag pag-insulto sa ibang tawo, 29pero ro nagainsulto sa Espirito Santo hay indi gid pagpatawaron. Owa gid it kapatawaran rondayang saea bisan hasta hin-uno.” 30Ginhambae ra ni Jesus ay may naghinambae abi nga ro espirito kuno nga una kay Jesus hay bukon 't-a it ro Espirito Santo kundi tag maeain 't-a nga espirito.

Ro Nagatuman sa Dyos ro Ginakabig ni Jesus nga Anang Matuod nga Pamilya

(Mat 12:46-50; Luc 8:19-21)

31Samtang nagahambae pa si Jesus hay nag-abot ro anang ina ag mga igmanghod. Idto sanda sa liwan it baeay nagatilindog ag ginpatawag nanda imaw. 32Abo nga mga tawo ro nagaeilingkod palibot kana ag may mga nagsugid dayon kana, “Hato sa liwan si nanay mo ag ro imo nga mga igmanghod. Ginausoy ka nanda.” 33Nagsabat si Jesus, “Huo, una matuod sanda pero sugiran ta kon sin-o ro akon nga ina ag mga igmanghod sa panueok it Dyos.” 34Gintueok nana ro mga nagaeilingkod sa anang libot ag pagkatapos hay naghambae imaw, “Raya ro akon nga ina ag mga igmanghod. 35Ro bisan sin-o nga nagatuman sa pagbuot it Dyos hay ruyon ro akon nga ginakabig nga ina ag igmanghod.”

Currently Selected:

Marcos 3: akl

Highlight

Copy