मरकुस 15

पिलातसक यागा येसुजि

(मति २७:१-२; ११–२६; लुका २३:१-५,१३-२५; युहन्‍ना १८:२८-३८)

1जब बिहान भेलइ मुख्‍य पुजेरियाह समाजक बडकि यगुवासभ, व्‍यवस्‍थाक-गुरुसभ हसे महासभाक जम्‍मे सदस्‍यसभसाङे मिलके सल्‍लाह करलइ हसे येसुजिके बाँन्‍हके रोमक बडकि हकिमवा पिलातसके सपदेलइ। 2तब पिलातस येसुजिके पुछलिय, “कथि तुइ यहुदियानिक राजा हखहि?” येसुजि जवाफ देके कहलसि, “यपनहिँ त वसने कहइ बडहुँ।” 3मुख्‍य पुजेरियाह बहुत बातमा येसुजिक विरोधमा दोस लगोइ रहलइ। 4उहेसे पिलातस हुनेके फेरि पुछलिय, “कथि तुइ यापन बारेमा किहो जवाफ नाहिँ देबहिँ? हेरहि त, हुनुका तोर विरोधमा कतेक दोस लगोइ बडइ।” 5बाकि येसुजि किहो जवाफ हइने देलसि। इअ देखके पिलातसक यचम्‍म लगलइ। 6निस्‍तार-पबनियाक जुनवामा पिलातस मन्‍सावानिक छानलि एक जन कइदिके छाडदिय। 7तखनहिँ देस विरोध काम करके झ्‍यालखनवामा परल याको कइदियानिसाङे बारब्‍बा नाउँक एक जन मन्‍से रहलिय। उअ अन्‍दोलनक समयमा याको जनसाङे मिलके मन्‍से मारले रहलिय। 8उहेसे मन्‍सावाह पिलातसक लघिना याके, “यपनहुँक चलन यनुसार हमार तहिँया एक जन कइदियाके छाड देहुँ” कहके बिन्‍ति करलइ। 9तखनहिँ पिलातस हुनुकाके पुछलिय, “कथि मुइ तोहार तहिँया यहुदियानिक रजवाके छाडदेउ?” 10केहकेकि मुख्‍य पुजेरियाह डाहेसे येसुजिके पिलातस लघिना यनले रहलइ कहके वकर थाह रहलइ। 11बाकि मुख्‍य पुजेरियाह भिडवाक मन्‍सावानिके सुर्‍याके येसुजिक सटटाहामा बारब्‍बाके छाड देहुँ कहके माङ करे लगोलइ। 12तब पिलातस हुनुकाके फेरि पुछलिय, “तोहरा जकरेके यहुदियानिक राजा कहसह, वकरेके मुइ कथि करु कहके तोहरा चाहसह?” 13तखनहिँ हुनुका जबड माहे चिलइते कहलइ, “वकरेके क्रुसवामा टङहुँ।” 14तब पिलातस हुनुकाके पुछलिय, “केहके? इअ कथि अपराध करले बडिय?” बाकि हुनुका झन याको चिलइते कहलइ, “वकरेके क्रुसवामा टङहुँ।” 15उहेसे पिलातस भिडवाक मन्‍सावानिके खुसि पारेके तहिँया बारब्‍बाके छाड देलिय हसे येसुजिके कोडा लगावेके आग्‍या देके क्रुसवामा टाङेके तहिँया सपदेलिय।

सिपहियावासभ येसुजिके गिल्‍ला करलइ

(मति २७:२७-३१; युहन्‍ना १९:२-३)

16वकरपाछा सिपहियावाह येसुजिके पिलातसक प्रेरेटोरियममा#१५:१६ रोमि बडकि हकिमवाक रहना मुख्‍य ठउरिके प्रेरेटोरियम कहसइ। लिगलइ हसे याको जम्‍मे सिपहियवानिके बलोलइ। 17हुनुका येसुजिके जामुक रङक लुगा पेहरा देलइ हसे काँटक मकुट बिनके हुनेक मुडियामा धरदेलइ, 18हसे “यहुदियानिक रजवाक जय हखइ!” कहते सलाम करलइ। 19हुनुका लरकटवासे मुडियामा पिटके हुनेक वपरा थुकलइ हसे ठेहुँनाके हुनेके ढोगलइ। 20यसने हुनुका गिल्‍ला करसकलेपर येसुजिके पेहरोलि जामुक रङक लुगवा निकडा देलइ हसे हुनेक यपने लुगवा पेहरादेलइ। वकरपाछा हुनेके क्रुसवामा टाङेके तहिँया लेले गेलइ।

येसुजि क्रुसमा टङाइल

(मति २७:३२-४४; लुका २३:२६-४३; युहन्‍ना १९:१७-२७)

21जब हुनुका येसुजिके लेके पइडावामा जाइ रहलइ, तब कुरेनि सहरवाक सिमोनके गउँवासे सहरवावरि यवइकि भेटलइ। उअ अलेक्‍जेन्‍डर हसे रुफसक बाबा रहलिय। सिपहियावाह वकरेके जबरजस्‍ति येसुजिक क्रुसवा बोके लगोलइ,#रोमि १६:१३ 22हसे हुनुका येसुजिके गलगाथा कहल ठउरियामा यनलइ। गलगाथाक यरथ “खोपडि” हखइ। 23वहवाँ पुगके हुनुका येसुजिके मुरर मिझरावल अंङगुरक यामित रस देलइ, बाकि हुने हइने पियलसि। 24वकरपाछा हुनुका येसुजिके क्रुसवामा टाङ देलइ हसे कुने कतेक पउतइ कहके चिठा घालके हुनेक लुगवाह बटलइ।#भजन २२:१८ 25येसुजिके क्रुसवामा टङइखुनि बिहनाक नउ बजल रहलइ, 26हसे येसुजिक क्रुसवा वपरा “यहुदियानिक राजा हखहि” कहके दोस लगावल सुचना-पाटि टाङल रहलइ। 27तखनहिँ येसुजिक दहिनिकलहरवा एक जन हसे लबडिकलहरवा एक जन डाँकुके क्रुसवामा टङलइ। 28[यसने “हुने अपरधियानिसाङे गनेलसि” कहलि धरमसास्‍तरवामा लिखइलि वचन पुरा भेलइ]#१५:२८ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्‍करनमा कोस्‍ठमा राखल बडइ। #यसइया ५३:१२ 29तब उअ पइडावामा भके बुललहराह मुडिया डिङा-डिङाके येसुजिक खिल्‍लि उडोते यसके कहलइ, “लो हेरह! मन्‍दिरवा भसकाके फेरि तिन दिनमा बनावे सक्‍लहराके!#भजन २२:७; १०९:२५; मरकुस १४:५८; युहन्‍ना २:१९ 30याबे यपनहिँके बचाके क्रुसवासे नाभके यवहि!” 31यसनेकरते मुख्‍य पुजेरियाह हसे व्‍यवस्‍थाक-गुरुसभ फेनि येसुजिक खिल्‍लि उडोते एक-दोसरि जनसाङे यसके कहे लगलइ, “इअ याको जनके त बचोलिय, बाकि यपनहिँके बचावे हइने सकलिय।#भजन २२:७-८ 32इअ इस्राएलिक राजा ख्रिस्‍ट, क्रुसवासे नाभके यइय हसे हमरा हेरके विस्‍वास करबहुँ!” येसुजिक दहिनि हसे लबडिकलहरवा क्रुसवामा टाङलि दु जन अपरधियाह फेनि हुनेक खिल्‍लि उडोलइ।

येसुजिक मृत्‍यु

(मति २७:४५-५६; लुका २३:४४-४९; युहन्‍ना १९:२८-३०)

33तखनहिँ दिना बारह बजेसे तिन बजेलइ देसवाभर यन्‍हार भेलइ, 34हसे तिन बजेवरि येसुजि जबड माहे चिल्‍लाके कहलसि, “इलोइ, इलोइ लामा सबखथनि#१५:३४ इलोइ, इलोइ लामा सबखथनि: इलोइ, इलोइ लामा सबखथनि इअ आरमाइक भासा हखइ। ” यकर यरथ, “हे मोर परमेस्‍वर, हे मोर परमेस्‍वर, यपनहुँ मोरके केहके त्‍यागलहुँ?” हखइ।#भजन २२:१ 35इअ बतवा सुनके वहवाँ ठडियलराहमधे कतेक जन यसके कहलइ, “सुनह, इअ त एलिया अगमवक्‍ताके बलोइ बडिय।” 36तब हुनुकरमधे एक जन दगुरते गेलिय हसे एगुडा नमहर लाठिक टुप्‍पयामा लुगवा घेउटके यामित रसमा डुबा देलिय। वकरपाछा येसुजिक मुहवामा गहके कहलिय, “लो हेरु त, एलिया याके यकरेके क्रुसवासे तर नभोबिय कि नाहिँ!”#भजन ६९:२१ 37तब येसुजि जबड माहे चिल्‍लाके यापन प्रान त्‍यागलसि। 38तखनहिँ मन्‍दिरवा भितरा टङइलि परदावा वपरासे तरलइ फाँटके दु चिघा भेलइ।#प्रस्‍थान २६:३१-३३ 39इअ देखके क्रुसवाक लजिके ठडियइलि एक जन रोमि कप्‍तनवा यसके कहलिय, “इअ मन्‍सावा सदियो परमेस्‍वरक पुतर रहलिय।” 40तखनहिँ कतेक जन जनियानिसभ तनाउसे हेरइ रहलइ। हुनुकरमधे मरियम मग्‍दलिनि, छुटकि याकुब हसे योसेफक दाओ मरियम हसे सलोमि रहलइ। 41हुनुका येसुजि गालिलमा रहइकि हुनेके पछयोते हुनेक सेवा करले रहलइ। यसने येसुजिसाङे यरुसलेमलइ याइल याको बहुत जनियानिसभ फेनि वहवाँ रहलइ।#लुका ८:२-३

येसुजिक दफन

(मति २७:५७-६१; लुका २३:५०-५६; युहन्‍ना १९:३८-४२)

42उअ दिन विसरामक दिनक यागाक तयारिक दिन रहलइ हसे साँझ परइ रहलइ।#व्‍यवस्‍था २१:२२-२३ 43तब अरिमाथिया सहरवाक योसेफ सहास करके पिलातसक लघिना गेलिय हसे येसुजिक मरलि देहिया मङलिय। उअ बडकि सभाक एगुडा माननिय सदस्‍य रहलिय हसे परमेस्‍वरक राजक पइडा हेरइ रहलिय। 44पिलातस येसुजि मरसकलसि कहके सुनके छक परलिय। उहेसे उअ एक जन कप्‍तानके यापन लघिना बलाके येसुजिक मृत्‍यु भेल बडइ कि हइने कहके पुछलिय। 45हुनेक मृत्‍यु भेसकल बात कप्‍तनवासे थाह पउलेपर, पिलातस योसेफके येसुजिक मरलि देहिया लेके जायके अनुमति देलिय। 46उहेसे योसेफ मलमलक लुगा किनलिय हसे येसुजिक मरलि देहिया क्रुसवासे तर नभोलिय। वकरपाछा येसुजिक मरलि देहियाके मलमलक लुगवामा घेउटके सिलवामा खोपाइल चिन्‍डियामा धरदेलिय हसे चिन्‍डियाक दुवरियामा एगुडा जबड पत्‍थरा राखदेलिय। 47तब मरियम मग्‍दलिनि हसे योसेफक दाओ मरियम येसुजिक मरलि देहिया कहवाँ धराइल बडइ उअ देखलइ।

Currently Selected:

मरकुस 15: CTHR

Highlight

Copy