Matius 14

Ima Wombabisaliga menda Yohanes watugwa wene

(Markus 6:14-29; Lukas 9:7-9)

1O andi hudi ap inis ombok o propinsi Galilea vagago welagagi Herodes akoen Yesus ogarit lagya ako, aruk hunggu lagagirik, 2Herodes aori inim ako yugirigya dugwit, “Ap Ima Wombabugu lagagi menda Yohanes ako, hambisagwima en iluk akluk, mondok iri lagagirik andien, at nggarogo ogarubuk menda ogarit landiga yiat higi o,” yugeragagi.

3-4Andi, at Herodes akoen at aot Pilipus ogwa hegek, hwa Herodiana ako wigya lagagimu, at Yohanes en Herodes yugugu dugwit, “Hwa andi, wabuk hegek wegen atma, hiperen dogop mondok moga o,” yiluk, enanggadi wakbigik adigat iri halok, eyave vagarogo heda magago lembaga mabagagi. 5At Herodes akoen, “Yohanes wakbayogon,” imbitigi ovara, it avakwa en, “Yohanes andi, navi Ala en yugugu hegek yugeraliga menda,” yiluk, yagagwa ako aruk hunggu lagagirik, warup alon agagi.

6Alon agya lagagirik, mbuverek werekma at Herodes endaklagagi amor-amor ari wagya lagagimu, hwa Herodiana eyak enanggelekma andoma velen-velen ndawi watya dugwit, Herodes endawi adenggen okbagya lagagimu, 7at Herodes en ombao inis hanum mbanggya dugwit, “Nano menda ambi nggino yuknugu heyalok, andiat wokhisogon.”

8Yugugu lagagimu, isa en wene endak eyak endawima mabagagirikmu, hwavyak akoen, “Yuguri yi vaga Ap Ima Wombabisaliga menda Yohanes ako unggul mbalogo walup vaga mbo erogo woknirimano.” 9Yugugu lagagimu, ap inis ombok Herodes ako Yohanes abwa en endawi weyak agagi ovara, it isogo isagusim wagagwa inivaga ombao inis hanum mbanggigirikmu, alon en, “Yuknigas akoat ogarilak,” yiluk, ap ambien Yohanes unggul mbalogo wogori warupwak yiluk, lakbagagi. 10Lakbagagi ako, lembaga nunggwigya lagagirik Yohanes unggul mbalogo 11walup vaga mbo erogo wolok wagya lagagirik, hwavyak ako wogugu lagagimu, hwavyak akoen wolok isa wogori lagagi.

12Eke, at Herodes akoen Yohanes watya lagagimu, it Yohanes ane welagwi menda akoen wagu lagagwarik, eyave warek ako dombok erogo wen sabaluk, Yesus yugiri lagagwa.

At Yesus en ap eneyave 5.000 erom ugurogo wogeragagi wene

(Markus 6:30-44; Lukas 9:10-17; Yohanes 6:1-14)

13At Herodes en Yohanes watas Yesus aruk hunggu lagagirik, “O yoma hekbisiluk avakwa dekma o hunogoma layogon,” yiluk, mburis vaga nunggwigya lagagirik, ao lagyaim, it avakwa en, “Yesus ako mburis vaga landiga o,” yagagwa ako enaruk hunggu lagagwarik, enamwa adik-adik en sup wen vaga Yesus laup imbitigirikmu akoma amusek lagagwa. 14Amusek lagu lagagwarik, abyam werekma, At Yesus mburis vaga en is omban vaga ari wulu wagya dugwit, avakwa wisane wonggalek ako inigu lagagirik, enabwa wisane imbita dugwit, it aup idup warek inim lagagwa ako sek okbogogi.

15Sek oginipu hegek o vage howam agya lagagimu, At Yesus ane welagwi menda ako At adema wagu lagagwarik, yugugu dugwit, “O valek yoma ambi mondok dek, eke, mo ogo vage huruk yagaliga atma, it avakwa wisane wonggalek agarwik yi, avakwa enamwa andoma enagarom onggo hunogombo nenggek lapwak yiluk, lakbisin.”

16Yugugu lagagwama, At Yesus en it yugirigya dugwit, “It lakbisabuk. Enagarom napwak yiluk, hirenat wogeranes.”

17Yugirigya lagagimu, iren yugugu dugwit, “Nit yoma un erom roti 5, eke, ikan mberen adigat vagago agurik.”

18Yugugu lagagwama, Yesus en, “Andi halok erom roti inim ikan inim andiat wolok omanes.” 19Yiluk, avakwa wisane ako, “Mbeyambuk vaga horares,” yugirigya lagagirik, hora yugu lagagwama, At Yesus en erom roti 5 inim, eke, ikan mberen inim, inggimu wigya lagagirik, elose mbogot vaga iligik dugwit, “Nasin Ala wa,” yiluk, roti ako ugurogo At ane welagwi menda ako wogirigya lagagimu, iren avakwa wisane wonggalek ako menageragagwa. 20Menagirugu lagagwama, it avakwa ako ovok erogo nunggu lagagwarik, enagaum wisane agagi. Nunggu lagagwarik, erom nin higitlagagi menda ako, mburiyum 12 elagapaga yedogo bagagwa. 21It erom nunggugwa ako andi, akwa inim, avyak mariduk inim, eneyave dambulik andi, ininggis dinggilinipitek ovara, ap eneyave adigat andi, 5.000-at nunggugwa.

Is iri vaga lagagi wene

(Markus 6:45-52; Yohanes 6:15-21)

22Erom roti ovok nunggu lagagwama, At Yesus en At ane welagwi menda ako yugirigya dugwit, “Mburis vaga nunggugu dogomundik, henendak is ambo elavikit lagu dogones,” yiluk, yugirigya lagagirik, lagusigik, it avakwa wonggalek wisane ako enamwa wibogogi. 23Wibugu lagagirik, lagusigik, At adigat samban ogarigiluk, o hulikmu andoma inggya lagagirik, o hup agya lagagimu, At adigat welagagi. 24At hulikmu adigat werekma, At ane welagwi menda ako, inamut yanggadek o ilim agakoma ari nunggugusim, o havut enelokwemanggan en lavuliluk wagya dugwit, is mogoliluk navunak-kavunak erogo mburis ako vanggalegek ogagagi. 25Mburis vanggalegek ogagyaim, At Yesus ako hup o yanggo yigiluk mbuagun warininggaim inamut yanggadek iri vaga isok yabagek-ndabagek enadema wagagi. 26Enadema wagya inil hugu lagagwarik, enalon en enowak dede yugu dugwit, iren, “Wuk! Ap ako anggela-at wandiga ai!” yiluk, na yagagwa.

27Na yugu lagagwama, At Yesus en, “Henanggela wulubuk. An neyave-at wandiga atma, henalon habuk.”

28Yugirigya lagagimu at Peterus akoen, “Ai, Nasin. Harat heyalok, an is iri vaga nisok yabagek-ndabagek hat hadema warigen, yukniru o.”

29Yugugu lagagimu, “Oma,” yugogogi.

“Oma,” yugugu lagagimu, at Peterus ako mburis vaga en wunggu lagagirik, is iri vaga isok yabagek-ndabagek Yesus adema lagiluk ogagi. 30Lagiluk ogagagi ovara, o havut watya ako il higya lagagirik, alon agya dugwit, is endawima isok dovaliluk wambup ogagya lagagimu, ane na iri dugwit, “Nasin vaknerama!”

31Yugugu lagagimu, Yesus inggis hamilogo vagatigi. Hamilogo vagatya dugwit, “Hat hendawi des erogo avyarat nembetetek yi, nggarogo yiluk hendawi mberen agindik?”

32Yugugu lagagirik, iperen mburis vaga nunggugu lagagwama, o havut ako anyedek agagi. 33Anye dek agya lagagimu, it mburis vaga welagagwa akoen Yesus agayuk wutu dugwit, “Hat avyarat Ala Abut heyagyo o,” yiluk, yugogogwa.

O Nggenesaret aup idup sek okbogogi wene

(Markus 6:53-56)

34Yugugu lagagwarik, inamut Galilea elavikit en wulu wagu lagagwarik, o Nggenesaret ari wagagwa. 35Wagu lagagwama, it avakwa andoma menda en Yesus yedok hugu lagagwarik, o ap enamwa adik-adik andoma yugeregek lagu lagagwama, avakwa aup idup-mbidup werek ovok erogo woginiviluk, Yesus adoma bisa wagagwa. 36Bisa wagagwa akoen “Hasum atok adigat ninggis vagatu neyalok, sek arisogon,’ yiluk, nggino yugugu lagagwarik, ininggis vagatuselok, it ovok erogo sek agu lagagwa.

Currently Selected:

Matius 14: nbq2013

Highlight

Copy