Mataio 18
18
1Kurua pani ai aivara‐oro Iesu ai anenave, erau voa veve’enave ane, Mukua epe’epe a’a koana pani muku eiei ai?
2Ukua mau’u U ai aneai Iesu laea‐ulau’unave, oro awkono avao ai oiai U awkinave ane.
3U erau voa kurunave, Nai kurunaina kapoi, Noro lai urukiape liane, ukua mau’u orau evere’eape liane, pani muku eiei noro ikiriapea.
4A’a una lai ei ukua mau’u unu lai orau kekepa?-?ena, u mukua epe’epe keina pani muku eiei ai.
5Ukua mau’u monou ei ukua mau’u orau a’a umu‐awkana Nai eiai, u umu‐ikana awku.
6Ei ukua mau’u unu kaupu ukua‐monou u ipirimaroakona a’a uai aiane u eiai, awku ima kurua a’a eiai rawre una ke piriakeiai, u ere aura anu eporo ai mumukiakeiai.
7Au’a pani va’au e, uku uai oro eiai! uai‐oro aneai limakina; au’a uai inu uku vaki e!
8Ni eve naea, ni are naea, aravai‐niane, orere eine, kaiene ane: ima ni eiai are o’onu, eve eria, rokoa ikiriai, ni eve rere, are rere awku, e‐mi’ina opai iau ai runikavakeiai.
9Ni inamu aravai‐niane, inamu eme‐awkine, kaiene ane: ima ni eiai inamu monou miai, rokoa ikiriai ane, ni inamu rere miane, Gehena ai runikavakeiai.
10Oivirine ei a’a kaupu unu a’a mau’u monou noro lari‐awkanavaia: Nai kurunaina kapoi, uku pani muku ai omo aivara‐avaea‐oro Na Mai inu paku inamu‐oina panipani ai.
11Uku A’a anu Mere anena paukiakeia a’a‐oro iekavai.
12Noro oiamalaikora’i? A’a mamoe 100 miane, mamoe monou pawru enava’ane, u mamoe 99 ave’eapeana, akapu ai inana pawru vaki voroai?
13U pawru vaki auiane, Nai kurunaina kapoi, una kopai ei pawru vaki eiai ovara‐mai keina, kopai ipi’ipia u miape mamoe 99 eiai.
14Orau awku uku nomo Mai inu lai pani muku ai U umu‐a‐li’inakea ei kaupu unu ukua mau’u monou paukiakeiai.
15Ni aroa a’a namea‐nikava’ane, u ai enara, una namea ni ipawkira; u ni voa evere’eane, ni aroa a’a anu umu ni mi’ina.
16U ni voa inaka‐liane, a’a monou naea, a’a rere naea, eravaka‐enara ni aroa a’a anu paku ai uku ione a’a rere naea, rere kaiane naea, voa kavakava evere’eakeia’ane.
17Omo voa u viriape liane, ekalesia a’a ekira: ekalesia a’a anu voa u viriape liane, lai unuku a’a orau, moni akoa a’a orau u eia?-?keinamoki.
18Nai kurunaina kapoi, Awku kavakava noro pani va’au piriakana pani muku ai piriakeiakana: awku kavakava noro pani va’au ai ururuakana pani muku ai ururuakeiakana.
19Voa mo Nai kurunaina, Nomo a’a rere kuruei voa kuruane uku awku eiai orere nawki‐awkavakana, i Na Mai pani muku ai kurua awku liakeiakana orere eiai.
20Uku iou ai a’a rere naea, a’a rere kaiane naea, i‐kaupukina Na nawi eiai, oro awkono avao ai Nai i?-?pokoina.
21Petero U ai anenave, erau voa veve’enave ane, Amua e, pani ekara aru ana na aroa a’a namea‐ikavakana nai paue‐awmiakana ane? Pani 7 ana?
22Iesu kurunave, Nai kuruniape pani 7: a Nai kurunina kapoi, pani 70 pani mo opai keiakana ni paue‐awmiakana.
23Ou uku eiai pani muku eiei amua a’a monou mikiriakeina, una aivara anu moni kaiai opara evere’eai u umu?-?li’inave.
24Amua aivara anu moni akoaka’ane a’a monou una paku ai arekavakei’inave u amua anu kaio a’a taleni 10,000 kei’inave.
25Uku u moni eria miaka, una amua awkinave ei a’a, una a’e ane, ukua‐oro ane, inaea‐ekavakeiai, kavani amua awkuakeiai.
26Aivara amua anu paku ai are epo ai’inave, avioinave ane, erau voa kurunave, Amua e, maura, umu‐ikane, kavani iki nai nikuakana.
27Kurua aivara anu amua umu‐eakei’inave u aivara ururunave, una kaio awku u pauenave.
28A kurua aivara iki ai elenave, una aivara kaupu a’a monou u auinave, ei vaki una kaio a’a 100 peni kei’inave: u ei vaki inu ke eve a’akinave, erau voa kurunave ane, Kaio moni ikune.
29Moni kaio vaki are epo ai’inave, erau voa nanuku‐awkanave ane, Maura, ni umu‐ikane, kavani iki nai nikuakana.
30U a‐virinavea: kaio a’a kipura marea laru ai u ai’inave, anea’anea u kaio moni awkuane.
31Aivara kaupu a’a‐oro inamu‐oiaka’ane omo a’a liaka, oro lai kukunu kei’inave, oro anenave omo amua awkinave uku awku uriria liakei’inave.
32Una amua laea‐ulauaka’ane erau voa kurunave, Lipi vaki e, uku ni nawki‐ikanave ni kaio iki nai pauenave:
33Opara anana peana ni awku ni kaupu a’a umu‐awkavai orau nai umu‐nika?-?nave?
34Una amua iarakei’?-?inave ei vaki u vaki‐awmia a’a ekunave oro vaki‐awmiane‐iai anea’anea una kaio iki u awkuane.
35Na pani muku Mai awku orau liakana noro eiai noro kavakava una aroa a’a paue‐awmiape liane uku omo namea eiai.
Currently Selected:
Mataio 18: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
