Matius 16
16
“Ninilup arup menda ogaru,” yugogogwa wene
(Markus 8:11-13; Lukas 12:54-56)
1Wagya lagagimu, it ap Varisi menda inim, ap Saduki menda inim, Yesus adema wagu lagagwarik, avut mbaluguluk yugugu dugwit, “Hat heyave avyarat Hasin Ala mbogot vaga menda en lakbaga wagagarikmu wagen halok, ninilup arup nenalon werek menda ambi ogagya heyasogom.”
2Yugugu lagagwama, Yesus en, “O howam mo il huruk iri hegek mbogot vaga mudu-mudu ogagya halok, hiren, ‘Heveret o hivi arigiluk, ogagya higi,’ yiluk, yugwi, 3eke, o hutun mbogot vaga elose mudis buringgu halok, hiren, ‘Yogak o musu ombok nagiluk, ogagya higi,’ yiluk, yugwi, hit anderogo yagalagwi ako. Mbogot elosenggen ogasiga dibaluk, ‘Anderogo ogagya hasogom o,’ yiluk, yagalagwi ovara, o yogak arup ogasiga andi, hinilup arovovok yiluk ogasiga ovara, dibaluk, ‘Andi anderogoat ogarigiluk ogagya higyo,’ yiluk, yup meyanat hinigis. 4Hit avakwa o yogak agipik yi, Ala hekbagu lagagupik, weyak adigat ogarit nagu dugwit, ‘Ninilup arup menda ambi ogagya heyasogom o,’ yuknisagwi ovara, hinilup arup menda An adik ambi ogagya neyasogombuk. Ata, at navi Yunus akoen, inilup arup menda ogagagi ako adigat ogagya neyasogom,” yiluk, yugirigya lagagirik, it ap ako hekbisiluk lagagi.
It Varisi Saduki enane ragi roti virisiga menda ovagak atma, enane dibagu dogobuk wene
(Markus 8:14-21)
5It Yesus ane welagwi menda ako, inamut yanggadek Galilea ambo elavikit wunggu lagagwarik, erom roti inunggut akluk lagagwarikmu, 6Yesus en it ako yugirigya dugwit, “It ap Varisi menda inim, ap Saduki menda inim, enane andi, ragi roti virisiga menda ako hak atma, henendawima nunggwigya haoen, hit henova hwalogo dogones.”
7Yugirigya lagagimu, it ako ambi yugigik ambi yugigik ogagu dugwit, “Roti wolok wagetek niniselok yukneraliga,” yiluk, yugwi ako 8At Yesus yedok inigu lagagirik, “Hit henendawi des erogo avyarat nombasagwidek yi, ‘Erom roti andi menda wegetek,’ yiluk, henendawi anggin dugwit wene yagalagwi andi, nggarogo yiluk? 9-10Endak, erom roti 5 ovara, ap eneyave 5.000 wogirugu lagipik, andela higitlaga mburiyum maren yedogo bagep ako hinunggut agep? Eke, erom roti 7 ako ap eneyave 4.000 wogirugu lagipik, mburiyum maren yedogo bagep ako ogo hinunggut agep? Adem anderogo yiluk ogaga, hit dibagetek dugwit, yagalagwi? 11Anen eve erom roti andi menda avok yukheraligadek ovara, nano yiluk hit dibagetek agipik? It ap Varisi menda inim, ap Saduki menda inim, enane ako andi, ragi roti virisiga menda ako hak atma, henendawima nunggwigya haoen, hit henova hwalogo dogovovok yiluk yukheraliga.”
12Yugeragagi andi vaga iren, “At Yesus yagaliga andi, erom roti virupwak yiluk, ragi ovaga belagwi ako menda halok, yukneraligadek. Ata, it ap Varisi ap Saduki inim en enane mamulerelagwi menda ako nenendawima nunggwigya haoen, nit nenova hwalogo dogoguluk, yuknirigya higyo o,” yiluk, dibagagwa.
Peterus en, “Hat Keretus aro,” yugogogi wene
(Markus 8:27-30; Lukas 9:18-21)
13At Yesus o Kaisarea Pilipi ari lagu lagagwarik andoma nagu dugwit, At ane welagwi menda yugirigya dugwit, “Avyak! An Ap-At Endaklagagis yi, it avakwa en sa numbutu dugwit, yagalagwi?”
14Yugirigya lagagimu, iren At yugugu dugwit, “It ninen ‘Hat Yohanes Ima Wombabugu lagagi menda ako aro,’ yugwi, it ninen, ‘Elia-at,’ yugwi, eke, it ninen, ‘At navi Yeremia a, ata ap Ala en yugugu hegek yugeraliga menda navi ambi a?’ yiluk, yugwi, yagalagwi.”
15Yugugu lagagwama, “Iren anderogo yagalagwi ovara, hit andi, An sa numbutu dugwit yagalagwi?”
16Yugirigya lagagimu, at Simon Peterus en, “At mondok itok iluk agarik Ala Abut Mesias, nenagap wendarupwak yiluk enogo lakba wagagi ako, Hararo.”
17Yugugu lagagimu, Yesus en, “Yunus abut Simon naswe wa. Wene andi avakwa en yukhigitek. Ata, An Nasin mbogot vaga menda enat yukhigarikmu, hendawi adenggenat imbita dogwen. 18Hat hinis Peterus andi, adem helep atma, helep yivaga An naburi wonggabisiluk, o ovagak valhedamindikmu, hambisagwi adem en An naburi ako mondok sovalogo bisayogonbuk. 19At mbogot vaga menda avema bisaup hunsi ako harat wokhirisogon atma, haren wen vaga yoma, ‘Ogarup moga,’ iri heyalok andi, mbogot vaga ogo ‘Ogarup moga,’ iri hayogon. Eke, haren wen vaga yoma, ‘Ogarup sek,’ iri heyalok andi, mbogot vaga ogo ‘Ogarup sek,’ iri hayogon, yiluk, yukhisiga.”
20Yugugu lagagirik, “Hiren An neyave Mesias neyagep ako, avakwa mondok yugerabuk,” yiluk, At ane welagwi menda ako enaruk watigi.
“Anggin-mbanggin novaga baniluk narusogom o,” yugeragagi wene
(Markus 8:31—9:1; Lukas 9:22-27)
21O andi hudi vaga en, At Yesus ako At ane welagwi menda yugirigya dugwit, “An o Yerusalem andoma laup imbitirikmu mondok landiga. Lagya neyalok, it ap ombok-ombok inim, it imam-imam enasini inim, it Ala wene vagago agarwik menda inim en anggin-mbanggin erogo novaga baniluk, narusogom. Natu dogomima ndugwis mberen dukluk, ndugwis ambi vaga Ala en niluk erogo mondok okbanisogon,” yiluk, sigamat yugirigya lagagi.
22Sigam anderogo yugirigya lagagimu, at Peterus en Yesus inggis lirogo wolok lagya lagagirik, ane anye erogo yugugu dugwit, “Anderogo yubuk! Nasin anderogo okbagaup mondok dek!”
23Yugugu lagagimu, At Yesus il ambukmu endenogo Peterus yugugu dugwit, “Hat Sile-at heyagi! Ala endawi ombasiga ako ndatak ombasigadek, ovara, avakwa enendawi ombasagwi ndatak imbita dugwit yuknisiga atma, harenen An sup monggalogo baniliga atma, hat yenam en wilitak!” yugogogi.
24Yugugu lagagirik, Yesus en it At ane welagwi menda ako yugirigya dugwit, “Hit An nane wokbaluk ninim nagu dogop umbutu dugwit halok, yi menda ndi menda ogarup ombasagwi ako hekbisiluk, yo winik vaga lobalogo bigigaup ako hedelok, An ninim nagu dogosogom. 25Heneyave hinidi okhedasogom halok, heneyave yelemele-at yusogom. Eke, An ninis ombok arupwak yiluk heneyave hinidi degerogo betasogom halok, heneyave hinidi eregat dogogup. 26Hit yi awi ndi awi ovok erogo andok okhidugu dogomundik, heneyave yelemele yusogom halok, nggayoklarup ombasagwi? Heneyave yelemele yusogom halok, avoloma nano betaup ombasagwi? 27An Ap-At Endaklagagis yi, An Nasin abinak vaga niri-novagangge dikduk okhedelok, malaikat ninim wagu dogomundik, yi ap ndi ap ogasagwi ako onggo wane-wane-at wogera warisogon. 28Dibas! Hit avakwa yoma agipik ako, nin ao hambegetek hinigik, An Ap-At Endaklagagis yi avakwa navema bisagiluk warisogon ako hinil neyasogom o,” yiluk, yugeragagi.
Currently Selected:
Matius 16: nbq2013
Highlight
Share
Copy
Want to have your highlights saved across all your devices? Sign up or sign in
