Juan 8
8
Ro Bayi nga Hadakpan nga Nagapangawatan
1Tag nakahalin eon sanda, si Jesus ma't-a hay nag-adto sa Bukid it Olibo. 2Pagkaaga-aga hay nagbalik imaw sa *lagwirta it Templo. Tag idto eon imaw hay gintueumpukan imaw it mga tawo, ngani nagpungko imaw ag gintinud-an sanda. 3Tag nagaturo pa imaw, ro mga *maestro it Kasuguan ag ro mga Pariseo hay may gindaea nga bayi sa atubang ni Jesus ag ku tanan nga mga tawo. Ro bayi ngato hay hadakpan nga nagapangawatan. 4Naghambae sanda kay Jesus, “Maestro, hadakpan sa akto ro bayi ngara nga nagapangawatan. 5Ginsugo ni Moises sa atong Kasuguan nga ro magkasaea it pareho sa saea ku bayi ngara hay dapat eapgon it bato hasta mamatay. Ano ring mahambae kara?” 6Anda man lang kara nga ginadakop-dakop si Jesus agod may anda dayon nga ikaakusar kana. Pero nagdungok eang si Jesus ag nagsueat ku anang tudlo sa eapok.
7Pero ginpinangutana gihapon nanda imaw, ngani tumindog si Jesus ag ginhambae sanda, “Kon sin-o kinyo ro owa gid it saea hay imaw ro mag-una it pagbato kana.” 8Pumungko eon man si Jesus ag dumungok ag nagsueat sa eapok. 9Pagkabati ku mga nagaakusar sa bayi ngato ku ay Jesus nga ginhambae hay tigsambato sanda nga naghaealin. Sa mga nag-akusar ngato, ro hauna gid nga naghalin hay ro mga pinakamagueang kanda. Hasta ku ulihi, ro habilin eon lang hay si Jesus ag ro bayi nga nagatindog sa atubang ku mga tawo idto.
10Pagkatapos, nagtindog si Jesus ag ginhambae ro bayi, “Hay siin eon sanda? Owa eon baea it gasintinsya kimo it kamatayon?”
11“Owa eon, Sir,” sabat ku bayi. Naghambae si Jesus, “Indi man ako magsintinsya kimo. Uli eon ag talikdi eon ring saea ngaron.”
Owa Nagpati ro mga Pariseo nga Si Jesus ro Iwag it Kalibutan
12Tapos, naghambae pa gid si Jesus sa mga tawo, “Ako ro Iwag nga nagatao it kahayag sa paino-ino it mga tawo iya sa kalibutan. Ro nagasunod kakon hay indi magkabuhi sa kadueom, kundi mahayagan imaw ku Iwag nga nagatao it minatuod nga kabuhi.”
13Naghambae dayon kana ro mga Pariseo, “Bukon man it matuod ro imong ginahambae ngaron ay owa man it ibang gapamatuod karon kundi ikaw manlang.”
14Nagsabat si Jesus, “Bisan ako mismo ro nagapamatuod sa akong kaugalingon hay matuod ma't-a ro akong ginahambae tungod sayod ko kon siin ako naghalin ag kon siin ako gapaadto. Pero kamo't-a hay owa gid karon kasayod. 15Ro inyo nga paghusgar kakon hay nabase eang sa kon ano ro inyong makita. Ako't-a hay bukon it makaruyon kon maghusgar. 16Pero kon magpanghusgar gid man ako hay tama ro akong paghusgar, ay bukon eang it ako ro magahusgar kundi daywa kami ku akong Ama nga nagpadaea iya kakon. 17Sa Kasuguan nga inyo perming ginabasehan hay nasueat nga kon may daywang ka magpamatuod ag magkasinanto ro andang ginahambae hay masaligan nga matuod ron. 18Ako ro isaea sa nagapamatuod parti sa akong kaugalingon ag ro sambilog pa nga nagapamatuod karon hay ro akon nga Ama nga nagpadaea iya kakon.”
19Ginpangutana dayon nanda si Jesus, “Hay siin ro imong ginahambae ngaron nga Ama?”
Nagsabat si Jesus, “Owa kamo kakilaea it mayad kakon ag owa man kamo kakilaea it mayad sa akon nga Ama. Kon kilaea ninyo ako it mayad hay kilaea man ninyo it mayad ro akong Ama.” 20Raya ro ginhambae ni Jesus tag idto imaw nagaturo sa *lagwirta it Templo, maeapit sa may ginabutangan it haead nga kwarta. Pero owa it nagdakop kana ay owa pa nag-abot ro oras nga tumanon nana ro plano it Dyos.
Ro mga Indi Magtuo kay Jesus hay Indi Mapatawad sa Andang mga Saea
21Tapos, naghambae pa gid si Jesus kanda, “Sa indi magbuhay hay mapanaw eon ako ag inyo ako nga usuyon, pero indi ninyo ako makita, ag mamatay kamo nga owa mapatawad ro inyong mga saea. Indi kamo makaadto sa akong adtunan.”
22Naghambae dayon ro mga manogdumaea it mga Judio sa kada isaea, “Ham-an it gahambae imaw nga indi kita makaadto sa anang adtunan? Hay pa manghugot 't-a ra imaw ay?”
23Naghambae si Jesus, “Ro inyong paino-ino hay ana gid it mga tawo iya sa kalibutan nga nagakuntra sa Dyos. Ro akon ma't-a nga paino-ino ag ginaturo hay eangitnon. Tagaiya kamo sa kalibutan pero ako't-a hay bukon. 24Mawron nga naghambae ako kinyo nga mamatay kamo nga owa mapatawad ro inyong mga saea. Kon indi kamo magpati sa akon nga ginahambae kon sin-o gid ako hay mamatay gid-a kamo nga owa mapatawad ro inyong mga saea.”
25Ginpangutana nanda si Jesus, “Sin-o ka gi't-imo ay?”
Nagsabat imaw, “Kon sin-o ako sinakon kinyo halin pa kato hay ruyon don. 26Abo gid ro akong ikahambae parti kinyo ag ikakondenar kinyo. Pero ro nagpadaea iya kakon hay bukon gid it purilon, ag ro akon eang nga ginahambae sa mga tawo iya sa kalibutan hay ro mga nabatian nakon kana.”
27Pero owa kaeubot ro mga tawo nga ro ginapatungdan kara ni Jesus hay ro Dyos nga Ama. 28Ngani naghambae si Jesus kanda, “Pagkatapos nga inyo nga hibayaw sa krus ako nga Unga it Tawo hay dikaron ninyo masayran nga matuod ro akon nga ginahambae kon sin-o gid ako. Masayran man ninyo nga owa ako gahimo it bisan ano nga akon-akon eang kundi ro akon nga ginahambae hay ro mga ginturo kakon it akon nga Ama. 29Ro nagpadaea iya kakon hay kaibahan ko permi, owa nana ako ginaaywani dahil ginaobra ko permi kon ano ro gapalipay kana.” 30Pagkabati ku mga tawo sa mga ginpanghambae ngara ni Jesus hay abo nga nagtuo kana.
Ro Minatuod nga mga Inapo ni Abraham hay ro Nagapadayon sa Pagsunod sa Ginaturo ni Jesus
31Tapos hay naghambae si Jesus sa mga Judio ngato nga nagtuo kana, “Kon magpadayon kamo sa pagsunod sa akong ginaturo hay matuod gid nga mga sumueunod ko kamo. 32Masayran gid dayon ninyo ro kamatuuran halin sa Dyos parti kakon, ag ruyon ro magahilway kinyo.”
33Nagsabat kana ro mga Judio, “Mga inapo kami ni *Abraham ag halin pa kato hay owa kami haulipon bisan nanyo. Ano ro imong buot hambaeon sa imong ginahambae nga mahilway kami?”
34Nagsabat si Jesus, “Matuod gid rang ginahambae kinyo nga ro tanan nga nagapadayon sa pagpakasaea hay mga ulipon it saea. 35Ro ulipon hay owa it kinamatarong sa panimaeay it anang amo ag puydi nga pahalinon. Makaruyon man ro mga ulipon it saea. Indi sanda puydi nga magpabilin sa panimaeay it Dyos. Pero ro mga nagatuo kakon, nga mga unga eon it Dyos hay makapabilin sa anang panimaeay hasta sa owa it katapusan.#8:35 Ginabilang ku mga Judio nga mga unga sanda it Dyos sa anang panimaeay dahil ginpili nana sanda nga mangin anang mga katawhan. Pero kon indi nanda pagbatunon si Jesus nga matuod nga Unga it Dyos hay maduea ro andang kinamatarong bilang mga unga it Dyos. 36Ngani kon ako nga Unga it Dyos ro maghilway kinyo sa pagkaulipon it saea hay matuod nga hilway gid-a kamo. 37Sayod ako nga mga inapo kamo ni Abraham, pero gusto gihapon ninyo ako nga patyon, ay owa gid-a ninyo gintanom sa inyong paino-ino ro akong ginahambae. 38Ginahambae ko kon ano ro akon nga hakita tag idto ako sa akon nga Ama, ag kamo ma't-a, ro inyong ginatuman hay kon ano ro inyong habatian sa inyong ama.”
39Nagsabat sanda, “Si Abraham ro amon nga ama.”
Pero naghambae si Jesus, “Kon mga inapo matuod kamo ni Abraham, ro inyo kunta nga ginaobra hay pareho sa anang mga gin-obra. #8:39 Nagtuo gid si Abraham sa Dyos ag gin-abi-abi nana ro mga mensahiro halin sa Dyos. Basaha sa Gen 12:1-4, 18:3 ag Genesis kapitulo 22. 40Ro kamatuuran manlang nga habatian ko halin sa Dyos ro akong ginsinugid kinyo, pero ginaplanuhan ninyo ako nga patyon. Owa naghimo it makaruyon si Abraham. 41Ro inyong mga ginaobra hay pareho man sa mga ginaobra ku inyong ama.”
Nagsabat sanda, “Bukon 't-a kami it mga bastardo. Ro Dyos eang ro among matuod nga Ama.”
42Nagsabat dayon si Jesus, “Kon matuod kamo nga mga unga it Dyos hay higugmaon kunta ninyo ako ay kana ako naghalin. Owa ako nag-adto iya nga akon-akon eang, kundi imaw ro nagpadaea iya kakon. 43Ham-an abi it indi kamo kaeubot sa akong ginahambae? Tungod indi kamo katakod magpamati sa akong mga ginahambae! 44Si Satanas#8:44 Sa Griniyego, raya hay “Dyablo” nga ro kahueugan hay manogpakaeain o manogpabangod. ro inyong ama, ngani naila kamo magtuman sa anang gusto. Halin pa ku umpisa hay manogpatay eon imaw ag ginakaugtan nana ro kamatuuran, ay maeayo ro kamatuuran sa anang kabubut-on. Kon gapinuril ngani imaw hay suno gid-a ron sa anang kinaiya, ay purilon imaw ag imaw man ro ginahalinan it tanan nga kapurilan. 45Pero ako't-a, ro kamatuuran nga halin sa Dyos ro akong ginasugid kinyo pero indi't-a kamo magpati kakon. 46Owa it bisan sambilog kinyo nga makapamatuod nga nagapinuril ako. Kon ro kamatuuran 't-a ro akon nga ginasugid, ham-an it indi kamo magpati kakon? 47Ro mga unga it Dyos hay nagapamati ag nagatuman sa ginahambae it Dyos kanda. Pero owa ninyo ron ginapamatii ag ginatumana tungod bukon kamo it mga unga it Dyos.”
Si Jesus hay Eabaw Pa kay Abraham
48Naghambae dayon ro mga Judio ngato kay Jesus, “Tama gid-a ro amon nga hambae nga pareho ka sa makangingil-ad nga Samaritanhon ag ginagamhan ka pa it demonyo!”
49Pero nagsabat si Jesus, “Owa ako ginsudli it demonyo. Ginatahod ko ro akon nga Ama, pero owa ninyo ako ginatahura. 50Ugaling hay owa ma't-a ako gahangad nga dayawon. Pero may una't-a nga gusto nga dayawon ako, ag imaw 't-a ro magahusgar sa mga owa nagatahod kakon. 51Matuod gid rang ginahambae kinyo nga ro nagapati ag nagatuman sa akong ginahambae hay indi mamatay bisan hasta hin-uno.”#8:51 Ro buot hambaeon kara ni Jesus hay indi sanda makaagi it pina sa impyerno nga hasta sa owa it katapusan. Daya ro “pangaywa nga kamatayon” (basaha sa Pahayag 2:11; 20:6; 20:14 ag 21:8).
52Naghambae sanda, “Sigurado eon gid kami nga ginsudlan ka it demonyo ay si Abraham ag ro mga propeta hay nagkaeamatay eon kato pa. Ham-an it gahambae ka nga ro nagapati ag nagatuman sa imong ginahambae hay indi makaagi it kamatayon bisan hasta hin-uno? 53Hay pa eabaw ka pa sa nagtaliwan namon nga lolo nga si Abraham ay? Namatay eon imaw pati ro mga propeta. Hay sin-o ka gid ing sinimo?”
54Nagsabat si Jesus, “Kon dayawon ko ro akong kaugalingon, owa ron it pueos. Ro akon nga Ama nga ginahambae ninyo nga inyong Dyos hay imaw ro nagadayaw kakon. 55Owa ninyo imaw makilaea pero kilaea ko't-a imaw. Kon maghambae ako nga owa ko imaw hakilaea hay pareho eon dayon ako kinyo nga purilon. Kilaea ko gid-a imaw ag ginatuman ko ro anang ginahambae. 56Kato anay, ro inyong lolo nga si Abraham hay nagkalipay tungod anang ginapaabot nga makita nana ro akong pag-abot riya. Ag hakita ron nana#8:56 Owa ra nagakahueugan nga hakita ku mga mata mismo ni Abraham ro pag-abot ni Jesus sa kalibutan kundi ginpahayag kana nga sa ulihi, paagi sa isaea sa anang mga inapo hay pakamaayuhon ro tanan nga rasa it tawo. Napatungod rato kay Jesus nga Maneueuwas nga ginpromisa it Dyos. mawron nga nalipay gid imaw it duro.”
57Naghambae ro mga Judio, “Owa ka pa ngani it 50 anyos, tapos mahambae ka nga hakita mo't-a si Abraham!”
58Nagsabat si Jesus, “Matuod gid rang ginahambae kinyo nga bago pa natawo si Abraham hay una eon ako.” 59Ngani nagpueot sanda it bato ag anda kunta imaw nga eapugon hasta mamatay, ugaling hay naduea't-a imaw sa andang panueok ag gumuwa dayon imaw sa Templo.
Currently Selected:
Juan 8: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
