मरकुस 14

येसुजिके मारे खोजइ

(मति २६:१-५; लुका २२:१-२; युहन्‍ना ११:४५-५३)

1याबे निस्‍तार-पाबनि हसे अखमिरि रोटि#१४:१अखमिरि रोटि: सोडा हइने घालके पकावल रोटिके अखमिरि रोटि कहसइ। इअ रोटिया यहुदि मन्‍सावाह निस्‍तार-पाबनिमा खाइ। खइना पाबनि यावेके दु दिन बाँकि रहलइ। तखनहिँ मुख्‍य पुजेरियाह हसे व्‍यवस्‍थाक-गुरुसभ येसुजिके कस्‍के चुपे-चुपे पकडके मारे सकबहुँ कहके दाउ खोजइ रहलइ।#प्रस्‍थान १२:१-२७ 2बाकि “पबनियाक दिनवामा हमरा इअ कमवा नाहिँ करु, केहकेकि इअ जुनवामा मन्‍सावाह हुलदाङा करे सकतइ” कहके हुनुका विचार करलइ।

बेथानियामा येसुजिके अभिसेक करल

(मति २६:६-१३; युहन्‍ना १२:१-८)

3एक दिन येसुजि बेथानिया गउँवामा सिमोनक घरवामा रहलसि। जकरेके पहिला बडकि दुःखवा रोग लागल रहलइ। जब हुने जेउना करे लगलसि, तब एक जन जनियानि सिङगमरमरक सिसियामा#१४:३ सिङगमरमरक सिसि: सिङगमरमरक सिसि कहले पत्‍थरासे बनावल सिसिके कहेसइ। बहुत महङ जटामसियाक बसान तेल लेले यलिय हसे सिसिया फुटाके उअ बसानि तेलवा येसुजिक मुडियामा खन्‍यादेलिय।#लुका ७:३७-३८ 4बाकि वहवाँ भेलि कतेक जन खिसियाके एक-दोसरि जनके यसके कहे लगलइ, “इअ जनियावा यतुरा महङ बसान तेलके वसहिँ केहके बरबाद करलिय? 5बरु इअ बसानि तेलवा तिन सय चाँनिक सिक्‍कासे फेनि बहुत मोलमा बेचके उअ पइसावा गरिबवानिके देवे सकेतिय।” यसने कहके हुनुका वकरेके खाँ घोघटलइ। 6बाकि येसुजि कहलसि, “वकरेके छाडदेह, तोहरा केहके यकरेके दुःख देइ बडह? इअ त मोर तहिँया बहुत यसल काम करले बडिय। 7केहकेकि गरिब मन्‍सावाह त तोहारसाङे सबदिन रहतइ हसे तोहार इछा लगलि जुनवामा हुनुकर भलाइ करे सकबह, बाकि मुइ त तोहारसाङे सबदिन नाहिँ रहबहिँ।#व्‍यवस्‍था १५:११ 8इअ जनियावा मोर तहिँया जथि करे सकलिय, उहे करलिय। उअ मोर देहिया गाडेके तहिँया यगाहेसे बसानि तेलवा लगाके तयार पारले बडिय।#युहन्‍ना १९:४० 9मुइ सदियो तोहराके कहबहिँ, संसार भर जहवाँ-जहवाँ सुसमाचार परचार करेतइ, वहवाँ फेनि यकर सम्‍झानामा वकर करलि कमवाक बारेमा परचार करेतइ।”

येसुजिके पकडावेके योजना

(मति २६:१४-१६; लुका २२:३-६)

10वकरपाछा येसुजिक बारह जन चेलवानिमधे यहुदा इस्‍कोरियोत कहल एक जन चेलवा येसुजिके पकडादेवेके तहिँया मुख्‍य पुजेरियानिक लघिना गेलिय। 11वकर बतवा सुनके मुख्‍य पुजेरियाह गहनि खुसि भेलइ हसे वकरेके पइसा देवेके राजि भेलइ। उहेसे उअ येसुजिके पकडादेवेके तहिँया मउका खोजे लगलिय।

येसुजि चेलवानिसाङे वराट भोज खेलसि

(मति २६:१७-३०; लुका २२:७-२३; युहन्‍ना १३:२१-३०; १ कोरिन्‍थि ११:२३-२५)

12तखनहिँ अखमिरि रोटि खइना निस्‍तार-पाबनिक पहिला दिन यलइ। उअ दिनवामा इस्राएलक मन्‍सावाह भेडाक पाठा भोग चढावेके चलन रहलइ। उहे दिन येसुजिक चेलवाह हुनेके पुछलइ, “हमरा कहवाँ जाके यपनहुँक तहिँया निस्‍तार-पाबनिक भोज तयार करु कहके यपनहुँक इछा बडइ?” 13उहेसे येसुजि यापन दु जन चेलवानिके यसके कहके पठोलसि, “तोहरा सहरवामा जाह हसे वहवाँ घइलामा पानि बोकके गेलहर एक जन मरदाना मन्‍से तोहराके भेटबिय। तोहरा वकरपाछा लगिह। 14उअ मन्‍सावा जुन घरवामा पेसबिय, उहे घरवाक मलिकवाके यसके कहिह, ‘हमार गुरुजि पुछले बडसि, पहुनाक खोक कहवाँ बडइ हसे मुइ कहवाँ यापन चेलवानिसाङे निस्‍तार-पाबनिक भोज खाए सकबहि?’ 15तब उअ मन्‍सावा तोहराके वपराक तलवामा खाँ डउलसे सजावल एगुडा जबड खोक देखोबिय। तोहरा वहवाँहिँ भोज तयार करिह।” 16वकरपाछा चेलवाह सहरवामा गेलइ हसे जसने येसुजि कहके पठोले रहलसि, वसने पउलइ हसे वहवाँहिँ हुनुका निस्‍तार-पाबनिक भोज तयार करलइ। 17साँझ भेलेपर येसुजि यापन बारह जन चेलवानिसाङे यलसि। 18जब हुनुका बइठके जेउना करइ रहलइ, तब येसुजि कहलसि, “मुइ सदियो तोहराके कहबहिँ, तोहार मधेमा मोरसाङे खेलहरवा एक जन मोरके धोखा देबिय।”#भजन ४१:९ 19इअ बतवा सुनके चेलवाह दुःखित भेलइ हसे पलहा-पलहि करके “कथि उअ मुइ हखहि” कहके येसुजिके पुछलइ? 20तब येसुजि कहलसि, “तोहरा बारह जनमधे, जुने यखनि मोरसाङे कचोरवामा रोटिया डुबोइ बडिय, उअ मोरके धोखा देबिय। 21केहकेकि मन्‍सेक पुतर त धरमसास्‍तरवामा लिखइलि नहिँया मरहिँ परतइ, बाकि उअ मन्‍सावाके धिकार बडइ, जुने मन्‍सेक पुतरके धोखा देबिय! बरु उअ मन्‍सावा नाहिँ जरमल रहतिय त वकर तहिँया यसल हतिय।” 22जब हुनुका खाइ रहलइ, तब येसुजि रोटिया लेके परमेस्‍वरके धन्यवाद देलसि। वकरपाछा रोटियाके खाडा-खाडा बनाके चेलवानिके देते यसके कहलसि, “इअ लेह, इअ मोर देहि हखइ।” 23वकरपाछा येसुजि एक कचोरा अंङगुरक रस लेके परमेस्‍वरके धन्‍यवाद देलसि हसे चेलवानिके बाट देलसि। तब हुनुका जम्‍मे जन उहे कचोरवासे पिलइ। 24तखनहिँ येसुजि हुनुकाके कहलसि, “इअ परमेस्‍वर हसे मन्‍सावानिक बिचाक वाचाक#१४:२४ लउठा वाचा: जुन मन्‍सावाह परमेस्‍वरक एक मतरे पुतरमा विस्‍वास करसइ, हुनुका जम्‍मे जनके परमेस्‍वर उद्धार करेके प्रतिग्‍या कि वाचा करलसि यकरेके लउठा करार कहसइ। रकत हखइ, जुन बहुत जनक तहिँया बहावल बडइ।#प्रस्‍थान २४:८; यरमिया ३१:३१-३४ 25मुइ सदियो तोहराके कहबहिँ, परमेस्‍वरक राजमा लउठा करके नाहिँ पियइलइ मुइ यखनिसे अंङगुरक रस फेरि नाहिँ पियबहिँ।” 26वकरपाछा हुनुका एगुडा भजन गाके जइतुन पहडावामा गेलइ।

येसुजि पतरुसके सम्‍झोलसि

(मति २६:३१-३५; लुका २२:३१-३४; युहन्‍ना १३:३६-३८)

27वहवाँसे जाइखुनि येसुजि यापन चेलवानिके कहलसि, “तोहरा जम्‍मे जन मोरके छाडके जेबह, केहकेकि यसके लिखाइल बडइ,

‘मुइ भेडहरवाके मारबहिँ

हसे भेडवाह छाहरछिता हतइ।’ # जकरिया १३:७

28 “बाकि मुइ मरलिसे फेरि जिउते भके तोहारसे यागा गालिलमा जेबहिँ।” # मति २८:१६ 29तब पतरुस येसुजिके कहलिय, “जम्‍मे जन छाडके गेले फेनि मुइ कबहुँ फेनि यपनहुँके नाहिँ छडबहिँ।” 30बाकि येसुजि पतरुसके कहलसि, “मुइ सदियो तोरके कहबहिँ, याजु राति चिङनावा दु पारि बसलिसे यागा तुइ मोरके तिन पारि इन्‍कार करबहि।” 31तब पतरुस याको जोड देके कहलिय, “यगर यपनहुँसाङे मरे परतइ फेनि मुइ मरबहि, बाकि यपनहुँके कबहुँ फेनि इन्‍कार नाहिँ करबहिँ।” तखनहिँ याको जम्‍मे चेलवाह फेनि वसने कहलइ।

गेतसमनि बगिचवामा येसुजिक परथाना

(मति २६:३६-४६; लुका २२:३९-४६)

32वकरपाछा हुनुका गेतसमनि नाउँक एगुडा ठउरिमा गेलइ। वहवाँ पुगके येसुजि यापन चेलवानिके कहलसि, “मुइ परथाना करइलइ तोहरा यहवहिँ बइठल रहिह।” 33तब हुने पतरुस, याकुब हसे युहन्‍नाके यापनसाङे लिगलसि। तखनहिँ हुने व्‍याकुल भके छटपटेलसि, 34हसे हुनुकाके कहलसि, “मोर आत्‍मा दुःखित भके मरे जोकर भेल बडइ। तोहरा यहवाँ रहके मोरसाङे जगले रहिह।” 35वकरपाछा हुने इचिका वताहुँ जाके भुयवामा घोप्‍टे परके यसके परथाना करलसि, “हखे सकतइ जउँ मोर वपरा यवेलगइकि दुःखवा मोरसे होटा देहुँ।” 36हुने कहलसि, “हे अब्‍बा#१४:३६ अब्‍बा: अब्‍बा आरमिक भासा हखइ। यकर यरथ पिता हखइ। , हे पिता, यपनहुँ जम्‍मे चिजु करे सकसहुँ, यपनहुँ इअ दुःखवाक कचोरवा मोरसे होटा देहुँ। मोर इछा हइने, बरु यपनहुँक इछा पुरा हखइ।” 37जब येसुजि फेरि फिरके यलसि, हुने तिन जन चेलवानिके सुतल देखके पतरुसके कहलसि, “सिमोन, कथि तुइ निनेलहि? कथि तुइ एक घन्‍टा फेनि जगले रहे हइने सकलहि? 38तोहरा परिछामा नाहिँ परेके तहिँया जगले रहके परथाना करिह। आत्‍मा त तयार बडइ, बाकि देहिया कमजोर बडइ।” 39तब येसुजि हुनुकाके वहवाँ छाडके गेलसि हसे फेरि दोहराके उहे परथाना करलसि। 40जब येसुजि फेरि चेलवाह भेलि ठउरियामा यलसि, हुने चेलवानिके निनाइल देखलसि, केहकेकि हुनुका निनसे यखिया खोले हइने सकलेसे हुनेके जवाफ देवे फेनि हइने जनलइ। 41यसने येसुजि तिसरि पारि फिर याके यापन चेलवानिके कहलसि, “कथि तोहरा याको निनाके आराम करइबडह? याबे भेलइ। हेरह! मुइ मन्‍सेक पुतरके धोखा देके पापि मन्‍सावानिक हथवामा सपेके जुन यासकल बडइ। 42उठह, याबे हमरा जाउँ! हेरह! मोरके पकडा देलहरवा यहवाँ यासकल बडिय।”

येसुजिक पक्राउ

(मति २६:४७-५६; लुका २२:४७-५३; युहन्‍ना १८:३-१२)

43जब येसुजि बात करते रहलसि, तब हुनेक बारह जन चेलवाहमधे यहुदा कहल एक जन वइघरहिँ वहवाँ यलिय। तखनहिँ वकरसाङे डाङ हसे तरवार लेल मन्‍सेसभक भिड रहलइ। हुनुकाके मुख्‍य पुजेरियाह, व्‍यवस्‍थाक-गुरुसभ हसे समाजक बडकि मन्‍सावाह पठोले रहलइ। 44तब येसुजिके पकडा देलहरवा यहुदा हुनुकाके यसनुक कहके इसारा देले रहलिय, “जकरेके मुइ चुमबहि, उहे येसु हखिय। वकरेके पकडिह हसे पहरा देते लिगिह।” 45तखनहिँ यहुदा वहवाँ यइतेकि येसुजि लघिना जाके, “हे रब्‍बि!” कहते हुनेके चुमलिय। 46वकरपाछा हुनुका येसुजिके पकडलइ। 47तखनहिँ येसुजिक लजिके ठडियलि मन्‍सावानिमधे एक जन तरवरवा निकडाके प्रधान पुजेरियाक बहरियावाक कनवा चट्टे काटदेलिय। 48तब येसुजि हुनुकाके कहलसि, “कथि तोहरा मुइ डाँकु हखहि कहके डाङ हसे तरवार लेके मोरके पकडे याइल बडह? 49मुइ सबदिन मन्‍दिरवामा सिछा देइखुनि तोहरेसाङे रहलहि, ताफेनि तोहरा मोरके हइने पकडलह। बाकि धरमसास्‍तर पुरा हखइ कहके यसके हखे परतइ।”#लुका १९:४७; २१:३७ 50तखनहिँ जम्‍मे चेलवाह येसुजिके छाडके भगलइ।

51तखनहिँ वहवाँ एक जन ढोठनिया मन्‍से येसुजिक पाछा-पाछा जाइ रहलिय हसे उअ यापन देहियामा एगुडा मलमलक लुगा मतरे होडले रहलिय। हुनुका वकरके फेनि पकडलइ। 52बाकि उअ यापन लुगवा छाडके नङहटे भगलिय।

महासभाक यागा येसुजि

(मति २६:५७-६८; लुका २२:५४-५५,६३-७१; युहन्‍ना १८:१३,१४,१९-२४)

53वकरपाछा हुनुका येसुजिके प्रधान पुजेरियाक घरवामा लिगलइ हसे मुख्‍य पुजेरिया, समाजक बडकि यगुवासभ हसे व्‍यवस्‍थाक-गुरुसभ वहवाँ जामा भेलइ। 54तखनहिँ पतरुस तनाउसे येसुजिके पछियोते प्रधान पुजेरियाक घरवाक यङनावामा गेलिय हसे वहवाँ मन्‍दिरवाक परहरियावानिसाङे यागि तापे लगलिय। 55तब मुख्‍य पुजेरिया हसे सभाक याको जम्‍मे सदस्‍यसभ येसुजिके मारेके तहिँया किहो परमान खोजे लगलइ, बाकि हुनुका हइने पउलइ। 56केहकेकि येसुजिक विरोधमा बहुत जन झुठा साछि देलइ, बाकि ककरो बतवा फेनि हइने मिललइ। 57वकरपाछा कतेक जन उठके येसुजिक विरोधमा इअ झुठा दोस लगोलइ, 58“मुइ मन्‍सावाक हथवासे बनोलि इअ मन्‍दिरवाके भसकाके मन्‍सावाक हथवासे हइने बनोलि मन्‍दिरवा तिन दिनमा बनोबहिँ कहके कहलि बतवा हमरा यपनहिँ सुनलहुँ।”#युहन्‍ना २:१९ 59बाकि हुनुकर कहलि बतवा फेनि हइने मिललइ। 60तब प्रधान पुजेरिया जम्‍मे जनक यागा ठडियाके येसुजिके पुछलिय, “तुइ यखनि फेनि केहके जवाफ हइने देलहि? कह त, तोर विरोधमा इअ मन्‍सावाह कथिक दोस लगोइ बडइ?” 61बाकि येसुजि चुप लगलसि हसे कथियो जवाफ फेनि हइने देलसि। तब प्रधान पुजेरियाह फेरि हुनेके पुछलिय, “कथि तुइ परम धन्यक पुतर ख्रिस्‍ट हखहि?” 62तब येसुजि कहलसि, “हँ मुइ हखहि हसे एक दिन यपनहुँसभ मुइ मन्‍सेक पुतरके सरवसक्‍तिमानक दहिनिकलहरवा बइठल हसे स्‍वरगसे यकसवाक बदरियामा यवइकि देखबह!”#दानिएल ७:१३ 63इअ सुनके प्रधान पुजेरिया यापन लुगवा फारलिय हसे कहलिय, “याबे हमराके याको कथि परमान चाहिँ बडइ त? 64तोहरा यकर करलि परमेस्‍वरक निना सुनले बडह। लो याबे कहह ता, तोहार कथि विचार बडइ?” तब हुनुका जम्‍मे जन, “इअ अपराधि हखिय हसे मृत्‍यु दन्‍ड पावेके लाइक बडिय” कहके कहलइ।#लेवि २४:१६ 65तखनहिँ, हुनुकरमधेसे कतेक जन हुनेके थुके लगलइ हसे हुनेक यखिया झापके धुसते कहलइ, “अरे अगमवक्‍तावा लो कह त, तोरके कुने धुसलइ?” तब मन्‍दिरवाक परहरियावाह हुनेके मुकियोते लिगलइ।

पतरुस येसुजिके इन्‍कार करलिय

(मति २६:६९-७५; लुका २२:५६-६२; युहन्‍ना १८:१५-१८,२५-२७)

66जब पतरुस तर यङनावामा बइठल रहलिय, तखनहिँ प्रधान पुजेरियाक एगुडि बहरिनिया वहवाँ यलिय। 67उअ पतरुसके धुनिया तपइकि देखके वकरेके निङाहारके हेरलिय हसे यसके कहलिय, “तुइ फेनि त नासरतक येसुसाङे रहलहि।” 68तब पतरुस जवाफ देते कहलिय, “हइने, तुइ कस्‍नुक बात करइ बडहिँ, मुइ त किहो फेनि हइने बुझलहि।” वकरपाछा पतरुस यङनावाक केवरियावरि गेलिय हसे तखनहिँ चिङनावा बसलिय। 69जब उअ बहरिनिया पतरुसके वहवाँ देखलिय, तब वहवाँ भेलि मन्‍सावानिके फेरि कहलिय, “इअ मन्‍सावा फेनि त हिनिकरमधेक एक जन हखिय!” 70बाकि पतरुस फेरि इन्‍कार करलिय। तब किहो समय पाछा वहवाँ ठडियइलि मन्‍सावाह फेनि पतरुसके कहलइ, “तुइ सदियो हुनुकरमधेसे एक जन हखहि, केहकेकि तुइ फेनि गालिलिक मन्‍से हखहि।” 71तब पतरुस फेरि इन्‍कार करके यपनहिँके सरपलिय हसे किरिया खइते कहलिय, “मुइ यपनहुँक कहलि इअ मन्‍सावाके हइने चिनसहिँ।” 72तखनहिँ, दोसरि पारि चिङनावा बसलिय हसे “चिङनावा दु पारि बसलिसे यागा तुइ मोरके तिन पारि हइने चिनसहिँ कहके इन्‍कार करबहिँ” कहलि येसुजिक बतवा पतरुस सम्‍झलिय। तब पतरुस डोढा-डोढाके काने लगलिय।

Currently Selected:

मरकुस 14: CTHR

Highlight

Copy