Matius 15
15
Parenta Alatala pade ada to Yahudi
(Mrk. 7:1-23)
1Napu ee bahangkua dua to Farisi pade to nataualu buku Taurat narata lako Yerusalem nepekune hi Yesus, 2“Napa pade ana-ana guru-Mu nantiboki ada tumpulokota? Momarahana nowano ncala pade nangkonirada.”
3Naupawee Yesus nampahonoira, “Napa pade laitibokimi muikowo parenta Alatala habana nantuku ada tumpulokomi? 4#Ul. 5:16; 21:17Alatala nanguli, ‘Bila tuamamu bo tinamu,’ pade ‘Hema-hema to mangkamo tuamana bo tinana kana rapatehi.’ 5Naupawee komi nopatudu iwei, ‘Ane maria hadua mangulika tuamana bo tinana ane napa to mahipato napopewai halaku petulungi hi hira, laipopewaina hi Alatalami, 6tauna ee mai mamalami moma mebila hi tuamana bo tinana.’ Hante patudumi lauria, komi nampapoti lolita Alatala habana nantuku ada tumpulokomi. 7He, komi to nabelo wongko, nakonomi lolita Alatala to laiparata nabi Yesaya owi nangkambelai komi iwei,
8 #
Yes. 29:13
‘Todea i ngata ei nampemabohe-'A hante wiwira,
naupawee rarara na'awa lako hi Aku.’
9Moma naria bunura nepue hi Aku,
apa patudu to laipatudukara tau ntanina, aga atura to laibabei manuhia.”
10Lauparia Yesus nangkio todea pade nangulikara, “Epe pura komi pade mipairara mpuu! 11To nampakarumu tauna i tingoo Alatala, moma to nehua i rara nguduna. Naupawee to nehuwu lako rara nguduna, eemi to nampakarumu'i.”
12Napu ee ana-ana guru Yesus narata hi Hia pade nangulika-'I, “Laincani-Mu ane napa to iuli-Mu etu laipokodi rarara to Farisi?”
13Yesus nampahonoira, “Hira to Farisi ee nahibali ewa tinuda to moma'i laituda Tuama-Ku. Butu tinuda to moma laituda Tuama-Ku to i huruga, kana rawuka hante larina. 14Palele motoramo. Hira etu mai ewa to naburo nopanuntu to naburo. Aji ane hore to buro momepanuntu, natantu amiramo manawu rara lowu.”
15Lauparia Petrus nangulika-'I, “Kewoka kami batua porapa lauria.”
16Nehono Yesus, “Poma muikowo pahami napa to iuli-Ku? 17Apa moma incanimi ane humawee to nehua rara ngudu, nehua i rara ntai pade ratadi i hawalikuna? 18Naupawee, napa to nehuwu lako ngudu, narata lako ihi rara pade eemi to nampakarumu tauna i tingoo Alatala. 19Apa lako rara tauna neumba pampekiri-pampekiri to nadaa, dota mepatehi, mebualohi bo meago, mogau hala, mangio, manguli to moma nakono nangkambelai tau ntanina, pade mepakudaa. 20Humawee laumiria to nampakarumu tauna i tingoo Alatala. Naupawee momata narumu i tingoo Alatala ane mangkonita moma mowano ncala.”
Hadua bangkele to moma Yahudi neparahaya hi Yesus
(Mrk. 7:24-30)
21Napu ee neongkomi Yesus lako ngata Genesaret ee, rau i ngata-ngata to namohu Tirus pade Sidon. 22Hadua bangkele to no'oha i hee narata hi Yesus. Bangkele ee mai to Kanaan, moma'i to Yahudi. Hia nanguli, “Tuama, muli Magau Daud, potowe'akuwo! Anaku bangkele laipehua anudaa. Napepa mpuu iepena.”
23Naupawee, moma-'I nehono Yesus nau hamati. Alaana, ana-ana guru-Na nampamohuki pade nangulika-'I, “Tudumi bangkele ei manculi, apa ngare-ngarena oami nantukuta!”
24Lauparia Yesus nangulika bangkele ee mai, “Aku laihuro muntu hi muli to Israel to naronto ewa bimba aga.”
25Nangepe lauria, bangkele ee mai nampamohuki Yesus pade notingkodu i tingoo-Na, iulina, “Pue, tulungi'akuwo!”
26Naupawee Yesus nehono, “Moma mahipato mangala roti to laipahadiakara ngana pade rateneka dike.”
27Nehono bangkele ee mai, “Nakono Tuama! Naupawee dike nangkoni hewu konia to nanawu lako meja maradikana.”
28Lauparia Yesus nangulika'i, “To tina, nabohe peparahayamu. Madupami hi iko ewa to laiperapimu.” Tempo ee mui naurimi anana.
Yesus nampakauri nadea tauna to nohaki
29Napu ee neongkomi Yesus lako hee pade nomako nantara wiwi Rano Galilea, pade nanake-'Imi i hangu bulu, noncuna i ria. 30Narataramo todea hi Yesus nangkeni to nakejo, to naburo, to napungku, bo to nabobo pade nadeapi tau ntanina to nohaki. Tau-tauna to nohaki ee mai laikenira i tingoo Yesus pade laipakauri-Naramo.
31Namangka purara todea ee mai nampahilo to nabobo nojarita, to nakejo nauri, to napungku nomako pade to naburo nenaa. Etu pade todea ee mai nampaune Alatala to laipuera to Israel.
Yesus nopakoni nelabi opo ncobu dua tauna
(Mrk. 8:1-10)
32Napu ee Yesus nangkiora ana guru-Na pade iulika-Nara, “Na'ahi rara-Ku nampahilora todea ei mai. Tolu eoramo dohe-Ku i hei pade moma naria koniara. Moma-'A madota mantudura manculi hante maoro, madungkara mei i lentongo dala.”
33Ana-ana guru-Na nangulika Yesus, “Kita ei mai i kalinoana. Ta'ala rima konia tapakonikara humawee tauna ei?”
34Yesus nampekunera ana guru-Na, “Hangkua roti to naria hi komi?”
Nehonora, “Papitu ongu roti pade bahangkua maa bau to nakodi.”
35Napu ee Yesus nantudura todea ee mai noncuna i tana. 36Yesus nangala papitu ongu roti pade bau-bau kodi ee mai pade nosukuru-'Imi hi Alatala. Napu ee laitubi-tubi-Na pade laiwaika-Na hi ana-ana guru-Na. Ana-ana guru-Na nopadola notira-tira hi todea ee mai. 37Humawee tauna nangkoni duura nabohu. Napu ee ana-ana guru Yesus nopalimpuru labi roti bo bau, naponu papitu pangkoloapi kadeana. 38Kadea tauna to nangkoni maria opo ncobu dua balailo, poma laireke bangkele bo ngana.
39Naliu ee, laitudu-Naramo Yesus todea ee mai manculi, pade nengkahe-'Imi i lolo duanga, neongko rau i Magadan.
Currently Selected:
Matius 15: MYL
Highlight
Share
Copy
Want to have your highlights saved across all your devices? Sign up or sign in
