Matius 16
16
To Farisi bo to Saduki nerapi tanda
(Mrk. 8:11-13)
1Napu ee, narataramo bahangkua dua to Farisi bo to Saduki madota mopanawu Yesus. Aji, laiperapira hi Yesus bona Nababei tanda to nepakahera mampahiloi ane nakono-'I narata lako huruga.
2Naupawee Yesus nampahonoira, “Ane ngkinuwia mihilo langi nalei, iulimi, ‘Mabelomi eo maile.’ 3Pade ane hampepulo mihilo langi nalei bo nalimau, iulimi, ‘Welau ei maudaa.’ Laincanimi nobatuani tanda i langi, naupawee moma laincanimi nobatuani humawee tanda to laibabei Alatala tempo ei. 4Nadaa mpuu ingkumi to natuwu tempo ei, pade moma komi mpuu-mpuu neparahaya hi Alatala. Nerapi komi tanda, naupawee moma komi rawaika tanda. Wuwu tanda to nahibali hante to nadupa hi nabi Yunus owi aga to rawaika komi.” Napu ee raumi Yesus nampalahira.
Nangkambelai ragi to Farisi bo to Saduki
(Mrk. 8:14-21)
5Naliu ee, Yesus hante ana-ana guru-Na neongko rau dipo Rano Galilea. Moma ilingara ana guru-Na nangkeni roti rapobokura. 6Yesus nangulikara, “Pakabelo, pade kana mainga komi hi ragi to Farisi bo to Saduki.”
7Ana-ana guru-Na nampomeuli hore hira napa to laiuli Yesus lauria, iulira, “Nemo-nemo pade iuli-Na lauria, habana moma ilingata nangkeni roti.”
8Naupawee ncani-Na Yesus napa to laipomeuliira, pade iulika-Nara, “Komi tauna to nakura peparahayami. Napa pade pomeuliimi kamomana naria roti laikenimi? 9Poma oa komi nengkao? Momami lingami bewa-'A nopakoni alima ncobu dua tauna hante alima ongu roti? Hangkua pangkoloapi labina laipahirurumi? 10Pade momami lingami popakoni-Ku opo ncobu dua tauna hante papitu ongu roti? Hangkua pangkoloapi labina laipahirurumi? 11Napa pade poma oa komi nengkao, ane to laiuli-Ku ei moma roti mpuu? Naupawee hangkanipi Ku'ulika komi, maingahawo hante ragi to Farisi bo to Saduki!” 12Alaana nengkaoramo ana guru-Na ane Yesus nantudura mainga, moma mainga hi ragi roti, naupawee bona maingara hi patudura to Farisi bo to Saduki.
Pangakua Petrus ane Yesus ee Ana Alatala
(Mrk. 8:27-30; Luk. 9:18-21)
13Karata Yesus i ngata Kaisarea Filipi, laipekune-Nara ana guru-Na, “Panguli tauna, hema kakonona Ana Manuhia?”
14Ana-ana guru-Na nehono, “Nariara to nanguli Yohanes to Pediu. Naria muira to nanguli Elia, pade to ntanina mui nanguli Yeremia, ba hadua lako nabi-nabi.”
15Napu ee Yesus nepekune hi hira, “Ane pangulimi komi, hema kakonona Aku ei mai?”
16Nehono Simon Petrus, “Ikomi Magau to Pepakahalama to laitipa Alatala, Ana Alatala to natuwu!”
17Yesus nangulika Simon, “Norahimoko Simon ana Yunus, habana moma manuhia to nangkewokako lauria naupawee Tuama-Ku to i huruga. 18Pade Ku'ulikako, ikomi Petrus. Batua hangamu etu, Watu to Naroho. I lolo watu to naroho ei Kupatuna hou-Ku. Batuana to iuli-Ku ei, humawee todea to neparahaya hi Aku Kupahiromu. Pade baraka kamatea moma mampadagira. 19Kuwaikako kunci poparentaa Alatala, bona napa to mupetagii i dunia, rapetagii mui i huruga, pade napa to moma mupetagii i dunia, moma mui rapetagii i huruga.” 20Napu ee Yesus nampatagira ana guru-Na bona nemo rakewora ane Hiami Magau to Pepakahalama to laitipa Alatala.
Pangkewo Yesus to pamulana nangkambelai bewa-'I mei mamate
(Mrk. 8:31–9:1; Luk. 9:22-27)
21Hinungkai lako hee, nopamulami Yesus nangkewokara ana guru-Na ane Hia kana rau i Yerusalem pade mangkolo madea ngaa kahehaa lako totua-totua ngata to Yahudi, imam-imam to i matana bo to nataualu buku Taurat, duuna rapatehira-'I. Naupawee eo katoluna rapakatuwu nculi-'I lako kamatea.
22Nangepe to iuli Yesus lauria, Petrus nampadii-'I rau humpiina pade iulikana-'I, “Pue, kuperapi bona Alatala mampaka'awa to ewa etu lako hi Iko. Moma maria hangkania to ewa etu madupa hi Iko.”
23Naupawee Yesus neili hi Petrus pade iuli-Na, “Magau Heta, petibomoko lako tingoo-Ku! Iko nampalawa-'A mobabei dota Alatala, apa iko nampekiri to laipekiri manuhia moto, moma laipekirimu napa to laipekiri Alatala.”
24Napu ee Yesus nangulikara ana guru-Na, “Butu tauna to mingki mantuku-'A, hia kana mampehapuka wotona moto, mangkolo kahehaa pade mantuku'A. 25Apa hema-hema to mampomaihi tuwuna moto, moma mei narata katuwua to moma maria kahuduana. Pade hema-hema to moma mampomaihi tuwuna habana nantuku-'A, hia mei mamparata katuwua to moma maria kahuduana. 26Moma naria bununa hadua tauna mamparata humawee ihi dunia, ane moma'i narata katuwua to moma maria kahuduana. Pade moma naria to mamala rapake mohula katuwua to moma maria kahuduana ee. 27Habana Ana Manuhia mei marata lako huruga hante malaeka-malaeka rara baa baraka Tuama-Na, mampahuku bo mampatiroi humawee tauna mantuku ingkura. 28Mpuu-mpuu Ku'ulika komi, maria mei bahangkua dua tauna to naria i hei to poma mamate kapomana rahilora Ana Manuhia marata halaku Magau.”
Currently Selected:
Matius 16: MYL
Highlight
Share
Copy
Want to have your highlights saved across all your devices? Sign up or sign in
