मरकुस 13

वराट दिनक चिन्‍हासभ

(मति २४:१-१४; लुका २१:५-१९)

1येसुजि मन्‍दिरवासे निसकइखुनि हुनेक एक जन चेलवा यसके कहलिय, “हेरहुँ त गुरुजि, कतहर डउल पत्‍थरासभ! हसे कस्‍नुक छबिगर महलसभ!” 2तब येसुजि वकरेके कहलसि, “कथि तोहरा इअ खाँ छबिगर महलसभ देखइ बडह? उअ जम्‍मे भस्‍कतइ हसे एगुडा पत्‍थरा फेनि दोसरि पत्‍थरवा वपरा नाहिँ रहतइ।” 3वकरपाछा येसुजि मन्‍दिरवाक वाहिपार जइतुन पहडावामा बेठलसि। तखनहिँ पतरुस, याकुब, युहन्‍ना हसे अन्‍द्रियास हुनेके चुपे-चुपे पुछलइ, 4“हमराके कहहुँ, इअ घटनावाह कहिया हतइ? हसे इअ जम्‍मे घटनावा पुरा हखेके जुनवामा कथि चिन्‍हा देखा परतइ?” 5तब येसुजि हुनुकाके कहलसि, “तोहरा हुसियारसे रहिह! ककरहुँसे फेनि तोहरा झिन झुकइह! 6केहकेकि बहुत जन मोर नाउँमा याके ‘मोहिँ ख्रिस्‍ट हखहि’ कहके कहतइ हसे बहुत मन्‍सेसभके धोखा देतइ। 7जब तोहरा लडाइ भेल हसे लडाइसभक हाला सुनबह, तोहरा झिन डेरइह। इअ घटनासभ हखहि परतइ, बाकि तखनहिँ वइघरहिँ संसारक वराट नाहिँ हतइ। 8केहकेकि जाति-जातिक विरोधमा उठतइ, राज-राजक विरोधमा उठतइ, ठउरि-ठउरिमा जबड-जबड भुइचाल जेतइ हसे यनिकाल परतइ। इअ जम्‍मे बतवा एगुडा जनिक हलुकाइखुनि सुरु भेल दुःखक सुरुवात नहिँया हखइ। 9बाकि तोहरा हुसियारसे रहिह, केहकेकि तोहरा मोर पाछा लगलेसे मन्‍सावाह तोहराके पकडके अदालतमा लिगतइ हसे सभाघरवाहमा लिगाके पिटतइ। तोहराके मोर खातिर गवाहि देवेके तहिँया बडकि हकिमवा हसे रजवानिक यागा ठडियोतइ। 10बाकि वराट हखलिसे यागा जम्‍मे जतियाक मन्‍सावानिके सुसमाचार परचार करे परतइ। 11जब मन्‍सावाह तोहराके पकडके अदालतमा सपदेतइ, तब कथि फदके परतइ कहके यगाहेसे चिन्‍ता झिन करिह, बाकि परमेस्‍वर उअ जुनवामा तोहराके जथि फदके देबसि, उहे कहिह। केहकेकि तोहरा यापनवरिसे नाहिँ फदकबह, बाकि पवितर-आत्‍मा तोहारसे फदकबसि।#मति १०:१७-२०; लुका १२:११-१२ 12तखनहिँ मन्‍सावाह यापन ददेर-भयवानिके मारे तहिँया सपदेतइ हसे दाओ-बाबा फेनि यापन बेटवा-बेटियानिके वसने करतइ। यसने बेटवा-बेटिया फेनि यापन दाओ-बाबाक विरोधमा उठतइ हसे हुनुकाके मारेके तहिँया सपदेतइ। 13तोहरा मोर पाछा लगलेसे जम्‍मे मन्‍सावाह तोहराके घिना करतइ, बाकि जुने यापन जिन्‍गिक अन्‍तिम दिनलइ डटके रहतइ उअ उद्धार पउतइ।#मति १०:२२

डरलग्‍ना सङकस्‍टक जुनक बारेमा

(मति २४:१५-२८; लुका २१:२०-२४)

14 “जब तोहरा असुद्ध पारना घिन लगना चिजुके मन्‍दिरवाक पवितर ठउरियामा देखबह (इअ पढलाहरा यकर यरथ बुझिह), तखनहिँ यहुदिया छेतरमा रहलहरा पहडावावरि भागके जइह। # दानिएल ९:२७; ११:३१; १२:११ 15घरवाक छतवा वपरा भेलि मन्‍सावा तर झिन नभिह हसे किहो चिजु-बिज लेवेके तहिँया घरवा भितरा फेनि झिन जइह।#लुका १७:३१ 16जुने खेतवामा बडिय उअ यापन लुगा लेवेके तहिँया घरवामा झिन फिरिय। 17तखनहिँ, भारदेहि हसे दुध पियोलहर दाओक हालत डेरटावनेक हतइ। 18इअ घटनवा जाड महिनवामा झिन हखइ कहके परमेस्‍वरसाङे परथाना करिह। 19तखनहिँ यसनुक महासङकस्‍ट यतइ कि, परमेस्‍वर इअ संसारक सिरिस्‍टिसे यखनिलइ न त यसनुक भेल बडइ, न कबहुँ फेनि यसनुक हतइ।#दानिएल १२:१ 20यगर परमेस्‍वर उअ दिनवाह नाहिँ घटोले रहतसि जउँ, कुनहुँ फेनि बचे नाहिँ सकतिय। बाकि यापन छानलि मन्‍सावानिक तहिँया हुने उअ दिनवाह घटोले बडसि। 21यगर उअ समयमा कुनहुँ तोहराके, ‘हेरह, मुक्‍ति देलाहर ख्रिस्‍ट यहवाँ बडसि’ कि ‘मुक्‍ति देलाहर ख्रिस्‍ट वहवाँ बडसि’ कहके कहतइ जउँ, तोहरा उअ बतवामा विस्‍वास झिन करिह। 22केहकेकि उअ दिनवामा झुठा ख्रिस्‍टसभ हसे झुठा अगमवक्‍तासभ निकडतइ। हुनुका यचम्‍मक चिन्‍हासभ देखाके हसे यचम्‍मक कामसभ करके परमेस्‍वरक छानलि मन्‍सावानिके झुकोतइ। 23उहेसे तोहरा चेतले रहिय! मुइ तोहराके इअ जम्‍मे घटनवासभ यगाहेसे कहदेले बडहिँ।

येसुजि फेरि यबसि

(मति २३:२९-३१; लुका २१:२५-२८)

24 “उअ महासङकस्‍टक दिनवा पाछा बेरियावा यन्‍हार हखबिय हसे जोन्‍हवा इजोर नाहिँ देबिय, # यसइया १३:१०; इजकिएल ३२:७; योएल २:१०,३१; ३:१५; प्रकास ६:१२ 25यकसवासे तरगनवाह खस्‍तइ हसे यकास मन्‍डलक जम्‍मे सक्‍तिसभ डिङगतइ।#यसइया ३४:४; योएल २:१०; प्रकास ६:१३ 26तखनहिँ जम्‍मे मन्‍सावाह मन्‍सेक पुतरके जबड सक्‍ति हसे महिमासाङे बदरियामा यवइकि देखतइ।#दानिएल ७:१३; प्रकास १:७ 27वकरपाछा हुने स्‍वरगदुतवानिके पठाके धरतियाक वराटिसे लेके स्‍वरगक वराटिलइ चारिवरसे हुनेक छानलि मन्‍सावानिके जामा करबसि।”

कोइलारक गाछसे सिछा

(मति २४:३२-३५; लुका २१:२९-३३)

28वकरपाछा येसुजि यसके कहलसि, “याबे कोइलरवाक गछवासे पाठ सिखह। जब कोइलरवाक गछवाक डरवाह नरम भके टुसा निकडे लगसइ, तब गरमक जुन लजिके यलइ कहके तोहार थाह हसइ। 29जब मोर कहलि इअ बतवाह पुरा हखते जाइकि देखबह, तब मोर यइना दिन लजिके बडइ कहके जनिह। 30मुइ तोहराके सदियो कहबहिँ, इअ जम्‍मे बतवा पुरा नाहिँ हखइलइ इअ पुस्‍ता नाहिँ बिततइ। 31स्‍वरग हसे धरतिया बितके जेतइ, बाकि मोर कहलि वचनसभ कबहुँ फेनि नाहिँ बिततइ।”

हुसियार रहेके सिछा

(मति २४:३६-४४; लुका १२:३८,४०)

32 “उअ दिन हसे जुनवा कहिया यतइ कहके ककरहुँके फेनि थाह हइने बडइ। स्‍वरगमा रहलाहर दुतवानि कि मन्‍सेक पुतरके फेनि उअ दिनवाक बारेमा थाह हइने बडइ, बाकि परमेस्‍वर पिताक मतरे थाह बडइ। 33उहेसे तोहरा फेनि चेतले रहिह! केहकेकि उअ जुनवा कहिया यतइ कहके, तोहार थाह हइने बडइ। 34इअ त यसनुक एगुडा मन्‍से नहिँया हखिय, जुने परदेस गेलिसे यागा यापन बहरियावानिके हुनुकर करे परना जम्‍मे कमवाक जिम्‍मा देसिय हसे पलियावाके डउलसे वगरसि कहके आग्या देसिय।#लुका १२:३६-३८ 35उहेसे तोहरा चलाख भके रहिह! केहकेकि उअ मलिकवा कखनि यबिय कहके तोहार हइने थाह बडइ। उअ साँझ, याधाराति, चिङनावा बसइखुनि कि, बिहना जखना फेनि यावे सकबिय। 36यगर उअ तोहार हइने सोचलि जुनवामा यरमरका यबिय जउँ, तोहराके सुतले झिन भेटिय। 37मुइ तोहराके जम्‍मे जनके कहइ बडहिँ, ‘जगले रहिह’!”

Currently Selected:

मरकुस 13: CTHR

Highlight

Copy