सेगुम्पाक 22
22
1“ओ आप्पा-आमा, आफुआनुन्छाचि, काबे आप्दिक एम्माहा चेॽया इहाचा म्मायान होङ्चा का इजाङ् आप्दिक एन्दाहा? ङ्खा चेॽयागा उतुम्बे न्निङ्दा उचुन लुम्मेॽनेनिन्हा, हाकु आचेॽया उचुन खेप्सानुम॥”
2खाॽला पावाल हिब्रु चेॽयाबे चेक्ताना ङ्खेप्सुहोङ् झान घाक स्वाक ङ्वाया॥ न्हाङ् पावालङा ङ्खाचि खाॽला लुचि, 3“का किलिकियागा टार्सास साहारबे वाम लेक्साना याहुदिङान, ङ्खाॽनिङ्गो का नाबे यारुसालेमबेॽमाङ् चिन्खुबा गामालिएलगा चेला लेक्साङ्होङ् पुसाङ्॥ एङ्गा पुर्खाभाङ् ङ्येनुक्तुहा धार्मासाप्लाबेॽहा चेॽया का उचुन चिन्दामाङ्॥ हेन न्निङ्दा निङ्वाफुमागा सेवा चोक्माबे इखिङ् प्याक निङ्वा पिक्सुम्गा, का चा ङ्खाॽला निङ्वा पिखुबा याॽमि सायाङ्॥#सेगुम्पाक ५:३४-३९ 4का हाङ्बागा लाम्बुबे लाम्खुबाचि न्सिनुङ् सोम्मा तुखि पिङ्चिङ्॥ न्हाङा बाबु-मामुचि लाबुङ्चिङ्होङ् छेक्पाङ्बे छेक्तुङ्चिङ्॥ 5खा का लुॽनेनिन्हा चेॽया जेप्पा ओमभोङ् खाङ्खाङ् हाङ्खुबा नुङ् माछुम्माबेॽहा घाक याॽमिचिङा चा कामा ङ्यामेहा॥ उङ्चिङामाङ् का दामास्कासपे वाखुबा याहुदि फुनुन्छाचि लाप्मागा चोक्तोक पियाना छेप्फा पिया॥ न्हाङा येसुबे बिस्वास चोक्खुबा न्नाबेॽहा फुनुन्छाचि लाप्साङ् यारुसालेमबे ताॽमाचिहोङ् दान्डा पिॽमागा का दामास्कासपे ख्याङ्॥#सेगुम्पाक ८:३; २६:९-११
6“दामास्कास तासेहेक्सुक्साङ्निङ् लेन्लुम लेक्सामासा॥ ङ्खिङ्बेला ताङ्खेङ्भाङ् थाप्थुम्बे छेरेरेङ्ना जोति आका ओरिपोरि चाम्काचोगा॥ 7न्हाङा का खामबे काक्कुलिक काक्साख्याङ्, ङ्खिङ्बेला का खाॽलाना एको सेम्ला खेप्सुङ्, ‘साउल! ओ साउल! का इजाङ् तुखि पिमेङ्गाना?’
8“न्हाङ् का छिम्दुङ्, ‘ओ हाङ्बा, न्दा इसागान?’ उङा काया, ‘न्दा तुखि पिॽमासिम्मेकाना, नासारातपेॽना येसु कामाङ् ओम्ङान॥’ 9न्नाबे कानुङ् सोरि लाम्खुबा याॽमिचिङा ओम्ना जोति च्हेन न्निसु, ङ्खाॽनिङ्गो कानुङ् चेक्खुबागा चेॽया च्हेन ङ्ङासुनिन॥
10“का फेरि छिम्दुङ्, ‘हाङ्बा, हाकु का इ चोक्ङा?’ हाङ्बाङा लुयाङ्, ‘पोगाघोङ् दामास्कास साहारबे ख्या, न्हाङा न्नाबे न्दा चोक्माहा कामगा उतुम्बे न्लुम्मेकाना॥’ 11न्ना चाम्काचोगाना ओम्नाङा आमिक लेक्तुचोचिहोङ् का आमिक मेनिखुबा लेक्साङ्॥ न्हाङामाङ् कानुङ् सोरि लाम्खुबा आका काम्निभाकचिङा आमुकपे लाबाहोङ् दामास्कासपे तामेता॥
12“न्ना साहारबे हानानिया बाङ्ना एको याॽमि वाया॥ उङ् मोसाङा पिचिहा ब्यावास्था येन्खुबा धार्मोति याॽमि साया, न्हाङ् न्नाबे वाखुबा घाक याहुदिचिभाङ् उङा आदार तोक्तुक्सा॥ 13न्ना याॽमि का वायाङ्ना ठोङ्बे तायाहोङ् आयुम्बे येप्साङ् खाॽला काया, ‘ओ आनुन्छा साउल, न्दा फेरि निमा याखुबा लेक्सा॥’ उङा खाॽला कायाना सोलोक का निमा याखुबा लेक्साङ्, न्हाङ् उङ् निसुङ्॥
14“न्हाङा उङा लुयाङ्, ‘न्दा एङ्गा पुर्खाचिगा निङ्वाफुमागा निङ्वा आमा यासुगानि भोङ्माङ् उङा न्दा सेगामागा॥ न्दा धार्मोति सेवाक येसु निमा तोक्तुगा न्हाङ् उङा चेक्तुहा चेॽया चा खेम्मा तोक्तुगा॥ 15इजाङ्बाङ्निङ् न्दा उका साचि लेङ्मेकाहोङ् न्दा निसुघा नुङ् खेप्सुघा चेॽया घाक याॽमिचि खेम्मेत्वाचिघा॥ 16न्हाङामाङ् हाकु इना कुस्वागाना? पोगाघोङ् बाप्तिस्मा लियाचोगु, न्हाङ् उका उनिङ्बे बिस्वास चोगुघोङ् ङ्गा पापभाङ् सुद्दा लेक्सा॥’
17“न्हाङा का न्नाभाङ् यारुसालेमबे लासाख्याङ्होङ् निङ्वाफुमापाङ्बे पार्थाना चोक्मास्याङ्निङ् एको सेन्चि तोक्तुङ्॥ 18सेन्चिबे हाङ्बाङा का खाॽला लुॽमास्याङ्ना निसुङ्, ‘यारुसालेमभाङ् हानि खेब्या, इजाङ्बाङ्निङ् न्दा आका उतुम्बे पिचिघा गाबाहि नाबेॽहा याॽमिचिङा ङ्खेप्स्वानिन्हा॥’
19“न्हाङा का उङ् लुङ्, ‘ओ हाङ्बा, का घाक याहुदि छुम्पाङ्चिबे ख्याङ्होङ् न्दाबे बिस्वास चोक्खुबाचि लाबुङ्चिङ्होङ् छेक्पाङ्बे छेक्तुङ्चिङ्हा नुङ् मोक्तुङ्चिङ्हा चेॽया ङ्खाचि घाकङा था वान्ने॥ 20ङ्गा साचि पिखुबा स्तिफानास हेलि-हेलि न्जोगुहोङ् न्सिसुनिङ् का चा न्नाबेॽमाङ् वायाङ्॥ न्हाङा उङ् सिखुबाचि पोटि केक्साङ्होङ् ङ्खाचिगा तेक कुसाङ् युङामासाङ्॥’#सेगुम्पाक ७:५८
21“न्हाङा हाङ्बाङा का लुयाङ्, ‘न्दा ख्या, का न्दा माङ्दु-माङ्दु सोम्मा हेकोहा जातिचिगाबे पाङ्मेॽनेन्ना॥’”
22खिङ् लुचिनुङ् सोम्मा याॽमिचिङा पावालगा चेॽया ङ्खेप्सुक्सा॥ ङ्खाॽनिङ्गो न्हाङ् च्हेन ओक्साङ् ङ्खाचि खाॽला कामा न्दारोक्तु, “ना याॽमि इमिन्होङ्चा सिमाना, हाकु ना ताम्दाङ्फुमाबे हिङ्मा मेम्बिॽमाना॥” 23खाॽला ङ्खाचि तेक छिन्साङ्, ताङ्खेङ्पोटि धुलो लेप्साङ् ङ्ओक्ता॥
पावालङा रोमि नागारिकङान लुचिहा
24खा निसुहोङ् रोमि काङ्बाचिगा माडा याॽमिङा काङ्बाचि वामाना पाङ्होङ्बे खेतुहोङ् “ना याॽमिगा बिरुद्दाबे याहुदिचि इजाङ् ङ्ओक्ताहा ओम?” भोङ् था तोक्मागा कोर्रा एम्माना आग्गे पिचि॥ 25काङ्बाचिङा पावाल कोर्रा एन्मागा न्थुन्धेक्सुसानिङ् पावालङा उका उयुम्बे येप्खुबा केप्टेन खाॽला लु, “रोमि नागारिक इहाचा आप्दिक मेॽनिङ् कोर्रा एम्मा रोमि कानुनङा न्निङ्दा पिइवाघा?”
26खा खेप्सुहोङ् केप्टेन काङ्बाचिगा माडा याॽमिगाबे ख्याहोङ् उङा माडा याॽमि खाॽला लु, “ओ हाङ्बा, खा इचोक्मा सिम्मेकाना? न्दा था वेॽना? न्ना याॽमि गो रोमि याॽमि ले बु!”
27खा चेॽया खेप्सुहोङ् न्ना काङ्बाचिगा माडा याॽमि पाहोङ्बे उयाहोङ् पावाल छिम्दु, “इना न्दा जेप्पा रोमि नागारिक्कान?”
पावालङा लु, “ओम्बा, का रोमि नागारिकङान॥”
28न्ना काङ्बाचिगा माडा याॽमिङा लु, “का गो प्याक याङ् हुङुङ्होङ् रोमि नागारिक लेक्साङ्ना ओम॥”
पावालङा पोलोवा पि, “का गो वायाङ्ना नाहाङ्तोमाङ् रोमि नागारिकङान॥”
29खाॽलाहा चेॽया ङ्खेप्सुहोङ् सोलोक पावाल कोर्रा एम्माहोङ् छिम्मा त्यार लेङ्खुबा याॽमिचिङा उङ् न्नाओहोङ् ङ्ख्या॥ पावाल रोमि नागारिक ओमभोङ् था तोक्तुहोङ् न्ना काङ्बाचिगा माडा याॽमि चा किसिता, इजाङ्बाङ्निङ् उङा पावाल चेक्चिगा साङ्लिङा थुम्मेतुक्साचि॥
पावाल याहुदि माछुम्माबे
30हेक्साङ्ना लेन याहुदिचिङा पावाल इजाङ् आप्दिक ङ्ङेन्दुना भोङ् था तोक्मा मितुहोङ् पावालगा साङ्लि फुक्साहाक्तुबि॥ न्हाङा घाक खाङ्खाङ् हाङ्खुबाचि नुङ् माछुम्माबेॽहा घाक याॽमिचि छुम्माना आग्गे पिचि, न्हाङ् पावाल खेतुहोङ् घाक्का उयुम्बे येप्मेतु॥
Currently Selected:
सेगुम्पाक 22: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
