Markus 16

Yesus iluk agya lagagirik, mendok yagagi wene

(Matius 28:1-8; Lukas 24:1-12; Yohanes 20:1-10)

1It Yakuri samban okbaluk, o hup agya lagagimu, hwa Maria awi Makdalena menda ako inim, Maria Yakobus isa ako inim, hwa Salome inim, it akoen yoangga-hedangga amburup amben sek menda Yesus eyave eralogo bamunda onggo huni lagagwa. 2Onggo huni lagu lagagwarik, nogo yiluk, hari minggu vaga hutun erogo mo il henogo daga wagya helan, wimu akoma lagagwa. 3Ir-it enane yagan lagu dugwit, “Saen helep larik ako hurogo bininayogon embetep?” yiluk, 4inil yokhugu lagagwarik, helep ombok sup larik ako sigilogo lagagi inil hagagwa. 5Hugu lagagwarik, wimu akoma nunggugu dugwit, ininggis amot vikit apsawe ambi yum mudu yirik horaik werekma, inil hugu lagagwarik, enanggela wunggu dugwit, “Ap yi sava agarik?” umbutusim, 6at akoen “Hit henanggela wulubuk. Hit Yesus awi Nasaret menda yo vaga lobalogo bagao ako hinil yokhaguluk wagep ovara, eyave yoma dek. At vage iluk akluk mendok yagas. Henowa eyave nggik okbagarwikmu avela hinil havovok yiluk, omanes. 7#Markus 14:28 yokhanes. ‘An endak Galilea andoma lamindikmu neyalasogom,’ yiluk, wene yukheragagi ako ndatak-at ogagarikmu, At ane welagwi menda nin inim, Peterus inim, yugerelales,” yugeragagi.

8Yugirigya lagagimu, “Wi,” yiluk, enowak wuruk-wuruk yagan wimu en lagu lagagwarik, hoda wunggu dugwit, enalon en avakwa ambi yugeregetek, mbauk enanedek lagagwa.

Yesus sigam agagi wene #16:8: Ala wene Bahasa Yunani mondok endak menda ayat 8 hudi vaga wene Markus yi hekbagagwa. It ap Ala wene inilup menda en “Ayat 9 hudien ayat 20 hudi ako andi ap Markus ako dirup watitek. Ap adik en hivis dirup watigi,” yiluk, yagalagwi.

(Matius 28:9-20; Lukas 24:13-49; Yohanes 20:11-23; Lakbogogi Wene 1:6-8)

[9Hari minggu o hutun hup en At Yesus ako iluk akluk mendok iri lagagirik, at hwa Maria awi Makdalena menda madis 7 endawima welagagi wibagagi ako, Yesus eyave il neyapwak yiluk, sigam agya lagagimu, 10At Yesus aswei inim, arupwi inim welagagwa ako, yup yagwi, de wene yugwi, ogagusim, at hwa ako yonggo yugeralagagi. 11Yesus iluk akluk, mendok yagas il higya lagagirik, yugeralagagi ako enaruk hunggugwa ovara, enendawi avyarat embetetek welagagwa.

12Anderogo ogagu lagagwarik, werekma, Yesus aswei menda mberen o umwa en wunggu lagagwarik, suvaga lagusim, At Yesus eyave adik hunogo heda okbaluk, sigam agya lagagimu, 13eneyami vaga wagu lagagwarik, enaswei nin yugera wagagwa ovara, it ako ogo avyarat embetetek adigat welagagwa.

14Andi okbaluk, hivis At ane welagwi menda eneyave 11 ako erom nunggusim, neyapwak yiluk, enadema sigam ari wagagi. Sigam ari wagya lagagirik, avyarat embetetek enendawi lakot atma, At iluk akluk mendok yagagi inil helok yugera wagagwa ako, enendawi avyarat embetetek iniselok, enanggadi watigi.

15Enanggadi watya lagagirik, it ako yugirigya dugwit, “Hit yi awi ndi awi lagu dogomundik, it yi avakwa ndi avakwa ininis unggul adik-adik ovok erogo Sek Wene yugeregek nagu dogop. 16Sek wene yugeregek lamwi ako vaga enendawima en avyarat umbutu dogomundik, ima wombabuguselok, enagap wendarisogon. Eke, wene andi enendawima avyarat embetetek iniselok andi, Ala en enowak dibaluk anggin enovaga bisayogon. 17An nane enendawima avyarat umbutuselok, it nggarogo ogarubuk menda yerogo ogarusogom: it madis enendawima nonggagagi ako An ninis vaga nggigilogo wibugwis, it enane adik-adik inunggut menda yugurugwi, 18mbas huli ininggis vagatwis, heda nalis amburup nungguselok, hambegetek inugwis, aup edup iniselok, enovaga ininggis vakbisiluk, sek okbugwis, ogarit lagu dogosogom o,” yiluk, yugeragagi.

Yesus mbogot vaga wolok inggigi wene

(Lukas 24:50-53; Lakbogogi Wene 1:9-11)

19Yugirigya lagagimu, Nenowa Inis Ombok Yesus ako, At Ala en wolok mbogot vaga ba inggya lagagimu, At inggis amotkan hora yagagi. 20Ba inggya lagagimu, it Yesus ane welagwi menda ako yi awi ndi awi Sek Wene yugeregek nagusim, nggarogo ogarubuk menda ogarit nagwis vaga, it avakwa ovok erogo, “Wene yi avyarat o,” ombarupwak yiluk, Nenowa Inis Ombok yonggar-inipu hegek, ogarit nagu lagagwa.]

Currently Selected:

Markus 16: nbq2013

Highlight

Copy