Lukas 3
3
Yohanes Pumpudoiꞌ mampakareba kasalamaꞌang ung bùruꞌa
(Mat. 3:1-12, Mrk. 1:1-8, Yoh. 1:19-28)
1Tempona sampulo:‑mo lima heaꞌna ti Kaisar Tiberius mamparenta nasang kadatuang Roma, Pontius Pilatus ti gubernur i Yudea, pang Herodes muparenta i Galilea. Pilipus, dea‑mo mantàdina Herodes, muparenta i Iturea pang Trakonitis, pang dea ti Lisanias muparenta i Abilene. 2Kapala Imang tempo to dea‑mo Hannas pang Kayapas. Heaꞌ dea‑mo to ti Puang mampadeaꞌ suaNa mao i Yohanes anakàna Sakaria, i padang ung tunini. 3Deanna‑mo to, Yohanes lumao pai iaka-aka i pangalanna Uhai Yordan pang mampikakoang‑ing moa teꞌ, “Mingkatobaꞌ‑mo: se pang pehea‑ko se ti kalaemu nidoiꞌ, mangking na pantengkai:‑ing Puang ti dosa-dosammu.”
4Ung na pukauꞌ Yohanes to, sileo: ung nironno: i laling suraꞌ nabi Yesaya, ung mangkonai: moa teꞌ,
“Ara tau ung mikako-kakoang i padang ung tunini moa teꞌ,
‘Salokaꞌi‑ingko se pang pakahulo:‑ingko se
dalang ti Puang.
5Nasang ung makàtu nitampoia,
pang nasang mungku pang mungku-mungku nirantea.
Dalang ung si mulengko: nipakahuloa,
pang ung si kadetu nipabeloia.
6Pang nasang tulino mangitaa
kasalamaꞌang ung nai Puang.’ ”*#3:4-6 Yes. 40:3-5.
7Boso: tungka ti tau ung bùruꞌ mao i Yohanes mupupidoiꞌ. Hampoꞌ musua: ti Yohanes moa teꞌ, “E dio se ung mapangae: talubammaꞌ, isai ti ung massuo:‑ko se mampalai‑ing kalaemu nai kalalàkangna Puang ung bùruꞌa? 8Deanna‑mo to, pupiita‑kangko se i pingkuheoꞌ-heoꞌmu moa teꞌ u mingkatobaꞌ‑mo se. Pang hau moa se teꞌ, ‘Ha na leoa‑kangka kalalàkangna Puang, sàbaꞌ ki hatiꞌna Abraham.’ Hang mène:‑ida to! Ku pusua: matung teꞌ, Moi nai hatu-hatu tee teng, Puang hela mampupiluhali hatiꞌna Abraham! 9Pang i latenna, uase tokana‑mo i toaꞌna lòpo:. Deanna‑mo to, nasang lòpo: ung dang manghoa:‑ing hoa: ung belo:, nitìhìnga pang nitibe mao i api.”
10Mingkutikìna‑mi se mao i Yohanes teꞌ, “Jadiꞌ, aka ti ung parallu ki pukauꞌ?”
11Na sùmuinna‑mi moa teꞌ, “Tau ung mangampu idua kayaꞌ, parallu na àdo:‑ing ti besa mao i tau ung dang ara. Pang dea ti tau ung mangampu kinanne:, parallu ho na kàlaꞌ-kàlaꞌ mène: to.”
12Ara ho tupassima*#3:12 Mampatu: tupassima, hele catatan kaki i Mat. 9:9. ung bùruꞌ mupupidoiꞌ. Mingkutiki‑i se moa teꞌ, “O Tungguru, aka ti ung parallu ki pukauꞌ?”
13Na sùmuinna‑mi moa teꞌ, “Hau mampalau se mitàra nai ung nipatantu‑mo.”
14Pang ara ho tantara ung mingkutiki teꞌ, “Mangaka ti kami deꞌ? Aka ti ung parallu ki pukauꞌ?”
Na sùmui ho teꞌ, “Hau marrampaꞌi se seengna isai-sai pòteng mangola: dalang mampupariaꞌ dea‑raka mutannaꞌ ung dang tongang. Pikànaꞌ‑mo: se ti saromu!”
15Tempo to, na rara‑mo nasang tau ti marranung tungka pang mingkutiki i laling pinanahanna moa teꞌ, “Datu: Pipasalamaꞌ naꞌ ti te, ung ta ampe-ampei se?” 16Misùmunna‑mi ti Yohanes mao i dei: se teꞌ, “U ku doiꞌ se uhai, hampoꞌ Dea to ung bùruꞌa, u Na doiꞌa se Pinanaha Malìsong pang api.*#3:16 Mampatu: api, hele catatan kaki i Mat. 3:11. Làbi iaho‑Da nai koi:. Manghùraꞌ‑ing pòteng ulang sapatunNa pang, hang sipatu:‑kaꞌko. 17Mantokaꞌ harang ung Na pakea mantapi: nasang gandumNa. Ung kaisinna Na patamaa i laling talukungNa, hampoꞌ putapiangna Na sohea, pang api to harai: podaꞌna.”
18Mène:‑mo to ti ung na padeaꞌ Yohanes, pang boso: kang ho ti ung na pipasakiꞌ‑ing i laling mampakareba Kareba Belo:. 19Hampoꞌ dea ti Herodes, ung muparenta i Galilea, na ràho Yohanes mampatu: kasilopàkangna sìnang Herodias, bahinena pulengkeꞌna, pang mampatu: nasang ung kadetu ung na pukauꞌ. 20Hampoꞌ tiꞌ mampakànaꞌi parodo sule: kauꞌ-kauꞌna, mampatama Yohanes i putarungkuꞌang.
Yesu nidoiꞌ
(Mat. 3:13-17, Mrk. 1:9-11, Yoh. 1:32-34)
21Tempona nasang tau to‑i se na doiꞌ Yohanes, Yesu ho nidoiꞌ. Ladu to, musumbayang. Tarrang musumbayang, tuhangka ti langiꞌ, 22pang Pinanaha Malìsong minguluꞌ i laling rupanna kudaꞌ merpati, mampintoàngi‑I. Nisàdingna‑mi ti sua: nai langiꞌ teꞌ, “Dio‑mo ti AnakàKu ung Ku pulemu. Ku masannang tungka mao i Dio.”
Toroꞌna ampe-ampena Yesu
(Mat. 1:1-17)
23Tempona Yesu marrara kamaꞌangNa, umuruꞌNa màka: itàlu pulona heaꞌna. Pantangaꞌ tulino, Yesu dea‑mo anakàna Yusup
ung na kianak‑ing Eli. 24Eli anakàna Matat,
Matat anakàna Lewi, Lewi anakàna Malki,
Malki anakàna Yanai, Yanai anakàna Yusup,
25Yusup anakàna Matica, Matica anakàna Amos,
Amos anakàna Nahum, Nahum anakàna Hesli,
Hesli anakàna Nagai, 26Nagai anakàna Maat,
Maat anakàna Matica, Matica anakàna Simei,
Simei anakàna Yosek, Yosek anakàna Yoda,
27Yoda anakàna Yohanan, Yohanan anakàna Resa,
Resa anakàna Serubabel, Serubabel anakàna Sealtiel,
Sealtiel anakàna Neri, 28Neri anakàna Malki,
Malki anakàna Adi, Adi anakàna Kosam,
Kosam anakàna Elmadam, Elmadam anakàna Er,
29Er anakàna Yesua, Yesua anakàna Elieser,
Elieser anakàna Yorim, Yorim anakàna Matat,
Matat anakàna Lewi, 30Lewi anakàna Simeon,
Simeon anakàna Yehuda, Yehuda anakàna Yusup,
Yusup anakàna Yonam, Yonam anakàna Elyakim,
31Elyakim anakàna Melea, Melea anakàna Minna,
Minna anakàna Matata, Matata anakàna Natan,
Natan anakàna Daud, 32Daud anakàna Issai,
Issai anakàna Obed, Obed anakàna Boas,
Boas anakàna Salmon, Salmon anakàna Nahasson,
33Nahasson anakàna Aminadab, Aminadab anakàna Admin,
Admin anakàna Arni, Arni anakàna Hesron,
Hesron anakàna Peres, Peres anakàna Yehuda,
34Yehuda anakàna Yakub, Yakub anakàna Isak,
Isak anakàna Abraham, Abraham anakàna Terah,
Terah anakàna Nahor, 35Nahor anakàna Serug,
Serug anakàna Rehu, Rehu anakàna Peleg,
Peleg anakàna Eber, Eber anakàna Salmon,
36Salmon anakàna Kenan, Kenan anakàna Arpaksad,
Arpaksad anakàna Sem, Sem anakàna Nuh,
Nuh anakàna Lamek, 37Lamek anakàna Metusala,
Metusala anakàna Henok, Henok anakàna Yared,
Yared anakàna Mahalaleel, Mahalaleel anakàna Kenan,
38Kenan anakàna Enos, Enos anakàna Set,
Set anakàna Adam, Adam na tampa Puang.*#3:38 na tampa Puang. Sua: Yunani anakàna Puang.
Currently Selected:
Lukas 3: skx
Highlight
Share
Copy
Want to have your highlights saved across all your devices? Sign up or sign in
