लुका 1
1
1आदर ले़ःॽमारोमा थियोफिलस ज्यु, बेॽलो याॽमिजिडे़ॽ कानिङ्मि रुम्बेॽ येसुमि टुम्बेॽ लिबॽआ खा बेॽलो याक्लोएबाङ साप्खुबाजिडे़ॽ साप्मे योम्बोक खोजिडे़ॽ ले़ए़टुजे। 2माहा चोप लिबोक्पॽआबाङ खोजिमिन्नोॽ मिगे़ॽ खाङ्खुबाजिनुङ इगोमि टुम्बेॽए सुसमाचारमि खा खेम्मेॽखुबाजिडे़ॽ लुटुजे। 3आदरनिया थियोफिलस ज्यु, के़ॽसो इघा खामि टुम्बेॽहा खा याक्लोएम्बाङ्नोॽ नुरोॽ योक्नुङ नेॽसाङ मेलोइडे़ॽ साप्माबेॽनोॽ नुबा लिइ मिॽनुङ इगो हे़ने़ए़ लागि साप्मे़ॽनिङ्सिनुङे। 4इन्ढोङ्होङ इघा के़ॽ साप्पॽआ खा नेॽमाबेॽ हे़न इःॽपॽआ खा चाइबमा ले़येले़ लुनुङ लेहेन्डुए।
बप्तिस्मा पिघुबा युहन्ना टोक्मे खा याक्लोनोॽ इःबॽआ
5यहुदियाबेॽए हाङ्बा हेरोदमि पालोबेॽ इक्को जकरिया निङ ले़ःॽखुबा याडाङ्बा टुसे़। खो अबिया याडाङ्बा हुलबेॽए याडाङ्बा ले़टे़। खोमि बनिमा हारुन-बङ्सबेॽए ले़टे़#१:५ हरुन चाहिँ यहुदि जातिबाङ याक्लोए एप्पा याडाङ्बा ले़टे़। १ इतिहास २४:१० । खोमि निङ एलिसिबा ले़टे़। 6खोजि निप्पाङ्नोॽ निवाहाङ्मि पोम्बेॽ धरमि ले़टाजे। खोजि निवाहाङ्डे़ॽ लुबॽआ चोप आग्या इक्कोसो मे़मिन्डेॽरेॽ पालना ले़टाजुए। 7एलिसिबा सारुक्मा ले़टेन्से़ॽ खोजिमि पसाजि माॽआडामि। खोजि सानुङ्गामनोॽ ठाॽपा ठाॽमा लिघे़ॽपॽआ ले़टाजे।
8इक्खेॽ जकरिया खोमि हुलमि पालोडोॽ खो निवाहाङ्मि पोम्बेॽ याडाङ्बामि योम्बोक ले़ःॽमे़ॽनिङ्सिडा। 9याडाङ्बाजिमि चलनडोॽ चिट्ठा ए़म्माबेॽ थानाबेॽ धुपा इक्मे पालो जकरियामि सिॽटा। मोडोगे़ॽ खो मन्दिर होङ्सिॽयु धुपा इक्सिॽ खडा। 10धुपा इक्मे बेलाबेॽ मन्दिर ओम्फिॽयु हाइखा बेॽलो याॽमिजिसो निवाहाङ्नुङ पारथना ले़ःॽमे़ॽनिङ्सिडामि। 11इडोॽ जकरियाडे़ॽ धुपा इक्मे़ॽनिङ्सिमाबेॽ इक्को थाङ्सिरिदुत थानामि चुप्थिङ्लाम येःप्टिङ्बॽआ खाङ्मुसा। 12जकरिया मो थाङ्सिरिदुत खाङ्डोक्नुङ बेॽलोनोॽ किस्सिडा। 13तर थाङ्सिरिदुतडे़ॽ खो लुसु, “जकरिया, ए़क्किसिने, निवाहाङ्डे़ॽ हे़ने़हा पारथना बिन्ति खेम्इटुहा। मोडोगे़ॽ हागो हे़ने़ए़ खिमदाङ्मे़ॽ इक्को पसा टोॽइन्डुए। हे़ने़ॽ खोमि निङ युहन्ना युङ्मे। 14मोडोक्पेॽ हे़न्जिङ बेॽलो साप्थाङ्इन्जेनुङ हाइखा याॽमिजिसो मो ओङे़क टोक्माबेॽ बेॽलो साप्थाङ्इम्मे। 15इन्ढोङ्होङ हे़ने़ए़ मो पसा निवाहाङ्मि पोम्बेॽ महान लिये। खोसे़ॽ इन्डोक्पेॽसो इनुङ टोप्टे़ॽवा उक्सुनिहा। खो टोक्पॽआ याकबाङ्नोॽ निवाहाङ्मि पबित्रा होङ्निवामि सक्तिडे़ॽ खो अधिन ले़न्डुए। 16खोसे़ॽ इस्राएलबेॽहा बेॽलो जातिहा याॽमिजि परभु निवाहाङ्मि रामबेॽ टेआप्मिन्डुजे। 17खो एलियाडोक्नोॽ सक्तिदाङ्बानुङ निवानुङ्मा लिये, परभुमि लागि राम पोरोक्इन्डुए। खोसे़ॽ पाबानुङ पसाजिमि रुम्बेॽ निवा टोङ्इन्डुए मोबा निवाहाङ्मि खा खेम्खुबा याॽमिजिडे़ॽ राम्ढाम नुबा रामलाम कोआप्मिन्डुजे। इडोॽ खोसे़ॽ निवाहाङ्मि याॽमिजि खोमि लागिनोॽ पोरोक्इन्डुजे#मलाकि ४:५-६ ।”
18मोबा जकरियाडे़ॽ थाङ्सिरिदुत लुसु, “इगो खा के़ॽ इन्डोक्टे लेहेमे ? इन्ढोङ्होङ काजिङ सानुङ्गामनोॽ ठाॽपा ठाॽमा लिघे़ॽचिङे।” 19थाङ्सिरिदुतडे़ॽ लुसु, “का निवाहाङ्मि योम्बोक ले़ःॽखुबा गाब्रिएल ले़ङे। निवाहाङ्डे़ॽनोॽ का इगो नुबा लम्बवाँ हे़न खेम्मेॽसिॽ पाङ्इटिङे। 20के़ॽ लुबॽआ खा पुरा मे़लिरोठोक हे़न यामुहेनिबा। इन्ढोङ्होङ हे़ने़ॽ के़ॽ लुबॽआ खा बिस्वास मे़ले़टु। मो बचन खोमि बेलाबेॽ पुरा लिये।”
21हाइखा याॽमिजि मन्दिरमि ओम्फिॽयु जकरिया हुङ्मे़ॽनिङ्सिडामि। खो ढिलो ले़ःॽपॽआसे़ॽ खरि मिम्मे़ॽनिङ्सिडामि। 22जकरिया पाखे़ॽयु आप्माबेॽ याॽमिजिनुङ खो मे़यामुहेसा। मोडोगे़ॽ मन्दिर होङ्सिॽयु सेन्जिसेम्माङ चुप्मिटु लुनुङ माहाजिडे़ॽ लेसुजि। मोबा खो मे़यामुहेबॽआसे़ॽ पाखे़ॽयुहा याॽमिजि हुगे़ॽ टाःगुजि।
23जकरियामि धुपा इक्मे पालोमि योम्बोक येॽनुङ खोमि खिमबेॽ खडा। 24मोबा ए़क्साङ एलिसिबा उक्खाइसुम्मा लिसा, खो ङाउम महिनाडोॽ हाम्बेॽसो मे़ङ्खे़ॽलेॽ खिमबेॽनोॽ पेना। 25एलिसिबाडे़ॽ लुसु, “इगो महान योम्बोक काङ्मि लागि परभु निवाहाङ्डे़ॽ ले़पेटिङे। खोसे़ॽ का नम्नम ले़ःॽनुङ याॽमिजिडे़ॽ सिःक्चामाबाङ जोगा ले़ए़टिङे!”
येसु टोक्मे खा
26एलिसिबा उक्खाइसुम्मा लिबॽआ चुक्चि महिना लिमाबेॽ निवाहाङ्डे़ॽ खोमि दुत गाब्रिएल गालिलबेॽए नासरत सहरबेॽ पेङ्घुबा इक्को फुङ्सया मे़ले़ःॽपॽआ राङ्मिॽ पिच्छा मरियमबेॽ पाक्सु। 27खो इक्को कन्या राङ्मिॽ पिच्छाबेॽ खडा, मो पिच्छा दाउद हाङ्बामि बङ्सबेॽए योसेफनुङ साक्खि राःप्पेबॽआ ले़टे़। मो पिच्छामि निङ मरियम ले़टे़।
28थाङ्सिरिदुतडे़ॽ मो राङ्मिॽ पिच्छाबेॽ लेन्नुङ लुसु, “सेवा मुसुङ यो, मरियम! परभु निवाहाङ्डे़ॽ हे़न बेॽलो नम्नावा ले़ए़टे़नुङ निवाहाङ हे़न्नुङ टुये।” 29थाङ्सिरिदुतडे़ॽ लुबॽआ खा मरियमडे़ॽ मे़ले़हेसु, इगो इन्डोक्मा सेवाडे लुनुङ निवाबेॽ मिडु। 30मोबा थाङ्सिरिदुतडे़ॽ लुसु, “मरियम ए़क्किसिने, हे़ने़ॽ निवाहाङ्बाङ बेॽलो नम्नावा चुप्मिटुए। 31हागो खेप्से, हे़न उक्खाइसुम्मा लिये मोबा हे़ने़ॽ इक्को पसा टोॽइन्डुए। मोमि निङ येसु युङ्मे़। 32खो महान लियेनुङ निवाहाङ्मि पसा लुन्डुजे। परभु निवाहाङ्डे़ॽ खोमि टुबा दाउदडोॽमानोॽ हाङ्बा टोङ्इन्डुए। 33खोसे़ॽ याकुबमि बङ्सजिबेॽ सानिङ्नोॽ राज्य ले़न्डुए। खोमि राज्य इन्डोक्पेॽसो रुक्खे़ॽनिबा।” 34मो खा खेम्नुङ मरियमडे़ॽ थाङ्सिरिदुत लुसु, “कागो कन्यानोॽ ले़ङे, इन्डोक्टे इगो खा लिहेये ?” 35मो थाङ्सिरिदुतडे़ॽ लुसु, “निवाहाङ्मि पबित्रा होङ्निवा हे़नबेॽ लेङ्इये, मोबा चोप्पाङ महान निवाहाङ्मि सक्तिमि लावा हे़न सोक्पेॽ सिॽइये मोडोगे़ॽ टोॽइये ओङे़क पबित्रा लियेनुङ खो निवाहाङ्मि पसा लुये। 36फेरि खेप्से, हे़ने़ए़ टाङ्बाङ एलिसिबासो उक्खाइसुम्मा लिटे़। खोगो याॽमिजिडे़ॽ सरुक्मा लुसुजे। खो पाको पिॽखे़ॽपॽआ होङ्सो खोसे़ए़ रुङ्माबेॽ चुक्चि महिनामा ओङे़क टुये। 37इन्ढोङ्होङ, निवाहाङ्डे़ॽ मे़ले़ःॽहेमे योम्बोक इमाङ्सो माॽआये।” 38मोबा मरियमडे़ॽ लुसु, “नुये, का परभु निवाहाङ्मि सेउते ले़ङे, हे़ने़ॽ लुबॽआ खा काबेॽ लिरो।” मोबा थाङ्सिरिदुत मोबाङ खे़ॽपेसा।
मरियम एलिसिबा चुप्सिॽ खे़ॽपॽआ
39इक्याक नियाक ए़क्साङ मरियम चान्डो ले़ःॽसाङ यहुदियामि इक्को खिम्डेमबेॽ खडा। 40मोबा जकरियामि खिमबेॽ रुक्नुङ मरियमडे़ॽ एलिसिबा सेवा मुसु। 41मरियमडे़ॽ सेवा मुमाबेॽ एलिसिबामि रुङ्मा होङ्सिॽयुए ओङे़क अप्सा। मोडोक्पेॽनोॽ एलिसिबामि निवाबेॽ पबित्रा होङ्निवा लेस्सा। 42मोबा एलिसिबाडे़ॽ बेॽए सेम्ले़ॽ लुसु, “मेॽनामिॽचिबेॽ हे़न चोप्पाङ बेॽलो आसिस चुप्खुबा ले़ये, हे़ने़ॽ आसिसनुङ्मा ओङे़क टोॽइन्डुए।
43“का असा ले़टिङे ? के़ए़ परभुमि मामा लिनुङ्सो का चुप्सिॽ ले़ङ्इटे़ ? 44इन्ढोङ्होङ हे़ने़ॽ का सेवा मुबॽआ खेम्नुङ के़ए़ रुङ्माहोङ्सिॽयु ओङे़क साप्थाङ्मानुङ अप्सा। 45परभु निवाहाङ्डे़ॽ हे़न लुबॽआ खा चइबानोॽ पुरा लिहा लुनुङ बिस्वास ले़ःॽखुबा, हे़न इन्डोक बेॽलो आसिस चुप्खुबा मेॽनामिॽ ले़ये।”
मरियममि ओहाङ सेम्लुमा
46मोबा मरियमडे़ॽ लुसु,
“काङ्मि सोःक्माडे़ॽ परमपरभुमि ओहाङ ले़नुङे।
47मोबा का मुक्ति पिघुबा निवाहाङ्नुङ के़ए़ निवा बेॽलो साप्थाङ्इटे़।
48इन्ढोङ्होङ काडोक्मा इनाःमे मेॽनामिॽसो खोसे़ॽ नम्नावा ले़टिङ।
“हागोएम्बाङ चोप याॽमिजिडे़ॽ का आसिस टोक्पॽआ मेॽनामिॽ लुम्मे।
49इन्ढोङ्होङ खो सक्तिदाङ्बा निवाहाङ ले़ये, खोसे़ॽ काङ्मि लागि बेॽए योम्बोक ले़ःॽपेटुङे,
निवाहाङ्मि निङ पबित्रा ले़ये।
50मोबा निवाहाङ्मि आदर ले़ःॽखुबाजि खोसे़ॽ पुस्ता-पुस्ताडोक्लो नम्नावा ले़न्डुजे।
51मोबा खोमि सक्तिनुङ्मा हुगे़ॽ निवाहोङ्सिॽयु काङायोङ्बा ले़ःॽखुबाजिमि निवा फेम्बेबेटुजे।
52खोसे़ॽ काङायोङ्बा हाङ्बाजिमि सक्ति ङाप्पेबेटुजे।
तर टाङ्बा ए़डे़म्मा मिॽखुबा याॽमिजि निवाहाङ्डे़ॽ बेॽए याॽमि टोङ्इटुए।
53खोसे़ॽ सगे़ॽ सिबॽआ याॽमिजि नुबा खाडे़ॽ उक्खामेॽटुजि।
तर टाङायोङ्बाजि चाहिँ होप्रे़ॽवा हुक टेहाक्सुजि।
54निवाहाङ्डे़ॽ कानिङ्मि टुबालाबानुङ लुबॽआ खा पुरा ले़ःॽनुङ टाङ्बामि सेवाक इस्राएल सहायता ले़ए़टुए,
55खोसे़ॽ कानिङ्हा टुबालाबाजि लुडिडोक्नोॽ अब्राहामनुङ खोमपसा याङ्मेनजि नम्नावा ले़ःॽमा इन्डोक्पेॽसो मे़मिन्डेडु।”
56मोडोक्पेॽ मरियम सुम महिनाडोॽ एलिसिबानुङ पेन्नुङ मोबाङ खोम खिमबेॽ टेसा।
बप्तिस्मा पिघुबा युहन्ना टोक्पॽआ
57एलिसिबामि कुम्सुमा लिमे याक लेस्सा खोसे़ॽ इक्को वडाङ्पसा टोगु। 58परभु निवाहाङ्डे़ॽ इडोॽ बेॽएम्मा नम्नावा एलिसिबाबेॽ ले़ःॽपॽआ खाङ्नुङ खोसे़ॽहा टाङ्बाङ्जिनुङ पेन्लागामजिसो खोनुङ साप्थाक्सामि। 59ओङे़क टोक्पॽआ एच्छि याकपेॽ ओङे़कमि यहुदि चलनडोॽ खतना#१:५९यहुदि वडाङ्पसा ओङे़क टोक्पॽआ इक एच्चि निङ ए़क्साङ सेगुमा सेढाममि टुप्पामि साउक हे़क्मा ले़ःॽमामि याॽमिजि सुप्सामि। मोबा माहाजिडे़ॽ ओङे़कमि निङ खोम्बामिडोक्नोॽ जकरिया युङ्मा योगुजि। 60तर खोम्मे़ॽ माहाजि लुसुजि, “ने़ॽनि इगोमि निङ्गो युहन्ना युङ्मा खे़ये।” 61माहाजिडे़ॽ एलिसिबा लुसुजि, “हे़ने़हा टाङ्बाङ्जिबेॽको इडोक्मा निङ ले़ःॽखुबा असासो माॽआम्मि।” 62माहाजिडे़ॽ ओङे़कमि पाबा कुबा खाप्लाबाङ सिप्सुजि, “हे़ने़ॽ आम्मि पसामि निङ इमाङ युङ्मा मिॽइन्डुए ?” 63जकरियाडे़ॽ साप्ठाम पाटि ङाःक्नुङ, “इगो ओङे़कमि निङ युहन्नानोॽ युङ्मा खे़ये” लुनुङ सबु। मो खा खाङ्नुङ याॽमिजि खरि मिनामि। 64मोडोक्पेॽनोॽ जकरिया याक्लोडोक्नोॽ यामुबुगा मोबा निवाहाङ्मि ओहाङ ले़पोगु। 65माहा चोप खा खाङ्नुङ पेन्लागामजिसो खरि मिन्साङ निवाहाङ्नुङ किस्सिडामि। मोबाङ यहुदियामि चोप सुम्लाखानुङ खिम्डेमराजि मो खा मुक्खडा। 66इडोक्मा खा खेम्घुबा चोप याॽमिजि निवाबेॽ लुसुजि, “इगो ओङे़क हाइक्याक इन्डोक्मा लिये होला” इन्ढोङ्होङ खोसोक्पेॽ परभु निवाहाङ्मि सक्ति टुये।
जकरियाडे़ॽ निवाहाङ्मि ओहाङ ले़टु
67युहन्नामि पाबा जकरियाबेॽ पबित्रा होङ्निवा लेन्नुङ अगमबानि इःबोगु।
68“इस्राएलिजिमि परभु निवाहाङ्मि ओहाङ यो। इन्ढोङ्होङ खो लेङ्इटे़, टाङ्बामि याॽमिजि छुट्कारा पिटुजे!
69खोसे़ॽ टाङ्बामि सेउते दाउदमि बङ्सबाङ छुट्कारा पिघुबा सक्तिदाङ्बा मुक्तिदाङ्बा टोङ्इटुए।
70-71खोसे़ॽ इगो खा उहिलेबाङ्नोॽ टाङ्बामि पबित्रा अगमबक्ताजिमि याबुकबाङ लुबॽआ ले़टे़।
72हागो खोसे़ॽ कानिङ्हा टुबालाबाजि नम्नावा ले़ःॽमामिनुङ खोजिनुङ हुप्पॽआ पबित्रा हेन्ज्रुङ मिॽनुङ कानिङ नम्नावा ले़ए़टे़।
73मो हेन्ज्रुङ कानिङ्मि टुबा अब्राहामनुङ निवाहाङ्डे़ॽ हुप्पॽआ ले़टे़।
74मोबा कानिङ्मि सतुरजिमि हुकबाङ छुट्कारा ले़ये।
75मोबा कानिङ मे़ङ्किस्सिरेॽ खोमि पोम्बेॽ हिङ्मवा इॽठुप पबित्रानुङ धारमिक लिनुङ खोमि पोम्बेॽ सेवा ले़ःॽहेन्डुङ्मे।
76हागो होउ के़ए़ पसा, हे़न महान अगमबक्ता लिये। इन्ढोङ्होङ हे़न परभुमि राम पोरोक्मामि खोबाङ याक्लो याक्लो खे़ॽए़ये।
77मोबा ‘पापबाङ आम्लाङ चुप्नुङ मुक्ति चुप्मिन्डानुमे’ लुमे खा हे़ने़ॽ परभुमि याॽमिजि इःन्डुजे।
78कानिङ्मि निवाहाङ् किरपानुङ्मा, नम्नावानुङ्मा ले़ये। मोडोगे़ॽ खोसे़ॽ छुट्कारामि उज्यालो थाङ्सिरिबाङ कानिङ्बेॽ हाङ्बेॽये।
79मोबा सेन्जुगुपबेॽ पेङ्घुबाजिनुङ सिसिॽपोरोक्पॽआ याॽमिजि हिङ्मवामि उज्यालो पिन्डुजे। मोबा मो उज्यालोडे़ॽनोॽ कानिङ सान्तिमि रामबेॽ राम्मराप्मिये।”
80युहन्ना हिङाबेॽनुङ निवाबेॽ वाबुगा। मोबा इस्राएलिजिमि रुम्बेॽ परचार तरिक्मा याक्लो, खो रे़क्रे़क्मा ठाउँबेॽनोॽ पेना।
Currently Selected:
लुका 1: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
