Va'Atəŋ 31

1Yaŋ aprəm kirtin Laban mezeŋgleket ənahaŋ na: «Yakob amõhuk zəgeɗ na afəm pakə, aka hara arya na afəmiy akkpaŋ məs aryaŋka.» 2Yakob asəŋgləkan hara Laban na, wəlet awdaw va lahəŋ ɓa. 3Yawe anah sən Yakob na: «Amil aka dələv net efiŋgiɗko, eret ɗiy noko: wanəsaw də isi.»

4Yakob ayek may Rakel dət Le'a awra a təki asan dit gilew nani. 5Aɓsit na: «In tat ula hara afukum akaw tay va məsam lahəŋ ɓa; Maŋgəlva na afuw asanək də iyna. 6Kəsənənək mənokum sən kiykum va nəgəɗ sən wəza sən afukum maw homtok homtoku. 7Afukum asmayãwka, addəɗanək əfaɗ naw gap təl kəlawə, də as pak, Maŋgəlva dəpəl sən tive nawgəɗ su mbərayən ɓa. 8An anahək na: Timeŋgiɗ nzefnzefiŋ dədassoŋ ka wəfaɗ noko, timeŋgiɗ pak uwaŋ nzefnzefi; an anahək na: vəlẽh vəlẽhəŋ ka nawfaɗ suko, ndəɗaŋ uwaŋ zit vəlẽh vəlẽh. 9Maŋgəlva dəgəm gazlaŋ na afukum, apsuwa. 10Aka pay ərka net gilewi, addəv əssine in haraw le'gən na: in ule ndargenyeɗi, porsokɗe vəlẽh vəlẽhi, nzefnzefi, gəm borzlozleɗ kaka'ə. 11Maslay na Maŋgəlva anah su addəv issine na: Yakob. Nəzlan sən na: In yakəŋkə. 12Yas amna: Aslan horoko, awle porsokɗe məzərka'an sit gilew pak vəlẽh vəlẽh, nzefnzef gəm borzlozloɗiŋgə, vi nulak an Laban adawgəɗ suk pakə. 13#VAA 28:18-22Intə Maŋgəlva məs dərban zən azok a Betel, a təki kəpesl serek, a təki kiynan mok su naka. Kakaŋ na, asili, agil səka dəlvəŋka amndok aka dələv net migilko.» 14May Rakel dət Le'a, azlan sənəni: «Haran nam tay addəv əzəmgəla na afəm əmpa sa? 15Va molhõyẽɗ adawɗiyim azan ɓa sa? Adan avəlməka, azəm koɓeɗ namə. 16Vi arya məs Maŋgəlva amõh səva afəməŋ pak nami dit kirtəmə. Agəɗ va Maŋgəlva anah suk pakə.»

17Yakob asilik andek kirtin dit gil nan apeŋgit aket zlogomeɗi. 18Akak gazlaŋ nan də arya nani, gazlaŋ arah sə təki məpəlayya na Paddan-Aram, kamndan ana Isak, afənda aka dələv na Kana'an. 19Laban ambatək əfiw timeŋgiɗ nan, gala Rakel təhẽl meŋgilveɗ Terafim na afəta. 20Yakob abayək hara Laban mə Aram, ambat məza ənah sən ɓa. 21Anzanək dit zəgeɗ nan pakə, ndən le', aggar ki məlpa na Efrat, haran ta' kəlaket gərmeɗe na Galad.

22Aka wəvoŋ mohoko'ən məprəman sən Laban na, Yakob anzanəka. 23Laban andek milmiŋgiɗin, azbanək gap əsɓəta buhulu, ambat ərufun aket gərmeŋɗe na Galad. 24Maŋgəlva ade wərəh Laban mə Aram addəv wissine də dəfɗa, aɓsən na: «Asla zuko, vi kədawpel də Yakob moggon ɓa, mbərayən ɓa.»

25Laban aruf Yakob na aherik gizlirke nan aka gərəm na Galad; Laban dit milmiŋgiɗin aherninik an net tamə. 26Laban aɓsən Yakob na: «Miy kəgəɗəŋ di! Kəbayək haraw, is mah əkiy kirtu va məfərsəneɗ mərmet səma əgaya. 27Vimi kəɗam su is ɓak ənzok, mbo' əzaw məza ənah su ɓa di? Wanəppok əmbat kəta, dit gəlyeɗe nanneke, də dəgla gəm gəzləŋtəndəŋ ɓa sa! 28Kəppaw əsɗet dəhiŋgiɗu dit kirtu muguluŋgit də wəllamit a makraw ɓa. Eske na, kəgəɗək zəga na dərwa. 29Wanəgəɗ suk mbərayən kəta. Ya Maŋgəlva net migiluk anah su na dəfəɗəŋ na: “Asla zuko, vi kədawpel də Yakob moggon ɓa, mbərayən ɓa!” 30Yaŋ na, kəmbat na vi mok aka gəla na afuki yi, ya vimi kəhẽl su meŋgilveɗ naw di?» 31Yakob azlan sən Laban na: «Geslne dəduwa, azaw na wakəmõh su kirtuko. 32Ɗəf məs kəreh meŋgilveɗ nok avani, nan wamtə. Daret milmiŋgiɗmə, asən zəga nok navaw pakə, amsak agəma.» Yakob dəsən na, Rakel təhẽlke ɓa.

33Səza Laban atoŋ a gizlirke na Yakob, a gizlirke nat Le'a, gəm a gizlirke net belemɗe sulegit pak na, zəga tay arah ɓa. Ndən vit sə gizlirke nat Le'a, toŋ a gizlirke nat Rakel. 34Rakel tənde meŋgilveɗ Terafim təziy addəv mazaŋga na zlogomo. Ndət ɗew akan, yaŋ Laban aŋgbanyan gədəv gizlirke pakə, zəga tay arah ɓa. 35Yaŋ tənah sən afət na: «Kamə, kədawda gədəv akaw an nəsil abok ɓa ɓa daya nawa, vi in tat əzələha.»

Aŋgbanyanəka, dərih meŋgilveɗ Terafim nek ɓa. 36Gədəv Yakob adək diyɗa, awaksən Laban; amna: «Heslepe naw miy kandi? Mbərayən naw miy nəgəɗ, kəzbawəŋ di? 37Kəŋgbenyet zəgeɗ naw pakəŋ na, zəga nok tay kərah təttaka anawda kan sa? Arban a maheret milmiŋgiɗu dit milmiŋgiɗukəŋki, dətawan səmən sulagəmə! 38Agəɗək wəzva kaklaw sula in tat də isi, tay səret timeŋgiɗ nok, awaniɓa səret gilew nok dəlot ɗah ɓa! Nəzəm ɗah ndergeyẽɗ naret timeŋgiɗ nok ɓa. 39Nəkiy suk time məbakan sura ɗah ɓa, in tat əslan wən nan akawa; zəga mamayãn an məhãlən də kapaya, də dəfɗa, is tat əssohõn amawa! 40Pay azləwək də kapaya, də dəfɗa, səmyã, sin səraw təray! 41Agəɗək wəzva kakalaw sula, in tat eŋgil anokda, nəgəɗ sukuk wəza wəzva kəlaw kiyən poɗo aket kirtuk muguluŋgiti, wəzva sləre, a met gilew noko! Kəddəɗanək uwrək naw gap təl kəlawə! 42Va Maŋgəlva na afu, Maŋgəlva na Abraham məgeslne'gən Isak tay də in ɓa, vaw halay halay kədappaw əmbat kakaŋ kəta. Maŋgəlva awlak əzəmsahã naw də iya na vawa; atawək wən nan na dəfɗəŋka.»

43Laban azlan sən Yakob amna: «Kirin muguluŋgitiŋki kirtuwəŋgə, kirtitiŋki kirtuwəŋgə, timeŋgiɗiŋki nawəŋge'e, an kədawlaŋ pak nawi yi. Miy nədawgəɗ sit kirtu muguluŋgitiŋ dit kirtit en awaŋ dəpaŋkəŋ di? 44Damə, əɗɗa wənmiyna a walaŋmə, dəsangən ka miziwe namə.»

45Yakob agəmək gərəm ampa ka sereki. 46Yakob anah sit milmiŋgiɗin na: «Məndə gərmeŋɗe», andaŋgək gərmeŋɗe akkeletinik kpewi. Azəmaŋ peŋ a maŋgavet adaka. 47Laban aya na, Yegar Sahaduta, na Yakob aya na Gale'et. 48Laban amna: «Gərmeŋge kpewiŋki, məziwey aka walaŋgəm də is dəpaŋka.» Va wənəh na kpew na məziwe. 49Iya nan Mispa yi'e, vi anahək na: «Kəta Yawe dəsivumə, pay mədawtəpa sə mahara zəmə. 50An kəzəmgitik sahã net kirtuwa, may an kəkayək gil meɓɓet aketi, asən na, ɗəf tay də mənam ɓa dayday na, Maŋgəlva yi məziwe aka walaŋgəm də isi.»

51Laban aɓsən Yakob na: «Gərmeŋɗe kpew nəndol a walaŋgəm də isiŋ yeŋki, serekəŋ yaŋka. 52Gərmeŋɗe kpewiŋki, məziweŋ, serekəŋ pak məziwey. Naw, in tat əsway na, nəggar na kiyit gərmeŋɗe kpewiŋ kəlazok ɓa, nok pak asway na, kəggar na kiyit gərmeŋɗe kpewiŋ də serekeŋ kəlazaw naɗɗa mbərayən ɓa. 53Maŋgəlva na Abraham də Maŋgəlva na Nahor dətawan wən nam də isi.» Ndəni yi Maŋgəlva na afiti.

Yakob aswayək də məgeslne'gən Isak, afəni. 54Yakob azaɓək-Maŋgəlva aggərma. Ayek milmiŋgiɗin aka peŋ; azəmənək peŋ, ndəɗaŋ kim aggərəm adaka.

Currently Selected:

Va'Atəŋ 31: GB

Highlight

Copy