Matius 21

Yesus o Yerusalem nunggwigyaim, “Nenowa Inis Ombok yi aro,” yagan wagagwa wene

(Markus 11:1-11; Lukas 19:28-40; Yohanes 12:12-19)

1It Yesus inim wagagwa ako, o Yerusalem vanggo yi wagu dugwit, o Betepage ndom Saitun vaga ari wagu lagagwarik, akoma dugwit, Yesus en At ane welagwi menda eneyave mberen lakbugu dugwit, 2“O valekma akilisim elales. O valekma andoma ari lagu dugwit, wam keledai ambi eyak im yunggwi yidugup agarwik hinil hugu dogomundik, yunggwi veralogo woknirimano. 3Eke, ap ambi en, ‘Hit nano ogasagwi?’ yukhirigya halok, hirenen yugugu dugwit, ‘Nenasin wam keledai hogop en, “Walales,” yuknirigya halok, wa wagyo,’ yugugu dogomwima, arenen ‘Andi halok, hodorogo wolok elales,’ yukhirigya halok, wolok omano,” yiluk, wene enovaga bugu lagagirik, lakbogogi.

4Anderogo yiluk lakbogogi ako, At Ala yugugu hegek yugeraliga menda navi ambien yagagi ako, atma des yupwak yiluk, lakbogogi. At yagagi andi, yerogo:

5 # Zakharia 9:9 yokhanes. “Avakwa o Sion menda yugurugu dugwit,

‘Henowa Inis Ombok vage henadema wandiga o.

Endawi sagain dugwit keledai ambot vaga hora yiluk wagya,

keledai eyak ambot vaga hora yiluk wandiga andi,

hinil hanes o,’ yiluk yugeranes,”

yiluk, yagagi ako atma des yupwak yiluk, lakbogogi.

6Anderogo lakbugu lagagimu, At Yesus ane welagwi menda mberen ako, lagu lagagwarik, Yesus yugeragagi ako wane-wane-at ogagu dugwit, 7wam keledai eyak iperen woginiviluk wagu lagagwarik, it enasum sogwesum wam keledai ambot vaga ndabagu lagagwama, Yesus andi vaga hora yi inggigi. 8It avakwa wisane wonggalek welagagwa ako ninen enasum sogwesum sup ombok vaga mbigalogo ndalit lagwi, eke, it ninen yo angga mbalogombo sup ombok vaga ndalit lagwi, 9#Mazmur 118:25, 26 yokhanes. okbagu lagagwama, ako vaga wagya hegek, it nin enendak wagwi, it nin ambetaga wagwi, ogagu dugwit,

“Daut ombao yi, Wa! Wa! Wa! Hosana! Wa!

Nenasin Ala inis vaga wandiga yi, inis siyabelagwi o!

At Ala o mbogot winimen agarik ako, Wa! Wa! Hosana! Wa!”

yiluk, enamitmit yagan wagagwa.

10Yagan wagusigik, At Yesus o Yerusalem nunggwigya lagagimu, it avakwa o kota andoma menda ovok erogo nane-hane yugu dugwit, “Ayai! Ap yi sa ombasagwi?”

11Yugu lagagwama, it avakwa wonggalek welagagwa akoen, “Ap yi Yesus, navi Ala en yugugu hegek yukneraliga o Galilea awi Nasaret menda ako,” yiluk, yagagwa.

Yesus en Ala awi valekma haryogo wibogogi wene

(Markus 11:15-19; Lukas 19:45-48; Yohanes 2:13-22)

12At Yesus akoen Ala awi valekma mbumbumu nunggwigya lagagirik, it Ala awi valekma andoma yi menda ndi menda onggo hunggik yagalagwi menda ako haryogo wibugu, it ap yoparip onggo-onggo ogasagwi ako enameja ndalek inim, it swa suwa onggo hunisagwi enombanggu horaik agarwik menda inim, avut endenogo mbombo higya, ogagya lagagirik, 13#Yesaya 56:7 yokhanes; Yeremia 7:11 yokhanes. it yugirigya dugwit, “Ala en, ‘An nawi valek yi, “Samban ogasagwima-at” yugu dogopwak o,’ yiluk, yagagi dirup warek agarik ovara, o yi, hiren, ‘Ap enonggop wokbaluk, hwilaklari nunggwisagwima,’ ovagak ogagu hinigis,” yiluk, yugeragagi.

14Yugirigya lagagirik, it inil mbuk menda inim, inisok weyak menda inim, Yesus adema o Ala awi valekma akoma wagu lagagwama, sek okbogogi. 15Sek okbugu lagagimu, it imam-imam enasini inim, it Ala wene vagago welagagwa menda inim, akoen At Yesus nggarogo ogarubuk menda ogagya inim, eke, it avyak mariduk en Ala awi valekma mbumbumu andoma enane ombok vaga yugu dugwit, “Daut ombao yi, Wa! Wa! Hosana! Wa!” yugwi ako inim, inil inugu lagagwarik, enaninis en mbet yugu dugwit, 16#Mazmur 8:2 yokhanes. “It avyak yagalagwi yi ako, hat haruk hulisiga!”

Yugugu lagagwama, At Yesus en, “Yu. Naruk hulisiga. Ala wene endak dirup warek ako vaga, ap ambien iri dugwit:

‘It avyak ao swi endago menda inim, ao idak nelagwi menda inim, hinis siyabagagu dogopwak yiluk, amor erogo okbogogin o,’

yiluk, yagagi ako, hit bikhegetek agipik yi?”

17Yugirigya lagagirik, it ap ako hekbisiluk, o kota ombokma andoma en wulu wagya lagagirik, o Betania-at nogo yi lagagi.

Yo widis vudilogo bagagi wene

(Markus 11:12-14, 20-24)

18Nogo yiluk, hutun o yanggo iri lagagimu, At Yesus eyami vaga o kota ombok Yerusalem akoma wagya dugwit, erom uvup ogagya lagagimu, 19yo widis ambi suvaga werekma il higya lagagirik, adema lagya lagagirik, yo ako enggen yigitek un angga adigat higya lagagirik, yo eyave ako yugugu dugwit, “Hat yo yi, henggen mondok yigitek-at dogwen.” Yugugu lagagimu, yo widis ako, yugugu hegek mbikit mbuk agagi.

20Mbuk agya lagagimu, it Yesus ane welagwi menda ako inil hugu lagagwarik, “Wi, nalon i!” yiluk, vok yugu dugwit, “Yo widis yi, nggarogo yiluk mbikit mbuk aga?”

21Yugu lagagwama, At Yesus en, “An wene ambi avyarat yukherayogon. Anen yo widis yi ogagi hak, hiren anderogo ogarup ndak ovara, andi adigat dek. Henendawi mberen dek dugwit, Ala ovaga vanggabaluk avyarat ombasagwi halok, hiren, ‘Ndom yi yoma en legego namutmu nunggwilak,’ yugugu hiniselok, ndatak-at ogagya hagup. 22Eke, hit yi menda ndi menda Ala nggino yugugu dugwit, henendawi At ovaga vanggabaluk avyarat umbutu hiniselok, wokhirigya hagup o,” yiluk, yugeragagi.

“Sa inis vaga ogasiga?” yugogogwa wene

(Markus 11:27-33; Lukas 20:1-8)

23At Yesus ako Ala awi valekma mbumbumu nunggwigya lagagirik, avakwa mamulirigya hegek, it imam-imam enasini inim, ap ombok-ombok inim, Yesus adema wagu lagagwarik, At yugugu dugwit, “Hat yi ogagek ndi ogagek ogasiga andi, sa inis vaga ogasiga? Saen yukhogogirikmu ogasiga?”

24Yugugu lagagwama, Yesus en, “An ogo, hit ambi hemekhinisayogon. Onggo yuknugu hiniselok andi, An ogarit landiga yi, sa inis vaga ogasiga ako sigam erogo yukherayogon.” 25Yugirigya lagagirik, it yugirigya dugwit, “At Ima Wombabisaliga menda Yohanes ako andi, saen yugogogi vaga wombabugu lagagi? Ala mbogot vaga menda en yugogogirikmu wombabugu lagagi a, ata avakwa en yugogogwarikmu wombabugu lagagi a? Hit yukneres!”

Yugirigya lagagimu, ir-it wene mbanggu dugwit, “Niren, ‘Mbogot vaga en yugogogi vaga ima wombabugu lagagi o,’ yugu niniselok, Aren iri dugwit, ‘Eke, andi halok, hit hinilup helan, nggarogo yiluk hit henendawi At avyarat embetetek welagagup,’ yiluk, yuknerayogon. 26Eke, nirenen, ‘Un avakwa en yugogogwa vaga ima wombabugu lagagi o,’ yugugu niniselok, it avakwa ovok erogo, ‘At Yohanes andi, ap navi Ala en yugugu hegek yugeraliga menda,’ yagalagwi atma, it nadok-hadok ogagu saoen, nit nggarogo yup erek, nenalon,” yiluk, 27Yesus yugugu dugwit, “Nit ninunggut o,” yugogogwa.

Yugugu lagagwama, “Andi halok, An ogasiga yi ogo, saen yuknogogirikmu ogasiga andi yukherayogonbuk,” yiluk, yugeragagi.

Ap aburi mberen ogagagwa vaga wakhegek yugeragagi wene

28Yugirigya lagagirik, ambi inim yugirigya dugwit, “An wene yi yukhirigya neyagek, hit nggarogo ombarumwi? Ap ambi aburi eneyave mberen atma, asin en abut manggum ako adema lagya lagagirik, yugugu dugwit, ‘Nabut wai. Hat yogak anggur yavup yagoma akoma ogarilak.’

29“Yugugu lagagimu, abut manggum akoen, ‘E o, nasin,’ yugogogi ovara, ogari lagetek mbup yagagi.”

30“Andi okbaluk, asin akoen aot ako adema lagya lagagirik, anderogoat yugugu lagagimu, ‘An nanggon,’ yugogogi ovara, hivis andi, endawi yunggup iri lagagirik, ogari lagagi.”

31“Enasin ogarup endawi imbitigi ako aburi mberen atma, ambi saen ogagagi ombasagwi?”

Yugirigya lagagimu, iren, “At hivis menda akoenat ogagagi higyo o.”

Yugugu lagagwama, At Yesus en, “Andi halok, An wene ambi avyarat yukherayogon. Hit imam-imam enasini inim, ap ombok-ombok inim, Ala avema ao nonggegetek hinigik, it ap pemerintah enake yoparip wonggalisagwi menda inim, it akwa ugun yanenggek nelagwi menda inim, it enendak Ala avema nunggwisagwi. 32Wene sek ogarit nagu dogop Ala ombasiga ako, at Yohanes en yukhera wagagi ovara, hiren, ‘Yi avyarat yukneraliga,’ embetetek hinigik, it ap pemerintah enake yoparip wonggalisagwi menda inim, akwa ugun yanenggek nelagwi menda inim, it akoen At avyarat umbutugwa. Eke, it At avyarat umbutugwa ako hinil inigu dugwit, ‘Ai, nit ogo, weyak ogasagwi nenasam helok, avyarat ombarusogom o,’ yup segat ovara hinigik, henasam hegetek avyarat embetetek agipik yi!” yiluk, yugeragagi.

It ap anggur yavup malogo welagagwa wene

(Markus 12:1-12; Lukas 20:9-19)

33Yugirigya lagagirik, ambi inim yugirigya dugwit, “Wene wakhegek ambi yukherayogon atma, henaruk des erogo holes. Ap awen werek ambien anggur awi yakbaluk, leget wigya, owangga mbetalogo yanggadumenda walup mendagya, eke, suam watu dogopwak yiluk, mbeda leyanggya, ogagya lagagirik, enggen mbalek ako nin it hidugwi, nin at wogugwis, ogagu dogopwak yiluk, at eyavup yago ako ap malogo dogomenda mondok okbisiluk, o hunogoma lagagi. 34Lagya lagagirik, andoma dugwit, anggur enggen yugup ako mbalup amor ari wagya hegek, it at eyavup malogo dogopwak yiluk bisiluk lagagi akoen enggen yugup nin at angge ako mbalogo woknirupwak en yiluk, ayelomani enadema lakbisa wagagi.”

35“Lakbisa wagagi ako wagu lagagwama, it at awi yagagi malogo agarwik akoen at ayelomani ako vakbisiluk, ambi yo watwis, ambi mondok min watwis, ambi helep vaga sagalogo watwis, oginipugwa. 36Oginipu lagagwama, endak ap awen werek akoen ayelomani mberenat lakbisa wagagi ovara, hivis andi, wisane erogo lakbisa wagagi ako wagu lagagwama, it ogo, anderogoat oginipugwa. 37Oginipu lagagwama, hivis ap awen werek akoen, ‘Nabut yi andi, agayuk wutu dugwit, hai warogo wasogom o,’ yiluk, at abut adigat lakba wagagi.”

38“Abut lakba wagagi ako, at awi yagagi malogo agarwik akoen inil hugu lagagwarik, ir-it wene mbanggu dugwit, ‘Abut mavorangge hedaup yi atma, mondok wakbaluk, mavorangge nirat hedasogom o.’ 39Yugu lagagwarik, eyave vagarogo anggur awi yagoma en leget weram haryogo wibagu lagagwarik, mondok min-at watugwa.”

40“Anderogo ogagagwa atma, enasin awen werek ako wagya halok, it at eyavup yago malogo agarwik ako, nggarogo okbisayogon ombasagwi?”

41Yugirigya lagagimu, it akoen, “Dek o! Enasin wagya halok, it ap weyak adigat ako andi, mondok enarogo dek okbisiluk, enavoloma awi yagagi malogo dugwit, enggen mbalup amor agyaim enggen mbalogo wogugu dogopwak yiluk, ap adik ambi mondok okbisayogon o,” yiluk, yugogogwa.

42 # Mazmur 118:22, 23 yokhanes. Yugugu lagagwama, Yesus en, “Ala wene dirup warek ambi yi:

‘It helep vaga o valisagwi menda akoen

o vanggu dugwit, helep ambi mbobagagwa ako,

mondok-mondok helep owak ndalaga o.

At Nenasin Inis Ombok en ogagagi atma,

mondok iya adigat hugu lagurik,

vok yagalagwi o,’

yiluk, yagagi dirup warek ako hit bikhegetek agipik yi?”

43“Andi halok, Ala avema bigigaup hirat welagagup ovara, avema bigigayogonbuk. Ata, hit henavoloma, enggen sek menda yiliga hak, it avakwa ininis unggul adik hunogoma menda en, Ala endawi ombasiga menda des erogo ogagu dogosogom halok, At avema bisayogon. 44It avakwa helep andi vaga yakhiduguselok, eneyave yungguk-bogok erogo wambusogom, eke helep andien avut endenogo avakwa enovaga sopabugu halok andi, eneyave mondok ilumukmut erogo okbugu dugwit, huvuwelanggen ovagak okbisayogon o,” yiluk, yugeragagi.

45It ap imam-imam enasini inim, ap Varisi inim, akoen At Yesus wene wakhegek yugeragagi ako enaruk hunggu lagagwarik, “Nit niniselok yagaliga o,” yiluk, yedok hugu lagagwarik, 46vagaruguluk ogagagwa ovara, avakwa wisane en, “Ap yi, Ala en yugugu hegek yukneraliga navi ako menda Arat higyo,” yiluk, yugu lagagwama, enalon en mbup yagagwa.

Currently Selected:

Matius 21: nbq2013

Highlight

Copy