लुका 2
2
येसु टोक्पॽआ खा
(मत्ति १:१८-२५)
1मोडोक्पेॽ रोमि एप्पा हाङ्बा अगस्टसडे़ॽ#२:१ रोमि एप्पा हाङ्बामि निङ खोमि “राज्यबेॽहा चोप याॽमिजिमि निङ साप्मे” लुनुङ हुकुम ले़टु। 2सिरिया ठाउँबेॽ कुरेनियस निङ ले़ःॽखुबा एप्पा मायोङ्बा टुमाबेॽ इगो निङ साप्मे योम्बोक याक्लोएखेॽ लिबॽआ ले़टे़। 3चोप याॽमिजि टाङ्बा टाङ्बामि निङ साप्सिॽ खोजिमि सहर खडामि।
4योसेफसो गालिलमि नासरतबाङ यहुदिया ठाउँमि बेथलेहेम, हाङ्बा दाउदमि सहरबेॽ निङ साप्सिॽ खडा। इन्ढोङ्होङ योसेफ हाङ्बा दाउदमि बङ्सबेॽए ले़टे़। 5योसेफनुङ फुङ्सया ले़ःॽमामि साक्खि राःॽपेबॽआ मरियमसो सोरि चिक्खे़ॽटु। मोडोक्पेॽ मरियम उक्खाइसुम्मा ले़टा। 6खोजि बेथलेहेमबेॽ टुमाबेॽ मरियममि कुम्सुमा लिमे बेला लिसा। 7मोबाङ खोसे़ॽ टुम्मि पसा टोगु, मोबा चेॽटे़ॽ मोम्नुङ पिगे़ॽ खोले चाढाम खोङ्बेॽ इम्मेॽटु। इन्ढोङ्होङ खोजिडे़ॽ चाबाङ खिमबेॽ पोप्ठाम ठाउँ मे़न्चुप्टाजु।
गोठ्लाजिनुङ थाङ्सिरिदुत
8बेथलेहेम सहरमि के़क्पेॽनोॽ सामु गोठ्लाजि सेन्डा खोजिमि सामुजि हुङ्साङ पेम्मे़ॽनिङ्सिडामि। 9मोडोक्पेॽनोॽ परभुमि इक्को थाङ्सिरिदुत मोबेॽ खाङ्मुसा, मोडोक्पेॽनोॽ परभुमि उज्यालो माहाजिमि किॽयु मिॽयु पोगा, इगो खाङ्नुङ गोठ्लाजि बेॽलो किस्सिसामि। 10तर थाङ्सिरिदुतडे़ॽ माहाजि लुसुजि ए़क्किसिसानिङे, “का चोप याॽमिजिमि लागि सारोनोॽ हाङ्हाङ्मि सुसमाचार खेम्मेॽसिॽ लेङ्इटिङे, मो चोप याॽमिजिमि लागि नुबा ले़ये। 11आयु दाउदमि सहरबेॽ हे़निङ मुक्ति पिघुबा हाङ्बा खिरिस्ट टोॽइटे़। खोनोॽ परभु ले़ये। 12हे़निङ्मि लागि चिङ्गा चाहिँ इडोक्मा लिये, इक्को ओङे़क चेॽटे़ॽ मोम्नुङ पिक्मि खोले चाढाम खोङ्बेॽ इम्मेॽपॽआ चुप्मिन्डानुमे।” 13मोडोक्पेॽनोॽ हाइखा बेॽलो थाङ्सिरि दुतजिमि इक्को हुल मोबेॽ लेस्सामि। माहाजिडे़ॽ निवाहाङ्मि ओहाङ ले़ःॽसाङ इडोॽ लुसुजि,
14“चोप्पाङ मिन्डु थाङ्सिरिबेॽ पेङ्घुबा निवाहाङ्मि ओहाङ
मोबा मक्खाम्डेमबेॽ हाम्भा याॽमिजिनुङ निवाहाङ साप्थाङ्इये खोजिडे़ॽ सान्ति चुप्टुजिरो।”
15थाङ्सिरिदुतजि खोजिबाङ टेघे़ॽनुङ ए़क्साङ, गोठ्लाजि काबुगामि, “लो निवाहाङ्डे़ॽ थाङ्सिरिदुतजिबाङ लुबॽआ खा खाङ्सिॽ बेथलेहेमबेॽ खे़ॽमा।” 16माहाजि चान्डो चान्डो पिङ्खडामि। मोबेॽ पिगे़ॽ खोले चामे खोङ्बेॽ चेॽटे़ॽ मोम्नुङ इम्मेॽपॽआ इक्को ओङे़कनुङ खोम्बा योसेफनुङ खोम्मा मरियम चुप्टुजि। 17थाङ्सिरिदुतजिडे़ॽ ओङे़कमि टुम्बेॽ गोठ्लाजि लुबॽआडोक्हा चोप खा खाङ्डोक्नुङ गोठ्लाजिडे़ॽ याॽमिजि लुबेॽटुजि। 18गोठ्लाजिडे़ॽ लुबॽआ इघा खा खेम्घुबा चोप याॽमिजि खरि मिनामि। 19तर मरियमडे़ॽ इघा चोप खा खेम्नुङ निवाबेॽनोॽ युक्सु। 20थाङ्सिरिदुतजिडे़ॽ लुबॽआडोक्नोॽ चोप खाङ्डोक्पॽआसे़ॽ गोठ्लाजि निवाहाङ्मि ओहाङ ले़ःॽसाङ टेसामि।
ओङे़कमि निङ येसु युङ्बॽआ
21ओङे़क टोक्पॽआ आक्चि याकपेॽ खतना#लेबिजि १२:३; लुका १:३१ ले़ःॽमाबेॽ खोमि निङ येसु युङ्बेॽटुजि। इगो निङ मामामि रुङ्माबेॽ खो लेम्मा याक्लोनोॽ थाङ्सिरिदुतडे़ॽ लुबॽआ ले़टे़।
मन्दिरबेॽ येसु
22मोसाडे़ॽ साप्पॽआ यहुदि धारमिक नियमडे़ॽ लुबॽआडोॽ खोजि चोख्याबा लिमे याक पुरा लिसेॽनुङ ए़क्साङ, खोमि पाबानुङ मामे़ॽ ओङे़क पियेॽमामि लागि यरुसलेम मन्दिरबेॽ लाजे़डाजु। 23निवाहाङ्मि नियमबेॽ इडोॽ साप्पॽआ ले़हा, “चोप टुम्मि पसाजि निवाहाङ्मि लागि पबित्रा लिम्मे।”#परस्थान १३:२,१२ 24मोनुङ सोरि निवाहाङ्मि नियममि नेॽचिराडे़ॽ लुबॽआडोॽ चोखो लिमे याक निच्चि सिरिॽवामि पसाहोङ्सो उख्रिॽवामि पसाहोङ्सो भोग पिमा खडे़#लेबिजि १२:२ ।
25मोडोक्पेॽ सिमियोन निङ ले़ःॽखुबा याॽमि यरुसलेमबेॽ पेने़। खो धरमि ले़टे़, निवाहाङ्मि खा नुरोॽ खेम्खुबा ले़टे़। खोसे़ॽ इस्राएलिजि मुक्ति पिघुबा इक्को याॽमि ले़ङ्इये लुनुङ राम खाङ्मे़ॽनिङ्सिडुए। खोनुङ पबित्रा होङ्निवा टुसे़। 26“परमपरभुमि छुट्कारा पिघुबा हाङ्बा खिरिस्ट मे़ङ्खाङ्लेॽ हे़न सिघे़ॽनिबा” लुनुङ पबित्रा होङ्निवाडे़ॽ खो याक्लोनोॽ लुबॽआ ले़टे़। 27सिमियोन पबित्रा होङ्निवाडे़ॽ लुबॽआसे़ॽ खो मन्दिरबेॽ खडा। निवाहाङ्मि नियमबेॽ इडोॽ साप्पॽआ ले़ये, मोडोक्पेॽनोॽ योसेफनुङ मरियमसो ओङे़क येसु खिमानुङ मोबेॽ लेस्साजि। 28मोबा सिमियोनडे़ॽ ओङे़क हुकपेॽ ठेॽनुङ निवाहाङ ओहाक पिसाङ लुसु,
29“हे परभु, आम्मि हेन्ज्रुङ काबेॽ पुरा ले़पेटुए। हागो हे़ने़ए़ सेउते सान्तिनुङ बिदा पिमा।
30इन्ढोङ्होङ आयु के़ए़ मिगे़ॽ, हे़ने़ॽ पाङ्बॽआ मुक्तिदाङ्बा खाङ्डोक्इटुङे।
31खो चोप जातिहा याॽमिजिडे़ॽ खाक्सुजिरो लुनुङ पाङ्इटुए।
32खोनोॽ अयहुदि जातिहा याॽमिजि हे़ने़ए़ राम खाङ्मेॽखुबा जोति ले़ये। खोसे़ॽनोॽ हे़ने़हा इस्राएलि याॽमिजिमि महिमा ले़ःॽमेन्डुए।”
33ओङे़कमि टुम्बेॽ सिमियोनडे़ॽ लुबॽआ खा खेम्नुङ खोमि पाबा मामा खरि मिनाजि। 34सिमियोनडे़ॽ खोजि आसिरबाद पिनुङ ओङे़कमि मामा लुसु, “खेप्से, इस्राएलबेॽहा बेॽलो याॽमिजि छुट्कारा ले़ःॽमामि अथबा नासि ले़ःॽमामि निवाहाङ्डे़ॽ हे़ने़ए़ पसानोॽ सेङ्इटुए, खो चाहिँ निवाहाङ्डे़ॽ खाङ्मेॽपॽआ चिङ्गा ले़ये, खो बेॽलो याॽमिजिडे़ॽ बिरोध ले़ःॽसाङ खोजिमि निवाहोङ्सिॽयुहा खा इःन्डुजे। 35मोबा हे़ने़ए़ निवा चाहिँ चुजुमा फेयाडे़ॽ खाक्पॽआडोॽ लिनुङ खेःडे़ॽ टिप्मिन्डुए।”
36मन्दिरबेॽ इक्को हन्ना निङ ले़ःॽखुबा टुमा अगमबानि इघुबा ले़टे़। खो आसेर बङ्समि फानुएलमि सम्समा पसा ले़टे़। खोमि फुङ्सया लिबॽआ एच्चि निङ्बेॽनोॽ ठाॽपा सिघे़ॽनुङ राङ्मिॽमा लिबॽआ ले़टे़। 37मोडोक्पेॽ खो चाउरासि निङ याक्खे़ॽपॽआ ले़टे़। खो मन्दिरबाङ हाम्बेॽसो मे़ङखाडे़, खोसे़ॽ मे़न्चारेॽ निवाहाङ्नुङ सानिङ पारथना ले़ःॽसाङ सेन्डा लेन्डा ओहाङ ले़टुए। 38खोसे़ॽसो मरियमनुङ योसेफमि के़क्पेॽ लेन्नुङ निवाहाङ ओहाक पिसु, मोबा यरुसलेम छुट्कारा ले़ःॽखुबामि राम हुङ्घुबा चोप याॽमिजि ओङे़कमि टुम्बेॽ इःबेॽटुजि।
39परभु निवाहाङ्मि नियमडे़ॽ लुबॽआडोॽ चोप बिधि ले़ःॽसे़ॽनुङ मरियमनुङ योसेफ येसु चिक्मानुङ टाङ्बामि सहर नासरत टेखडाजि। 40ओङे़क येसु हिङानुङ निवाबेॽ वाबुगा मोबा निवाहाङ्मि अनुग्रहा खोबेॽ टुसा।
मन्दिरबेॽ ओङे़क येसु
41येसुमि पाबा मामा सानिङ्नोॽ छुट्कारामि चाड मनाबा ले़ःॽसिॽ यरुसलेम खडाजे। 42येसु इक्पोङ निनिङ लिमाबेॽ खोमि पाबा मामा छुट्कारामि चाड मनाबा ले़ःॽसिॽ यरुसलेम खडाजि। 43चाड मनाबा ले़ःॽसेॽनुङ मरियमनुङ योसेफ खिम टेघडाजि, तर येसु चाहिँ यरुसलेमबेॽनोॽ पेङ्यगा, मो खा खोम्बा खोम्मे़ॽ मे़लेसाजु। 44खोजिडे़ॽ मिॽटाजु येसु रामबेॽ राम्खुबा खोसे़हा लङ्गामजिनुङ टुये मिॽनुङ खोजि लेल्ले राप्साजि। युडारेॽनोॽ लङ्गामजिनुङ टाङ्बाङ्जिनुङ योगाजु। 45पसा हाम्बेॽसो मे़न्चुप्पॽआसे़ॽ खोजि फेरि येसु योक्सिॽ यरुसलेमनोॽ टेसाजि। 46पसा योक्मे़ॽ योक्मे़ॽ सुम याकबेॽरेॽनोॽ खोजिमि पसा मन्दिरबेॽ चुप्टाजु। खो यहुदिजि सिक्छे इःक्खुबाजिनुङ खोजिमि खा खेम्साङ, सिम्साङ पेम्मे़ॽनिङ्सिडा। 47खोमि निवानुङ खोसे़ॽ इःबॽआ खा खेम्नुङ चोप याॽमिजि खरि मिनामि। 48इडोॽ खोजिमि पसा मोबेॽ चुप्माबेॽ खोजि खरि मिनाजि। मरियमडे़ॽ सिप्सु, “नानि, हे़ने़ॽ इन्ढोङ्डे इडोॽ ले़ए़टे़ ? खाक्से, आम्बानुङ का हे़न योक्माबा सिजाखे़ॽचिङे!” 49येसुडे़ॽ खोम्बा खोम्मा लुसुजि, “हे़न्जिङेॽ इन्ढोङ का योॽइन्जे ? का काङ्मि पाबामि खिमबेॽ पेम्मा खे़ये लुमे खा लेसाजुने ?” 50तर येसुडे़ॽ लुबॽआ खा मरियमनुङ योसेफडे़ॽ मे़लेसाजु। 51मोबा येसु पाबा मामाजिनुङ नासरतबेॽनोॽ टेघडा। खोजिडे़ॽ लुबॽआ चोप योम्बोक ले़ःॽसाङ पेना। खोम्मा मरियमडे़ॽ माहा चोप खा निवाबेॽनोॽ युक्सु। 52येसु चाहिँ निवाहाङ्मिनुङ याॽमिमि अनुग्रहाबेॽ निवानुङ हिङाबेॽ वाबुक्साङ खडा।
Currently Selected:
लुका 2: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
