लूका 16

चलाक मूनीम

1फेरी यीशुऐं आपके चेल्‍लैं थ कैहया, “एक अमीर इन्सान थिया, अर उसका एक मूनीम भी थिया, अर एक बारी लोक्कैं अमीर इन्सान्‍ना साम्है मूनीम्मा पर बदी लगाई कि वो जयजात उड़ाया करता है। 2पिछैं उनु आपके मूनीम्मा कु बुलाई कैहया, ‘तेरे बारे म हूँ या क्या सुणया करता हैं? तौं आपके मूनीम्मा के काम्मा का हिसाब दे, क्योंकि आग्गै वास्तै तौं मेरा मूनीम कोइन रैहैं।’ 3पिछैं मूनीम्मै आपके मना म कैहया, ‘इब हूँ क्या करैं? मेरा मालक मेरे मूनीम्मा का काम मेरै थ खोस्या करता है। अर मेरै म तो इब इतनी ताकत भी कोइन कि हूँ खेत्‍तैं म जाई काम-काज़ करी सकैं। अर भीक माँगणैं म मिस्कु शरम आत्‍ती है। 4इब हूँ समझी गया हैं कि मिस्कु क्या करना है, ताकी जिद हूँ मेरे मूनीम्मा के काम्मा थ हटाया जावैं, तो लोक आपके घरैं म मेरा आदर करैं।’ 5अर उनु आपके मालका के एक्की-एक्की कर्जेतिया कु बुलाई पैहलै थ बुझ्झया, ‘मेरे मालका का तेरै पर कितना कर्जा है?’ 6उनु कैहया, ‘सौ मण जैतुन्‍ना का तेल।’ फेरी मूनीम्मै कैहया, ‘या ले, तेरे खात्‍ते का हिसाब इसमै तौं बैस्सीकना पचास मण लिखी ले।’ 7फेरी उनु दूसरे थ बुझ्झया, ‘तैं कितना कर्जा देणा है?’ उनु कैहया कि, ‘सौ मण गेहूँ।’ मूनीम्मै उसथै कैहया, ‘या ले, आपके खात्‍ते का हिसाब अस्सी मण लिखी ले।’ 8इसपर मालकैं, उस बेमान मूनीम्मा कि बड़ाई करी, क्योंकि उनु चलाकिया थ काम लिया थिया। क्योंकि दुनियावी लोक आपके युगा के लोक्कैं सात्थी व्यभार करनै म परमेश्वरा के लोक्कैं थ ज्यादा चलाक हैं।

9“हूँ थमकु कैहता हैं, कि दुनियावी पैसे थ आपकै वास्तै दोस्त बणाओ। क्योंकि जिद थारी दौलत खतम होई जाग, तो वो थमकु ऐस्से घरा म लेई जाँग जो हमेशा बणया रैहैग। 10जो कोइ थोड़े थ थोड़े म विश्वास्सा लायक है, वो घणैं माह भी विश्वास्सा लायक है। अर जो थोड़े थ थोड़े म बेमान है, वो घणैं माह भी बेमान है। 11इसकरी अगर थम दुनियावी धना म ही विश्वास्सा लायक ना होंगड़े, तो थमकु सच्‍चा धन कोण सौंप्पड़ा? 12अर अगर थम पराये धना वास्तै ही विश्वास्सा लायक ना होंग, तो जो थारा धन होई सक्‍ता है, वो थमकु कोण दैगड़ा?”

13 # मत्‍ती 6:24 “कोइ भी दास दो मालकैं कि सेवा नाही करी सकै। क्योंकि वो एक्की थ बैर अर दूसरे थ प्यार राक्खगड़ा। या फेरी वो एक्की थ तो मिल्या रैहैग, अर दूसरे कु बेकार समझग। इदा ही थम परमेश्वर अर धन दोन्‍नो कि सेवा नाही करी सको।”

परमेश्वरा के राज्जा का मोल

(मत्‍ती 11:12,13; 5:31,32; मरकुस 10:11,12)

14जो लालची फरीसी थिये, वो यीशुआ कियाँ ये बात्‍तां सुणी उसका मज़ाक उड़ाणैं लाग्गी गये। 15इसपर यीशुऐं कैहया, “थम तो लोक्कैं साम्है धर्मी बणते हो। पर परमेश्वर थारे मनैं कु जाणता है, क्योंकि जो चीज़ इन्सान्‍ना किया नज़री म बड़ी है, परमेश्वर उसथै नफरत करता है।

16 # मत्‍ती 11:12,13 “नियमैं अर नबीयैं कियैं किताब्बैं का ज़ोर यहून्‍ना बत्‍तीस्मा दैणैं आळे ताइं ही थिया। अर उसके बाद्दाम परमेश्वरा के राज्जा का शुभसमाचार सुणाया जाया करता है, अर हर कोइ परमेश्वरा के राज्जा म जाणैं वास्तै घणी महनत करया करते हैं। 17#मत्‍ती 5:18आसमान अर धरतिया का नास होणा तो असान है, पर नियमैं कि कोइ एक बात भी कोइन टळैं।

18 # मत्‍ती 5:32; 1 कुरि 7:10,11 “जो कोइ आपकिया लुगाइय्या कु छोड्डी किसी होरी कु ब्याहाउता है, वो व्यभिचार करता है। अर जो कोइ उस छोड्डोड़िया औरता थ ब्याह करता है, वो भी व्यभिचार करता है।

अमीर इन्सान अर गरीब लाजर

19“पिछैं यीशुऐं या भी कैहया, एक बारी एक अमीर इन्सान थिया, जो हमेशा किमती अर मुलायम कापड़े घाल्ता थिया, अर पूरे सुख-चैन्‍ना थ रैहैता थिया। 20अर एक लाजर नावाँ का इन्सान उसके दरवाज्जे पर छोड्डी दिया जात्‍ता थिया, जिस्का शरीर जखमैं थ भरोड़ा थिया। 21अर वो उस अमीर इन्सान्‍ना के झुठ्ठे खाणैं थ ही आपका पेट भरनै वास्तै तरस्ता थिया। अर होर तो होर, बल्की कूत्‍ते भी आइकना उसके जखमैं कु चाटते थिये। 22अर फेरी इदा होया, कि एक दिन वो गरीब मरी गया, अर स्वर्गदुत्‍तैं उसकु अब्राहम्मा किया गोद्दा म पौंहचाई दिया। अर पिछैं अमीर भी मरया अर गाड्डी दिया गया। 23अर अमीरैं दूरा थ ही पताळा#16:23 पताळा मरनै के बाद्दाम जड़ै अविश्वास्सी लोक फैसले के दिना ताइं रैहते हैं। म तड़फतोड़ैं आँख्खी चाई अब्राहम्मा कु देख्या, अर उसके गोद्दा म लाजरा कु देख्या। 24अर उनु अब्राहम्मा थ ऊँचिया अवाज्जा थ कैहया, ‘हे बाप, मेरै पर तरस खा, अर लाजरा कु मेरै धौरै घलाई दे, ताकी वो आकपिया आँगळिया का सिरा भेइकना मेरीया जिब्भा कु ठण्डा करै, क्योंकि हूँ इस आग्गू म तड़फ्या करता हैं।’ 25पर अब्राहमै उसकु कैहया, ‘हे मेरे बेट्टे, याद कर धरतिया पर चिकु आछियाँ चिज्जाँ मिलियाँ है। पर लाजरा कु बुरीयाँ चिज्जाँ ही मिलियाँ। पर इब लाजर एठ्ठै सुख देख्या करता है, अर तौं तड़फ्या करता है। 26अर इन बात्‍तैं के अलावा भी, म्हारे अर थारे बिच्‍चा म, एक खाई ठहराओड़ी है, ताकी जो नुआ जाणां चाहता है ना जाई सकै, अर जो कोइ नुआ थ इतवळ आउणा चाहवैं, वो ना आई सकै।’ 27फेरी अमीरैं कैहया, ‘तो फेरी हे बाप, हूँ तेरै थ मीन्त करता हैं, कि तौं लाजरा कु मेरे बाप्पा के घरा म घला। 28क्योंकि मेरे पाँच भाइय्ये होर हैं, अर लाजर उनकु चिताउगड़ा, ताकी इदा ना होवै कि वो भी एठ्ठै आइकना मेरै ज़ू तड़फैं।’ 29पर अब्राहमै उसकु कैहया, ‘उनकै धौरै मूसा अर नबीयैं कियाँ किताब्बा हैं। वो उनकी सुणैं।’ 30अमीरैं कैहया, ‘हे बाप अब्राहम, नाही! पर अगर मरोड़ैं माहला उनकै धौरै कोइ जावै तो वो मन फिराई लैंगड़े।’ 31पर अब्राहमै उसकु कैहया, ‘अगर वो मूसा अर नबीयैं कियैं किताब्बैं कि ही ना मान्‍नै, तो अगर कोइ मरोड़ैं माहला उनकै धौरै जावै, तो वो उसकी भी कोइ मान्‍नै।’”

Currently Selected:

लूका 16: Sansi

Highlight

Copy