Matius 24

“Ala awi valek masalogo mbo hagup,” yugeragagi wene

(Markus 13:1-2; Lukas 21:5-6)

1At Yesus Ala awi valekma en wulu wagyaim, At ane welagwi menda en At adema wagu lagagwarik, yugugu dugwit, “Ala awi valek yi hil okhanen,” yiluk, yugugu lagagwama, 2At Yesus en it yugirigya dugwit, “O yenam valek agarik ovok erogo hinil helagwi? Helep ovaga dambuk ogarek iligik andi ambiat ogo dogosogonbuk. Ovok erogo masalarugwi, yiluk, avyarat yukheraliga o,” yugeragagi.

Anggin enovaga arisogon wene

(Markus 13:3-13; Lukas 21:7-19)

3Andien, ndom Saitun vaga inggya lagagirik, adik andenam hora yiluk werekma, At ane welagwi menda ako adema ari wagu lagagwarik, At yugugu dugwit, “‘Anderogo arugwi o,’ yukneregen ako, o mera oklarugwi? Eke, Hat warup inim, o hivis oklarup inim, horok ari wagya halok, ninilup arup menda nenendawi dibaguluk nano ogagya hagup? Yukneran.”

4Yugugu lagagwama, At Yesus en it yugirigya dugwit, “Avakwa henendawi wokhinipu saoen henova hwalogo dogones. 5It avakwa wisane en An ninis vaga yagan wagu dugwit, ‘At Keretus ako andi, an aro,’ yiluk, avakwa wisane erogo henendawi wokhinivusogom. 6Ndup silis bagwi, ndup sumbutwis, ogasagwi ovok henaruk hunggu dogosogom ovara, henalon habuk. Andi avyarat oklarisogon ovara, ‘Yi hivis arup ako vage ari wandiga o,’ yiluk, umbutu dogobuk. 7Ap ininis unggul adik-adik ndup sumbutwis, ap inis ombok ambi aori en ap inis ombok ambi aori inim ndup ombok ogagwi, ogarugup. Ogagusigik, o yi awi ndi awi erom uvup agya, o wadok ombok erogo iris, ogarisogon andi, 8akwa eneyak endaruguluk yavul wasagwi hak, anderogo wane-wane andi menda ovok erogo endak ogagya hagup o.”

9“O andi hudi it avakwa en hit heneyave vagarogo henovaga idup-mbidup okbigiluk, henarupwak yiluk, wogurugwi, it avakwa ininis unggul adik-adik en hit An nane wagagup vaga, enanggon hinumbutwi, ogarugup. 10O andi hudi ap wisane enanggon numbutu dugwit eve wene hekbugwis, ap ambien ap ambi warupwak yiluk, wogirigya, at ambien at ambi anggon imbita, ogarugup. 11Eke, ap wisane wagu dogogupik, un hulugat, ‘Ala en yuknigas ambi yukherayogon o,’ yiluk, avakwa wisane enendawi wugu sagup. 12It avakwa weyak ogasagwi andi, ombok arisogon atma, avakwa nabwa-habwa ombasagwi ako enendawi hol agya dugwit, enanggon-at oginivugwi. 13Anderogoat ari warugwi ovara, o hivis atok vaga henendawi wadokdek dogomwi halok, henagap wendakhinivugwi. 14Ala avema bisaup Sek Wene yi, avakwa ininis unggul adik-adik menda inilup arupwak yiluk, yi awi ndi awi ovok erogo mondok sigam erogo yugeregek naguselok andi, o hivis oklarup avyarat arugwi,” yiluk, yugeragagi.

Anggin mondok adik menda okbisaup wene

(Markus 13:14-23; Lukas 21:20-24)

15Yugirigya lagagirik, wene ambi inim yugirigya dugwit, “Hit dirup warek bikhelagwi yi, henendawi dibas. At navi Daniel akoen iri dugwit, ‘Agoda werek weyak okbisaliga menda,’ avok yagagi ako, Ala awi valekma andenam mendek yi wagya hit hinil hugu dugwit, 16it o Yudea agarwik menda hoda o ndom vaga andoma hwilaklari lapwak. 17It o virimu ugun agarwik ako, enangge-enangge umwa ilim agarik ako, heda nunggubuk. 18Eke, it eneyavumu agarwik ako, eneyami vaga enasum enamwa heda labuk.”

19“O andi hudi anggin iya agya halok, it akwa enavula inim, eneyak idak wogerelagwi inim, hoda wulup meyan atma, enabwa o. 20O hoda wulup ako, o soges ogagya mbeda a, ata o samban ogasagwi vaga a, agya haoen, samban ogagu dogones. 21At Ala yi menda ndi menda ogagagi hudien mbikit, yogak hudi avakwa enovaga anggin-mbanggin okbugu lagagwa ako, horok madugat okbugu lagagwa. Hivis ogo, madugat okbisasogom ovara, o andi hudi adik alonedok erek adigat anggin-mbanggin enovaga okbugu sagup. 22Anggin-mbanggin enovaga bisaup ari wagya halok andi, anggin-mbanggin ako Ala en hudi balipuk en ap enagap mondok wendaklaklipuk ovara, avakwa enogo bogogi ako enake hudi bagwi.”

23“O andi vaga ap ambien ‘Yokhanes, Keretus ako yoma agarik,’ eke, ap ambien ‘Yokhanes, Keretus ako andoma agarik,’ yukhiruguselok, henendawi avyarat ombarubuk. 24It ninen huluk wene yukhirugu dugwit, ‘An Keretus aro,’ eke, ‘An navi Ala wene yukheraliga menda aro,’ yiluk, yagan wagu dogomundik, avakwa Ala aburi enogo bogogi ako enendawi nomalinivuguluk, enalon werek menda inim, nggarogo ogarubuk menda inim, ogarugup ovara, dek. 25Andi ogarup andi, ao ogagetek hegek, wene yi sigam erogo yukheraliga atma, henendawi dibas.”

26“‘O harumu avakwa dekma agarik o,’ yukhiruguselok, bikha labuk. Eke, ‘Umwa ilim andoma agarik o,’ yukhiruguselok, avyarat ombarubuk. 27Mo il wulu wandigama en o digavok iri dugwit o atok-atokma ovok erogo awiya agya dugwit ovok sigam asiga hak, An Ap-At Endaklagagis warup ako vaga anderogoat ogarugwis. 28Wam vidis agarikmu akoma swa ikakuk linggilisagwi o,” yiluk, yugeragagi.

“An Ap-At Endaklagagis ako warugwis,” yugeragagi wene

(Markus 13:24-27; Lukas 21:25-28)

29 # Yesaya 13:10; 34:4 yokhanes. Wene ambi inim yugirigya dugwit, “Heneyave anggin-mbanggin ako henovaga okbigigu dogomwima, ndugwis ambi inim welagatek,

‘Mo il hwis iris, saut abya dek agya,

dadiwap mbogot vaga en wen vaga wambu wagya,

it mbogot vaga enanye werek menda ako, yukul-wadok iris,

ogarugwi o.’

30“Ogagya hegek, o andi hudi An Ap-At Endaklagagis warup inilup arup menda ambi mbogot vaga andoma ogagya neyalok, it avakwa wen vaga ininis unggul adik-adik en yup yagusigik, An Ap-At Endaklagagis ako mondok nabinak werek niris-novagangge dikduk okhedelok nagayuk werek dugwit, mbogot vaga en hena anggelekma wagya neyagup o. 31Eke, ane ombok ogasagwi menda trompet ako ane ogagya hegek, Anen it nayelomani malaikat ako lakbisa wagya neyalok, wagu dogomundik, An naburi enogo miginipigis ako o adem venak-venak en, o mbogot atok-atokma en, ovok erogo wonggalogo bisa warugup o,” yiluk, yugeragagi.

Yo widis vaga wakhegek yugeragagi wene

(Markus 13:28-31; Lukas 21:29-33)

32Yugirigya lagagirik, ambi yugirigya dugwit, “Yo widis angga savuligiluk ogasiga ako wene henendawi dibas. Elaklak vaga aruknuk mban iri dugwit, angga savuligiluk ogagya halok, ‘O vage hivi bagiluk ogagya higi o,’ yagalagwi ako hak, 33‘Anderogo ogarugwi,’ yiluk, yukhirigi ako ogagya hinil hugu dogogupik, ‘Wi! Horok vanggo yagas atma, vage ari wagya higi o,’ yiluk, ombarugup. 34Hit avakwa yogak agipik yi, ao dek agetek hinigik, hivis ogarup avok yukhirigi ako, ovok erogo atma des iri hagup o, yiluk, avyarat yukheraliga. 35Wen inim, mbogot inim, dek arugwi ovara, An nane andi, dek arisogonbuk mondok-at dogosogon,” yiluk, yugeragagi.

“Ndugwis ngga vaga warup hit hinunggut,” yugeragagi wene

(Markus 13:32-37; Lukas 17:26-30, 34-36)

36Wene ambi inim yugirigya dugwit, “An Ap-At Endaklagagis yi, o ngga hudi warup inim, mo il maren vaga warup inim, ako avakwa mondok inunggurat. It mbogot vaga nelagwi menda malaikat ogo, inunggurat. Eke An Ala Abut ogo, ninggurat. Ilup andi, An Nasin Ala adigat agarik. 37Ap Nuh eyave hegek, avakwa ugun ogarit lagu lagagwa ako ndatak, An Ap-At Endaklagagis warup hudi it avakwa anderogo ugunat ogarit lagu dogosogom. 38Is nggut namut ombok ao yanggadit daga wagatek hegek, it avakwa en ugunat enagarom nunggwi, enagas nunggwi, ap en akwa hidugwi, akwa en ap hidugwi, ogarit nagusigik, at Nuh mburis ombok ako elola nonggagagi. 39Nunggwigya lagagimu, it avakwa en, ‘Yeoklarisogon,’ enape wenggelekdek werekma, is nggut namut yanggadit inggya dugwit, eneyave wisane is ndokalipigi ako ovagak, An Ap-At Endaklagagis warup hudi vaga anderogoat oklarisogon. 40O andi hudi ap mberen eneyavumu werekma, ambi wigya, ambi hekbagya, ogagya hagup o. 41Eke, akwa mberen gandum enggen yangganggusim, ambi wigya, ambi hekbagya, ogagya hagup.”

42“Anderogo atma, Henasin An ako, o ngga vaga warup hinunggut atma, henendawi suam watu dogones. 43Hit dibas! At ap awi werek en, ap onggop waliga menda ako o hup mo il ngga vaga warisogon, ilup duklipmu en, ‘Sup lakbaluk, nangge-nangge onggop wa nunggu wagya haoen,’ yiluk, nogo yigitek mondok-mondok suam watya duklip. 44An Ap-At Endaklagagis yi, hiren, ‘O ngga vaga warup,’ nembetetek hinigik, warugwis atma, hit mondok dikduk okbaluk dogones o,” yiluk, yugeragagi.

Ap ambi ugun ogagya, ambi dikduk erogo ogagya, ogagagwa wene

(Lukas 12:41-48)

45Wene ambi inim yugirigya dugwit, “Andi halok, ap ombok ayeloman ambi endawi werek yavup dikduk erogo ogagya halok andi, at asin ap ombok akoen at ayelomani nin yugirigya dogopwak yiluk, mondok okbagagi. Mondok okbaluk, winggigi. Wunggu hegek, ayeloman akoen, ayelomani nin ako enagarom wogeraup agya halok, enagarom des erogo wogeragagi. 46Hivis it enasin ako wagya dugwit, at ayeloman ambi ako anderogo dikduk ogagya halok, asin ako endawi adenggen ombarisogon. 47Asin en ayeloman ako anderogo ogagyama adema wagya halok, angge-angge ovok erogo vagago dogopwak yiluk, andok okbayogon o, yiluk, yukheraliga. 48Eke, ap ayeloman ako andi, ovavut mondok weyak atma, endawi imbita dugwit, ‘Nasin ipi erogo dukluk warisogon ai?’ yiluk, 49asin ayelomani at aswei nin ako yo yawi enatya, is anggur agas nelok, nenek ogasagwi menda inim dambulik dugwit, yi menda ndi menda ugun dagap yagan nenggek lagya, is anggur agas ninggya, ogagya halok andi, nggarogo oklarup ombasagwi? 50Dek o! Ap ayeloman akoen, ‘Nasin ndugwis andi vaga warisogon,’ eke, ‘Mo il andi vaga warisogon,’ embetetek endawi ugun obak werekma asin ako wagya dogomindik, 51ayeloman ako eyave libik-ndendok erogo it avakwa enagavoval ovagak ogasagwi menda mabisaligama akoma mabamindikmu dugwit, yup yagya, idup en wakhidigya, ogagya dogosogon o,” yiluk, yugeragagi.

Currently Selected:

Matius 24: nbq2013

Highlight

Copy