Zvakayitwa ngo Vapostori 9

Jesu unodanija Sauri

1Asi Sauri echifemurika ngo ushungu wokuda kuuraya vajiji va Mambo, wakaenda ku mupristi mukuru, 2akakumbira kwaari tshamba yo kuenda mu Dhamaseku, mu nyumba jo kudira, kuti kudari echivona vayiva vo Njira iyi, pikija vanarume nokuti vanakaji, waizovaviisa vakasungwa ku Jerusarema. 3Achafamba, wakakwedera mu Dhamaseku. Paripo kwakaviya kumutendeneja kujeka kwechibva mu denga. 4Naye wakawa pasi pa mavhu, wakazwa izwi rechiti kwaari: “Sauri, Sauri, unonditambujirenyi?” 5Naye wakati: “Uriyani, Mambo?” No uwo wakati: “Ndiri Jesu wo unotambuja; [kunonesa kwouri kudarika pa machocho anopinja.” 6Asi iye echihuta, no kushama, wakati: “Mambo, unoda kuti ndiitenyi?” Na Mambo wakati kwaari:]#9:6 Kunonesa kwouri: na Mambo wakati kwaari: Tshamba jakawanda jo chiGriki ajina mazwi aya. “Miruka, unghwine mu dhoropa, nakwo kunozobvunjwa kwouri icho chinosisira kuti uite.” 7No vanarume vaifamba naye vakayima vasikavereketi, vechizwa izwi, asi avasaivona mundhu. 8Na Sauri wakamiruka, naapo abewura majiso ake, aazivi kuvona chiro; navo vakamubata ngo nyara, vakamuendesa mu Dhamaseku, 9naye wakayita mazuva matatu asikavoni, asikazivi kuha nokuti kumwa. 10Zvino kwayivapo mujiji wakatikuti mu Dhamaseku, zina rake raizwi ndi Ananiya na Mambo wakati kwaari ngo chivoniso: “Ananiya!” Naye wakati: “Ndiri pano Mambo.” 11Na Mambo wakati kwaari: “Miruka, uende mu njira inozwi Yakarurama, ubvunjise mu nyumba ya Judhasi mundhu unozwi ndi Sauri wo Tarsu; ngokuti, ringira, iye unokumbira; 12naye wavona muchivoniso mundhu zina rake ndi Ananiya, echinghwina, no kudira nyara jake panyezuru pake, kuti aashire kuvona kwake.” 13Asi Ananiya wakapingura, echiti: “Mambo, ndakazwa ngo vazhinji ngo ndava yo mundhu uwu ngo kuwanda kwo izvo zvakashata zvaakayita kuno vakacheneswa vako mu Jerusarema. 14Napano unaro simba raakapuwa ngo vapristi vakuru kuti asunge avo vese vanokumbira ngo zina rako.” 15Asi Mambo wakati kwaari: “Endayi, ngokuti uwu uri ndiro yakatsananguhwa ndini kuti atware zina rangu kuno vo majinja, no majimambo, no kuvana vaIsraeri. 16Ngokuti ndinozomupangijira uwandu hwaanozotambujwa ngo ndava yo zina rangu.” 17Na Ananiya wakaenda, akanghwina mu nyumba; echidira nyara jake panyezuru pake, akati: “Mukoma Sauri, Mambo, ndiye Jesu, uwo wakavoneka kwouri mu njira yo wakaviya ndiyo, wakandituma kuti uvone, uzariswe ndi Mweya Wakachena.” 18Paripo akawa kubva kumajiso ake akadari ngo magwamba, naye wakavona akamuka, akabhapatiswa. 19Wakaashira kuha, akagwinyiswa.

Sauri mu Dhamaseku

Sauri wakagareyo mazuva akatikuti no vajiji vayiva mu Dhamaseku. 20Paripo mu nyumba jo kudira wakateketesa Jesu kuti uri Mwana wa Mwari. 21Naavo vese vakamuzwa vakashama, vechiti: “Uwu andiyepi here wakauraya mu Jerusarema avo vaikumbira ngo zina iro? Naye wakaviya pano kuti atore vakasungwa pamberi po vapristi vakuru?” 22Asi Sauri simba rake rakavangirira kukura, akavakangaija vaJudha vayigara mu Dhamaseku, echikohomejisa kuti uwu Jesu uri Kristu. 23Ngosure kwo mazuva mazhinji, vaJudha vakayita bangano rokumuuraya. 24Asi zano ravo rakazivikanwa kuna Sauri. Navo vakarinda misuvo masikati no usiku kuti vamuuraye; 25asi vajiji vake vakamutora usiku, vakamubzusa ngo parukumbati, uri mu dendere.

Sauri mu Jerusarema

26Naapo ayinga aguma Jerusarema, wakaeja kuti ayite umwe wo vajiji, navo vese vakamutya vasikatendi kuti wayiva mujiji. 27Asi Bharnabha wakamutora akamuviisa kuna vapostori, akadurujira kwavari mavonere aakayita Mambo mu njira, no njira yaakavereketa ndiyo kwaari, no njira yayinga akachumaira ngo kushinga mu Dhamaseku ngo zina ra Jesu. 28Naye wayiva navo echinghwina no kubuda mu Jerusarema. 29Wakachumaira ngo kushinga ngo zina ra Mambo. Wakavereketa echikanijana no vagiriki. Asi avo vakatanda mazano okuda kumuuraya. 30Asi apo vakoma vazviziva, vakamubzusa kuenda Khesariya, vakamutumira Tarsu. 31Ndizvo zviara zvese zvayiva mu Judhiya, no mu Garire, no Samariya, zvakawana kunyarara, zvakavakiwa, nazvo zvechifamba ngo kumutya Mambo, no mukuembezehwa ndi Mweya Wakachena, zvakawandiswa.

Kuponeswa kwa Aniya

32Kwakaitika kuti Pedru echiparura ndau jese wakabzuka kuno vakacheneswa vayigara Ridha. 33Naapo wakavona mundhu wakatikuti zina rake raizwi ndi Aniya, uwo wayinga akavata pa mubhedhi wake makore masere, ngokuti wayiva no ndhenda yo kuoma muviri. 34Pedru wakati kwaari: “Aniya, Jesu Kristu unokuponesa; miruka, unasirire mubhedhi wako.” Paripo iye wakamuka. 35Naavo vese vayigara mu Ridha, no mu Sharoni, vakamuvona, vakatenderuka kuna Mambo.

Kumuswa kwa Tabhita

36Zvino kwayivapo mu Jopa mujiji wakatikuti, zina rake raizwi Tabhita, ukwo kunoti ngo kukumuchwa, Dhorika. Iri jimayi inga rina mishando yakanaka, no kukovera zvorakaita. 37Kwakaitika ngaao mazuva, kuti rakahwara, rikafa; naapo vayinga varishambija, vakaridira mukamera ro muturika. 38Ngokuti Ridha rayiva phedo poJopa, vajiji vechizwa kuti Pedru wayiva umwo, vakatuma vanarume vaviri kwaari, vechimupota, kuti Usanonoka kuviya kwetiri. 39Na Pedru wakamiruka, akaenda navo. Naapo ayinga aguma vakamuviisa mukamera ro muturika; jakaima phedo pake jese shirikaji, jechichema, jechipangijira nghanju no zvokufuka zvaainga akayita Dhorika, achiripo navo. 40Asi Pedru avabudisa vese, wakagwadama, akakumbira, Akunukuka kuno muviri wakafa, wakati: “Tabhita, muka.” Naye wakabewura majiso ake, avona Pedru, wakamuka, akagara. 41Naye amubata ngo nyara yake wakamumusa; adanija vakacheneswa no shirikaji wakamutura kwavari echipona. 42Nakwo kwakazivikanwa mukati mwo Jopa rese; no vazhinji vakamutenda Mambo. 43Kwakaitika kuti iye wakagara mazuva mazhinji mu Jopa, no mundhu unozwi Simoni, musukuti.

Currently Selected:

Zvakayitwa ngo Vapostori 9: CINDAU NT

Highlight

Copy