Mateo 26

Ro Plano nga Patyon si Jesus

(Mar 14:1-2; Luc 22:1-2; Juan 11:45-53)

1Pagkatapos ni Jesus it turo ku rayang mga butang, naghambae imaw sa anang mga sumueunod, 2“Sayod kamo nga daywang adlaw eon lang ag Pagtililipon eon sa Pagdumdum ku *Pagtaliwan. Dikato man ako nga Unga it Tawo hay pagadakpon ag itugyan sa mga magapaeansang kakon sa krus.”

3Ku rato man nga oras, ro mga pinuno it mga saserdote ag ro kaibahan nandang mga lider hay nagtililipon sa palasyo ni Caifas nga pinakapinuno nga saserdote. 4Andang gin-istoryahan kon paalin nanda hidakop it patago si Jesus agod hipapatay imaw. 5Pero hambae man nanda, “Indi naton imaw puyding dakpon sa Pagtililipon ay basi magkagulo ro mga tawo.”

Ginbu-buan it Mahumot nga Banyos ro Ueo ni Jesus

(Mar 14:3-9; Juan 12:1-8)

6Pilang adlaw#26:6 Ap-at nga adlaw ra. Basaha sa Juan 12:1 ag ikompara sa Mar 14:1. pa't-a bago ro mga nagkaeanabo ngaron hay nag-adto anay sanday Jesus sa Betania. Tag idto sanda sa baeay ni Simon nga dating aruon 7hay may sangka bayi nga nag-abot tag nagakaon sanday Jesus. Ro bayi ngato hay may daea nga maeahaeon nga pahumot. Ro sueudlan it pahumot ngato hay human sa bato nga alabastro kon tawgon. Nagpaeapit ro bayi kay Jesus ag ana dayon kara nga ginbu-bu ro pahumot sa ueo ni Jesus. 8Pagkakita kara ku mga sumueunod ni Jesus hay naakig sanda sa bayi. Sinanda sa kada isaea, “Kaumangon 't-a! Ham-an it gin-amulitan 't-a nana ron? 9Kon ginbaligya't-a kunta ron hay abo't-a ron nga kwarta#26:9 Sa Mar 14:5, raya hay “sobra sa 300 ka denaryo.” Ro haega it sang denaryo hay sang adlaw nga sweldo it trabahador ku ratong tyempo. nga ikatao sa mga pobre.”

10Pero sayod ni Jesus ro andang ginaistoryahan ngani naghambae imaw kanda, “Ham-an it ginasura't-a ninyo imaw? Mayad ro ana ngarang gin-obra kakon. 11Ro mga pobre hay kaibahan 't-a ninyo permi pero ako hay indi ninyo mangin kaibahan permi. 12Ginbu-buan nana ako it pahumot agod pahaumon ro akon nga eawas sa akon nga eubong. 13Matuod rang ginahambae kinyo nga bisan siin iwali sa bilog nga kalibutan ro Mayad nga Balita hay igasugid man ro gin-obra ku bayi ngara agod indi imaw malipatan.”

Nakigkunsabo si Judas sa mga Pinuno it mga Saserdote nga Traiduron si Jesus

(Mar 14:10-11; Luc 22:3-6)

14Pagkatapos kara, si Judas Iscariote nga isaea sa dose ka sumueunod ni Jesus hay nag-adto sa mga pinuno it mga saserdote 15ag naghambae, “Ano ro inyong isuhoe kakon kon buligan ko kamo nga madakop si Jesus?” Ginpahauman nanda si Judas it 30 bilog nga pilak.#26:15 Sa mata it mga saserdote ngato, ro haega eang ni Jesus hay pareho it sangka ulipon (basaha sa Exo 21:32). 16Umpisa kato, nagbinantay si Judas it kahigayunan nga ikapadakop si Jesus kanda.

Ginpasayod ni Jesus nga si Judas ro Magatraidor Kana

(Mar 14:12-21; Luc 22:7-13, 21-23; Juan 13:21-30)

17Primero eon rato nga adlaw it Pagtililipon sa Pagdumdum ku Pagkaon it Tinapay nga Owa it Pangpaalsa.#26:17 Ruyon ro adlaw nga nagapatay sanda it tiyo it karnero para sa ihapon sa Pagdumdum ku *Pagtaliwan (Mar 14:12). Ku adlaw ngaron, nagpaeapit kay Jesus ro anang mga sumueunod ag nangutana, “Siin mo gusto nga pahaumon namon ro tanan nga kinahangean nimo para sa aton nga ihapon makaron nga Pagdumdum ku *Pagtaliwan?”

18Nagsabat si Jesus, “Adto kamo sa baeay ku aton ngato nga kilaea idto sa syudad ag hambaeon imaw nga hambae maton ku amon nga maestro hay madali eon lang ro ana nga oras. Iya maton imaw sa inyo magakatipon kaibahan ku anang mga sumueunod sa Pagdumdum ku *Pagtaliwan.” 19Gintuman ku mga sumueunod ro bilin ni Jesus ag nagpahaom dayon sanda it andang ihapon para sa Pagdumdum ku Pagtaliwan.

20Tag gabii eon, si Jesus ag ro anang doseng ka sumueunod hay nag-ihapon. 21Samtang nagakaon sanda, naghambae si Jesus, “Matuod rang ginahambae kinyo nga sambilog kinyo ro magatraidor kakon.”

22Nageain gid ro buot ku anang mga sumueunod ag nagpangutana ro kada isaea kanda kay Jesus, “Bukon it ako, Ginuo, no?”

23Nagsabat si Jesus, “Ro magatraidor kakon hay isaea kinyo nga nagasawsaw ku anang tinapay sa maeukong nga akon man nga ginasawsawan.#26:23 Sa andang kultura, maeain gid kon halitan it sangka tawo ro anang kasaeo (basaha sa Salmo 41:9). 24Magataliwan eon ako nga Unga it Tawo suno sa nasueat sa Sagrado nga Kasueatan. Pero makaeueuoy ro magatraidor kakon ay makangingidlis gid ro matabo kana sa ulihi. Mas mayad pa nga owa eon lang imaw matawo sa rayang kalibutan.”

25Naghambae dayon si Judas, ro magatraidor kana, “Maestro, bukon 't-a it ako, no?”

“Ikaw gid 't-a,” sabat ni Jesus.

Ro Ihapon nga Mangin Padumdum ku Kamatayon ni Jesus

(Mar 14:22-26; Luc 22:14-20; 1 Cor 11:23-26)

26Samtang nagakaon sanda, nagbuoe it tinapay si Jesus ag ginpasaeamatan ra nana sa Dyos. Ginpihak-pihak dayon nana rato ag gintao sa anang mga sumueunod. Naghambae imaw, “Raya ro akon nga eawas. Kan-a ninyo.”

27Nagbuoe dayon imaw it kopa nga may bino ag ginpasaeamatan man ra nana sa Dyos. Gintao dayon nana rato sa anang mga sumueunod ag naghambae, “Inom kamo tanan kara. 28Raya ro akon nga dugo nga gapalig-on ku bag-o nga kasugtanan nga gintao it Dyos sa tawo. Igauea ra para sa kapatawaran it mga saea ku abo nga mga tawo. 29Ginahambae ko kinyo nga halin makaron, indi gid ako mag-inom it makarayang bino hasta indi mag-abot ro oras nga kaibahan ko kamo, pati ro tanan nga mga sinakpan ku akon nga Ama, ag bag-o eon ro tanan.” 30Pagkatapos hay nagkanta sanda it pagdayaw sa Dyos ag nagpanaw dayon paadto sa Bukid it Olibo.

Ginhambae Eagi ni Jesus nga Ipanghiwaea Imaw ni Pedro

(Mar 14:27-31; Luc 22:31-34; Juan 13:36-38)

31Tag nagapanaw eon sanda, naghambae si Jesus sa anang mga sumueunod, “Makaron nga gabii, kamo tanan hay magatalikod kakon ag aywanan ninyo ako. Ruyon ro katumanan ku ginsueat sa Sagrado nga Kasueatan nga, ‘Patyon ko ro manogbantay it karnero ag magakaealhit ro mga karnero.’#26:31 Zac 13:7.

32Pero pagkabanhaw kakon it Dyos hay mauna ako kinyo idto sa Galilea.”

33Naghambae dayon si Pedro kay Jesus, “Ginuo, indi ko gid ikaw pagtalikdan bisan talikdan ka nanda tanan.”

34Ginsabat imaw ni Jesus, “Pedro, matuod rang ginahambae kimo nga sa rayang gabii bago magpamaeo ro manok hay tatlong beses mo nga igapanghiwaea nga kilaea mo ako.”

35Pero nagsabat gihapon si Pedro, “Indi gid ron matabo, Ginuo! Bisan mamatay pa ako kaibahan nimo hay indi ko gid ikaw igpanghiwaea.” Imaw man ron ro ginhambae ku ibang mga sumueunod.

Nagpangamuyo si Jesus sa Getsemani

(Mar 14:32-42; Luc 22:39-46)

36Pag-abot nanday Jesus sa lugar nga ginatawag nga Getsemani,#26:36 Ro Getsemani hay sa may ubos it Bukid it Olibo. naghambae imaw sa anang mga sumueunod, “Pungko eang anay kamo dikara ay mangamuyo pa ako idto sa unahan.” 37Gindaea nana sa unahan si Pedro ag ro daywang ka magmanghod nga mga unga ni Zebedeo. Nakabatyag dayon si Jesus it kasubo ag indi imaw himayang. 38Naghambae imaw kanda, “Matsa mamatay gid ako sa grabi nga kasubo. Iya eang kamo rikara. Ibhi ninyo ako nga magpueaw.” 39Nag-adto pa gid si Jesus sa ueu-unahan ag naghapa ag nagpangamuyo. Hambae nana, “Ama ko, kon mahimo hay pataliwana lang kakon ro grabi nga kasakit nga akon nga aeatubadngon. Pero bukon it akon nga pagbuot ro dapat matuman kundi ro imo.”

40Nagbalik dayon si Jesus sa tatlo nanang ka sumueunod ag haabutan nana sanda nga nagakatueog. Ginpukaw nana sanda ag ginhambae nana si Pedro, “Indi eo't-a kamo makaunong kakon ag makatakod nga magpueaw bisan sang oras eang ay? 41Magbantay kamo ag magpangamuyo nga indi kamo matentar. Naila kunta kamo maghimo it tama pero ro inyong kinaiya bilang tawo hay indi kasarang nga maghimo karon.”

42Bumalik eon man si Jesus sa ueu-unahan ag nagpangamuyo it uman. Hambae nana, “Ama, kon indi puydi nga malikawan nakon ro grabi nga kasakit nga akon nga aeatubadngon hay ro imong pagbuot ro matuman.” 43Bumalik eon man imaw sa anang mga sumueunod ag haabutan nana nga nagakatueog gihapon sanda ay matsa ginasuyop gid ro andang mga mata sa kadueuygon. 44Pumanaw eon man si Jesus sa may unahan ag nagpangamuyo it ikatlong beses. Makarato man gihapon ro anang ginpangamuyo.

45Tapos, nagbalik imaw sa anang mga sumueunod ag ginhambae sanda, “Gapinahuway ag gakinatueog gihapon kamo? Nag-abot eon ro oras nga ako nga Unga it Tawo hay ipadakop ag itugyan sa alima it mga makasasaea. 46Bangon eon kamo. Mapanaw eon kita. Hayra eon ro nagatraidor kakon.”

Gintraidor ag Gindakop si Jesus

(Mar 14:43-50; Luc 22:47-53; Juan 18:3-11)

47Owa pa katapos it hambae si Jesus hay nag-abot si Judas nga isaea sa dose nana nga ka sumueunod. Kaibahan nana ro kaabo-abong mga tawo nga may mga daeang daga ag bakulo. Ro mga tawo ngato hay ginpaadto ku mga pinuno it mga saserdote ag ku kaibahan nandang mga lider. 48Ginhambaean eagi ni Judas ro anang mga kaibahan kon paalin nanda makilaea ro andang daeakpon. Hambae nana, “Ro tawo nga akon nga haruan hay ruyon ro inyong dakpon.”

49Nagdiritso eagi si Judas kay Jesus ag naghambae, “Mayad-ayad nga gabii, Maestro.” Ag ana ra dayon nga ginharuan.

50Nagsabat si Jesus, “Obraha eon kon ano ring panaw iya, mig.” Pinaeapitan dayon ku mga kaibahan ni Judas si Jesus, dinakop ag pinuko.

51Gumabot ku anang daga ro sambilog sa mga kaibahan ni Jesus ag linabo ro ulipon ku pinakapinuno nga saserdote. Nautas ro dueunggan ku ulipon ngato.

52Ginhambae dayon ni Jesus ro nageabo ngato, “Tagban ro imong daga ngaron. Ro nagagamit it daga hay sa daga man mamatay. 53Owa ka baea kasayod nga kon magpangayo ako it bulig sa akon nga Ama hay makapadaea imaw it linibo nga mga anghel makaron eagi? 54Pero kon obrahon ko ron hay indi eon matuman ro nasueat sa Sagrado nga Kasueatan nga dapat matabo ro mga nagakaeatabo ngara.”

55Ginhambae dayon ni Jesus ro kaabo ngato nga mga tawo, “Ano ay? Matsa rebelde't-a ako nga nagdaea pa kamo it daga ag bakulo sa pagdakop kakon. Adlaw-adlaw hay idto ako sa Templo nagalingkod ag nagaturo pero owa ninyo ako kato pagdakpa. 56Pero natabo ra tanan agod ro ginsueat it mga propeta sa Sagrado nga Kasueatan hay matuman.” Pagkahambae karon ni Jesus hay nagpaeagiw dayon tanan ro anang mga sumueunod ag inaywan imaw.

Gin-imbistigar si Jesus sa Atubang it *Sanedrin

(Mar 14:53-65; Luc 22:54-55, 63-71)

57Gindaea si Jesus ku mga nagdakop kana idto sa palasyo ni Caifas nga pinakapinuno nga saserdote kon siin nagtilipon ro mga maestro it Kasuguan ag ro kaibahan nandang mga lider. 58Nagsunod man si Pedro pero idto imaw sa maeayo-eayo. Nagsaylo man imaw sa *lagwirta it palasyo ag pumungko kaibahan it mga gwardya agod hisayran nana kon ano ro matabo.

59Nagtinguha ro mga pinuno it mga saserdote ag ro tanan nandang kaibahan sa *Sanedrin nga makatipon it mato-mato nga ebidensya kuntra kay Jesus agod masintinsyahan nanda imaw it kamatayon. 60Pero bisan abo ro nagtestigo kuntra kana hay owa gid sanda it ebidensya nga magamit agod masintinsyahan imaw it kamatayon.#26:60 Owa sanda it magamit nga ebidensya ay ro mga ginhinambae ku mga testigo ngato hay owa nagtaeabo. Basaha sa Mar 14:56. Ku ulihi, may daywang ka tawo nga nagtindog ag nagtestigo. 61Hambae nanda, “Naghambae ro tawo ngara nga waskon nana ro Templo it Dyos ag patindugon na man kuno it uman sa sueod it tatlong adlaw.”

62Tumindog dayon ro pinakapinuno nga saserdote ag ginhambae si Jesus, “Owa ka gid baea it ikasabat sa ginaakusar ngaron kimo?”

63Pero naghinipos eang si Jesus. Ginhambae eon man imaw ku pinakapinuno nga saserdote, “Magsumpa ka sa ngaean it buhi nga Dyos nga magasugid ka it matuod kon ikaw ro Unga it Dyos, ro Maneueuwas nga anang ginpromisa.”

64Nagsabat si Jesus, “Ako gid ma't-a. Pero ginahambae ko kinyo nga sa ulihi hay hikita ninyo ako nga Unga it Tawo nga nagapungko sa pinakadungganon nga pwesto sa tuo it Makagagahom nga Dyos. Ag hikita man ninyo ako sa daeaura sa akong pagbalik sa kalibutan.”

65Pagkabati karon ku pinakapinuno nga saserdote hay gin-gisi nana ro anang eambong sa anang kaakig. Naghambae dayon imaw, “Ginatupungan 't-a nana kara ro Dyos! Ham-an it mausoy pa abi kita it iba pang testigo ay habatian man ninyo ro anang ginhambae? 66Ano ro inyong sintinsya?”

Nagsabat ro bilog nga konseho, “Dapat gid imaw nga patyon!”

67Pagkatapos hay ginpil-an nanda si Jesus sa uyahon, gintapungoe ag gintueop. 68Sinanda pa, “Ikaw kuno ro Maneueuwas nga ginpromisa it Dyos, tugmaha abi kon sin-o ro nagtueop kimo!”

Ginpanghiwaea ni Pedro nga Kilaea nana si Jesus

(Mar 14:66-72; Luc 22:54-62; Juan 18:15-18, 25-27)

69Tag idto pa si Pedro sa *lagwirta it palasyo nagapungko hay may nagpaeapit kana nga sangka bayi nga sueuguon. Ginhambae nana si Pedro, “Kaibahan ka man ni Jesus nga tagaGalilea.”

70Pero nagbalibad 't-a si Pedro sa atubang ku tanan nga mga tawo nga idto. Hambae nana, “Bukon a! Owa't-ang kasayod ku imong ginahinambae ngaron.” 71Tapos, naghalin imaw sa may pwertahan it pader. May sangka bayi pa gid nga nakakilaea kana. Ginhambae ku bayi ngato ro mga tawo idto, “Kaibahan man raya ngara ni Jesus nga tagaNazaret ngato.”

72Nagbalibad eon man si Pedro. Hambae nana, “Sumpa man. Owa gid ako kakilaea ku haning tawo ngaron.”

73Maangan-angan hay nagpaeapit dayon ro mga nagaistambay idto ag ginhambae si Pedro, “Sigurado gid nga kaibahan ka man nanda ay sayod sa ing tono kon maghambae nga tagaGalilea ka.”

74Pero nagsabat si Pedro, “Sumpa ko man, bisan maldisyunon pa ako it Dyos, owa gid-ang kakilaea ku haning tawo ngaron.” Ag nagpamaeo dayon ro manok. 75Hadumduman dayon ni Pedro ro ginhambae ni Jesus nga “Bago magpamaeo ro manok hay ipanghiwaea mo it tatlong beses nga kilaea mo ako.” Pumanaw dayon si Pedro ag nagtinangis it pwerti.

Currently Selected:

Mateo 26: akl

Highlight

Copy