Matius 17
17
Yesus laipemabohe i lolo bulu
(Mrk. 9:2-13; Luk. 9:28-36)
1Ono eo lako hee, Yesus nangkeni Petrus, Yakobus pade Yohanes tuai Yakobus, rau nanake bulu to nalangko. Wuwu hira aga i ria. 2I lolo bulu ee mai Yesus nobali tari-Na i tingoora. Lence-Na newanta ewa eo pade waru-Na nabula neringkila. 3Tolu dua ana guru-Na ee mai ngkali nampahilo Musa pade Elia nampojaritaka Yesus.
4Nampahilo lauria, Petrus nangulika Yesus, “Pue, nagoe mpuu kami i hei. Ane madota-Ko, kubabei tolu bamaru. Hangu hi Iko, hangu hi Musa, pade hangu hi Elia.”
5Bulana nojaritadipi Petrus, ngkali naratami gawu to nabula nampabungura, pade iepera Alatala nololita, “Eimi Ana towea-Ku, to laipokagoe-Ku. Epe pade turuhi-'Imi.”
6Nangepe lauria, ana-ana guru-Na naeka mpuura hampena nadungka natepatumpa i tana purara. 7Yesus nampamohuki pade nantuira, iuli-Na, “Pokangkoremo komi. Nemo maeka.” 8Hangka nokangkorerapa, lainaara humangkulilira, momami naria tau ntanina, wuwu Yesusdimi to lainaara.
9Panaura Yesus hante ana-ana guru-Na lako lolo bulu ee mai, laipalingai-Nara, iuli-Na, “Nemo olu mikewo hi hema-hema nangkambelai napa to laihilomi i lolo bulu, kapomana Ana Manuhia rapakatuwu nculi lako kamatea.”
10 #
Mal. 4:5
Ana-ana guru-Na nepekune, “Ane wee, napa pade to nataualu buku Taurat nanguli ane Elia kana marata moilodo?”
11Nehono Yesus, “Nakono to iulira etu. Elia kana marata moilodo mampakabelo hangu hangaa. 12Ku'ulika komi, kakonona naratami Elia. Naupawee tau-tauna moma nangincani'i, pade dota-dota rarara nobabei hangu hangaa to nadaa hi hia. Wee moto mui mei Ana Manuhia kana mangkolo kahehaa i rara mpalera.” 13Alaana, nengkaoramo ana guru-Na, ane to laiuli Yesus ee mai nangkambelai Yohanes to Pediu.
Yesus nampakauri hadua ngana to laipehua anudaa
(Mrk. 9:14-29; Luk. 9:37-43)
14Panculi Yesus hante ana guru-Na to tolu dua ee hi todea, hadua balailo nampamohuki-'I pade notingkodu i tingoo-Na, 15nanguli, “Pue, potowekuwo anaku ei, habana nohaki lilimpuanga'i. Napepa mpuu iepena. Naharo'i nanawu i rara apu bo i rara ue. 16Laikenikumi hi ana-ana guru-Mu, naupawee moma'i namala laipakaurira.”
17Yesus nanguli, “He, komi tauna to moma neparahaya pade nahalatara! Hangkuapi kahae-Ku matida dohemi? Hangkuapi kahae-Ku mohabara hi komi? Keni tumai ngana etu!” 18Yesus nampakamaro anudaa to nampehuai ngana ee mai pade nalaimi anudaa ee. Lako hee naurimi ngana ee mai.
19Naliu ee, hangka momarapa naria todea i humpii Yesus, narataramo ana guru-Na nepekune hi Hia, “Napa pade moma'i namala laipopalai kami anudaa to nampehuai ngana ee wei?”
20Nehono Yesus, “Apa nakura peparahayami hi Alatala. Mpuu-mpuu Ku'ulika komi, ane peparahayami nau ewa kabohe beha sesawi aga, mamala komi mangulika bulu ei mai, ‘Poencumoko lako hei rau hamai.’ Bulu ee mai kana manturuhi komi, apa moma naria to moma mamala mibabei. [21Anudaa to hangaa ei mai mamala'i rapopalai hante mohambaya bo mopuaha aga.]”
Pangkewo Yesus karongkanina nangkambelai bewa-'I mei mamate
(Mrk. 9:30-32; Luk. 9:43-45)
22Tempo Yesus hante ana-ana guru-Na nahiromu i Galilea, laiulika-Nara, “Ana Manuhia kana rapopewai i rara mpale manuhia, 23pade rapatehira-'I. Naupawee eo katoluna rapakatuwu nculi-'I lako kamatea.” Nangepe lauria najuu mpuu rarara ana guru-Na.
Yesus nobayari paja Hou Alatala
24Yesus hante ana-ana guru-Na narata i Kapernaum. Tempo ee mai narata hadua to peduhu paja Hou Alatala nepekune hi Petrus, “Laibayari-Na Gurumu paja Hou Alatala?”
25Nehono Petrus, “Io, laibayari-Na.” Napu ee Petrus nehua i rara hou.
Yesus nampoilodoi nampekune'i, “Bewa pampekirimu Simon? Lako hi hema magau-magau i dunia ei nantarima paja? Lako hi todeara motodi ba lako hi tau ntanina to moma todearadi?”
26Nehono Petrus, “Lako hi tau ntanina to moma todeara.”
Yesus nangulika'i, “Ane wetu, momaramo mobayari paja todeara. Wee moto mui kita, kakonona momatamo mobayari paja Hou Alatala, apa kita ei mai todea Alatala. 27Naupawee, bona nemo makodi rarara hi kita, koimoko mopeka bau i rano. Bau to pamulana mambela pekamu, bea nguduna. Muhuma mei doi halaka i rarana. Alami doi ee pade waikaramo halaku pobayari paja-Ku bo pajamu.”
Currently Selected:
Matius 17: MYL
Highlight
Share
Copy
Want to have your highlights saved across all your devices? Sign up or sign in
