मरकुस 16
16
येसुजिक पुनरुत्थान
(मति २८:१-८; लुका २४:१-१२; युहन्ना २०:१-१०)
1जब विसरामक दिन वरेलइ, तब मरियम मग्दलिनि, याकुबक दाओ मरियम हसे सलोमि येसुजिक देहियामा लगावेके तहिँया बसान तेल किनलइ, 2हसे यतोरवाक बिहनहिँ हुनुका येसुजिके धरलि चिन्डियामा गेलइ। 3हुनुका पइडवामा हखइखुनि “चिन्डियाक दुवरियामा झपलि पत्थरावा हमार तहिँया कुने होटा देबिय?” कहके एक-दोसरि जनसाङे फदके लगलइ। 4बाकि चिन्डियामा पुगलिसे यागा चिन्डियाक जबडि पत्थरवा होटावल देखलइ, 5हसे चिन्डियाक भितरा पेसके हेरइकि एक जन गोरहर लुगा पेहरल ढोठनिया मन्से चिन्डियाक दहिनिकलहरवा बइठल देखके हुनुका खाँ डेरेलइ। 6बाकि उअ ढोठनियावा मन्सावा हुनुकाके कहलिय, “झिन डेराह, तोहरा क्रुसवामा मारलि नासरतक येसुजिके खोजइ बडह। हुने मरलिसे जियल बडसि! हुने यहवाँ हइने बडसि! हुनेक धरलि ठउरिया हेरह। 7बाकि तोहरा यखनि जाके पतरुस हसे येसुजिक याको चेलवानिके कहदिह कि, हुने तोहार यागा-यागा गालिलमा जाइबडसि। हुनेक कहलि नहिँया तोहरा वहवाँ हुनेके देखबह।”#मति २६:३२; मरकुस १४:२८ 8उहेसे हुनुका चिन्डियासे दगुरते बाहरा निकडलइ हसे ककरहुँके फेनि किहो हइने कहलइ, केहकेकि हुनुका डरेसे दुलदुलाइ रहलइ।
येसुजि चेलवानिक लघिना देखा परलसि
(मति २८:९-२०; लुका २४:१३-५३; युहन्ना २०:११-२३; प्रेरित १:४-११)
9[जब हप्ताक पहिला दिन बिहनहिँ येसुजि मरलिसे जियउठलसि, हुने सबसे पहिला मरियम मग्दलिनि लघिना देखा परलसि। वकरसे येसुजि सात गो दुस्ट-आत्मा निकडोले रहलसि। 10तब मरियम जाके हुनेक चेलवानिके इअ समाद देलिय। तखनहिँ हुनुका विलाप करते कनइ रहलइ। 11जब येसुजि जिउतलसि हसे मरियम हुनेके देखले बडिय कहके सुनलइ, तब हुनुका पतियइवे हइने करलइ। 12वकरपाछा गउँवावरि जाइकि दु जन चेलवानिक लघिना येसुजि छुट्टे रुपमा देखा परलसि। 13जब हुनुका फिरके इअ बतवा दोसरे जनके कहदेलइ, तब हुनुका फेनि हइने पतियलइ। 14वकरपाछा येसुजि एगारह जन चेलवाह जेउना करइखुनि हुनुकर लघिना देखा परलसि। हुनुकर अविस्वास हसे यापन मनवा कठोर पारलेसे येसुजि हुनुकाके घोघटलसि, केहकेकि हुनुका येसुजि मरलिसे जिउतल बडसि कहके याको जनक कहलि बतवामा विस्वास हइने करलइ। 15वकरपाछा येसुजि हुनुकाके कहलसि, “याबे जम्मे संसारमा जाके जम्मे मन्सावानिके सुसमाचार परचार करिह।#प्रेरित १:८ 16जुने विस्वास करके बप्तिस्मा लेसइ उअ उद्धार पउसइ, बाकि विस्वास हइने करलहरा दन्ड पउतइ। 17विस्वास करलहरासाङे इअ यचम्मक चिन्हासभ हतइ, हुनुका मोर नाउँमा भुत-आत्मासभ निस्कोतइ हसे लउठा-लउठा भासासभमा फदकतइ। 18हुनुका यापन हथवासे सपवानिके पकडतइ हसे यगर हुनुका किहो बिख पितइ जउँ, हुनुकर किहो हानि फेनि नाहिँ हतइ। हुनुका मनियइलि मन्सावानिक वपरा हाथ धरले हुनुका डउल हतइ।” 19चेलवानिसाङे फदक सकलेपर प्रभु येसुजि स्वरगमा लिगेलसि हसे हुने परमेस्वरक दहिनिकलहरवा बेठलसि।#प्रेरित १:९-११ 20वकरपाछा चेलवाह जम्मे ठउरियामा जाके परचार करलइ हसे प्रभु हुनुकरसाङे भके काम करलसि हसे यचम्म-यचम्मक चिन्हासभसे हुनेक वचनवाके सत्य ठहरादेलसि।]#१६:९-२० इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्करनमा कोस्ठमा राखल बडइ।
Currently Selected:
मरकुस 16: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
