Matius 12
12
It Yakuri samban ogasagwi vaga nggarogo ogagu dogop wene
(Markus 2:23-28; Lukas 6:1-5)
1O andi vaga At Yesus ane welagwi menda inim, it Yakuri samban ogasagwi vaga gandum yagoma lagu dugwit, At ane welagwi menda ako erom uvup oginipu lagagimu, gandum enggen heralogo nenggek lagagwa. 2Nenggek lagwi ako it ap Varisi menda en inil inigu lagagwarik, Yesus yugugu dugwit, “Samban ogasagwi vaga yi ogagek ndi ogagek ogarup moga wene hobalek hegek, it Hat hane welagwi menda en ugun ogasagwi yi hil yogisin!”
3Yugugu lagagwama, Yesus en, “At Daut aori inim lagu dugwit erom uvup oginipu lagagimu, ogagagwa ako, Ala wene dirup warek bikhegetek dugwit yagalagwi yi? 4At Daut Ala awi valekma nunggwigya lagagirik, erom roti Ala ake bago ako, it ugun naup moga, it imam-imam halok adigat nunggu dogop wene hobalek hegek ovara, at aori inim nunggugwa. 5Eke, samban ogasagwi vaga mbuverek dogop wene hobalek hegek, it ap imam-imam akoen samban ogasagwi vaga Ala awi valekma yavup ogasagwi ovara, Ala en, ‘Hit weyak o,’ yiluk, yugeraligadek un hekbisiliga ako, Musa Wene dirup warek dombanggu dugwit, bikhegetek agipik? 6Ala awi valek ako andi, iya horogat hegek, o yoma ap ambi mondok eve iya-at agarik o, yiluk, yukheraliga. 7Ala en iri dugwit, ‘Henanggom ndomba warogo nake belagwi ako andi, An hogop ombasigadek. Ata, avakwa enabwa en sek okbisaup andi, An, “Ai,” adigat ombasiga o,’ yiluk, yagagi dirup warek ako, adem hit hinilup aklipmu en, it weyak ogagetek ugun agarwik ako, ‘Weyak ogagao,’ yiluk, wene enovaga biselapuk. 8Samban ogasagwi vaga yerogo ogarup nderogo ogarup yugu dogop andok ako andi, An Ap-At Endaklagagis aro,” yiluk, yugeragagi.
Ap inggis venak weyak ako sek ogagagi wene
(Markus 3:1-6; Lukas 6:6-11)
9At Yesus o andoma en lagya lagagirik, it Yakuri samban ogasagwima nunggwigya lagagimu, 10o andoma ap ambi inggis venak anyedek mondok masalek werekma, it ap enane wonggalek Yesus ovaga baguluk, aigwakma wugu dugwit, “Samban ogasagwi vaga yi menda ndi menda ogarup moga hegek, avakwa eneyave idup-mbidup menda sek okbisaup andi sek a, dek a?”
11Yugu lagagwama At Yesus en, “Henanggom ndomba ambiat ako, samban ogasagwi vaga wen bavulikmu wambigya halok, hininggis vagago badaga warup sek a dek a? 12Ndomba andi iya, eke, ap andi meyan atma yiluk yagalagwi? Avakwa andi, mondok iya atma, samban ogasagwi vaga sek okbisaup andi sek!”
13Yugirigya lagagirik, ap ako yugugu dugwit, “Hinggis welalhanen,” yugugu lagagimu, welalhigya lagagirik, inggis ako venak wane-wane segat agagi. 14Sek agya lagagimu, it Varisi menda akoen wunggu lagagwarik, “Nggarogonggan okbaluk waruk?” yiluk, avok mbinggugwa.
Ala ayeloman enogo bagagi wene
15At Yesus akoen it wene mbanggwis ako yedok inigu lagagirik, o andoma hekbaluk, lagya lagagimu, avakwa wisane inim lagagwa. Lagu dugwit, it aup idup ovok erogo sek oginipu lagagirik yugirigya dugwit, 16“Anen okhinipis yi, navok avakwa nin mondok yugerabuk,” yiluk, enaruk warogo yugeragagi. 17At Yesus ogagagi ako, At Ala en navi Yesaya yugugu hegek, yugeragagi ambi atma des yupwak yiluk, ogagagi. At Yesaya en yagagi ako, yi:
18“Anen enogo betagagis nayeloman nendawi hunik nadenggen okneraliga yi, hinil yokhanes.
An Naberiniki At ovaga bagya neyalok,
Aren An atma nggedok sek adigat enowak dilisiga ako, yi avakwa ndi avakwa yugeregek lagya dogosogon.
19Yugeregek lagya dugwit, avakwa inim wenemuk yugeregek lagya,
ane ombok vaga naik-nggwak yagan lagya,
sup ombok vaga lagya dugwit, ane anye vaga yugeregek lagya,
ogagya dogosogonbuk.
20At atma nggedok sek adigat enowak dilisiga ako,
ombok arupwak yiluk, ao ogagetek dugwit,
don owak yanggalek anyedek agarik ako hedalogo bayogonbuk,
eke, lilin ageda hali abya asigadek, yuvuk adigat agarik ako,
nagaulogo hekbayogonbuk.
21 #
Yesaya 42:1-4 yokhanes. It avakwa ininis unggul adik-adik menda en ‘Aren nenagap wendarisogon ai,’ yiluk, At vaga enape wenggelek-at dogosogom,”
yiluk, at Yesaya en yugeragagi wene ako atma des yupwak yiluk, At Yesus en ogagagi.
Yesus madis Mbelesebul iperen ndup ogorek agarwik wene
(Markus 3:20-30; Lukas 11:14-23)
22Andi en ap ambi madis endawima nonggagagirik, il mbuk anedek halok wolok wagu lagagwama, Yesus en sek okbagya lagagimu, ap ako ane werek agya, il higya, ogagagi. 23Ogagagi ako it avakwa wonggalek welagagwa ako ovok erogo At inil hugu lagagwarik, “Wi!” yiluk, vok yugu dugwit, “Ap yi, Daut ombao wene yugu lagagwa ako ai?” yiluk, yagagwa.
24It vok yagagwa ako ap Varisi menda en enaruk hunggu lagagwarik, “Wi! Ap yi, madis enasin Mbelesebul anye vaga madis haryogo wibugu helagwi,” yiluk, 25yagagwa ako At Yesus en yedok inigu lagagirik, it yugirigya dugwit, “Ap enowa o vagago ambi at avema agarwik inim, it adik-adik okhidugu dugwit ndup-at okhidugusigik, at avema bisaligama akoma mondok anyedek asogon. Eke, o kota ambi a, yapwi ambi a, it adik-adik okhidugu dugwit ndup-at okhedelagwi ako, enamwa andi o danggop-at agya dogomindik weyagat dogosogom. 26At Sile en Sile-at haryogo wibagya halok, arat ogot hedaliga atma, at avema bisaligama nggarogonggan sek dogop ombasagwi? 27Eke, an madis Mbelesebul anye vaga madis nggigilogo wibisaliga yuknisagwi ako, hit henaburi en ogo madis nggigilogo wibiselagwi ako madis anye vaga wibiselagwi yilip. Ovara it madis anye vaga wibiselagwidek. Anderogo atma, hit henaburi enat henanggadi wakbigigasogom. 28Eke, Anen Ala Averiniki anye ako vaga madis haryogo wibugu neyalok andi, Ala avema bigigaup vage henadema ari waga atma, yiluk, umbutu dogones.”
29“Ap anye werek ambi ao heda magetek hegek, nggarogonggan en at amwa nungguluk angge-angge haurogo hedelok wulu warup ombasagwi? Heda endak makbaluk andi, angge-angge hivis ndiyali nunggup sek.”
30“An ninim dambulik agurikbuk halok andi, ninim ndup-at agarwik. Eke, an ninim homakbiselagwidek akoen, haryogo ndindis erogo wibiselagwi aro. 31Andi halok, avakwa en yi weyak ndi weyak ogasagwi inim, avakwa enane wiyiknom-weyaknom erogo biselagwi inim, enomaduk andi, Ala en degerogo bisaup ndak ovara, enane weyak Ala Averiniki wiyiknom-weyaknom erogo baguselok andi, enomaduk andi, Ala en mondok degerogo bisayogonbuk, yiluk, yukheraliga. 32Hiren An Ap-At Endaklagagis ako, henane wiyiknom-weyaknom erogo banilagwi halok, henomaduk andi, Ala en degerogo bigigaup ndak ovara, Ala Averiniki wiyiknom-weyaknom erogo bagu hiniselok, Ala en o yogak inim, hivis inim, henomaduk andi degerogo bigigayogonbuk. Mondok hunigat dogosogon,” yiluk, yugeragagi.
Yo enggen yugu vaga inilup asiga wene
(Lukas 6:43-45)
33Yesus en wene ambi inim yugirigya dugwit, “Yo enggen sek yugup helagwi ako andi, ‘Adem sek vaga-at yigas,’ umbutwi, eke, yo enggen weyak menda yugup helagwi halok andi, ‘Adem weyak vaga-at yigas,’ umbutwi, ogagu dogones. Yo andi enggen yugup ako vaga hinilup arusogom. 34Mbas idup aburi endago menda hit yi aro! Nenendawima en nggeker-erek daga wagya dugwit, nenabis vaga yagalagwi atma, hit eve weyak dugwit, henane vaga nggarogonggan en wene sek yup? Meyan. 35Ap ovavut sek menda en, sek menda endawima ndugerek agarik ako vaga sek adigat ogasiga. Eke, ap ovavut weyak menda en, weyak menda endawima ndugerek agarik ako vaga weyak adigat ogasiga. 36Avakwa enane un enam warogo adem dek hegek yagalagwi ako ovok erogo hivis enowak dilinivup hudi vaga henadik-henadik wene sigam vagalogo yugurusogom atma, 37Ala en henowak dinggu dugwit, hit henadik-henadik henane yagalagwi vaga Ala en ‘Hat sek,’ yiluk, wokhinupu, eke, ‘Hat weyak,’ yiluk, anggin henovaga bigigu, ogarisogon o,” yiluk, yugeragagi.
“Ninilup arup menda ambi ogagya heyasogom,” yugogogwa wene
(Markus 8:11-12; Lukas 11:29-32)
38Yugirigya lagagimu, it ap Ala wene vagago welagagwa menda nin inim, ap Varisi menda nin inim, en Yesus yugugu dugwit, “Ngguru wai. Nit ninilup arup menda ambi ogagya heyasogom o.”
39Yugugu lagagwama, At Yesus en it yugirigya dugwit, “Hit avakwa yogak agipik yi, Ala hekbagu lagagupik, weyak adigat ogarit nagu dugwit, ‘Ninilup arup menda ogagya heyasogom o,’ yiluk yuknisagwi ovara, Anen adik ambi ogagya neyasogombuk. Ata, at navi Yunus akoen inilup arup menda ogagagi ako adigat ogagya neyasogom. 40At Yunus ako, ikan ombok agaum elola yidik hegek ndugwis mberen welagagirik, ndugwis ambi vaga lugurogo wibagagi ako hak, An Ap-At Endaklagagis yi, wen elola andoma neyagek, ndugwis mberen dukluk, ndugwis ambi vaga niluk akluk mendek yisogon. 41At Yunus andi, ap maduk ovagak dugwit, avakwa o Niniwe menda Ala wene yugirigya lagagimu, it ovok erogo enasam helok, enomaduk mbobagagwa. Mbobagagwa ovara, At ambi yoma agarik yi andi, ap mondok ombok atma, wene yukheraliga ako hobaluk, henomaduk mbobaup sek hegek, henendawi lakot agipik. Anderogo atma, hivis it avakwa enowak dilup hudi it o Niniwe menda akoen mendek yiluk, hit yogak agipik yi yukhirugu dugwit, ‘At ap horogat Yunus ako yuknirigya lagagimu, nenomaduk mbobagagup ovara, hit ap ombok ane hunggitek atma, henanggadi ares,’ yiluk, yukhirugu sagup,” yiluk, yugeragagi.
42“O endak, hwa inis ombok ambi at amwa o adumu selatan vikit en at ap Salomo endawi werek dugwit, wene hulisiga menda ako aruk huligiluk wagagi. Wagagi ovara, at Salomo andi, ap horogat welagagi, eke, At ambi yoma agarik yi andi, mondok ombogat agarik. At hwa ombok akoen ap horogat ane huligiluk wagagi ovara, hit andi, At ombok agarik ako ane hunggitek agipik. Anderogo atma, hivis avakwa enowak dilup hudi vaga at hwa ombok akoen mendek yiluk, hit yogak agipik yi yukhirigya dugwit, ‘An ap horogat Salomo ako ane hunggwigis ovara, hiren ap ombok yi ane hunggitek atma, henanggadi ares,’ yukhirigya hagup,” yiluk, yugeragagi.
Madis agoda werek menda eyami vaga nunggwisiga wene
(Lukas 11:24-26)
43Wene ambi inim yugirigya dugwit, “Madis idup agoda werek menda ap endawima en wunggu lagarik, ‘Nggoma sat yanggal hedaik,’ yiluk, is adem dekma belalit nagas-nagas sat yanggal hedapim dek halok, 44‘Namwa wulu wagirikmu akoma neyami vaga suguliluk nunggwisogon,’ yiluk, nunggwigya lagarik, at awi umu akoma mupwak horek yi menda ndi menda avolomambo ogarek halok, 45andien, wunggu lagarik, at madis ako weyak ovara, madis mondok weyak menda eneyave 7 wonggabisiluk, woginiviluk eyami vaga nunggu waga. Nunggu wagya lagarik, akoma inim dugwit, ap ako endak madis ambiat endawima werekma ambukum weyak welagagi ovara, hivis madis wisane erogo hobo-hobo ari nunggugu dugwit, ap ako evelela weyagat dogosogon. Anderogo ndatak, hit ap yogak agipik weyak adigat ogarit nelagwi yi, anderogoat okhinipu hagup,” yiluk, yugeragagi.
Yesus isa inim, aori inim, wagagwa wene
(Markus 3:31-35; Lukas 8:19-21)
46At Yesus en it avakwa wonggalek ako wene ao yugirigyaim, At isa inim, aori inim, wagu lagagwarik, At inim wene yuguluk wamu andenam welagagwa. 47Werekma ap ambi en, “Ngguru wai. Hisa-haori hinim wene yuguluk vage wagarukmu eneyave wamu agarwik.”
48Yugugu lagagimu At Yesus en, “An hinya andi, An naori andi, sani ombasiga?” 49Yugugu lagagirik, it At ane welagwi menda ako inggis sik-sik yugirigya dugwit, “Dek o. An hinya-naori andi it yi aro. 50Ap saen An Nasin mbogot vaga menda endawi ombasiga wane-wane ogaguselok andi, hinya-naori it aro,” yiluk, yugeragagi.
Currently Selected:
Matius 12: nbq2013
Highlight
Share
Copy
Want to have your highlights saved across all your devices? Sign up or sign in
