Lukas 2

Yesus endaklagagi wene

(Matius 1:18-25)

1Yohanes ao nggedera helan, ap inis ombok Kaisar Agustus yi awi ndi awi o Oroma ovok erogo vagago welagagi. Vagago werekma, it avakwa ovok erogo eneyave maren hudi agarwik ako, ilup arigiluk, ininis dirup warupwak yiluk, yugeragagi. 2Ininis endak dirup watugwa ako andi, ap Kirenius o Siria Gubernur hegek, watugwa.#2:2: O andi hudi ap ombok Kaisar Agustus inim, pemerintah Oroma inim, yi awi ndi awi wisane vagago welagagwa. Negara ambi vagago welagagwa andi inis Siria. Eke ambi vagago welagagwa andi Iserali. Iserali inim Siria inim horok-horok welagagwa ovara negara adik-adik welagagwa. 3Ininis dirup warupwak yiluk, it avakwa ovok erogo o nggoma-nggoma en enawi adem vaga lagagwa.

4At Yusup ako, Daut ombawi wigalek menda atma, o Galilea kota Nasaret en o Yudea Daut endaklagagirikmu o kota Mbelekem akoma lagagi.#2:4: O Nasaret en o Mbelekem andi Kobakma en Ilu wane-wane 100 kilometer-at. 5Hwa Maria Yusup ogwa onggo bago avula ako iperen ininis dirup warupwak yiluk, lagagwa. 6Lagu lagagwarik, werekma, eyak endaklarup ako vage amor ari wagya lagagimu, 7eyak manggum ap-at endaklagagi. Endaklagya lagagimu, o avakwa nogo yilagwima hobo iri lagagimu, avyak ako yum dinggilogo kambin-ndomba enamwa abirangge nelagwima akoma nggik okbagagwa.

Ap ndomba malenombogo welagagwa wene

8O Mbelekem horok andoma o hup weram harumu ap ndomba malenombogo werekma, 9it Ala yonggo malaikat ambi yukdekma enadema mendok yi wagya hegek, Nenasin Ala awiya okbugu lagagimu, enalon wisane agagi. 10Enalon wisane agya lagagimu, malaikat akoen yugirigya dugwit, “Henalon habuk. It avakwa ovok erogo enendawi adenggen ombok ombarup Sek Wene ambi wolok yukhera wandiga. 11Sek wene andi, henagap wendarisiga menda Daut endaklagagirikmu amunerama akoma henake o yogak endaklaga o. At andi, Nenowa Inis Ombok Keretus#2:11: Inis Keretus adem andi, ‘Ala en denogo bagagi’. Eke Iberani enane vaga, Mesias yagalagwi. Ala en denogo bagagi akoat. 12Avyak ambi yum kain dinggilogo ndomba abirangge nelagwima nggilik agarik hinil bikhelagu dogomundik, ako yi aro, ombarusogom,” yiluk, yugeragagi.

13Ao yugirigyama, it mbogot vaga menda eneyave wisane homago yukdekma homari wagu lagagwarik, at malaikat ako inim Ala inis siyabagu dugwit:

14“At mbogot winimen agarik Ala ako, inis siyabagu dogosogom o.

Eke, o wen vaga yoma it avakwa Ala endawi sek enombasiga ako, enendawi ugun wadokdek dogopwak o,”

yiluk, yagagwa.

15Yugu lagagwarik, it malaikat akoen ap ndomba andok ako bisiluk, eneyami vaga mbogot vaga unggusigik, it ap ndomba andok akoma at ambien at ambi yugigik ogagu dugwit, “Nenasin Ala en oklaga yukneraga ako, o Mbelekem bikhelasogom.”

16Yugu lagagwarik, Maria Yusup ako, avyak ndomba abirangge nelagwima nggilik werekma, vupuk bigisa lagagwa. 17Bigisa lagu lagagwarik, malaikat en avyak endago avok yugeragagi wene ako, avakwa nin andoma mbilinogo yugeragagwa.

18It ndomba andok en wene mbilinogo yugeragagwa ako, avakwa hunggu lagagwarik, it ovok erogo, “Wi!” yiluk, vok yagagwa.

19Vok yagagwa ovara, at Maria andi, wene yagagwa ako ovok erogo endawima wigya dugwit, wenggenggu lagagi. 20Eke, it ap ndomba andok ako eneyami vaga lagu dugwit, malaikat en it yugeragagi ako ndatak enaruk hunggwis, inil hugwi, ogagagwarikmu, Ala agayuk wurogo inis siyabalin lagagwa.

Yesus inis sanggugwa wene

21Ndugwis 8 vaga avyak ako agap mbalup agya lagagimu, agap mbanggu lagagwama, at isa ao avula agetek hegek at malaikat akoen, “Inis Yesus salop o,” yugogogi ako, At inis Yesus-at sanggugwa.

Yesus Ala woguruguluk, wolok lagagwa wene

22 # Imamat 12:1-8 yokhanes. Inis sanggu lagagwarik, “Akwa eneyagi endaginipuselok, ndugwis wane erogo avyak sovalek dogop o,” yiluk, Ala wene Musa#2:22: Ap Musa ako ap Yakuri enasin ombok welagagi. Ala en wene yerogo ogarup, nderogo ogarup wene 12 hukum ako yugugu lagagimu, Musa en avakwa Yakuri menda yugeragagi. en dirup watigi ako ndatak okbaluk, avyak ako Nenasin Ala woguruguluk, wolok o Yerusalem lagagwa. 23#Keluaran 13:2, 12 yokhanes. Ala woguruguluk wolok lagagwa ako, Nenasin Ala en, “Ap manggum endaklagya halok andi, An Henasin nake denogo banup o,” yugirigya, 24#Imamat 12:8 yokhanes. eke, ambi yugirigya dugwit, “Swa suwa mberen a, swa wurum mberen a, An Henasin nake warogo baup o,” yiluk, yugirigya, yugeragagi dirup warek ako ndatak ogaruguluk, avyak asin-isa akoen wolok lagagwa.

25O Yerusalem andoma ap ambi inis Simeon welagagi. At ap andi, endawi mondok sek Ala wene dibaluk ogagya lagagi. Ogagya dugwit, it avakwa Iserali menda enagap wendari warup ako at sok higya dugwit, Averiniki at ovaga welagagi.

26Averiniki at ovaga dugwit, Nenasin Ala en denogo mondok okbagagi Keretus ako, il hegetek hegek hambisogonbuk ilup okbagagirikmu, 27Averiniki en Simeon endawima yugugu halok, Ala awi valekma mbumbumu nonggagagi. Nunggwigya lagagirik, werekma, Yesus isa-asin en Ala wene dirup warek ogagu lagagwa ako, ndatak ogaruguluk, avyak Yesus ako wolok nonggagagwa. 28Nunggugu lagagwama, at Simeon akoen avyak inggimu wigya lagagirik, Ala siyabagya dugwit:

29-32“Nasin Ala wa! Hat hendawi ombasiga ako it Yakuri dek weram menda awiya okbugu,

eke, haburi Iserali menda ininis siyabugu,

ogarupwak yiluk,

ap enagap wendarisiga menda yi avakwa ndi avakwa inil hapwak yiluk vipuk erogo bagagin ako, an ovok nil higirikmu,

Hat yuknigigin ako ndatak yogak-at hayeloman an ako, nendawi horaik dugwit, hadema warigiluk, hekbanin o,”

yiluk, yugogogi.

33Avyak avok yagagi ako isa-asin en hunggu lagagwarik, “Wi!” yiluk, vok yagagwa. 34Vok yugusigik, at Simeon akoen adenggen isa-asin enovaga bisapwak yiluk, Ala yugogogi. Yugugu lagagirik, At isa Maria ako yugugu dugwit, “Avyak yi, it avakwa Iserali menda wisane mondok okbugu-sovabugu, ogagya dogopwak yiluk, At Ala en denogo bagagi. Avakwa inilup arupwak yiluk, denogo bagagi hegek, avakwa wisane, ‘Nenanggon o,’ yiluk, yugwi ako vaga 35enendawima ombasagwi ako sigam agya dogosogon. Eke, hat ogo, segowa vaga hendawi sapok erogo hatusayogon o,” yiluk, yugogogi.

36Eke, andoma hwa navi menda ambi inis Hana, ap Vanuel abut inis unggul Asiet menda welagagi. Hwa ako agun hidigya lagagirik, iperen inigik 7 tahun welagagirik, 37hivis, sogwa hegek 84 tahun ogagagirikmu, ovok hwa anggok agagi. Ala awi valekma en winggitek mondok andoma-at o hup dingga Ala ake yiluk, erom hunis dugwit, samban adigat ogagya lagagi. 38O andi vaga hwa ako wagya lagagirik, “Nasin Ala wa!” yiluk, yagagi. Eke, it avakwa “Ala en nit Yerusalem menda heda visilogo binina warup ai,” yiluk, sok hugu lagagwa ako, Hana en avyak endaklagagi avok vagalogo yugeragagi.

O Galilea wunggugwa wene

39“Avyak endaklagya halok, yerogo ogagu dogop,” yiluk, Nenasin Ala wene dirup warek ako, isa-asin en ovok erogo dikduk-dakduk okbagu lagagwarik, eneyami vaga enamwa o Galilea o kota Nasaret wunggugwa. 40Eke, avyak ako ombok agya, anye agya, ogagya dugwit, endawi werek hoda agagi. Eke, Ala endawi At inim hunik welagagi.

Avyak Yesus Ala awi valekma nonggagagi wene

41Yesus isa-asin akoen tahun ambi ogarup ari wagya hegek, it Yakuri Isogo Ombok Vasika#2:41: Isogo Ombok Vasika ako, saut Maret a, April a, isogo ombok isagu lagagwa. Isogo Vasika ogagu dugwit, wam ndomba eyak warogo nunggu lagagwa. It ogagagwa andi, it enombawi o muk Ala en o Mesir en visilogo wogonombolok wulu wagagi ako inilup dogoguluk adenggen ogagu lagagwa. Keluaran 12:17-20 yokhanes. isagusim, o Yerusalem lagu lagagwa. 42Lagu lagagwa ako, avyak Yesus endago hegek 12 tahun agya lagagimu, Isogo Ombok Vasika isagusim, lagagwa. 43Isogo isago ako nelok, isa-asin enamwa enendawi ugun lagusigik, Yesus ako inim lagetek o Yerusalem mbup yagagi. Asin-isa ako inunggut dugwit, 44avakwa ovok wagwi enanggelekma inim wandiga embetek lagu lagagwarik, nogo yuguluk ogagu dugwit, avyak ako eyave dek halok, owa-asin, aswei inim werek haoen yiluk, belanggugwa. 45Belanggugwa ovara, eyave dek halok, eneyami vaga o Yerusalem belalit lagagwa. 46Belanggu dugwit, ndugwis henggam okbaluk, Ala awi valekma, it ap wene mamulerelagwi menda enanggelekma horaik dugwit, enane hunggu, Aren it enaigwakma wigya, ogagyama hagagwa. 47It ap ovok erogo ane hunggugwa akoen At yi wene ndi wene ovok ilup dugwit, wene onggo yugirigya ako hunggu lagagwarik, “Avyak yi, ovok ilup dugwit, yagaliga yi wi!” yiluk, vok yagagwa. 48Asin-isa akoen At ako havitu lagagwarik, “Wi!” yiluk, isa en, “Neyak o. Hat nggarogo yiluk, anderogo okbininggin? Hasin niperen nenendawi anggin dugwit, belalhetek wagyo.”

49Yugugu lagagimu, Aren, “Hit nggarogo yiluk, An belalnetek wagep? An Nasin awi valekma dogop aga andi, hit hinunggutmu belalnetek wagep?” 50Yugeragagi ovara, it dibagetek welagagwa.

51Andien, At inim o Nasaret lagu lagagwarik, At isa-asin enavema dugwit, enane des erogo hunggu hegek, At isa akoen andi, it avakwa yugwi ako endawima wigya dugwit, wenggenggu lagagi. 52Eke, At Yesus andi, endawi werek agya, eyave sawe agya, ogagya hegek, Ala inim, avakwa inim, At vaga enadenggen umbutu lagagwa.

Currently Selected:

Lukas 2: nbq2013

Highlight

Copy