Mateo 18

Ro Nagapaubos ro Pinakaimportanti sa Tanan

(Mar 9:33-37; Luc 9:46-48)

1Maangan-angan, nagpaeapit kay Jesus ro anang mga sumueunod ag nagpangutana, “Sin-o kamon ro pinakaimportanti sa tanan nga mga sinakpan it Dyos?”

2Pagkabati karon ni Jesus, nagtawag imaw it sangka unga ag ana ra nga ginpatindog sa atubang ku anang mga sumueunod. 3Naghambae dayon si Jesus, “Matuod rang ginahambae kinyo nga kon indi ninyo pagbag-uhon ro inyong handom nga magmangin pinakaimportanti, ag kon indi kamo mangin mapainubuson pareho it mga unga hay indi kamo matapoe sa mga sinakpan it Dyos. 4Ro bisan sin-o nga nagapaubos pareho ku raya nga unga hay imaw ro pinakaimportanti sa tanan nga mga sinakpan it Dyos. 5Ag ro bisan sin-o nga nagadipara sa nagatuo kakon nga mapainubuson pareho ku unga ngara hay ako gid-a ro anang ginadipara.”

Indi Naton Pagtentaron ro Iba nga Magpakasaea ag Sukean Gid Naton ro Tentasyon

(Mar 9:42-48; Luc 17:1-3)

6Naghambae pa gid si Jesus, “Mas mayad pa't-a nga higtan ro sangka tawo it mabahoe gid nga galingan nga bato sa anang liog ag eumsan sa eawod kaysa sa masamitan na ro pina it Dyos sa ulihi kon makatentar imaw nga magkasaea ro bisan sambilog eang sa mga mapainubuson ngara nga nagatuo kakon. 7Makaeueuoy ro tanan nga tawo sa kalibutan ay ginalibutan sanda permi it sari-sari nga mga tentasyon nga magpakasaea. Matuod nga indi malikawan nga nagaabot ro mga tentasyon ngaron, pero makangingidlis gid ro matabo sa ulihi sa nagatentar sa andang isigkatawo nga magpakasaea. 8Kon ro imong alima o siki ro nagatueod kimo nga magkasaea,#18:8 Halimbawa, kon may ginaobra ka nga indi mo dapat pag-obrahon o kon mag-adto ka sa mga lugar nga indi mo dapat adtunan. utda ron. Mas mayad pa nga putoe ro imong sangka alima o sangka siki basta may imong kabuhi nga owa it katapusan sa eangit kaysa sa kumpleto matuod ro imong alima ag siki pero idto ka man lang hiadto sa lugar kon siin ro kaeayo hay nagadabdab hasta sa owa it katapusan. 9Kon ro imong mata ro nagatueod kimo nga magkasaea,#18:9 Halimbawa, nagatan-aw ka it ginabawae tan-awon. eukda ron ag ipilak. Mas mayad pa nga sambilog lang ro imong mata basta may imong kabuhi nga owa it katapusan sa eangit kaysa sa kumpleto matuod ro imong mata pero itagbong ka man sa kaeayo idto sa impyerno.”

Ro Istorya Parti sa Naduea nga Karnero

(Luc 15:3-7)

10Naghambae pa gid si Jesus, “Ayaw gid ninyo pagtuya-tuyaa bisan sambilog sa mga mapainubuson ngara nga nagatuo kakon. Ginahambae ko eagi kinyo nga ro mga anghel nga manogbantay nanda hay makapakigkita bisan anong oras sa akong Ama sa eangit. 11[Ako nga Unga it Tawo hay nag-adto iya agod euwason ro mga nagtaeang.”]#18:11 Ro bersikulo 11 hay owa gintapoe sa kaeabanan nga kopya it Sagrado nga Kasueatan sa Griniyego.

12“Halimbawa abi nga may sangka tawo nga may 100 nga ka karnero ag naduea ro sambilog. Kon kinyo, ano ro anang dapat obrahon? Bukon abi it ana nga aywanan#18:12 Ana anay siguro nga ibilin ro 99 ngato sa anang kapareho nga manogbantay it karnero. ro 99 nga nagahangeab sa kilid it bukid ag usuyon ratong sambilog nga naduea? 13Matuod rang ginahambae kinyo nga kon hikita eon nana ro anang karnero ngato hay magakalipay gid imaw it duro nga eabaw pa sa anang kalipay dahil sa 99 nga owa naduea. 14Makaruyon man ro baeatyagon ku inyong Ama sa eangit. Owa gid imaw naila nga may maduea bisan sambilog sa mga mapainubuson ngara nga nagatuo kakon.”

Ro Dapat Obrahon kon may Nagkasaea Katon

15Naghambae pa gid si Jesus, “Kon may igmanghod sa pagtuo nga nagkasaea kimo, buslahi imaw parti sa anang saea. Pero istoryahi imaw nga kamo eang nga daywa. Kon mag-ako imaw ku anang saea kimo hay magabalik sa dati ro inyong mayad nga pag-ililiba. 16Pero kon indi imaw mag-ako sa anang saea, adtuni imaw it uman ag magdaea ka it sambilog o daywang ka mga tumueuo agod may saksi nga gapamatuod kon ano ro inyong gin-istoryahan.#18:16 Deut 19:15. 17Kon indi gihapon imaw magpamati kanda#18:17 Klaro nga ro mga saksi ngato hay owa eang nagpamati sa istorya kundi nagkumbinsi man sa may saea ngato nga akuon nana ro anang saea ag magpangayo it patawad sa anang haagrabyo. hay idangop mo sa mga kaigmanghuran sa inyong grupo. Pero kon indi ma't-a gihapon imaw magpamati sa ginahambae kana ku mga kaigmanghuran hay bilanga ninyo imaw nga owa nagakilaea sa Dyos ag makasasaea pareho it manogluko nga *manogsukot it buhis.”#18:17 Nagakahueugan ra nga indi eon imaw puydi nga magpabilin nga myembro it andang simbahan.

18Naghambae pa gid si Jesus, “Matuod rang ginahambae kinyo nga ro bisan ano nga inyong ibawae iya sa kalibutan hay gakasinanto man sa ginbawae eon it Dyos sa eangit. Ag ro bisan ano nga sugtan ninyo iya sa kalibutan hay gakasinanto man sa ginsugtan eon it Dyos sa eangit. 19Matuod man rang ginahambae kinyo nga kon may daywa nga magkasugot iya sa kalibutan parti sa andang ginapangayo sa akon nga Ama sa eangit hay itao nana ron. 20Ginahambae ko ron ay kon siin nagatipon ro daywa o tatlo dahil sa andang pagtuo kakon hay una ako kaibahan nanda.”

Dapat Man Kitang Magpatawad ay Ginpatawad Man Kita it Dyos

21Pagkatapos, nagpaeapit si Pedro kay Jesus ag nagpangutana, “Ginuo, kon magkasaea kakon ro akong igmanghod sa pagtuo, pilang beses ko imaw nga patawaron, pitong beses?”

22Nagsabat si Jesus, “Bukon it pitong beses eang kundi pitong ka setenta beses.#18:22 Raya nga haeambaeunon sa Griniyego hay nagakahueugan nga “permi imaw nga patawaron.” 23Ginahambae ko ra dahil nga ro paghari it Dyos hay pareho kara: May isaeang ka hari nga nagdesisyon nga sumahon ag sukton ro mga kautangan kana ku anang mga ulipon.#18:23 Abo ro nagapati nga raya hay mga opisyales dahil sa kabahoe ku utang ku ratong sambilog nga tawo. 24Tag gin-umpisahan eon it hari ro pagsukot, gindaea sa anang atubang ro isaeang ka ulipon nga may utang kana nga 10,000 talanton.#18:24 Ro katumbas it sangka talanton hay mga 19 anyos nga sweldo it isaeang ka ordinaryo nga empleyado. 25Pero indi makabayad ro ulipon ngato sa ana nga utang. Ngani nagsugo ro hari nga ibaligya mismo ro ulipon, ro anang asawa ag mga unga agod mangin ulipon ag ibaligya man pati ro tanan-tanan nanang mga pagkabutang agod hibayran ro anang utang. 26Ngani naghapa ro ulipon ngato sa atubang it hari ag nagpakitluoy. Hambae nana, ‘Pasensyahi anay ako, mahae nga hari, bayran ko ugaling tanan ro akong utang kimo.’ 27Ginkaeuy-an imaw it hari ngani ginpaea eon lang ro anang utang sa listahan, tapos ginpapanaw imaw.

28“Pagguwa ku ratong ulipon sa palasyo hay hakita nana ro ana nga kapareho man nga ulipon it hari. May utang rato kana nga 100 nga ka denaryos.#18:28 Sa andang tyempo, ro 100 nga ka denaryos hay katumbas it mga tatlong buean nga sweldo it trabahador. Ana ra nga linuok ag ginhambae, ‘Bayri ro imong utang kakon!’

29“Humapa sa anang atubang rondatong ulipon ag naghambae, ‘Pasensyahi anay ako. Bayran ko ugaling tanan ro akong utang kimo.’ 30Pero owa imaw magsugot ag ana nga ginpapriso ratong kapareho nana nga ulipon hasta makabayad imaw sa anang utang.

31“Pagkakita ku iba pang mga ulipon ku natabo hay naugot-ugot sanda it duro ag sinugid nanda sa hari ro tanan nandang hakita. 32Ngani ginpatawag imaw ku hari ag ginhambae, ‘Maeain ka nga ulipon! Owa ko eon ngani pagsukta ro imong utang bangod nagpakitluoy ka kakon. 33Ham-an it owa mo pagkaeuy-i ro imong kapareho nga ulipon pareho ku akong pagkaeuoy kimo?’ 34Naakig gid it duro ro hari sa ulipon, ag ana ra nga ginpapriso agod hipasakitan it todo-todo hasta nga makabayad imaw ku anang utang.”

35Naghambae dayon si Jesus, “Makaruyon man ro obrahon ku akon nga Ama sa eangit kon ro kada isaea kinyo hay indi magpatawad it hantop sa inyong tagipusuon sa inyong igmanghod sa pagtuo nga gakasaea kinyo.”

Currently Selected:

Mateo 18: akl

Highlight

Copy