Lukas 4
4
Sile en Yesus avut mbanggigi wene
(Matius 4:1-11; Markus 1:12-13)
1Averiniki ako Yesus endawima des iri lagagimu, is Yorodan hekbaluk, Averiniki en wolok o harumu avakwa dekma andoma lagagi. 2Wolok lagya lagagirik, werekma, madis enasin Sile en At avut mbanggya hegek, ndugwis 40 hudi welagagi. Avut mbanggya hegek, Yesus erom nenggetek ndugwis 40 hari welagagirikmu, erom uvup agagi.
3Erom uvup en werekma, Sile ako wagya lagagirik, At yugugu dugwit, “Hat avyarat Ala Abut heyalok, helep yi, erom arupwak yiluk, yuguru!”
4 #
Ulangan 8:3 yokhanes. Yugugu lagagimu, At Yesus en, “Ala en iri dugwit, ‘Avakwa erom adigat nungguselok, iniluk dogosogombuk,’ yiluk, yagagi ako dirup warek agarik.”
5Yugugu lagagimu, at Sile akoen Yesus wolok ndom vaga inggya lagagirik, andoma en wen vaga yoma yi avakwa ndi avakwa ininis werek enavema biselagwima ovok erogo o digavok yagaliga hak ambi vaga-at inuk ogogi. 6Inuk ugu lagagirik, “It ap ininis werek enavema biselagwima andi ovok sek halok, avakwa en vok yagalagwi yi ako, an vagago dogopwak yiluk, woknogogirikmu, an nendawi en wogeraliga. 7Anderogo atma, Hat navema seve yiluk, siyabaninggya heyalok, hil hegen ako ovok erogo Hat vagago dogonyok yiluk, wokhisogon o.”
8 #
Ulangan 6:13 yokhanes. Yugugu lagagimu, At Yesus en, “Ala en iri dugwit, ‘Henasin Ala avema seve yiluk, At adigat siyabagwi, At yagaliga halok adigat dibaluk ogarit lagwi, ogagu dogones,’ yiluk, yagagi ako dirup warek agarik.”
9-11 #
Mazmur 91:11-12 yokhanes. Yugugu lagagimu, Sile en Yesus wolok o Yerusalem Ala awi valekma o virimu ba inggya lagagirik, Ala wene warek vaga yugugu dugwit:
“‘Ala en it ayonggo lakbisa wandiga malaikat ako,
malogo dogopwak yiluk, yugeramindikmu wagu dogomundik,
helep vaga hisok hado yi wambigya heyaoen,
ininggisena ndalek vaga enewogogo ari wambisogon o,’
yiluk, yagagi dirup warek agarik atma, Hat Ala Abut avyarat heyalok, yoma en soklok wambin.”
12 #
Ulangan 6:16 yokhanes. Yugugu lagagimu, At Yesus en yugugu dugwit, “Ala en iri dugwit, ‘Henasin Ala An navut mbalubuk,’ yagagi dirup warek ako andi ogo weregat!” yiluk, yugogogi.
13Yugugu lagagimu, at Sile en Yesus avut mbaligiluk ogagagi ako ovogat okbagya lagagirik, “Hivis yugurup ambi nanonggal werek agya hami a?” yiluk, hekbaluk, winggigi.
Yesus o Galilea eyami vaga lagagi wene
(Matius 4:12-17; Markus 1:14-15)
14Wunggu lagagimu, At Yesus ako Averiniki anye endawima dugwit, eyami vaga o Galilea lagagi. Lagya lagagirik, werekma, At avok ako o andoma ovok erogo wigak yagagi. 15O Galilea andoma dugwit, it Yakuri samban ogasagwima wene mamuleregek lagya halok, avakwa ovok erogo inis siyabagagwa.
It Nasaret menda en Yesus mbobagagwa wene
(Matius 13:53-58; Markus 6:1-6)
16Andien, At Yesus sawe agagirikmu o Nasaret akoma lagagi. Lagya lagagirik, it Yakuri samban ogasagwi vaga it samban ogasagwima akoma nonggegek iri lagagi ndatak, At nunggwigya lagagirik, Ala wene dirup warek vaga bikhegek yugeragiluk, mendek yagagi.
17Mendek iri lagagimu, mbuku virik-verek Ala wene ap navi Yesaya en dirup watigi ako Yesus wogogogi. Wogugu lagagimu, mbuku ako mbigalogo baluk yugirigya dugwit:
18“It avakwa ininggidek ako Sek Wene yugirigya dogopwak yiluk, denogo baninggigi atma,
Nasin Ala Averiniki novaga agarik o.
It avakwa heda mago agarwik ako, ‘Visilogo bisayogon o,’ yiluk, yugirigya,
inil mbuk ako, ‘Hinil sek okbigigaup andi, ndak,’ yiluk, yugirigya,
it avakwa sovabisiluk agarwik ako wender erogo bugu,
19 #
Yesaya 61:1-2 yokhanes. eke, Nenasin Ala nenabwa en okbininaup ako, yogak yiat aga o, yiluk, yagan lagya,
ogagya dogopwak yiluk, lakbani waga,”
yiluk, yagagi dirup watigi ako heyak bagya lagagirik, bikhegek yugeragagi.
20Wene ako ovok yugirigya lagagirik, mbuku ako yunggulogo yonggaragak wogugu lagagirik, hora yagagi. Hora iri lagagimu, it avakwa Yakuri samban ogasagwima homagagwa ako, ovok erogo inil At adigat vurek welagagwa. 21Inil vurek werekma, Yesus en it yugirigya dugwit, “Ala wene dirup warek bikhegek yukhirigi ako, o yogak yi henaruk hunggu hinigik, atma des yagas o,” yiluk, yugeragagi.
22Yugirigya lagagimu, it avakwa ovok en, “Ap yi iya,” yiluk, At wene eve sek iri halok, “Wi!” yiluk, vok yagagwa ovara, irenenat umbutu dugwit, “A! Yi adik, Yusup abut akora?” yiluk, yagagwa.
23Yugu lagagwama, Yesus en it yugirigya dugwit, “It avakwa en, ‘Dokter wai. Hat heyave sek okhedomano,’ mbilape yagalagwi ako, eke, ‘O Kapernaum ogagya lagen, hunggup ako, hat hawi adem vaga endaklagagindikmu yoma anderogo ogagya dogwen,’ An yuknirup yiluk, yugu hinigis.”
24Yugirigya lagagirik, “Henaruk des erogo holes! It ap navi-navi enawi adem vaga dugwit, Ala en yugirigya hegek yuguruguselok, enowa-enasin en enane sek erogo welagwidek o, yiluk, yukheraliga. 25Ap Elia ako hegek, musu mondok nenggetek tiga setengah tahun vaga yi awi ndi awi ovok erogo erom uvup werekma, Iserali enamwa andoma akwa sogwa eneyave wisane welagagwa ovara, 26Ala en ap Elia ako akwa sogwa Iserali menda ambi enadema lapwak yiluk, lakbagetek. Ata, hwa sogwa ambi o Sidon kota Saravat Yakuri dek menda werekma, adema lakbagagi. 27Eke, navi Elisa#4:27: Navi Elisa ako, navi Elia avoloma hivis mondok yagagi. ako hegek, avakwa Iserali enamwa andoma amu hunik wisane welagagwa ovara, it ambi amu hunik sek okbigitek aro. Ap Naman o Siria Yakuri dek menda ako, adigat amu hunik sek okbagagi o, yiluk, avyarat yukheraliga.”
28Yugeragagi ako it ap Yakuri samban ogasagwima welagagwa ako ovok enaruk hunggu lagagwarik, Yesus en ambi okbininayogonbuk yedok hugu lagagwarik, enaninis wisane agagwa. 29Enaninis wisane agu lagagwarik, mendek yiluk, At eyave enamwa en vagago wasim wibagu lagagwarik, enawi awek andugumu valekma, vanggalogo nggedek wombabelaguluk, wolok lagusim, 30it ovok andenam inigik enanggelekma en winggigi.
Ap ambi madis edup agoda werek endawima nonggagagi wene
(Markus 1:21-28)
31Andien, hivis, o Galilea kota ambi Kapernaum lagagi. Lagya lagagirik, it Yakuri samban ogasagwi vaga wene mamulirigya lagagi. 32Wene mamulirigya dugwit, At endawi werek dugwit ane anye vaga yugirigya halok, avakwa en, “Wi!” yiluk, enalon agagwa.
33Ndugwis ambi vaga ap ambi madis edup agoda werek menda endawima nonggagagirikmu, it Yakuri samban ogasagwima welagagi. At ap ako ane naik hunik iri dugwit, 34“Yesus wai. Hat ap Nasaret menda nit madis nggarogo okbininagiluk wagen? Nit dek okbininagiluk wagen a? Hat Ala Abut weyak ogasigadek mondok sek adik denek agindik ako, heyave an nilup.”
35Yugugu lagagimu, Yesus en mberugu dugwit, “Hat hanedek, wilin!” Yugugu lagagimu, madis akoen ap eyave avakwa enanggelekma wen vaga andoma ndun okbagya lagagirik, eyave edup yagan watitek hegek, madis nggigilogo winggigi.
36Nggigilogo wunggu lagagimu, it avakwa ovok erogo enalon en, “Wi!” yiluk, at ambien at ambi yugigik yugu dugwit, “Avyak! Ap yi, ane yagaliga, ayai! At ane avuput anye vaga madis edup agoda werek menda, ‘Wilin,’ yugirigya halok, wibisaliga wi!” yiluk, yagagwa. 37Eke, Yesus avok ako avilis ambot akoma wigak yagagi.
Avakwa wisane sek okbogogi wene
(Matius 8:14-17; Markus 1:29-34)
38At Yesus it Yakuri samban ogasagwima en wunggu lagagirik, ap Simon#4:38: Ap Simon ako, inis mberen, ambi Simon, ambi Peterus. amwa lagagi. Lagya lagagirik, Simon ogwa isa aup edup hali vago hak werekma, Yesus en sek ogarupwak yiluk, yugogogwa. 39Yugugu lagagwama, at eyave nogo yuguma lagya lagagirik, alilimu mendek dugwit, “Aup edudek aru,” ao yugugu hegek, dek agagi. Dek agya lagagimu, hwa ako mbikit mendek yiluk, it enake ogagya lagagi.
40O mo il huruk irisim, avakwa en it aup edup adik-adik warek menda wogonombolok Yesus adema bisa wagagwa. Bisa wagu lagagwama, it ovok erogo inggis vakbugu dugwit, sek okbogogi. 41Eke, it avakwa wisane madis enendawima nonggagagi ako ogo, sek okbugu dugwit, “Wilitales!” yiluk, madis ako yugirigya lagagimu, enane na yugu dugwit, “Ala Abut Harat o!” yiluk, nggigilogo wunggugwa. Ala en ap Inis Ombok Denogo Mondok Okbagagi Keretus ako it inilup atma, enane yugusigik ovara, At Yesus en mberirigya dugwit, “Hit henanedek mbuverek dogwes!” yiluk, yugeragagi.
Yesus avakwa dekma lagagi wene
(Markus 1:35-39)
42O hutun, mo il nggao iri lagagimu, Yesus o andoma en wunggu lagagirik, avakwa dekma lagagi. Lagagi ovara, it avakwa wisane en At belanggugwa. Belanggu lagagwarik, inim dogoguluk, sovabasogom yiluk ogagagwa ovara, 43Yesus en it yugirigya dugwit, “Ala avema bisaup Sek Wene ako, o kota hunogoma inim yugeregek lagya dogogiluk, lakbani wagagirikmu, mondok yugeregek landiga o,” yiluk, yugeragagi.
44Yugirigya lagagirik, o Yudea it Yakuri samban ogasagwima akoma yugeregek nagu lagagi.
Currently Selected:
Lukas 4: nbq2013
Highlight
Share
Copy
Want to have your highlights saved across all your devices? Sign up or sign in
