मत्ति 20
20
खेत्लाजिमि खानवा
1येसुडे़ॽ थाङ्सिरिमि राज्यमि टुम्बेॽ इक्को खानवा लुघे़ॽटु, “इगो खा इक्को सोङ्रादाङ्बाडोॽ ले़ये। खो माक्मिसेल्लाम खोमि अङ्गुर सोङ्राबेॽ योम्बोक ले़ःॽमेॽमामि खेत्ला योक्सिॽ खडा। 2मोबा ‘इक्याकमि नमयाक सिसे़ङ्मि इक्को मुन्डा पिनिम्ने़’ लुनुङ खेत्लाजि सोङ्राबेॽ योम्बोक ले़ःॽसिॽ पाक्सुजि। 3खो नोक्चिबोङ राजि हाटाबेॽ खडा, खोसे़ॽ हाइखा याॽमिजि योम्बोक मे़ॽनिङ येःप्टिङ्बॽआ चुप्टुजि। 4मोबा खोसे़ॽ माहाजि लुसुजि, ‘हे़निङ्सो के़ए़ सोङ्राबेॽ योम्बोक ले़ःॽसिॽ खडानिङे, हे़निङ्मि नमयाक पिनिम्ने़। मोबा खोजि योम्बोक ले़ःॽसिॽ खडामि।’ 5हागोसो मो याॽमि इक्पोङ निच्चि बोङ्राजिनुङ सुमबोङ्राजिसो खडा, मोडोक्पेॽ चुप्पॽआ खेत्लाजिसो योम्बोकपेॽ टिसुजि। 6मोबा फेरिसो खो मोडोक्नोॽ ङाउम बोङ्राजिसो हाटाबेॽ खे़ॽनुङ हाइखा याॽमिजि योम्बोक मे़ॽनिङ येःप्टिङ्बॽआ चुप्टुजि माहाजिसो सिप्सुजि, ‘हे़निङ इन्ढोङ योम्बोक मे़ॽनिङ इगोबेॽ लेल्ले येःप्इन्डानिङे ?’ 7माहा याॽमिजिडे़ॽ खो लुसुजि, ‘कानिङ असे़ॽसो खेत्ला मे़न्टिसामि।’ मोबा खोसे़ॽ लुसुजि, ‘मोडोक्होङ हे़निङ्सो काङ्मि अङ्गुर सोङ्राबेॽ योम्बोक ले़ःॽसिॽ खडानिङे।’
8 “युडा लिसा, मोबा अङ्गुर सोङ्रादाङ्बाडे़ॽ खोमि बैदर के़ःॽनुङ लुसु, ‘याक्लो चोप्पा ए़क्साङ लेङ्खुबाजि आयुए नमयाक पिसाजे, मोबा याक्लो लेङ्खुबाजि नमयाक पिसाजे।’
9 “ङाउम बोङ्राजि लेङ्खुबा खेत्लाजि लेस्सामि, माहाजिडे़ॽ इक्याकमि नमयाक चुप्टुजि। 10याक्लो लेङ्खुबा खेत्लाजि लेस्सामि, खोजिडे़ॽ बेॽलोनोॽ नमयाक चुप्मिन्डुङ्मा लुनुङ मिप्पॽआ ले़टे़, तर खोजिडे़ॽसो इक्याकमिरेॽनोॽ नमयाक चुप्टुजि। 11माहा याक्लो लेङ्खुबा खेत्लाजि नमयाक टाःप्नुङ, अङ्गुर सोङ्रादाङ्बामि बिरोधबेॽ कुनुॽकुनॽ काबोगामि। 12माहा खेत्लाजि सोङ्रादाङ्बाबेॽ लेन्नुङ काबोगामि, ‘इघा ए़क्साङ लेङ्घुबा खेत्लाजिडे़ॽको इक्को बोङ्रेॽ योम्बोक ले़टुजि। तर हे़ने़ॽको कानिङ माक्मिएबाङ युडाठोक नम राःक्माबेॽसो योम्बोक ले़ःॽखुबाजि पिबॽआडोक्नोॽ नमयाक पिसुजि।’ 13तर मो सोङ्रादाङ्बाडे़ॽ माहाजिबेॽ इक्को खेत्ला लुसु, ‘लङ्गाम, के़ॽ हे़न इमाङ्सो अन्याय मे़ले़टिॽ, इमा हे़न इक्याकमि नमयाक सिसे़ङ्मि इक्को मुन्डाबेॽ ले़ःॽमा राजि लिबॽआ ने़ॽनेन्डे ? 14हे़ने़ॽ चुप्मे नमयाक लाजाघडे, के़ॽ इघा ए़क्साङ लेङ्घुबाजिसो हे़ने़ए़डोक्नोॽ नमयाक पिमा मिॽइनुङ्हाजि। 15कानुङ टुहा इमाङ्सो के़ॽ मिॽटिडोॽ ले़ःॽटोक्टुङ्निहा ? के़ॽ इघाजि भलो ले़ःॽमाबेॽ हे़न इन्ढोङ सुरके़ये’ ?”
16 “इडोक्नोॽ ए़क्साङ्हाजि पोम्बेॽ सिॽइम्मे, पोम्बेॽहाजि ए़क्साङ सिॽइम्मे।”
येसुडे़ॽ टाङ्बा सिमे खा सुमखेॽ इःबॽआ
(मरकुस १०:३२-३४; लुका १८:३१-३४)
17यरुसलेम खे़ॽमे़ॽनिङ्सिमाबेॽ येसुडे़ॽ बारो जना चोङ्साजिरेॽनोॽ इक्के़ङ्बेॽ चिक्खे़ॽनुङ लुसुजि, 18“कानिङ यरुसलेमलाम खे़ॽमे़ॽनिङ्सिन्डिङ्मे, हागो याॽमिमि पसा एप्पा याडाङ्बाजिनुङ धारमिक खा इःॽखुबाजिडे़ॽ राःप्मिन्डुजे, खोजिडे़ॽ खो सेॽनेमे आप्टिक टिन्डुजे। 19खो सिःक्चामामि, कोरराडे़ॽ साःप्मामि, काप्सिङ्बेॽ किङ्नेमा लुनुङ अयहुदिजिमि हुकपेॽ जिम्मा टिन्डुजे। मोबा सुमयाकमि यिडे़ॽ खो येःॽमाबाङ हिङ्बोक्इये।”
इक्को मामामि बिन्ति
(मरकुस १०:३५-४५; लुका २२:२४-२७)
20मोबा जब्दियामि बनिमाडे़ॽ खोमि निप्पाङ पसाजि सोरि चिक्नुङ येसुबेॽ लेस्सा। मोबा खोमि पोम्बेॽ टुम्रुक ठोःक्नुङ बिन्ति ले़टु। 21येसुडे़ॽ खो सिप्सु, “हे़न इमाङ ले़ःॽपिॽमे़ ?” मोसे़ॽ लुसु, “बिन्ति ले़न्ने़, हे़ने़ए़ राज्यबेॽ, के़हा इघा निप्पाङ पसाजि इक्को हे़ने़ए़ चुप्थिङ्लाम हाइको हे़ने़ए़ ए़ङ्सिङ्लाम युङ्बेॽमा।” 22तर येसुडे़ॽ लुसु, “हे़निङे़ॽ इमाङ ङाःक्मे़ॽनिङ्सिन्डानुमे मो लेसानुम्ने। के़ॽ उङ्सिॽ पोरोक्पॽआ खेःमि खोरियाबाङ, इमा हे़न्जिङेॽ उङ्हेन्जुए ?” मोजिडे़ॽ लुसाजु, “उङ्हेन्जुङे।” 23येसुडे़ॽ लुसु, “के़ॽ उङ्बॽआ खोरियाबाङ उङ्हेन्जुए, तर के़ए़ चुप्थिङ्लामनुङ ए़ङ्सिङ्लाम पेम्मेॽमे अधिकार के़ए़ हुकपेॽ माॽआये। इघा ठाउँगो काङ्मि पाबाडे़ॽ असा असामि लागि पोरोक्इटुए माहाजिमि लिहा।”
24इगो खा खेम्नुङ हाइखा इक्पोङ जना चोङ्साजि चाहिँ मोजिनुङ बेॽलो सुरकडामि। 25तर येसुडे़ॽ माहाजि के़ःॽनुङ लुसुजि, “हे़निङे़ॽ लेयुक्सानुमे, अयहुदिजिमि सासकजिडे़ॽ माहाजिसोक्पेॽ नम्नम मे़ले़रेॽ सासन ले़न्डुजेनुङ बेॽहा मायोङ्बाजिडे़ॽ माहाजि अधिन ले़न्डुजे। 26हे़निङ्मि रुम्बेॽ इडोॽ लिनिबा, तर हे़निङ्बेॽ असा एप्पा लिमा मिङ्इये, मो हे़निङ्मि सेउते लिमा खे़ये। 27हे़निङ्बेॽ असा याक्लोमा लिमा मिङ्इये, मो हे़निङ्मि सेउते लिमा खे़ये। 28इडोक्नोॽ याॽमिमि पसासो हाइखाजिबाङ सेवा चुप्मामि लागि ने़ॽनि, हाइखाजि सेवा पिसिॽनुङ बेॽलो याॽमिजि छुट्कारा ले़ःॽमामि लागि टाङ्बामि सोःक्मा पिसिॽ लेस्सा।”
येसुडे़ॽ निप्पाङ मिक मे़ए़ॽखुबा याॽमिजि नुबोक्पॽआ
(मरकुस १०:४६-५२; लुका १८:३५-४३)
29येसुनुङ खोमि चोङ्साजि यरिहोबाङ खे़ॽमे़ॽनिङ्सिमाबेॽ, बेॽलो याॽमिजि ए़ङ्गुवा ए़ङ्गुवा खडामि। 30मोडोक्पेॽ राम के़क्पेॽ पेङ्घुबा निप्पाङ मिक मे़ए़ॽखुबा याॽमिजिडे़ॽ येसु मो राम लिसाङ खे़ॽमे़ॽनिङ्सिये लुबॽआ खेम्नुङ बेॽलो वोसाङ लुसाजु, “हे परभु, दाउदमि पसा, काजिङ्बेॽ नम्नावा ले़ःॽमाना।” 31माहा बेॽलो याॽमिजिडे़ॽ मोजि ए़क्कासाजे लुनुङ योबुजि, तर खोजि छना इडोॽ वोसाजि, “हे परभु, दाउदमि पसा, काजिङ नम्नावा मिॽमा ना।” 32येसु येःप्नुङ मोजि लुसुजि, “हे़न्जिङ्मि लागि के़ॽ इमाङ्डे ले़ःॽपिॽमे़ ?” 33मोजिडे़ॽ येसु लुसाजु, “हे परभु, काजिङ्मि मिक नुबोक्पेॽमना।” 34येसुडे़ॽ निवाबाङ मोजि नम्नम मिॽनुङ खोजिमि मिक के़क्पेॽटुजि, के़क्मासोरोक्नोॽ मोजिमि मिगे़ॽ खाङ्हेसाजु मोबा खोजि येसुनुङ्नोॽ सोरि राम्बोगाजि।
Currently Selected:
मत्ति 20: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
