Lukas 1
1
Sua: ung na pupidolung Lukas
1Mampatu: Teopilus ung ku sangadi,
Boso:‑mo ti tau ung mangokaꞌ dalang marronno: nasang kadadiang-kadadiang ung tikannaꞌ‑mo i àlaꞌ-àlaꞌta se. 2Na ronno:‑i se sibali ti ung na pakareba tau ung mangita mata‑mo kadadiang to nai pararanna pang na padumallaꞌ‑i se ti kareba to mao i kìta: se. 3Tòna ku pidalang‑mo tungka nasang ti to nai pararanna, ku pibelo:‑ko ho ti marronno: besa suraꞌ ung mangumpuꞌ nasang to 4mangking ta hela mambasa pang mangìsang moa teꞌ aka ti ung nipipaturo:‑ming mao i kinta:, ìnang tongang.
Aranna Yohanes Pumpudoiꞌ nipupihuyang
5Tòna Herodes ti datu: i Yudea, ara besa imang ung nikonai: Sakaria, nai kalompoꞌ imang Abia. Bahinena nikonai: Elisabet, ung hatiꞌna ho imang. 6Tuhona‑i se sampubahineang to, tongang i heleꞌna Puang. Hari: salaiangna‑i se i laling tuho: mantoroꞌi nasang parentanna pang atorangna Puang. 7Hampoꞌ hang kianak‑i se, sàbaꞌ mikamma ti Elisabet, pang nai iduanna matua:‑mi se.
8Tempona na puumpa: kalompoꞌ Abia mangkamaꞌ kamaꞌangna miluhali imang i heleꞌna Puang, 9na pukauꞌ‑i se ti kabiasaangna mangola: undi. Ara sangàlo, Sakaria ti ung na leo: undi mintama i Tamming Kabussùngang pang mantunu dupa i anto. 10Pang mène: kabiasaang tempona kapinombaang mantunu dupa, nasang jamaa musumbayang i sòhongna.
11Tempo to, besa malaikaꞌna Puang mampingèneꞌi Sakaria, tèdeꞌ mui konangna pantunuang dupa. 12Na itanna‑i Sakaria ti malaikaꞌ to, mimàha pang mariaꞌ. 13Hampoꞌ musua: ti malaikaꞌ to teꞌ, “O Sakaria, hau mariaꞌ! Sàbaꞌ na sàding‑mo Puang ti pusumbayangmu, pang bahinemu, dea‑mo Elisabet, mangkianàking besa anaka muane. Pang parallu u konai: Yohanes. 14Masannànga tungka ti pinanahammu, pang boso: tau mihakaa sàbaꞌ nikianak‑ing ti anaka to. 15Sàbaꞌ miluhalia‑da tau ung lammuꞌ i heleꞌna Puang. Pang ha madìngi: mangenung anggoroꞌ dea‑raka mangenung aka teng ung si mi liling. Songka: aranna i balammangna inanna, na kuasaia‑da Pinanaha Malìsong. 16Boso: tu Israel na pupiluhalia mangule:‑ing mao i Puang, dea‑mo Puangna‑i se. 17Mampidolùnging Puang silentong Pinanaha Malìsong pang kuasa ung sibali na ampu nabi Elia dolung. Mampupiluhalia pinanahanna ama:-ama: malemu pole mao i anakàna‑i se, pang tau ung dang si manuruꞌ na pupiluhalia mangule:‑ing mao i pantangaꞌ ung belo: pang mahulo:. Na pukauꞌ ti to mangking mampatokana tau to‑i se mao i Puang.”
18Sakaria mangkutiki malaikaꞌ to moa teꞌ, “Nai tanda aka ti helaa ku ìsang moa teꞌ aka to jadia? Sàbaꞌ ku matua:‑moko sìnang singkoringku.”
19Misùmunna‑mi teꞌ, “Koi:‑mo ti Gabriel, ung mulayani*#1:19 mulayani. Sua: Yunani tèdeꞌ, palleona sadia leleng. i heleꞌna Puang. Ku Na pantuyu‑mo matung mampadeaꞌ kareba belo: te. 20Kalehai! Na rara i latenna u miluhalia bebe. Hang helao: musua: deaꞌ tempona nipaara to ung ku pusua:‑mo, sàbaꞌ ha u patongang‑i ti suaku ung nikannaꞌia i tempona‑mi.”
21To tau i sòhongna mangahong maang Sakaria. Kalle‑i se sàbaꞌ masai rasi i laling Tamming Kabussùngang. 22Pang dea tòna missòhong‑mo, hang hela‑i musua:, mampitubebe teng. Nai anto, na ìsang‑i se moa teꞌ kaitaang‑moda i laling.
23Tòna ladu‑mo ti tempona mulayani i Tamming Kabussùngang, mangule:‑ming mao i lipuna.
24Hang masai‑i nai anto, kaleang ti singkoringna. Jadiꞌ, singkoringna to mampaku: kalaena i rasangna lima hulangna. 25Na konai: singkoringna moa teꞌ, “Ku na pulemu‑mo Puang. Pang mangola: ung Na pukauꞌ tee, Na sangki ti kanihele poluangku i heleꞌna tau.”
Aranna Yesu nipupiìsang
26Tòna ùnung‑mo hulangna kaleang ti Elisabet, Puang mampantuyu malaikaꞌ Gabriel mao i Nasareꞌ, besa lipu: i Galilea. 27Nipantuyu mao i besa anaka bahine ung dang ara‑kang na sola: muane, ung nikonai: Maria. Bahine to, sikàtui‑mo silopàka besa tau ung nikonai: Yusup, hatiꞌna Datu: Daud. 28Lumanna‑mi ti malaikaꞌ to i Maria pang musua: teꞌ, “Salamaꞌ matung, dio ung maupaꞌ tungka! Puang manterei‑ko.”
29Na sàdingna‑i ti sua: to, masussa tungka ti Maria, pang mingkuti-kutiki i laling pinanahanna aka ti palleona sua: to. 30Musuana‑mi ti malaikaꞌ to teꞌ, “O Maria, hau mariaꞌ! Sàbaꞌ u na patantu‑mo Puang mangkorai: malemunNa. 31Pisàdìngi‑kaꞌ! U kaleànga pang u mangkianàking besa anaka muane, pang u konaia Yesu. 32Miluhalia‑Da ung lammuꞌ, pang nikonaia Anakàna Puang, dea‑mo Puang ung Kamìnang Iaho. Pang Puang manghengiing esòngang kadatuangna Daud, ampena Anaka to. 33Miluhalia datuna hatiꞌna Yakub deaꞌ tùrungna. KadatuangNa harai: katampàkangna.”
34Misùmunna‑mi ti Maria teꞌ, “Mangakaa ti jadinna aka to? Sàbaꞌ hang ara‑maꞌko sola: muane.”
35Na sùmuinna‑mi malaikaꞌ to teꞌ, “Pinanaha Malìsong bùruꞌa matung, dea‑mo kuasanna Puang ung Kamìnang Iaho mangkaonei:‑ko. Deanna‑mo to, nikonaia ung malìsong pang Anakàna Puang ti anaka ung nu kianàking. 36Pang u ku paìsàngi matung moa teꞌ tau deammu Elisabet, ung matua:‑mo, mangkaleang‑ing ho anaka muane. Dea ung nikonai: mikamma, ùnung‑mo hulangna kaleang. 37Sàbaꞌ pàli i Puang hari:‑da ung balle.”
38Misùmunna‑mi ti Maria teꞌ, “Koi: tee, kaunangna Puang. Na jadi‑rangmo mao i kalaeku ti aka ung nu pusua:.” Malainna‑mi ti malaikaꞌ to.
Maria mampubelai Elisabet
39Pira-pira teng àlona nai anto, Maria masàraꞌ lumao i besa lipu: i Yudea, ung one: i mungku. 40I anto, mintama i rasangna Sakaria pang mupasalamaꞌ mao i Elisabet. 41Na sàdingna‑i Elisabet ti pupasalamaꞌna Maria, sàhe: mukaenang ti anaka i balammangna, pang Elisabet na kuasai Pinanaha Malìsong. 42Mikakoangna‑mi moa teꞌ, “Dio‑mo ti ung kamìnang nipasakke nai àlaꞌna nasang bahine! Pang nipasakke ti Anaka ung nu kianàking! 43Isai‑kaꞌ ti te? pùna bùruꞌ ti inanna Puangku mampubelai‑kaꞌ! 44Sàbaꞌ, ku sàdingna‑i ti pupasalamaꞌmu, mukaenang ti anaka i balammangku sàbaꞌ haka:. 45U maupaꞌ, sàbaꞌ u patongang moa teꞌ aka ti ung na pusua:‑mo Puang matung Na kannaꞌia!”
Pukurusumangaꞌna Maria
46Tempo to, musua: ti Maria teꞌ,
“Pinanahangku mampalammuꞌ Puang,
47pang lammuꞌ ti pihakaku sàbaꞌ Puang, Pipasalamaꞌku.
48Sàbaꞌ ku Na pusalainahai, na moi ku kaunang ung i hoiꞌ.
Na rara i latenna, nasang tulino mangkonaia‑kaꞌ ung nipasakke.
49Sàbaꞌ Puang ung Makuasa mampukauꞌ‑mo kalle-kalleang ung lammuꞌ mao i koi:.
Malìsong ti konaNa.
50Nai hatiꞌ sangale: tùrung mao i ale:-alena ung mintoroꞌ,
Puang minumpu mampulemu tau ung mangkariaꞌ‑I.
51Na pukauꞌ ti kauꞌ ung si lammuꞌ mangola: kuasanNa.
Na pasisara-saraka ti tau ung papenge:, ung mangkonai: kalaena‑i se.
52Tau ung si iaho, Na uluꞌ nai esòngang kakuasaangna‑i se,
pang tau ung si i hoiꞌ Na lanto‑ing.
53Tau ung si burorang, Na pabossaꞌi angkanna ung belo:,
pang ung si sukiꞌ Na suo: malai mubaba.
54Israel dea‑mo taunNa, Na pulemu.
Na kalehai sàbaꞌ malemunNa,
55mène: ti ung Na àluꞌ mao i ampe-ampeta
Abraham pang hatiꞌna deaꞌ tùrungna.”
56Maria leta: sola: Elisabet màka: itàlu hulangna masainna, màli: na sumule: mao i lipuna.
Yohanes Pumpudoiꞌ nikianak‑ing
57Bùruꞌ‑mo ti tempona Elisabet mangheleꞌi kakianàkang, pang mangkianak‑ing besa anaka muane. 58To na sàding‑mo sidungkuꞌna pang tau deanna moa teꞌ hang makàdaꞌ‑ida lammuꞌna ti malemunna Puang mao i Elisabet, pola:‑i dasse: ho masannang.
59Tempona karoꞌa:‑mo àlona ti anaka to, mukobu:‑mi se pang anaka to nisinni: siulaꞌ atorang tu Yahudi. Pang na aku:‑i se ti manghengi‑ing kona:, Sakaria, konana amanna. 60Hampoꞌ musua: ti inanna teꞌ, “Hari:! Parallu nikonai: Yohanes.”
61Na konaina‑mi se moa teꞌ, “Hari:‑da nai àlaꞌna tau deammu ung mampukona: kona: to.” 62Mampampitubebena‑ming se amanna teꞌ, “Kona: aka ti nihengiing anakàmu?”
63Mampitubebena‑mida ho ti Sakaria mampalau puronnoang, màli: na muronno: teꞌ, “Nikonai: Yohanes.” Mimàha‑i se nasang. 64Tempo dea ho teng to, hela‑mo musua: pole ti Sakaria, pang musua:-sua: mampudi Puang.
65Nasang sidungkuꞌna miluhali mariaꞌ, pang iaka-aka i pangalanna mungku to i Yudea, aka dea to nisilàhai:. 66Nasang tau ung massàding aka to, mingkuti-kutiki i laling pinanahanna‑i se teꞌ, “Oꞌ miluhalia aka ti anaka to i hunni?” Sàbaꞌ tiꞌ makàso: moa teꞌ Puang manterei‑i.
Sakaria mampadeaꞌ sua: nai Puang
67Tempo to, Sakaria, amanna anaka to, na kuasai Pinanaha Malìsong, pang mampadeaꞌ sua: nai Puang moa teꞌ,
68“Nipudi ti Puang, Puangna Israel!
Sàbaꞌ bùruꞌ‑mo mao i taunNa mantoloꞌ‑i se.
69Ta Na pantuyu‑ing se ti besa pipasalamaꞌ ung pabuu:,
hatiꞌna Daud, kaunangNa.
70Ìnang Na pusua: ti to nai lùlung
mangola: nabi-nabinNa,
71moa teꞌ ta nipasalamaꞌa nai ponita,
pang nai kuasanna nasang tau ung mampukàrang‑ke se.
72Nasang to, mampupiita malemunNa mao i ampe-ampeta
pang mangkannaꞌi pangàluꞌNa ung malìsong,
73ung Na àluꞌ sìnang musumpa
mao i Abraham ampeta,
74mangàluꞌ mampasalamaꞌ‑ke nai ponita
mangking hang mariaꞌ‑ke hura: mallayani‑I,
75silentong kamahuloang pang hari: salaiangna i heleꞌNa
deaꞌ katampàkangna katuhoangta.
76Pang dio anàku, u nikonaia nabinna Puang ung Kamìnang Iaho
sàbaꞌ u mampidolùnging Puang mampumasiloso:‑ing dalang ung Na olaa.
77Dea‑mo, u mampakarebaa mao i taunNa ti dalang kasalamaꞌang
mangola: na pantengkai:‑ing Puang ti dosa-dosanna‑i se.
78Hang makàdaꞌ‑ida malemunna ti Puangta,
pùna bùruꞌa mampasalamaꞌ‑ke.
Mène: kùlaꞌ ung sòhong i miluhengi massilaoi: lino,
79mène:‑da ho ti kamasilaoang ung bùruꞌa massilaoi: tau ung tuho: i laling kamakarinnìngang, ung mate kapatongangang,
pang kamasilaoang to mampidolung‑ingke i dalang kabeloang.”
80Dea ti anaka to, sa: baraꞌ-baraꞌna, sa: matotoꞌ-totoꞌna ti pinanahanna. Leta: i padang ung tunini deaꞌ bùruꞌ ti tempona mampakareba suana Puang mao i tu Israel.
Currently Selected:
Lukas 1: skx
Highlight
Share
Copy
Want to have your highlights saved across all your devices? Sign up or sign in
