Matius 17

Yesus Ni manglartar rsalan Ni snyain ma nlie nlengan desar

17:1-13

(Mrk. 9:2-13; Luk. 9:28-36)

1Lama Yesus naftutu monuk tomwat ngayadin a ne, ni lerar nem a rsak, I nor Petrus, Yakobus ma wainy Yohanes ma rti bubuar medasar sa.#2Ptr. 1:17-18 Na iano to kekes ma lan koko sir. 2Noak a ne sir rsalan Yesus e souny felan sa. Ma souny e idak farlan lere ma Ni rabit nangfuty resi ma namamas. 3Metryat e sir rsalan tomwatar du ma ratanuk ror Yesus. Sir a ne nabi Musa ma nabi Elia. 4Ne Petrus nfalak ber Yesus, “Mangnrure, tamin ye nangafel resi. Mpa farlan mpweang e yakw kufdiri befkar tel: sa ber Ko, sa ber Musa ma sa nbal ber Elia.” 5Noak ma Petrus lolone natanuk, metryat e mutan mafuti ma idak resi nma ma nepat sir. Ne rdengar liliri nof mutan dalam ma nfalak, “I ye Yakw Anakw ma kwamis I ma nafsenange dalangw. Ka mdyengar I.”#Kej. 22:2; Ul. 18:15; Mzm. 2:7; Yes. 42:1; Mat. 3:17; 12:18; Mrk. 1:11; Luk. 3:22 6Noak ma manglartar rdengar farane, sir ramtaut ma rsatngur terik ma rbon ompak. 7Ne Yesus nma ma nasyol sir ma nfalak, “Mimdir ma kete mimtaut!” 8Noak ma rpote sonir ma rfon e to rsalan kekes, lan Yesus koko I.

9Noak ma sir rnrunrur rof bubuar a ne, Yesus nfalak ber sir, “Ka kete misaur ber tomwate fen lese nbal na safe ma msyalan a ne terik ma Yakw, Tomwate Anaky kmworip a kbwali kof mangmwatar.” 10Ne Yesus Ni manglartar renrat I, “Safema mangaftutu Musa ni faretar rfalak feti ka nabi Elia nma baluan saryamprene betno Ray Silai?”#Mal. 4:5 11Ne Yesus nfalak, “Botuan feti ka Elia nma baluan ma nasusan safe-safe monuk.” 12Mdyengar ma kfwalak, ni botuan e Elia nma lo. Nempa tomwatar to rafai i ma rose yatak i rlarat nir mpempeang. Ma keta sir rose Yakw, Tomwate Anaky kwoman susar yadin farane nbal.#Mat. 11:14 13Noak a ne betno Yesus Ni manglartar a ne rkaul ral feti I natanuk na Yohanes mangadiris.

Yesus nafngamone kanak merwan sa ma ngerw

17:14-21

(Mrk. 9:14-29; Luk. 9:37-43)

14Noak ma Yesus nor Ni manglartar tel rbali sir rof bubuar ma rti rakmat tomwat ngayadin a ne nbal, merwan sa nma ma nakmat Yesus ma nsatngur a na sounlury. 15Tomwate ne nfalak, “Maken, mtwulung ma mufngamone anakw nre la! Koli biase ngerw nwayat ma nawar desar i. Ma noak ma ngerw e far mpene ne i nfufw far au, ma far mpene ne i nfufw far weye. 16Ma yakw kor i ber Nim manglartar lo, nempa to bonir ral ma rafngamone i.” 17Ne Yesus nfalak ber sir, “Hei tomwatar kmi ma myorip a na are ye, to milele Ratu ma ulmir arwaluk desar! Kmi mdyaun feti keta kor a kmi dodo e? Ma mdyaun feti keta Yakw kswabar ma kor a kmi e? Myor kanak a ne mya!” 18Mpe Yesus nfarete smwangat yatak ma nsung kanak a ne ma nbie. Ne smwangat yatak a ne nbie ma kanak a ne nangamon desar.

19Noak ma Yesus koko I e Ni manglartar rma ma rakmat I ma renrat, “Tuangguru, safema kam to bise ma matian kalin smwangat yatak a ne?” 20Ne Yesus nfalak, “Kmi to bomir myal ma mitian smwangat yatak a ne fali kmi to milele botuan Ratu. Mdyengar fen ngamone ma kfwalak, farlan kmi milele Ratu boloka lan rufuky, iane feleles farlan sasawi batin ma marumat desar. Keta kmi bise ma mfyalak ber bubuar ye, ma nbie nof ye ma nti a no, mpe keta bubuar a ne nbie nof a ne. Mpa farlan kmi milele botuan Ratu e bise ma myose safe-safe motak.#Mat. 21:21; Mrk. 11:23; 1Kor. 13:2 21[Smwangat yatak ma farye ka msyampayang ma mpyuase fuky betno bise ma mitian i.”]

Yesus natanuk na Ni mamate fen lain du

17:22-23

(Mrk. 9:30-32; Luk. 9:43-45)

22Noak ma Yesus nor Ni manglartar ramin propinsi Galilea, I nfalak ber sir, “Tomwatar keta ranrenre Yakw, Tomwate Anaky ber mangfaretar. 23Ma keta rfen Yakw nempa ni lerar tel e Yakw kmworip a kbwali.” Mpe Ni manglartar a ne dalmir suse desar.

Yesus naftutu tomwatar ma rbayar ulbati

17:24-27

24Noak a ne Yesus nor Ni manglartar rait kote Kapernaum. Ne mangtak ulbati na Ratu Ni Das Silai ne nma nakmat Petrus ma nfalak, “Ali biase mir Tuangguru nbayar Ratu Ni Das Silai ni ulbati e?”#17:24 Tomwat Yahudyar nir yayatrwar nfalak feti merwan Yahudyar monuk ma nir ngarkar buty du far das ka rbayar ulnir batin na Ratu Ni Das Silai. #Kel. 30:13; 38:26 25Petrus nfalak, “Au, I nbayar.” Ma noak ma Petrus nbali i far das e Yesus nenrat i baluan feti, “Petrus, nof nim andaun e mpear ma ka rbayar ulbati ber rayar na saryamprene ye? Biase sir rtak rof nir nusar nre tomwat walyetar?” 26Ne Petrus nfalak, “Nof tomwat walyetar!” Mpe Yesus nfalak ber i, “Farlan farane nir dasdalam to rperlu ma rbayar ulbati lo.” 27Nempa ni ngafele e tbayar motak ulninrar batin a ne nema kete dalmir maninik kit. Mpa ko mtwi twemul ma mupin. Ma ian ma mpwin baluan a ne, keta mswalan doit na babany dalam. Doit a ne dengan la mbwayar tadu ninr ulbati. Mpa ka mngwang babany ma mwal doit a ne. Ne mtwi mukmat mangtak ulbati na Ratu Ni Das Silai ne ma mbwayar tadu ninr ulbati.

Currently Selected:

Matius 17: YMD

Highlight

Copy