मत्ति 19
19
छोडपत्रामि टुम्बेॽए खा
(मरकुस १०:१-१२)
1येसुडे़ॽ इघा खा इःसेॽनुङ खो गालिल ठाउँ याःॽयानुङ यरदन होङ्मामि मेॽए़रेङ यहुदिया ठाउँराजि खडा। 2बेॽलो याॽमिजिडे़ॽ येसु टिङ्बोगुजिनुङ खोसे़ॽ माहा याॽमिजि नुबोगुजि।
3आढा फरिसिजिडे़ॽ येसु रेम्एम्मामि खोबेॽ लेन्नुङ इडोॽ सिप्सुजि, “टाङ्बामि बनिमा इमाङ्होङ्सो दोसबेॽ छोडपत्रा पिमा नुयेन्डे फे़न्निबा ?” 4येसुडे़ॽ माहाजि लुसुजि, “इमा हे़निङे़ॽ धारमिक नेॽचिराबेॽ मे़नेडानुमे ? सिरिस्टिदाङ्बाडे़ॽ याक्लो याॽमि टोङ्माबेॽनोॽ वडाङ्पसानुङ मेॽनामिॽ टोङ्इटुए। 5मोबा येसुडे़ॽ खोजि लुसुजि, ‘मोडोगे़ॽ वडाङ्पसाडे़ॽ टाङ्बामि पाबा मामा याःॽयानुङ टाङ्बामि बनिमानुङ पेङ्इयेनुङ खोजि निप्पाङ इक्को हिङा लिन्जे।’#उत्पत्ति २:२४ 6हागो खोजि निप्पाङ ने़ॽनि, तर इक्को हिङा लिॽचे। मोडोगे़ॽ निवाहाङ्डे़ॽ इक्को टोङ्बॽआजि, असे़ॽसो फाक्मा फे़न्निबा।”
7माहा फरिसिजिडे़ॽ येसु लुसुजि, “मोडोक्होङ इन्ढोङ मोसाडे़ॽ छोडपत्रा पिनुङ बनिमा लेप्पेमे लुसुजे ?” 8येसुडे़ॽ माहाजि लुसुजि, “मोसाडे़ॽ खोजिमि लुबॽआ मे़खेम्खुबा निवा लेनुङ्नोॽ बनिमा छोडपत्रा पिनुङ लेॽमा नुये लुसुजि। तर याक्लोनोॽ इडोक्मा नियम माॽआडे़। 9के़ॽ हे़निङ लुनिम्ने़, असे़ॽ बेभिचारमि दोसबाङ हाइखा दोसबेॽ टाङ्बामि बनिमा छोडपत्रा पिनुङ हाइकोनुङ फुङ्सया ले़टुहोङ मोसे़ॽ बेभिचार ले़न्डुए।”
10चोङ्साजिडे़ॽ इघा खा खेम्नुङ येसु लुसुजि, “बनिबा बनिमाजिमि रुम्बेॽ इडोॽ लियेहोङ्गो, फुङ्सया ए़ले़ःॽमानोॽ नुबा लियेले़।” 11येसुडे़ॽ माहाजि लुसुजि, “इगो खाडे़ॽ लुबॽआडोॽ चोप याॽमिजिडे़ॽ ले़ःॽहेसुजिनि, निवाहाङ्डे़ॽ पिबॽआ निवाडे़रेॽनोॽ ले़ःॽहेन्डुजे। 12इन्ढोङ्होङ इन्डोक जनाजि टोक्माबेॽनोॽ मेस्रेॽवा ले़म्मे, इन्डोक जना चाहिँ याॽमिजिडे़ॽ टोङ्बॽआ मेस्रेॽवा टुम्मे। इन्डोक जनाजि चाहिँ खोजिटाङ्बे़ॽनोॽ थाङ्सिरि राज्यमि लागि मेस्रेॽवाडोॽ फुङ्सया मे़ले़ःॽलेॽ पेङ्इम्मे। ले़ःॽमा मिॽखुबाडे़ॽ, इगो खाडे़ॽ लुडिडोॽ ले़टुजिरो।”
ओङे़कजि आसिस पिबॽआ
(मरकुस १०:१३-१६; लुका १८:१५-१७)
13येसुडे़ॽ ओङे़कजिसोक्पेॽ खोमि हुक युङ्नुङ पारथना ले़ःॽपेॽरो लुनुङ याॽमिजिडे़ॽ टाङ्बामि ओङे़कजि खोबेॽ चिक्चे़डुजि। इडोॽ लिबॽआ खाङ्नुङ येसुमि चोङ्साजिडे़ॽ माहा याॽमिजि वोबुजि। 14तर येसुडे़ॽ लुसुजि, “ओङे़कजि काबेॽ आप्मेॽटानुमे, खोजि ए़ॽसे़गानुमे, इन्ढोङ्होङ निवाहाङ्मि राज्यगो इडोक्हाजिमिनोॽ ले़ये।”
15मोबा माहा ओङे़कजिसोक्पेॽ खोमि हुक युङ्साङ पारथना ले़ःॽसेॽनुङ येसु मोबाङ खडा।
इक्को टाङायोङ्बा याॽमि
(मरकुस १०:१७-३१; लुका १८:१८-३०)
16इक्को वेन्जा याॽमि येसुबेॽ लेन्नुङ लुसु, “हे गुरु, ए़ॽसिघे़ॽमे हिङ्मवा चुप्मामि लागि के़ॽ इमाङ नुबा योम्बोक ले़ःॽमा खे़ये ?”
17खोसे़ॽ मो याॽमि लुसु, “नुबा खामि टुम्बेॽ का इन्ढोङ सिम्इङे ? नुबागो इक्को निवाहाङ्रेॽ टुये। तर हे़न ए़स्सिघे़ॽमे हिङ्मवा चुप्मा मिङ्इयेहोङ, निवाहाङ्डे़ॽ लुबॽआ चोप खा पालना ले़टे।”
18मो याॽमिडे़ॽ लुसु, “हाम्बहा खा चाहिँ पालना ले़ःॽमे ?” येसुडे़ॽ लुसु, “हे़ने़ॽ याॽमि ए़सेॽमे़, बेभिचार ए़ले़ःॽमे़, ए़क्खुमे़, मे़ॽनोॽमा साक्छि ए़ॽपिमे। 19टाङ्बामि पाबा मामामि आदर ले़ःॽमे़, टाङ्बामि पेन्लागामजि टाङ्बाडोक्नोॽ नम्नम मिॽमे़।”
20मो वेन्जा याॽमिडे़ॽ येसु लुसु, “इघा चोप खागो के़ॽ ले़ःॽमे़ॽनिङ्सिनुङे, हागो के़ॽ हाइखा इमाङ ले़ःॽमा खे़ये ?”
21येसुडे़ॽ मो वेन्जा लुसु, “हे़न चइबानोॽ धरमि याॽमि लिमा मिङ्इयेहोङ, खे़ॽनुङ हे़ने़हा चोप याङ्सरावा इन्जानुङ इमाङ्सो मे़ङ्काप्खुबा गरिबजि हाबेॽटाजे। मोबा हे़ने़ॽ थाङ्सिरिबेॽ याङ्सरावा चुप्मिन्डुए, मोबा हे़न कानुङ राप्से।”
22मो वेन्जा याॽमिडे़ॽ इडोक्मा खा खेम्नुङ ए़क्साङ, खो दुःखि लिनुङ खेप्पेसा, इन्ढोङ्होङ खोमि बेॽलो याङ्सरावा टुसहा।
23मोबा येसुडे़ॽ खोमि चोङ्साजि लुसुजि, “चइबानोॽ, हे़निङ लुनिम्ने़, थाङ्सिरि राज्यबेॽ टाङायोङ्बा याॽमिजि पे़ॽखे़ॽमा बेॽलो छॽइये। 24फेरिसो के़ॽ हे़निङ लुनिम्ने़, समिकमि नाढोकबाङ उट पे़एम्मा इन्डोक बेॽलो छॽइये, मोबाङ्सो बेॽलो टाङायोङ्बा याॽमिजि निवाहाङ्मि राज्यबेॽ पे़एम्मा छॽइये।” 25इगो खा खेम्नुङ चोङ्साजि खरि मिङ्साङ येसु सिप्सुजि, “मोडोक्होङ्गो असे़ॽ चाहिँ मुक्ति चुप्मिन्डुए ?” 26येसुडे़ॽ माहाजि खाङ्साङ लुसुजि, “याॽमिजिमि लागि इगो खा लिहेनिबा, तर निवाहाङ्बाङ चाहिँ चोप खा लिहेये।”
27मोबा पत्रुसडे़ॽ येसु लुसु, “खाक्से, कानिङेॽको चोप थोक याःॽयानुङ हे़न्नुङ राम्इटिङ्मे़। कानिङे़ॽ चाहिँ इमाङ चुप्मिन्डुङ्मे़ ?” 28येसुडे़ॽ माहाजि लुसुजि, “चइबानोॽ, हे़निङ लुनिम्ने़, असा असा कानुङ राम्इटानिङे, याॽमिमि पसा चोङ राज्यबेॽ महिमानुङ्मा हाङ्पेन्ढामबेॽ पेङ्इये, मोडोक्पेॽ हे़निङ्सो इक्पोङ निच्चि हाङ्पेन्ढामबेॽ पेङ्इन्डानिङे, मोबा इस्राएलमि बारो कुलसोक्पेॽ न्याय ले़न्डानुमे। 29असा असे़ॽ के़ए़ लागि टाङ्बामि, वावानिसाजि, नानाजि, पाबा मामाजि, पसाजि, रोपा, खिम, सोङ्रा याःॽयोटुजे, मोसे़ॽ मोमि सये गुना चुप्मिन्डुएनुङ ए़ॽसिमे हिङ्मवामि हक चुप्मिन्डुए। 30तर आयु पोम्बेॽ टुघुबा याॽमिजि, मोडोक्पेॽ ए़क्साङ सिॽइम्मे, मोबा आयु ए़ङ्गुवाबेॽ सिॽखुबा याॽमिजि मोडोक्पेॽ पोम्बेॽ सिॽइम्मे।”
Currently Selected:
मत्ति 19: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
