Yohanes 7
7
Yesu sìnang mantàdi:-tàdiNa
1Ladu nai anto, Yesu tùrung lumao pai iaka-aka i Galilea. Hang mio:‑Ida lumao i Yudea, sàbaꞌ ung si nipiama: i aluku tu Yahudi mangaku: mampatei‑I. 2Hampoꞌ tòna dungkuꞌ‑mo ti perayaang tu Yahudi ung nikonai: Mirasang-rasang, 3musuana‑mi ti mantàdi:-tàdina Yesu moa teꞌ, “Nàmo: i Yudea mangking na ita‑i dasse: ho tau ung mangulaꞌ‑Ko aka ti ung Nu pukauꞌ. 4Sàbaꞌ hari:‑da tau ung manghuni‑ing aka-aka ung na pukauꞌ, ìna mangkapelai: makona:. Dea ti tanda-tanda ung Nu pukauꞌ, belona U pupiita mao i lìliꞌna lino!” 5Musua:‑i se mène: to, sàbaꞌ moi dei: se ung kàle: pulengkeꞌNa, hang mampatongang‑I.
6Musuana‑mi ti Yesu teꞌ, “Hang tempoKu‑miko. Hampoꞌ mao i dio se, i sangkanna teng mading. 7Hang hela‑ida ti lino tee mampukàrang‑ko se. Hampoꞌ Koi:, ìnang Ku na pukàrang, sàbaꞌ lupu Ku mampusua: passabiingKu moa teꞌ kauꞌna kadetu. 8Nàmo: se i perayaang to. Hang lumaa‑Kaꞌko, sàbaꞌ hang tempoKu‑miko.” 9Mène:‑mo to ti suaNa mao i mantàdi:-tàdiNa, pang leta:‑Da i Galilea.
Yesu one: i perayaang Mirasang-rasang i Yerusalem i Yudea
10Hampoꞌ tòna lumao‑mo ti mantàdi:-tàdina Yesu i perayaang to, lumao‑Da ho, hampoꞌ lumao mimbuni-buni. 11One: i perayaang to, ung si nipiama: i aluku tu Yahudi mangokaꞌ‑I. Na konai:‑i se teꞌ, “Iaka‑i ti Tau to?”
12Pang dea ti tau boso: sineni-neniki. Ara ung moa teꞌ, “Tau belo:‑Da.” Ara ho ung moa teꞌ, “Hari:, mampahùling‑Da tau boso:.” 13Hampoꞌ hari: moi besa tau ung harani musua:, sàbaꞌ mangkariaꞌ‑i se tu Yahudi ung si nipiama:.
14To na lampiꞌ‑mo ti pallummuna perayaang to, Yesu mintama i kaoneang Tamming Kabussùngang pang mupaturo:. 15Kallena‑mi ti ung si nipiama: i aluku tu Yahudi, pang musua: teꞌ, “Aka na paìsang‑mo ti Tau tee, pambàtiꞌ i hoiꞌ ti sikolaNa?”
16Na sùmuinna‑mi Yesu teꞌ, “Ung Ku pipaturo:‑ing tee, handei:‑da pipaturoKu, sangadinna pipaturona‑Da ung mampantuyu‑Maꞌ. 17Isai-sai ti ung mangkapelai: mampukauꞌ pampuinahanna Puang, mangìsànga pipaturoKu tee, nai Puang‑raka, nai Koi: kalenanna‑raka. 18Tau ung mampipaturo:‑ing pipaturona kalenanna, mangokaꞌ teng kona: kalenanna. Hampoꞌ Dea ung mangokaꞌ konaNa ung mampantuyu‑I, mahulo:‑Da, hari: ung dang tongang i Dea. 19Hang na hengi‑mingko se naꞌ Musa to atorang-atorang ung na tarima nai Puang? Hampoꞌ tiꞌ hari:‑da nai àlaꞌmu se ung mantoroꞌi atorang-atorang to. Aka pu u mangokaꞌ se dalang mampatei‑Kaꞌ?”
20Misùmunna‑mi ti tau boso: to‑i se teꞌ, “U na katama‑do dihata bulituku! Isai ti ung mampateiO:?”
21Na sùmui Yesu teꞌ, “U kalle se sàbaꞌ ara besa ung Ku kamaꞌ i àlo kapillìheang. 22Hampoꞌ u mingkamaꞌ se ho i àlo kapillìheang. Sàbaꞌ Musa manghengi‑mingko se atorang mangking u musinni: se, mambùruꞌ‑ing moi àlo kapillìheang, u massinni: dosse: tau. Sitongangna, pusinni: to, hang nirara‑rai:da nai Musa, sangadinna nai ampe-ampeta se.*#7:22 Hele i Par. 17:10-12. 23Dea‑mo to, tau hela nisinni: àlo kapillìheang mangking ha nitengkai:‑i ti atorang Musa. Jadiꞌ, aka pu u lalaka tungka se mao i Koi: sàbaꞌ Ku mampumatalete: tau i àlo kapillìheang? 24Hau mangkàtui se nai aka ti ung niita mata, sangadinna mantoroꞌi‑ra: katongangang.”
Tongang naꞌ Datu: Pipasalamaꞌ ti Yesu?
25Pira-pira tu Yerusalem silàha: moa teꞌ, “Handei: naꞌ Tau tee ti ung niokaꞌ-okaꞌ nipatei e? 26Hele‑ko se! Mahulo:‑Da teng musua: i heleꞌna tau boso:, pang hari: aka-aka ung na pusua: ung si nipiama: mao i Dea. Na ìsang tungka‑mi se naꞌ moa teꞌ Datu: Pipasalamaꞌ‑da ti te? 27Hampoꞌ tiꞌ ìna bùruꞌ ti to Datu: Pipasalamaꞌ, harai:‑da moi besa tau ung mangìsang nai iaka ti bùruꞌNa, pambàtiꞌ Tau tee, ta ìsang‑moda ti lipuNa.”
28Tempo to, mupaturo: maang ti Yesu i kaoneang Tamming Kabussùngang. Mampikakoang‑ing moa teꞌ, “U konai: se moa teꞌ u Mi ìsang‑mo se, pang u ìsang‑mo nai iaka ti bùruꞌKu. Hampoꞌ handei:‑Ko pangkapelaiKu kalenanna ti pu Ku mai, sangadinna pangkapelaina Dea ung tongang, ung dang nu ìsang se, ti ung mampantuyu‑Kaꞌ. 29Hampoꞌ Koi:, Ku ìsang‑ko ti Dea, sàbaꞌ nai Dea ti Ku ara, pang Dea‑mo ti ung mampantuyu‑Maꞌ.”
30Na sukaꞌna‑mi se ti mantingkang Yesu, hampoꞌ hari: ung mantokaꞌ‑I. Hang jadi‑i ti to, sàbaꞌ hang na lampiꞌ‑mida ti tempoNa. 31Na moi mène: to, i àlaꞌna tau boso: to, boso:‑mo ti ung mampatongang‑I. Na konai:‑i se moa teꞌ, “Ìna bùruꞌ ti to Datu: Pipasalamaꞌ, làbi bosoa naꞌ ti tanda kalle-kalleang Na pukauꞌ nai Tau tee?”
Tau ung si nipiama: i aluku tu Yahudi mangkapelai: mantingkang Yesu
32Na sàding‑i se tu Parisi ti tau boso: to massineni-nenìki Yesu. Deanna‑mo to, na kasitoroꞌi‑i se sìnang kapala-kapala imang ti mampantuyu pikuyaꞌ Tamming Kabussùngang mantingkang Yesu.
33Musuana‑mi ti Yesu teꞌ, “Sangkìdoꞌ‑rai: ti tempota se sola:. Ladu to, Ku sumulea‑moko mao i Dea ung mampantuyu‑Kaꞌ. 34U Mi okaꞌa se, hampoꞌ hang Mi koraio: se. Sàbaꞌ hang hela‑ko dosse: lumao i anto ung Ku kaoneia.”
35Sikutikìna‑mi se ti ung si nipiama: i aluku tu Yahudi teꞌ, “Oꞌ lumaa‑mo iaka ti Tau te, pùna hang nikoraiI:? Lumaa naꞌ i tu Yahudi ung leta: i lipuna tau? Mampaturoa naꞌ tau ung dang dea tu Yahudi? 36Pang aka ti patuna suaNa ung moa teꞌ, ‘U Mi okaꞌa se, hampoꞌ hang Mi koraio: se,’ pang ‘Hang hela‑ko dosse: lumao i anto ung Ku kaoneia’?”
Uhai ung mi patuho:
37I matanna perayaang to, Yesu tèdeꞌ pang mampikakoang‑ing moa teꞌ, “Isai-sai ti ung mangkahara, na mai menung i Koi:. 38Mampatu: ung si mampatongang‑Kaꞌ, nironno: i Suraꞌna Puang teꞌ, Araa‑da mata uhai i laling kalaena, ung lupu mampasòhònga uhai ung mi patuho:.” 39Ung na patu: Yesu dea‑mo Pinanaha Malìsong ung na tarimaa tau ung si mampatongang‑I. Sàbaꞌ tempo to, Pinanaha Malìsong hang nihengi‑ming, sàbaꞌ tiꞌ Yesu hang nipaiaho‑mi.
40Ladu na sàding‑i se tau boso: ti suana Yesu, ara ung moa teꞌ, “Tau tee, manassa dea to Nabi ung na àluꞌ Puang!”
41Sintàna: mangkonai: teꞌ, “Datu: Pipasalamaꞌ‑da ti tee!”
Hampoꞌ ara ho ti ung mangkonai: moa teꞌ, “Ah, nai Galileaa‑mo naꞌ ti bùruꞌna Datu: Pipasalamaꞌ? 42I laling Suraꞌna Puang nironno: teꞌ Datu: Pipasalamaꞌ dea‑mo hatiꞌna Daud, pang bùruꞌa nai Betlehem, dea‑mo lipuna Daud.” 43Mambùruꞌ‑ing sikeboꞌi ti pantangaꞌna tau boso: mampatu: Yesu. 44Ara nai àlaꞌna‑i se ung palea: mantingkang Yesu, hampoꞌ hari: moi besa ung mantokaꞌ‑I.
Nikodemus mampusuai: Yesu
45Sumulena‑mi se ti pikuyaꞌ Tamming Kabussùngang to, ung nipantuyu mao mantingkang Yesu. Na kutikìna‑mi se kapala-kapala imang pang tu Parisi teꞌ, “Aka dang nu baha‑ko se mai?”
46Misùmunna‑mi se teꞌ, “Hara‑mida tulino ung musua: mène: to!”
47Na ràhona‑mi se tu Parisi teꞌ, “U nipahùling‑mo dosse: ho naꞌ? 48Ara naꞌ nai àlaꞌna tu Parisi, dea‑raka ung si nipiama: sintàna: i alukùta ung mampatongang‑I? 49Hampoꞌ tau boso: to‑i se, hang na ìsang‑i dasse: ti atorang-atorang Musa pang mabussung‑i se!”
50Nai anto, musua: ti Nikodemus, besanna nai tu Parisi. Nikodemus tee, ti ung ara‑mo na bùruꞌ mao i Yesu.*#7:50 Hele i 3:1-2. Musua:‑da mao i santuParisinna pang kapala-kapala imang teꞌ, 51“Manuruꞌ atorangta, tau hang mading‑mi nihukung i dang nisàding‑mi ti pampusuaina kalaena pang i dang niparessa‑mi aka ti ung na pukauꞌ.”
52Na sùmuinna‑mi se teꞌ, “U tu Galilea‑do ho naꞌ? Paressa ti Suraꞌna Puang pang u ìsang‑i moa teꞌ hari:‑da besa nabi ung niahong nai Galilea!”
Besa bahine ung malahang
Perikop tee ha nikorai:‑i i teks Yunani ung kamìnang dolung, hampoꞌ nikorai: i teks Yunani sintàna: pang niàna: sipatu: mintama i Suraꞌna Puang.
[ 53Ladu nai anto, lumao‑mi se i pantang rasangna‑i se,
Currently Selected:
Yohanes 7: skx
Highlight
Share
Copy
Want to have your highlights saved across all your devices? Sign up or sign in
