Varoma 4

Chivonero cha Abrahama

1Ndizvo tinozonangenyi ndi Abrahama baba wedu vokwenyama? Kuti wakavonenyi? 2Ngokuti kudari Abrahama wakapembejwa ngo mishando, unacho cho kuganza ndicho, asi haiwa pamberi pa Mwari. 3Ngokuti matahwa anonangenyi? Abrahama wakatenda Mwari, kwakaverengwa kwaari kuti kuri kururama. 4Zvino kwaari unoshanda, musharo wake auverengwi kuti iri nyasha, asi kuti gava. 5Asi kwaari usikashandi, asi iye unogonda kuno uwo unopembeja vashaishi, kugonda kwake kunoverengehwa kwaari kuti kuri kururama. 6Kudari ndi Dhavhidha wakananga ngo chidakajiso kuno mundhu uwo waakaverengera Mwari kururama ngo kunja kwo mishando, 7echiti: Vanomuchena avo vane zvinyangajo zvavo zvaregerehwa, no zvishaishi zvavo zvafishwa, 8#Vonayi kuna: Ndu. 32:1-2. unomuchena mundhuwo waasikaverengi Mambo kuti uno kushaisha. 9Ndizvo chidakajiso ichi chiri kuna vakachekwa vega here nokuti kuno vasikazivi kuchekwa navo? Ngokuti tinoti, kuna Abrahama kugonda kwake kwakaverengehwa kwaari kuti kuri kururama. 10Ndizvo kwakaita maverengehwenyi kwaari? Zvakaitika achekwa here, nokuti asati achekwa? Haiwa, achekwa, asi apo asati achekwa. 11Naye wakaashira chivoniso cho kuchekwa, chiri chitatijo cho kururama kwo kugonda ukwo kwayiva anakwo asati achekwa? Kuti ayite Baba wo avo vese vanotenda, pikija vasiri muchiyimo cho kuchekwa, kuti kururama kuverengehwe kwavari navo. 12Zve kuti ayite Baba vo vakachekwa kwavari, andivo vo vakachekwa vega, asi wo avozve vanofamba muzvitsiko zvo kugonda kwavaiva anakwo Baba wedu Abrahama, apo ayinga asati achekwa.

Kugonda kwa Abrahama no chigondiso cha Mwari

13Ngokuti chigondiso chokuti unozogara ndhaka yo nyika achizivi kuitwa kuna Abrahama nokuti kuno vana vake ngo mipango akadi, asi chakaitwa ngo kururama kwo kugonda. 14Ngokuti kudari avo vari vo mipango vari vanogara ndhaka, kugonda kwaitwa kusina shwiro, no chigondiso chinoyita chisina shwiro. 15Ngokuti Mipango inoshanda kupara ushungu; asi apo pasina Mipango, akuna kupauka. 16Ndizvo kuri kwo kugonda, kuti kuitwe kupuwa ngo nyasha; ngo ndava yokuti chigondiso icho chigwinyiswe kumibarihwana yese, haiwa kwavari vega vari vo Mipango, asi no kwavari vari vo kugonda kwa Abrahama, uri Baba wedu tese. 17#Vonayi kuna: Gen. 17:5.Kudari ngo zvakatahwa: “Ndakakuita Baba wo majinja akawanda pamberi pa Mwari, uwo waakatenda; unomusa vakafa, echidanija izvo zvisipo, kunonga zviripo.” 18Pasina kugonda, wakatenda anokugonda ngoiyi ndava, yokuti ayite Baba wo majinja akawanda, kudari ngoicho chakavereketwa chokuti vana vako vanozodaro. 19Asikazivi kurembejeka mukugonda, iye aazivi kupinimija ngo muviri wake unonga wafa, ano makore anoda kuyita zana (100) nokuti ngo kufa kwo ndani ya Sara. 20Iye aazivi kudengwaira ngo chigondiso cha Mwari ngo kugononda, asi wakagwinyiswa kugonda, echikuja Mwari, 21echigwinyisa kugonda kuti icho chaakagondisa, uno simbazve ro kuchiita. 22Ndizvo kwakaverengwazve kwaari kuti kuri kururama. 23Zvino akuzivi kutahwa ngo ndava yake ega, kuti kwakaverengehwa kwaari kudaro. 24Asi ngo ndava yeduvo, kwetiri kunoverengehwa kudaro, isisu tinotenda kuno uwo wakamusa Jesu Mambo wedu kuno vakafa, 25uwo wakapihwa ngo ndava yo zvishaishi zvedu, echimuswazve kuyita kupembejwa kwedu.

Currently Selected:

Varoma 4: CINDAU NT

Highlight

Copy